म. टा. प्रतिनिधी, मुंबई/औरंगाबाद
राज्याच्या कॅबिनेट मंत्री पंकजा मुंडे यांच्या भगिनी व भाजपच्या बीड येथील खासदार डॉ. प्रीतम मुंडे यांचे वर्चस्व असलेल्या वैद्यनाथ अर्बन को-ऑप. बँकेमध्ये गेल्या आठवड्यात १० कोटी १० लाख रुपयांच्या नोटा सापडल्याप्रकरणी सीबीआयने शुक्रवारी घाटकोपर पोलिस ठाण्यात बँकेच्या तीन अधिकाऱ्यांसह औरंगाबादमधील सिग्मा हॉस्पिटलविरुद्ध गुन्हा दाखल केला.
सीबीआयने बँकेच्या मुंबईसह पुणे, बीड आणि औरंगाबाद येथील ११ कार्यालयावर छापे टाकले. औरंगाबाद शहरातील नामवंत सिग्मा हॉस्पिटलमध्येही अधिकाऱ्यांनी चौकशी करुन कागदपत्र ताब्यात घेतली आहेत. राज्यात बँकेच्या ४१ शाखा आहेत. या बँकेचे मुख्यालय बीडमध्ये आहे.
वैद्यनाथ सहकारी बँकेची दहा कोटी दहा लाखांची रोकड मुंबईत जप्त करण्यात आली होती. २५ कोटी रुपयांची रक्कम परळीतील राष्ट्रीयकृत बँकानी न स्वीकारल्यामुळे ती रक्कम मुंबईला पाठविण्यात आली. मुंबई पोलिसांनी १९ डिसेंबर रोजी यागेश शिरोये यांच्या मालकीची कार तपासली. पाठलाग केल्यानंतर पोलिसांनी कारची तपासणी केली असता, त्यात हजार व पाचशे रुपयांच्या या जुन्या चलनातील दहा कोटी रुपये आणि नव्या चलनातील दहा लाख रुपये सापडले. दोन हजार रुपयांच्या नवीन नोटचा त्यात समावेश होता. वैद्यानाथ बँकेच्या कर्मचारी कृष्णा सातपुते हे कार चालवत होते. पिंपरी-चिंचवड शाखेचे व्यवस्थापक शिरीष धर्मराज थिगळे, गजानंद सोमनाथ स्वामी हे त्या कारमध्ये बसले असल्याचे घाटकोपर पोलिस ठाण्याच्या एफआयआरमध्ये म्हटले आहे. बँकेचे घाटकोपर शाखेचे बी. एम. शाह यांच्यासह पिंपरी-चिंचवडच्या अधिकारी व कर्मचाऱ्यांनी महाराष्ट्र राज्य सहकारी बँकेत पंधरा कोटी रुपये भरले आणि उर्वरित रक्कम पोलिसांनी मोटारीने बीडला नेताना मुंबई पोलिसांनी ही मोटर ताब्यात घेतली होती.
बँकेची घाटकोपर शाखामध्ये साडेतीन कोटी रुपयांचे डिपॉझिट असते त्यापैकी १ कोटी ९८ लाख रुपयांची रोकड सिग्मा हास्पिटलच्या खात्यात डिपॉझिट करण्यात आली. मुंबईतील प्रसिद्ध डॉक्टर सुरेश अडवाणी यांच्या घरातून ही रक्कम नेण्यात आली होती. बँकेचे शिरीष थिगळे, कृष्णा सातपुते, गजानंद स्वामी आणि बी. एम. शाह यांनी योगेश शिरोये, डॉ. सुरेश अडवाणी, सिग्मा हॉस्पिटल यांच्याशी संगनमत करून कटकारस्थान केल्याचे एफआयआरमध्ये म्हटले आहे. या सर्वांनी केंद्र शासन आणि रिझर्व्ह बँक ऑफ इंडियाच्या मार्गदर्शक तत्वांचे उल्लघंन केले आहे. बँकेचे कर्मचारी हे लोकसेवक आहेत म्हणून त्यांच्याविरुद्ध गुन्हा दाखल केला आहे, असे एफआयआरमध्ये स्पष्ट करण्यात आले आहे. सीबीआयने भारतीय दंड संहितेच्या कलम १२० (ब), कटकारस्थान, कलम ४२० (फसवणूक), कलम ४०६ (विश्वासघात) आणि लाचलुचपत प्रतिबंधक कायद्या अंतर्गत गुन्हा दाखल केला आहे.
दहा कोटींची रक्कम ही वैद्यनाथ बँकेचीच आहे. या रकमेचा पूर्ण हिशेब आमच्याकडे आहे. - डॉ. प्रीतम मुंडे, खासदार, भाजप
१ कोटी ९८ लाख रुपये आमच्याच खात्यात भरलेले आहेत. ती रोकड सिग्मा हॉस्पिटलचीच आहे. याच्या कागदोपत्री नोंदी आहेत. सीबीआयच्या अधिकाऱ्यांनी शुक्रवारी आमच्या हॉस्पिटलमध्ये येऊन कागदपत्रांची तपासणी केली आहे. - डॉ. उन्मेष टाकळकर, सीईओ, सिग्मा हॉस्पिटल
परळीच्या शाखेत जाऊन सीबीआयच्या अधिकाऱ्यांनी चौकशी केली. या चौकशीत ही रोकड वैद्यनाथ बॅँकेचीच आहे का याची विचारणा करण्यात आली. ही रोकड वैद्यनाथ बॅँकेचीच आहे. ती खातेदारांकडून आलेली आहे. ज्यांच्याविरुद्ध गुन्हा दाखल आहे ते अधिकारीही बॅँकेचेच आहेत. याची सत्यता सीबीआयने तपासली. - एस. एस. जोशी, विधी अधिकारी, वैद्यनाथ बॅँक
यांच्याविरुद्ध गुन्हा
- बी. एम. शाह, व्यवस्थापक, वैद्यनाथ बँक, घाटकोपर
- शिरीष थिगळे, व्यवस्थापक, वैद्यनाथ बँक, पिंपरी-चिंचवड
- योगश शिरोये, कार मालक, पिंपरी-चिंचवड
- कृष्णा सातपुते, कर्मचारी, वैद्यनाथ बँक
- गजानंद स्वामी, कर्मचारी, वैद्यनाथ बँक
- सिग्मा हॉस्पिटल, औरंगाबाद
- डॉ. सुरेश अडवणी, मुंबई
मोबाइल अॅप डाउनलोड करा आणि राहा अपडेट