नगरपालिका निवडणुकीच्या पहिल्या टप्प्यामध्ये बीडमध्ये आमदार जयदत्त क्षीरसागर यांच्या कुटुंबामध्ये पडलेली फूट चर्चेचा विषय होती. दोन्ही गटांनी आगामी जिल्हा परिषद, पंचायत समिती निवडणुकीसाठी स्वतंत्रपणे तयारीला सुरुवात केली आहे. त्यामुळे, नगरपालिका निवडणुकीनंतर दिलजमाईची शक्यताही मावळली आहे.
बीड नगरपालिकेच्या निवडणुकीत जयदत्त क्षीरसागर यांचे भाऊ रवींद्र व पुतण्या संदीप यांनी स्वतंत्र चूल मांडत काकू-नाना विकास आघाडी उभी केली होती. या माध्यमातून त्यांनी जयदत्त क्षीरसागर व राष्ट्रवादी काँग्रेसचे जिल्हाध्यक्ष भारतभूषण क्षीरसागर यांच्याविरोधात बंड केले होते. पहिल्याच प्रयत्नात वीस नगरसेवक निवडून आणण्यात काकू-नाना आघाडी यशस्वी झाली होती. त्यानंतर जिल्हा परिषद आणि पंचायत समिती निवडणुकीत क्षीरसागर घराण्यात दिलजमाई होते का, याकडे जिल्ह्याचे लक्ष लागले होते. जयदत्त क्षीरसागर व भारतभूषण क्षीरसागर यांनी बीड मतदारसंघातील जिल्हा परिषद पंचायत निवडणुकीसाठी सर्कलनुसार कार्यकर्ते मेळावे आणि इच्छुक उमेदवारांचे मुलाखती घेतल्या. काही उमेदवार अंतिम केले असून, उमेदवारांना प्रचारास सुरुवात केली आहे. या बैठकीस रवींद्र क्षीरसागर, संदीप क्षीरसागर यांना सोबत घेतले गेले नाही. त्यामुळे रवींद्र क्षीरसागर व जिल्हा परिषद सभापती संदीप क्षीरसागर यांनी आपल्या गटाच्या कार्यकर्त्यांच्या बैठका आयोजित केल्या आहेत. रवींद्र क्षीरसागर, माजी आमदार सय्यद सलीम व राजेंद्र जगताप यांचे उपस्थितीत जिल्हा परिषद गण बहिरवाडी व घोडका राजुरी या गणाची बैठक आयोजित करण्यात आली आहे.
नाळवंडी सर्कलधील दोन्ही पंचायत समिती गण व गटातील प्रमुख कार्यकर्त्यांची बैठक गोरक्षनाथ टेकडी येथे आयोजित करण्यात आली होती. या बैठकीला कार्यकर्त्यांनी मोठी गर्दी केली होती. या वेळी संदीप क्षीरसागर म्हणाले, ‘भाषणबाजीपेक्षा आम्ही लोकांच्या अडीअडचणी सोडविण्यासाठी अहोरात्र रस्त्यावर आहोत. सर्वसामान्य जनतेमध्ये राहून त्यांची सुख-दुःख जवळून पाहिली आहेत. मुंबई बसून नव्हे, लोकांच्या घरी जाऊन त्यांच्या अडचणी सोडवत अहोरात्र काम करत आहोत. शहरातील दणका ग्रामीण भागामध्येही दाखवून द्यायचा आहे.’
सय्यद सलीम म्हणाले, ‘सामान्य जनतेचा विश्वास संदीप क्षीरसागर यांच्यावर आहे. कोणत्याही दबावाला, प्रलोभनांना बळी न पडता त्यांना साथ द्यावी.’ राजेंद्र जगताप म्हणाले, ‘रवींद्र क्षीरसागर व संदीप क्षीरसागर यांची नाळ ग्रामीण भागातील लोकांशी जुळलेली आहे. या जनतेच्या आशीर्वादावर शहरातला दणका ग्रामीण भागामध्येही दाखवून देऊ.’
या बैठकांमुळे क्षीरसागर बंधूंमधील दरी वाढल्याचे स्पष्ट झाले आहे. त्यामुळे आगामी स्थानिक स्वराज्य संस्थांच्या निवडणुकीमध्ये त्याचा किती परिणाम होतो, याकडे सर्वांचे लक्ष लागले आहे.
मोबाइल अॅप डाउनलोड करा आणि राहा अपडेट
