म. टा. प्रतिनिधी, औरंगाबाद
‘सर्वसाधारण सभेत आयुक्त बसून का बोलले,’ म्हणत राजशिष्टाचाराचा मुद्दा पुढे करून पहिल्याच सभेत खोडा घालणाऱ्या भाजप नगरसेवकांना महापौर भगवान घडमोडे यांनी गुरुवारी घरचा आहेर दिला. मानापमानाला महत्त्व न देता आयुक्तांना खुर्चीत बसून उत्तरे देण्याची मुभा दिली. त्यामुळे नाराज नगरसेवकांनी सभात्याग केला.
घडमोडे यांची महापौर म्हणून असलेल्या आजच्या पहिल्याच सर्वसाधारण सभेला सकाळी अकरा वाजता सुरूवात झाली. मात्र, गणपूर्तीअभावी पाच मिनिटांसाठी महापौरांना सभा तहकूब करावी लागली. त्यानंतर सभा सुरू झाल्यावर विषयपत्रिकेवरील स्वच्छ महाराष्ट्र अभियानाच्या विषयावर चर्चा सुरू झाली. नगरसेवक नंदकुमार घोडेले, अॅड. माधुरी अदवंत, गजानन मनगटे यांनी मते मांडली. त्यानंतर महापौरांनी आयुक्त ओम प्रकाश बकोरिया यांना ‘या विषयावर केवळ चर्चा नको, पॉवर पॉइंट प्रेझेंटेशन सादर करून माहिती द्या,’ असे सांगितले. आयुक्तांनी त्यानुसार माहिती देणे सुरू केले. तेव्हा माजी उपमहापौर प्रमोद राठोड बोलण्यासाठी उभे राहिले. ते म्हणाले, ‘सभागृहात महापौरांचा मान राखला पाहिजे. महापौरांनी देखील ही बाब लक्षात घेतली पाहिजे. मान राखला जात नसेल, तर सभा तहकूब करा,’ अशी मागणी त्यांनी केली.
राठोड यांचे वक्तव्य संपत असतानाच नगरसेवक राजू शिंदे उभे राहिले. ‘काय चालले आहे, काय अडचण आहे,’ असा प्रश्न त्यांनी विचारला. तेवढ्यात दिलीप थोरात म्हणाले, ‘महापौर पिठासन अधिकारी आहेत. सर्वसाधारण सभेत त्यांनीच खुर्चीवर बसून बोलले पाहिजे. बाकीच्यांनी उभे राहून बोलावे अशी नियमात तरतूद आहे.’
राजगौरव वानखेडे म्हणाले, ‘महापौरांनी आयुक्तांना राजशिष्टाचार काय आहे हे सांगावे.’ स्वपक्षीय नगरसेवकांनीच राजशिष्टाचाराचा मुद्दा उपस्थित केल्यामुळे विचलित झालेल्या घडमोडे यांनी सर्वसाधारण सभा दहा मिनिटांसाठी तहकूब केली.
सभा पुन्हा सुरू झाल्यावर राजू शिंदे यांनी पुन्हा तोच मुद्दा मांडला. ‘सभेच्या संदर्भातील नियम सचिवांनी वाचून दाखवावेत,’ असे ते म्हणाले. सचिव दिलीप सूर्यवंशी यांनी महापौरांच्या आदेशानुसार सभा कामकाज नियमावली मधील कलम वाचून दाखवले. ‘पालिकेच्या सभागृहात पिठासन अधिकाऱ्यांशिवाय अन्य सदस्यांनी उभे राहूनच बोलले पाहिजे. पिठासन अधिकाऱ्यांनी आदेश दिले, तरच सदस्य खर्चीत बसून बोलू शकतात,’ असे ते म्हणाले. सचिवांनी केलेल्या खुलाशानंतर महापौरांनी या संदर्भात आयुक्तांना खुलासा करण्यास सांगितले.
आयुक्त ओम प्रकाश बकोरिया म्हणाले, ‘आतापर्यंत जेवढ्या सर्वसाधारण सभा झाल्या, त्या सर्व सभांमध्ये मी खुर्चीत बसूनच बोललो आहे. आताही बसूनच बोलणार.’ आयुक्तांच्या खुलाशामुळे राजू शिंदे संतापले. ‘सभागृहाचे कामकाज नियमानुसार चालले पाहिजे. आयुक्त नियमानुसार काम करणार नसतील, तर त्यांच्यावर हक्कभंग दाखल करून तो शासनाकडे कारवाईसाठी पाठवावा. महापौरांच्या मान सन्मानाचा हा विषय आहे,’ असे ते म्हणाले.
यावर भूमिका स्पष्ट करताना महापौर म्हणाले, ‘आयुक्त म्हणाले खुर्चीत बसून बोलतो. सुरुवातीपासूनच ते बसून बोलतात. मान अपमानाचा हा विषय नाही. आपल्याला शहर विकासाचे काम होण्याशी मतलब आहे. आयुक्तांनी सर्वसाधारण सभेत खुर्चीत बसून बोलावे, असे आदेश मी त्यांना देतो.’ महापौरांच्या अशा पवित्र्यामुळे प्रमोद राठोड, राजू शिंदे, दिलीप थोरात व गोकुळसिंह मलके यांनी सभात्याग केला.
मला माझ्याच पक्षाच्या नगरसेवकांनी कोंडीत पकडण्याचा प्रयत्न केला, असे म्हणणे योग्य होणार नाही. ते चौघे मला सांगूनच बाहेर गेले. दीड वर्षाच्या काळात सर्वसाधारण सभेच्या सभागृहात आयुक्त खुर्चीत बसूनच बोलतात. हा पायंडाच पडला आहे. हा पायंडा एकदम मोडून काढणे शक्यच नाही. मान अपमानात न गुरफटता शहर विकासासाठी आम्हाला काम करायचे आहे. सभा कामकाज नियमावलीच्या संदर्भात आयुक्तांशी चर्चा करण्याची माझी तयारी आहे. मी आग विझवण्याचे काम करतोय.
- भगवान घडमोडे, महापौर
सभागृह नियमानुसार चालले पाहिजे. नियमाचा सन्मान सर्वांनीच केला पाहिजे. शहराच्या विकासासाठी आम्ही प्रयत्न करणार आहोत. त्यामुळे मान-सन्मान, इगो यात गुरफटून राहण्याची आमची इच्छा नाही. नागरिकांना मुलभूत सुविधा देण्याचे आमचे उद्दीष्ट आहे. आज सभागृहात घडलेल्या घटनेसंदर्भात महापौरांशी चर्चा करतो. भाजपच्या नगरसेवकांची बैठक घेऊन त्यांना समज देखील दिली जाईल.
- किशनचंद तनवाणी, शहर जिल्हाध्यक्ष, भाजप
मोबाइल अॅप डाउनलोड करा आणि राहा अपडेट
