बारावी, दहावी परीक्षेच्या हॉलतिकिटावरील चुकांची दुरुस्ती करण्यासाठी विद्यार्थ्यांना माध्यमिक व उच्चमाध्यमिक शिक्षण मंडळाच्या कार्यालयात हेलपाटे मारावे लागत आहेत. परीक्षा मंडळ, शाळा, कॉलेज यांच्या चुकांमुळे विद्यार्थ्यांची फरफट होते आहे. दुरुस्तीसाठी अनेक तास ताटकळत बसावे लागले. परीक्षा चार दिवसांवर असताना अभ्यास सोडून रांगेत उभे राहण्याची वेळ अनेक विद्यार्थ्यांवर आली आहे.
माध्यमिक व उच्चमाध्यमिक शिक्षण मंडळतर्फे बारावीची परीक्षा २८ फेब्रुवारी, तर दहावीची परीक्षा ७ मार्चपासून सुरू होत आहेत. मंडळाने दिलेल्या अनेक हॉलतिकिटांमध्ये चुकांचा भरणा असल्याने विद्यार्थ्यांची तारांबळ उडाली आहे. चुक दुरुस्तीसाठी विद्यार्थ्यांना मंडळात यावे लागत आहे. विद्यार्थ्यांना तासन््तास ताटकळत बसावे लागते आहे. त्यात बुधवारी कम्प्युटर बिघाड झाल्याने विद्यार्थ्यांच्या अडचणीत आणखी भर पडली. हॉलतिकिटांवर चुकीचे माध्यम लिहिण्यात आल्याचे प्रमाण जास्त आहे. ऑनलाइन पद्धतीने अर्ज भरण्याची प्रक्रिया होते. अर्ज भरल्यानंतर कॉलेजमध्ये याद्या पाठविल्या जातात. त्या विद्यार्थ्यांकडून तपासून घेतल्यानंतर दुरुस्तीसह अर्ज पुन्हा पाठविले जातात. त्यानंतरही चुका राहिलेल्या आहेत. त्याचा फटका विद्यार्थ्यांना बसत आहे.
आर्थिक भुर्दंड
परीक्षा चार दिवसांवर आली असताना अभ्यास सोडून हॉलतिकीट दुरुस्तीसाठी विद्यार्थी मंडळात खेटे मारत आहेत. हॉलतिकीट दुरुस्तीसाठी त्यांचा वेळ खर्च होतो आहेच. त्याचबरोबर आर्थिक भुर्दंडही विद्यार्थ्यांनाच बसत आहे. दुरुस्तीसाठी ५० ते १०० रुपये मंडळ शुल्क आकारण्यात येत आहे. वेळ, पैसा खर्च करून वेळेत दुरुस्ती होईल की नाही? हा प्रश्न विद्यार्थी, पालकांना पडला आहे. या गोंधळामुळे विद्यार्थी, पालकांनी संताप व्यक्त केला.
- दहावी विद्यार्थी संख्या.........१,९१,४८८
- बारावी परीक्षार्थी संख्या.......१,६२,१६२
मंडळ, शाळा, कॉलेजांच्या चुकांमुळे विद्यार्थ्यांना ताटकळत बसावे लागते आहे. विशेषतः मंडळाने जन्मस्थळाचा कॉलम यंदा प्रथमच अर्जात दिला. त्यात झालेल्या दुरुस्तीसाठी दिलेल्या वेळेत त्यांची वेबसाइट वारंवार हँग होती. परीक्षा चार दिवसांवर आल्या आणि विद्यार्थी मंडळाच्या दारात माध्यम, विषय बदलाच्या प्रक्रियेसाठी रांगेत आहे. मंडळाच्या अशा गलथान कारभाराचा फटका ग्रामीण भागातील विद्यार्थ्यांना नाहक सोसावा लागतो आहे. त्याचा आर्थिक भुर्दंडही विद्यार्थ्यांनाच बसत आहे, हे थांबायला हवे.
- प्रकाश वाघ, कर्मचारी, शहीद भगतसिंग हायस्कूल, बजाजनगर.
दिवसभर आज हॉलतिकीट दुरुस्तीसाठी रांगेत उभे रहावे लागले. मंडळातील कर्मचारी उशीर का केला, असा प्रश्न करतात. कॉलेजकडून पत्र उशिरा मिळाले. ते घेऊन औरंगाबादला मंडळात यावे लागले. येथे बराच वेळ उभे राहून दुरुस्तीसाठी प्रयत्न करावे लागले. त्यामुळे अभ्यास बुडाला.
- भागवत कांबळे, विद्यार्थी, गंगामसला.
मोबाइल अॅप डाउनलोड करा आणि राहा अपडेट
