म. टा. प्रतिनिधी, औरंगाबाद
‘घटना घडली त्यावेळी रजेवर होते. गौणखणीज आणि करमणूक शुल्कची जबाबदारी अपर जिल्हाधिकाऱ्यांकडे आहे,’ असे म्हणत जिल्हाधिकारी डॉ. निधी पांडेय यांनी महसूल कर्मचारी गजानन चौधरी यांच्या मृत्युप्रकरणी अपर जिल्हाधिकारी पी. एल. सोरमारे, निवासी उपजिल्हाधिकारी विश्वंभर गावंडे आणि जिल्हा खनिकर्म अधिकारी भाग्यश्री जोशी यांच्याकडून स्पष्टीकरण घेणार असल्याचे मंगळवारी सांगितले.
अधिकाऱ्यांकडून मागवलेल्या स्पष्टीकरणाबाबत जिल्हाधिकारी म्हणाल्या की, ‘कार्यालयात कामाचा तणाव गंभीर प्रश्न आहे. गौणखणिज विभाग तसेच करमणूक शुल्क शाखेमध्ये मार्च अखेर कामाचा अधिक दबाव असतो. मात्र, या विभागांची जबाबदारी ही अपर जिल्हाधिकारी पी. एल. सोरमारे यांच्याकडे आहे. त्यामुळे सोरमारे यांची तसेच निवासी उपजिल्हाधिकारी विश्वंभर गावंडे व जिल्हा खणिकर्म अधिकारी भाग्यश्री जोशी यांनी या प्रकरणात काय केले, विभागात कामाचा किती ताण होता, याबाबत चौकशी होईल. तसेच कर्मचाऱ्याचा मृत्यू नेमका कशामुळे झाला याबाबत शवविच्छेदन अहवालही जिल्हा शल्य चिकित्सकांमार्फत तपासण्यात येईल व या संपूर्ण चौकशीचा अहवाल बुधवारी विभागीय आयुक्त डॉ. पुरुषोत्तम भापकर यांच्याकडे पाठवणार आहे,’ असे त्यांनी सांगितले. अपर आयुक्तांकडून होणाऱ्या चौकशीबाबत जिल्हाधिकारी म्हणाल्या की, ‘जिल्हा प्रशासनातील कर्मचाऱ्याचा मृत्यू झाला. स्वतःची जबाबदारी मोठी असल्यामुळे चौकशी करणार असून विभागीय आयुक्त कार्यालयाकडून होणाऱ्या चौकशीसाठीही सहकार्य करणार आहे. कोणत्याही चौकशीला सामोरे जाऊ,’ असे डॉ. पांडेय यांनी सांगितले.
...तर मराठवाड्यात काम बंद
महसूल कर्मचारी संघटनेने आक्रमक पावित्रा घेतला आहे. मंगळवारीही जिल्हाधिकारी कार्यालयात कामकाज बंद होते. जिल्हाधिकाऱ्यांची बदली तसेच अपर जिल्हाधिकारी व निवासी उपजिल्हाधिकाऱ्यांवर गुन्हा दाखल करत नाही, तो पर्यंत काम बंद आंदोलन सुरूच राहणार असून येत्या दोन दिवसांत निर्णय घेतला नाही, तर मराठवाड्यातील सर्व जिल्ह्यात कर्मचारी काम बंद आंदोलन करणार असल्याचे निवेदन कर्मचारी संघटनेने विभागीय आयुक्तांना दिले. निवेदनावर राज्य कार्याध्यक्ष डी. एम. देशपांडे, महिला प्रतिनिधी वसुधा बागुल, मराठवाडा अध्यक्ष लक्ष्मण नरमवार, जिल्हाध्यक्ष महेंद्र गिरगे तसेच संतोष अनर्थे, अरविंद धोंगडे, विनोद आहेर, सुधाकर मोरे, बबन आवळे, दिलीप त्रिभुवन, मुकुंद गिरी आदींच्या स्वाक्षऱ्या आहेत.
मोबाइल अॅप डाउनलोड करा आणि राहा अपडेट