म. टा. प्रतिनिधी, औरंगाबाद
छत्रपती शिवाजी महाराजांची बुधवारी तिथीनुसार जयंती साजरी करण्यात आली. शिवसेना व भारतीय जनता पक्षातर्फे दोन वेगवेगळ्या मिरवणुका संस्थान गणपतीपासून काढण्यात आल्या. शहरातील विविध भागात देखील शिवसेना, भाजपच्या पदाधिकाऱ्यांनी शिवजयंती साजरी केली.
संस्थान गणपती येथून सायंकाळी सात वाजता मिरवणुकीला प्रारंभ करण्यात आला. संस्थान गणपतीची आरती केल्यानंतर ही मिरवणूक सुरू झाली. यावेळी खासदार चंद्रकांत खैरे, प्रदीप जैस्वाल, अंबादास दानवे, नंदकुमार घोडेले, राजू वैद्य, राजेंद्र जंजाळ, उपमहापौर स्मिता घोगरे, नगरसेविका यशश्री बाखरिया, शिवजयंती महोत्सव समितीचे यंदाचे अध्यक्ष बाळासाहेब थोरात, सचिन खैरे, लक्ष्मीनारायण बाखरिया, गोपाळ कुलकर्णी, नारायण कानकाटे, महिला आघाडीच्या रंजना कुलकर्णी, प्रतिभा जगताप, संध्या जाधव, राजश्री पोफळे यांच्यासह म‌हिलांची उपस्थिती होती. बैलगाडीच्या रथात असलेल्या शिवरायांच्या पुतळ्याला पुष्पहार अर्पण करून मिरवणुकीला प्रारंभ करण्यात आला. मिरवणुकीत असलेल्या बँड पथकाने देशभक्तीपर आणि धार्मिक गिते सादर करून रंगत आणली.
आकर्षक देखावा
बाल शिवराय स्वराज्य स्थापनेची शपथ घेत असल्याचा सजीव देखावा महिला आघाडीने सादर केला. महादेवाच्या पिंडीवर रक्ताने अभिषेक करतानाचा हा आकर्षक देखावा मिरवणुकीचे आकर्षण ठरला. त्याचबरोबर विश्वासनगर येथील उपविभाग प्रमुख शेख रब्बानी यांनी आणलेल्या वाहनावर शिवरायांच्या मंत्रिमंडळात मुस्लिम समाजाला कसे महत्त्वाचे स्थान होते, याचा फलकाद्वारे देखावा सादर करण्यात आला. बजाज अॅटो कंपनीच्या कामगारांनी देखील मिरवणुकीत सहभाग घेतला. झाडे लावा झाडे वाचवाचा, असा संदेश त्यांनी देखाव्याद्वारे दिला.
विद्यार्थी सेनेची वाहन फेरी
छत्रपती शिवाजी महाराज जयंतीनिमित्त भारतीय विद्यार्थी सेनेतर्फे बुधवारी सकाळी वाहन फेरीचे आयोजन करण्यात आले. शिवाजी महाराजांच्या पुतळ्याला पुष्पहार अर्पण करून फेरीला सुरुवात करण्यात आली. यावेळी फेरीमध्ये खासदार चंद्रकांत खैरे, जिल्हाप्रमुख अंबादास दानवे, प्रदीप जैस्वाल, बाळासाहेब थोरात, राजू वैद्य आदी सहभागी झाले होते. भारतीय विद्यार्थी सेनेचे महाराष्ट्र निमंत्रक, नगरसेवक राजू जंजाळ यांच्या नेतृत्वाखाली निघालेल्या या फेरीसाठी नितीन मेघावाले, सागर पाटील, हनुमान शिंदे, संदीप लिंगायत यांच्यासह इतरांनी परिश्रम घेतले.
भाजपची स्वतंत्र मिरवणूक
शिवसेनेचा संस्थान गणपती येथील कार्यक्रम आटोपून मिरवणूक सुरू झाल्यानंतर भारतीय जनता पक्षाने आयोजित केलेल्या मिरवणुकीस प्रारंभ करण्यात आला. भाजपच्या वॉर्ड पद‌ाधिकाऱ्यांच्या वॉर्डांतील मंडळांची वाहने मिरवणुकीत सहभागी होती. महिला आयोगाच्या अध्यक्षा विजया रहाटकर, शहराध्यक्ष किशनचंद तनवाणी, नगरसेवक गजानन बारवाल, जगदीश सिद्ध, कचरू घोडके आदींच्या प्रमुख उपस्थितीत या मिरवणुकीला सुरुवात करण्यात आली. शिवसेना व भाजपच्या मिरवणुकांचा राजाबाजार, सराफा, सिटीचौक, मछली खडक, गुलमंडी, पैठणगेटमार्गे क्रांतिचौक येथे समारोप करण्यात आला.
मोबाइल अॅप डाउनलोड करा आणि राहा अपडेट
