म. टा. प्रतिनिधी, औरंगाबाद
उत्तरपत्रिकांची तपासणी न करता गठ्ठे परत पाठविणाऱ्या विभागातील अशा २७८ कॉलेजांना माध्यमिक व उच्चमाध्यमिक शिक्षण मंडळाने कारणे दाखवा नोटीस दिली आहे. बारावीची परीक्षा संपल्यानंतरही गठ्ठे परत येण्याचे सत्र सुरूच आहे. संबंधित कॉलेजांमधील विद्यार्थ्यांचे निकालही राखीव ठेवण्याचे नोटीसमध्ये म्हटले आहे.
माध्यमिक व उच्चमाध्यमिक शिक्षण मंडळातर्फे घेण्यात येणाऱ्या बारावीच्या लेखी परीक्षा २८ फेब्रुवारी ते २५ मार्च दरम्यान झाल्या. बारावी उत्तरपत्रिकांच्या तपासणीला अनुदानित महाविद्यालयासह विनाअनुदानित महाविद्यालयांतील शिक्षकांनीही नकार दिला. १५ मार्च रोजी अनुदानित शिक्षकांनी आंदोलन मागे घेतले. विनाअनुदानित शिक्षकांचे आंदोलनही कोठे सुरू कोठे बंद असे आहे. त्यात अद्याप उत्तरपत्रिका परत येण्याचे सत्र सुरूच आहे. त्यामुळे ज्या कॉलेजांकडून उत्तरपत्रिका तपासणीविना परत येत आहेत, अशा कॉलेजांना कारणे दाखवा नोटीसा बजावल्या आहेत. त्यात सर्वाधिक उत्तरपत्रिका बीड जिल्ह्यातून परत येत असल्याचे मंडळातील सूत्रांनी ‘मटा’ला सांगितले.
नोटीसमध्ये काय?
महाराष्ट्र खासगी शाळातील कर्मचारी (सेवेच्या शर्ती) नियमावली १९८१ अनुसूची ‘अ’मधील नियम क्रमांक २२(१) मधील मुख्याध्यापक, शिक्षक, शिक्षकेतर कर्मचारी यांच्याकरिता विहित केलेल्या कर्तव्यानुसार विभागीय मंडळाकडून सोपविलेली परीक्षेच्या संदर्भातील कोणतेही काम करणे हे त्यांचे कर्तव्य ठरले. तसेच मंडळ नियम क्रमांक ६७ मधील १८नुसार विभागीय मंडळाकडून घेण्यात येणाऱ्या परीक्षांसाठी कनिष्ठ महाविद्यालयात जरूर त्या सर्व सोयी व कर्मचारी वर्गाच्या सेवा देवू करील, असा उल्लेख असताना परीक्षण न करता परत पाठविल्या आहेत. त्यामुळे अत्यंत महत्त्वाच्या व कालमर्यादित कामामध्ये व्यत्यय निर्माण झालेला आहे. मंडळास असहकार्य करून व आपल्या कर्तव्यात कसूर केल्यामुळे मार्च २०१७चा निकाल राखीव का ठेवू नये आणि मंडळ मान्यता का काढून घेऊ नये,’ असे म्हटले आहे.
उत्तरपत्रिका न तपासता परत आल्या आहेत. ज्या कॉलेजांमधून या उत्तरपत्रिका परत आल्या आहेत, तशांना नोटीस पाठविल्या आहेत. संबंधित शिक्षकांनाही नोटीस देण्याची प्रक्रिया केली जाईल. - वंदना वाहुळ, विभागीय सचिव, माध्यमिक व उच्चमाध्यमिक शिक्षण मंडळ
मोबाइल अॅप डाउनलोड करा आणि राहा अपडेट
