म. टा. प्रतिनिधी, औरंगाबाद
‘राज्यातील शेतकऱ्यांची अवस्था अत्यंत दयनीय आहे. आजवर ९००० शेतकऱ्यांनी आत्महत्या केल्या. शेतकऱ्यांना दिलासा देण्यासाठी कर्जमाफी करावी अशी मागणी आम्ही वारंवार करत आहोत. मात्र, मुख्यमंत्री देवेंद्र फडणवीस टोलवाटोलवी करत आहेत. मुळात हा प्रश्नच मुख्यमंत्र्यांना समजलेला नाही. एवढ्या आत्महत्या झाले तरी मुख्यमंत्र्यांना त्यांचे गांभीर्य कळत नाही. आता कर्जमाफीसाठी पंचागांत मुहूर्त पाहणार काय ?’ असा टोला माजी मुख्यमंत्री पृथ्वीराज चव्हाण यांनी शनिवारी मुख्यमंत्री देवेंद्र फडणवीस यांना लगाविला.
शेतकऱ्यांना कर्जमाफी मिळावी, या मागणीसाठी काँग्रेस, राष्ट्रवादी काँग्रेस, समाजवादी पक्ष, एआयएमआयएम, रिपाई (कवाडे गट) यांच्यासह प्रमुख विरोधी पक्षांनी चंद्रपूर ते पनवेल अशी संघर्ष यात्रा सुरू केली आहे. ही यात्रा शनिवारी औरंगाबादेत पोचली. यानिमित्त आयोजित सभेत चव्हाण बोलत होते. राष्ट्रवादी काँग्रेसचे नेते माजी उपमुख्यमंत्री अजित पवार, दिलीप वळसे पाटील, विधानसभेतील विरोधीपक्ष नेते राधाकृष्ण विखे, बाळासाहेब थोरात, पतंगराव कदम, समाजवादी पक्षाचे नेते अबू आझमी, राजेश टोपे, डी. पी. सावंत, सुनील केदार, जितेंद्र आव्हाड, नसीम खान यांच्यासह आमदार अब्दुल सत्तार, भाऊसाहेब पाटील चिकटगावकर, सतीश चव्हाण, माजी आमदार डॉ. कल्याण काळे, नितीन पाटील यांची प्रमुख उपस्थिती होती.
चव्हाण म्हणाले,‘शेतकरी कर्जमाफीवर आम्ही आग्रही भूमिका मांडत आहोत. मुख्यमंत्री काही दिवसांपूर्वी दिल्लीत केंद्राकडून मदत मागणीसाठी गेले, पण तिथे पंतप्रधानांची भेट होऊ शकली नाही. अर्थमंत्री अरुण जेटली यांना ते भेटले. जेटलींनी चहापान केले आणि शेतकरी कर्जमाफीसाठी एक रुपयाही केंद्राकडून दिला जाणार नाही, असे सांगितले. मुख्यमंत्री म्हणतात की कर्जमाफी केल्याने बँकांचा फायदा होतो. मुख्यमंत्र्यांना हा प्रश्नच समजलेला नाही. आता काय २० हजार आत्महत्या होण्याची वाट पाहणार का पंचागांत पाहून मुहूर्त काढणार ?’ अशी टीका त्यांनी केली.
‘शेतकऱ्यांची सहनशीलता आता संपली आहे. संघर्षाची वेळ आली आहे. आम्ही तुमच्या सोबत आहोतच, पण या लढाईत जनतेचे पुढे आले पाहिजे. संघर्ष यात्रा लोकांना जागृत करण्यासाठी सुरू केली आहे. कर्जमाफी होईपर्यंत तुमच्या भागात मंत्र्यांना फिरू देऊ नका, काळ्या गुढ्या उभारून त्यांचा निषेध करा. ३० हजार कोटींचे कर्ज माफ करण्यास या सरकारला अडचण आहे, पण बड्यांची कर्जे मात्र माफ केली जातात. तुम्हाला कर्जमाफी करणे जमत नसेल तर सत्तेतून बाजूला व्हा. आम्ही कर्जमाफी करून दाखवितो,’ असे आव्हान चव्हाण यांनी दिले. अबू आझमी यांनीही सरकारच्या धोरणावर टीका केली. डॉ. कल्याण काळे यांनी सूत्रसंचालन केले. नितीन पाटील यांनी आभार मानले.
संघर्ष यात्रेचा दुसरा टप्पा लवकरच
पत्रकारांशी बोलताना पृथ्वीराज चव्हाण म्हणाले, ‘शेतकरी संघर्ष यात्रेचा दुसरा टप्पा लवकरच सुरू होईल. उत्तर महाराष्ट्र, धुळे, बुलडाणा, नंदूरबार, पालघर अशी ही यात्रा काढण्यात येईल. त्याचे नियोजन सुरू आहे. कार्यक्रमही जाहीर होईल. सरकारने काहीही नियोजन करून शेतकऱ्यांना कर्जमाफी दिली पाहिजे. यंदाही भीषण दुष्काळाची चिन्हे आहेत. पाण्यासाठी नागरिकांचे हाल होणार आहेत. त्याचे नियोजन सरकारने केले पाहिजे. भाजप सरकारने गेल्या तीन वर्षांत सिंचनाच्या क्षेत्रात काहीच काम केले नाही. मी मुख्यमंत्री असताना सिंचनाचा प्रश्न उपस्थित केला होता. त्यावेळी मोठा गदारोळ झाला. त्यात कोणी काय केले यापेक्षा आता काय होतेय हे महत्वाचे आहे. यंदा सिंचनासाठी अर्थसंकल्पात कमी तरतूद केली आहे. विकासकामांना कात्री लागणार आहे. सरकारला नेमके काय करायचे आहे ? हेच कळत नाही.’
कर्जमाफीची मागणी करणाऱ्या १९ आमदारांना सरकारने निलंबित केले. एकदा निर्णय घेतला की तो मागे घ्यायचा नसतो. आता ९ आमदारांचे निलंबन मागे का घेतले ? सरकार संघर्ष यात्रेमुळे घाबरले असून आमच्यात दुही निर्माण करण्याचा प्रयत्न करत आहे. निलंबन मागे घेतलेले आमदार कामकाजात भाग घेणार नाहीत. तूर खरेदी केंद्रात बारदाना नाही, हे यापेक्षा लाजिरवाणी गोष्ट काय आहे. सरकारला लाज वाटायला हवी. - अजित पवार, नेते, राष्ट्रवादी कॉँग्रेस
मोबाइल अॅप डाउनलोड करा आणि राहा अपडेट
म. टा. प्रतिनिधी, लातूर
