म. टा. प्रतिनिधी, औरंगाबाद
‘त्रिवार जयजयकार रामा
त्रिवार जयजयकार
पुष्पक यानांतुनी उतरली
स्वर्गसौख्य साकार,’
गीतरामायणातील या ओळी आजही आपल्याला मंत्रमुग्ध करतात. या मर्यादापुरुषोत्तमाचा जयघोष करत, मंगलवाद्याचा किनकिनाट आणि गुलाल, फुलांच्या उधळणीने मंगळवारी शहरात रामनवमी मोठ्या उत्साहात साजरी करण्यात आली.
किराडपुऱ्यातील श्रीराम मंदिर, बजरंग चौक एन-७ मधील राम मंदिर, उस्मानपुरा येथील छोटे श्रीराम मंदिर, वाळूजमधल्या नायगाव जवळील श्रीराम मंदिर, औरंगपुरा, कुंभारवाडा, चौराहा, सुपारी हनुमान मंदिराजवळील राम मंदिर, पद्मपुरा, ईटखेडा, चेतक घोडा चौकातील श्रीराम मंदिर आदी विविध ठिकाणी दुपारी बारा वाजता जन्मोत्सव झाला.
किराडपुरा येथील मोठया श्रीराम मंदिरात दुपारी जन्मोत्सव व दर्शन सोहळा झाला. संध्याकाळी मिरवणूक काढण्यात आली. पालखीचे दर्शन घेण्यासाठी अनेक नागरिक उपस्थित होते. अध्यक्ष मानसिंग पवार, दयाराम बसैये, हेमंत जोशी व मंडळींची उपस्थिती होती.
प्रभूश्री राम मंदिर, एन-७ ते प्रभू श्री राम मंदिर, किराडपुरा येथे सकाळी मिरणूक काढण्यात आली. सायंकाळी रामनवमी निमित्त साईंची पालखी काढण्यात आली. इटखेड्यात वाहन फेरी काढण्यात आली. दुपारी १२ वाजता जन्मोत्सवानंतर महाआरती आणि भंडारा करण्यात आला. नगरसेवक नंदकुमार घोडेले, साहेबराव कुमावत, विजय सोनवणे, संजय खडके, बाबासाहेब खडके, संजय कुमावत अविनाश कुलकर्णी यांच्यासह विविध नागरिकांची उपस्थिती होती.
उस्मानपुरा श्रीराम मंदिरात पूर्णपात्रे गुरुजींनी रक्तदान शिबिराचे आयोजन केले. दत्ताजी भाले रक्तपेढीने सहकार्य केले. ५०पेक्षा अधिक नागरिकांनी रक्तदान केले. यासह शहरातील विविध मंदिरात भंडारा, अन्नदान, साई दर्शन, आदी कार्यक्रम घेण्यात आले. औरंगपुरा, उस्मानपुरा, सिडको, किराडपुरा येथे मिरवणुका काढण्यात आल्या. शहरात विविध ठिकाणी मिरवणुकीत सहभागी झालेल्या नागरिकांना प्रसाद, पाण्याचे वाटप करण्यात आले. हजारो भाविक मिरवणुकीत सहभागी झाले होते.
रोकडिया हनुमान कॉलनीत कार्यक्रम
रोकडिया हनुमान मंदिर, मोंढानाका येथे रामनवमी ते हनुमान जयंती सप्ताहामध्ये राम जन्माच्या कीर्तनासह विविध कार्यक्रमांचे आयोजन करण्यात आले आहे.
सप्ताहात कीर्तनकार विनायक पांडे, गणेश महाराज बांगर, नंदुकाका बंदीष्टे आळंदी, अरुण महाराज पिंपळे, सुभाष महाराज भांडे, भिकाजी महाराज बारबैंले, पांडुरंग महाराज पळसकर आदींची कीर्तने रात्री ८ ते १० यावेळेत होणार आहेत. तसेच साथसंगत करण्यासाठी सोपान महाराज काकडे, नामदेव पंडित, सोमनाथ पंडित, रवींद कुलकर्णी, दयानंद चव्हाण, दिलीप कुलकर्णी, रतन जाधव, मुरलीधर नरवडे, हार्मोनियम वर किशोर कुलकर्णी, राजू घुले, श्रीपाद जोशी, कल्पना जोशी इत्यादी सहकाऱ्यांचा समावेश आहे. यामध्ये ७ ते ११ एप्रिलदरम्यान विनीताताई वझे यांच्या रामकथेचे आयोजन करण्यात आले आहे. रोज सायंकाळी ४ ते ६ यावेळेत रामकथा तथा हरिपाठ, कीर्तन, जागर, भजन होणार आहे. हनुमान जयंतीदिनी काल्याच्या कीर्तनासह महाप्रसादाचे आयोजन केले आहे. हनुमान जन्म सकाळी ६.२० वाजता होईल. या कार्यक्रमास भाविकांनी उपस्थित रहावे, असे आवाहन करण्यात आले आहे.
मोबाइल अॅप डाउनलोड करा आणि राहा अपडेट
