म. टा. प्रतिनिधी, औरंगाबाद
मानवीय आहार शाकाहार, बेटी बचाव बेटी पढाव, धरती बचाव, थॅलेसिमिया जागरुकता, सौर ऊर्जेचे महत्त्व आदी संदेश देत औरंगाबादेत रविवारी सकल जैन समाजाने भगवान महावीर जयंती उत्साहात साजरी केली. सकाळी भक्तीपूर्ण वातावरणात निघालेल्या मिरवणुकीत भक्ती, अहिंसा आणि जनजागृतीचा त्रिवेणी संगम अनुभवास आला.
गेल्या १७ वर्षांपासून औरंगाबादेत सकल जैन समाजातर्फे भगवान महावीर जयंती साजरी करण्यात येते. हा उपक्रम देशात अभिनंदनीय ठरला आहे. यंदा श्री भगवान महावीर जन्मकल्याणक महोत्सवानिमित्त गेल्या दहा दिवसांपासून विविध उपक्रम, स्पर्धा घेण्यात आला. रविवारी सकाळी महावीर चौकातील महावीर स्तंभाजवळ धर्मध्वजवंदन झाले. त्यानंतर उत्तमचंद ठोले दिगंबर जैन छात्रालय आणि गुरुगणेश नगरात ध्वजवंदन झाले. राजाबाजार जैनमंदिर येथून सकाळी वाहन फेरी काढण्यात आली. त्यानंतर सकाळी आठ वाजता पैठणगेट येथून मुख्य मिरवणुकीस प्रारंभ झाला. आचार्य यशोवर्मसुरीश्वर, आचार्य भाग्ययशसुरीश्वर, आचार्य कर्मविजय नंदी महाराज, मयंकसागर महाराज, गणिनीप्रमुख आर्यिका ज्ञानमती माताजी, साध्वी प्रज्ञाश्रीजी, प्रकाशकवरजी, किरणसुधाजी, कुलभूषणमती माताजी, चिन्मयश्रीमती, विवेकमालाश्रीजी, विशिष्टमालाश्रीजी, दीप्तीजी व लक्षिताजी आदींच्या प्रमुख उपस्थितीत मिरवणुकीस प्रारंभ झाला.
मिरवणुकीत श्री शंखेश्वर पार्श्वनाथ जैन जिनालय सिडको एन -३ रथ, श्री पार्श्वनाथ खंडेलवाल दिगंबर जैन मंदिर राजाबाजार पालखी, श्री अग्रवाल दिगंबर जैन मंदिर सराफा, श्री सैतवाल दिगंबर जैन मंदिर भाजीबाजार येथून पालखी, श्री आनंदजी कल्याणजी ट्रस्टचे श्री गोडीजी पार्श्वनाथ जैन श्वेतांबर मंदिर जोहरीवाडा येथून रथ, औरंगाबाद श्री जैन श्वेतांबर मूर्तीपूजक संघ रथयात्रेत अग्रभागी सहभागी झाले होते. भगवान महावीरांचा जयघोष करत मिरवणूक पैठणगेट, गुलमंडी, मछली खडक, सराफा, शहागंजमार्गे राजाबाजार येथे विसर्जित झाली.
‘जैनस फॉर इंडिया’ या विषयावर आधारित स्वच्छ भारत, आत्महत्याग्रस्त शेतकरी, पूरग्रस्तांना केलेली मदत व पुर्नवसन, शहीद जवानांना दिलेली मदत, पर्यावरण, पाणीबचाव, बेटीबचाव, पशुधन बचाव, वृक्षारोपण आदी विषयांवरील सजीव देखावे लक्षवेधी ठरले. अग्रवाल जैन महिला मंडळाच्या वतीने कचरा वर्गीकरण करण्याचा संदेश देणारा सजीव देखावा सादर केला गेला. जैन सोशल नेटवर्क संगिनी ग्रुपतर्फे थॅलेसिमिया जागरुकता विषयाचा सजीव देखावा मांडला होता. रश्मी शहा, रुपाली भंडारी, रिता मुनोत यांच्यासह सदस्यांचा यात सहभाग होता. आहार विवेकने सादर केलेला ‘शाकाहाराचे महत्त्व’ हा देखावा सर्वांचे आकर्षण ठरला. ‘हॉटेल का खाना रोगो को बुलाना’ अशा वाक्यांनी नागरिकांना संदेश दिला गेला. भारतीय जैन संघटनेच्या वतीने महाराष्ट्र दुष्काळग्रस्त अभियान राबविले जात आहे. त्याची माहिती देणारा देखावा मिरवणुकीत होता. जैन इंजिनीअर्स सोसायटीतर्फे सौर ऊर्जेचे महत्त्व सांगणारा देखावा मांडण्यात आला होता. मिरवणूक मार्गावर ठिकठिकाणी पुष्पवृष्टी करण्यात आली. गुलमंडीवर जय गुरू मिश्री युवा मंडळाने व्यासपीठ उभारले होते. तेथे मिरवणुकीत सहभागी प्रत्येक मंडळाचे स्वागत करण्यात येत होते. सिटी चौकात पोलिसांतर्फे स्वागतकक्ष उभारण्यात आला होता. गुरू परिवारातर्फे शहागंज येथील गांधीपुतळ्याजवळ स्वागत कक्ष उभारला होता. तेथे विलास साहुजी, अमोल पाटणी, प्रवीण लोहाडे, प्रीतम पाटणी, निलेश सेठी मिरवणुकीत सहभागी झालेल्यांचे स्वागत करत होते.
मिरवणूक विसर्जित झाल्यानंतर सरस्वती भुवन महाविद्यालयाच्या प्रांगणात महाप्रसादाची व्यवस्था करण्यात आली होती. नम्रता ग्रुपच्या मुगदिया परिवारातर्फे भक्तांसाठी आज महाप्रसादाचे आयोजन करण्यात आले. मिरवणुकीत खासदार चंद्रकांत खैरे, आमदार अतुल सावे, शिवसेना जिल्हाप्रमुख अंबादास दानवे, काँग्रेस शहराध्यक्ष नामदेव पवार, महापौर भगवान घडमोडे, उपमहापौर स्मिता घोगरे, शिवसेना शहरप्रमुख रेणुकादास वैद्य, माजी उपमहापौर प्रशांत देसरडा, नगरसेवक नंदकुमार घोडेले, सचिन खैरे, गजानन बारवाल, बसवराज मंगरुळे, प्रफुल्ल मालानी आदी सहभागी झाले होते.
पाणी, शीतपेय, खाद्यपदार्थांचे वाटप
मिरवणूक मार्गावर ठिकठिकाणी मिरवणुकीत सहभागी झालेल्या भक्तांसाठी पिण्याचे पाणी, सरबत, बिस्किट, खाद्यपदार्थांचे स्टॉल लावण्यात आले होते. देखावे आणि मिरवणुकीतील वाहनांत बसलेल्या लहान मुलांची विशेष काळजी घेण्यात आली.
ढोल पथक
वर्धमान रेसिडेन्सीचे ढोल पथक हे मिरवणुकीतील सर्वात आकर्षण ठरले. यंदा प्रथमच जैन बांधवांचे ढोल पथक महावीर जयंतीच्या मिरवणुकीत सहभागी झाले होते. उत्साहाने सहभागी झालेल्या युवक युवतींनी आपल्या कलाकृती सादर करून सर्वांची मने जिंकली.
संयोजन समिती
सकल जैन समाजाचे अध्यक्ष राजेंद्र दर्डा, कार्याध्यक्ष आमदार सुभाष झांबड, कोषाध्यक्ष जी. एम. बोथरा, सरचिटणीस महावीर पाटणी, ललित पाटणी, सुधीर साहुजी, डॉ. प्रकाश झांबड, डॉ. शांतीलाल संचेती, रवी मुगदिया, भगवान महावीर जन्मकल्याण महोत्सव समितीने अध्यक्ष वृषभ कासलीवाल, कार्याध्यक्ष विनोद बोकडिया, भारती बागरेचा, मुकेश साहुजी, अनिल संचेती, मिठालाल कांकरिया, निलेश सावळकर, राजेश मुथा, संतोष पापडीवाल, संजय सुराणा, प्रभाकर कुमठे, कुंतीलाल हिरण, अजित सुराणा, निलेश पहाडे, सुनील वायकोस, स्वप्नील पारख, पंकज साकला, भावना सेठिया, मंगला पारख, कविता अजमेरा, नरेंद्र अजमेरा, पीयूष कासलीवाल, सुधीर सावजी.
१ लाख वृक्षलागवडीचे उद्दिष्ट
आमदार सुभाष झांबड यांनी यावर्षी १ लाख वृक्षलागवडीचा संकल्प जाहीर केला होता. त्यानुसार महावीर जयंती उत्सवात सहभागी झालेल्यांना वृक्षलागवडीचे महत्त्व सांगण्यात आले. महाप्रसादाच्या ठिकाणी रोपट्यांचा स्वतंत्र कक्ष लावण्यात आला होता. ‘पुढील वर्षभरात १ लाख झाडे लावावीत, जेणेकरून पर्यावरणाचे संतुलन राखण्यास मदत होईल. तुम्हाला जेवढी झाडे पाहिजेत ती घेऊन जा पण प्रत्येक झाड जगले पाहिजे,’ असे प्रत्येकाला सांगण्यात येत होते.
१८२ जणांचे रक्तदान
महावीर जयंतीचे औचित्य साधून दरवर्षी सकल जैन समाजातर्फे रक्तदान शिबिराचे आयोजन करण्यात येते. नऊ रक्तपेढ्यांमार्फत संकलन करण्यात आले. दुपारी तीनपर्यंत १८२ जणांनी रक्तदान केले.
अशी रंगली मिरवणूक
- लुक अँड लर्न पाठशाळातर्फे जैसे खावे अन्न, तसे होई मन त्यामुळे चांगले खाऊन चांगले विचार निर्माण करा, असा संदेश घोषणातून दिल्या. विमलाराणी बाफना, रुपाली चोरडिया, कल्पना रुणवाल, तृप्ती बोरुडिया, अर्चना मुगदिया, प्रिती कांकरिया उपस्थिती होती.
- दिगंबर जैनवर्धन संस्थेतर्फे मोबाइलचे मुलांवर होणारे दुष्परिणाम यावर आधारित सजीव देखावा केला होता.
- सुमनबाई राजाभाऊ काला गर्ल्स होस्टेलमधील रंजना छाबडा, श्रद्धा अजमेरा, शिवानी जैन, हर्षिता सावजी, दर्शना पहाडे आदी विद्यार्थिनी काश्मिरी पेहरावात सहभागी झाल्या.
- प्रगती महिला मंडळतर्फे भगवान महावीर गर्भधारणा देखावा मेरू पर्वतासह करण्यात आला. यासाठी वासंती काळे आणि मीनाक्षी उदगीरकर यांनी पुढाकार घेतला.
- खंडेलवाल दिगंबर जैन महिला मंडळातर्फे अन्नदान करण्याचे आवाहन करणारा सजीव देखावा करण्यात आला.
- बालाजीनगर येथील श्री कुंथुनाथ दिगंबर जैन मंदिरातर्फे मांगीतुंगी (जि. नाशिक) येथील वृषभनाथ भगवानाच्या १०८ फूट मूर्तीचा देखावा साकारला होता.
- अरिहंतनगरातील युगप्रवर्तक १००८ आदिनाथ दिगंबर जैन मंदिराच्या महिला मंडळतर्फे ‘एकता मे ही जीवन है’ हा संदेश देणारे फलक लावण्यात आले होते. यामध्ये अनिता पहाडे, मधू कासलीवाल, वर्षा कासलीवाल, लता अजमेरा, कुसुम अजमेरा उपस्थित होते.
- माणिकचंद पहाडे यांनी रझाकाराविरोधात केलेल्या कार्याची माहिती देणारा देखावा पी. यू. जैन विद्यालयातर्फे सादर करण्यात आला.
- विमलनाथ जैन पाठशाळातर्फे नवकार की महिमा हा सजीव देखावा सादर करण्यात आला.
- चंद्रप्रभू खंडेलवाल दिगंबर जैन मंदिरातर्फे जैन फॉर ऑल या संकल्पनेवर आधारित देखावा करण्यात आला होता. चारा छावणी, शहीद जवानाच्या परिवाराला आर्थिक मदत, स्वातंत्र्यसैनिकांची माहिती, स्वच्छता अभियान आणि अहिंसा पुतळ्याची माहिती देण्यात आली. कविता अजमेरा, मीना पापडीवाल, मंजू पाटणी, भारती बाकलीवाल, शोभा अजमेरा यांचा यात सहभाग होता.
- बळ्ळारी ( कर्नाटक) येथून कैलास जैन हे महावीर जयंती उत्सवासाठी आले होते. गेल्या १५ वर्षांपासून ते उत्सवासाठी आवर्जून उपस्थित राहतात.
- सिडको एन -३ येथील वाहन फेरीत जर्मनीच्या दोन विद्यार्थिनी पारंपारिक वेशभूषा परिधान करून सहभागी झाल्या. या विद्यार्थिनी शिक्षणासाठी औरंगाबादेत आल्या आहेत.
- सिटी चौकातील स्वागत कक्षात राजेंद्र दर्डा आणि महावीर पाटणी सहभागी मंडळांना सूचना देत होते. दहानंतर उन्हाची तीव्रता वाढल्याने सिटीचौकापासून शहागंजपर्यंत मिरवणूक वेगाने पुढे सरकली.
- महावीर जयंतीनिमित्त महाप्रसादाचे मानकरी होण्यासाठी दरवर्षी बोलिया लागतात. यंदा महाप्रसाद मंडपातच पुढील चार वर्षांचे यजमान निश्चित झाले.
- अर्पण ग्रुपच्या वतीने अॅम्ब्युलन्स देण्यात आली. गरजू रुग्णांना या अॅम्ब्युलन्सद्वारे मोफत सेवा पुरविली जाणार आहे.
मोबाइल अॅप डाउनलोड करा आणि राहा अपडेट
