उद्यान, चांगले रस्ते, सामाजिक सभागृह द्या; नागरिकांनी केली मागणी
म. टा. प्रतिनिधी, औरंगाबाद
शहरातील एक प्रमुख वसाहत असलेला प्रतापनगर परिसर अद्यापही नागरी सोयी-सुविधांपासून दूरच आहे. सर्व प्रकाराच्या करांचा प्रामाणिक भरणा करूनही परिसरातील विकासकामाकडे मात्र दुर्लक्ष केले जात आहे, असा आरोप येथील नागरिकांनी केला आहे. उद्यान, अंतर्गत रस्त्यांचा प्रश्न कायम असून शेजारी मोकळ्या मैदानात रात्रीच्या वेळी नशेबाजी चालते, असे अनेक प्रश्न तातडीने निकाली काढावे, अशी मागणी त्यांनी केली आहे.
उस्मानपुरा परिसरातील प्रतापनगरात प्रतापनगरसह कासलीवालनगर, प्रशांतनगर, सूरज पार्क यासह अनेक छोट्या मोठ्या कॉलनी आहेत. उच्चभ्रू, मध्यमवर्गीय लोकांची वसाहत असलेल्या या भागात नोकरदार, व्यापारी, व्यवसायिक मंडळी मोठ्या प्रमाणात राहतात. नाही म्हणायला ड्रेनेज, पाणी पुरवठा आदी सोयी सुविधा या परिसरात मिळत असल्या तरी अन्य वॉर्डांच्या तुलनेत या भागात विकासकामे फारशी झाली नाही, अशी ओरड नागरिकांकडून होत आहे.
यात प्रमुख नागरी समस्या म्हणजे प्रतापनगर गल्ली नंबर एकपासून स्मशानभूमीपर्यंत जाणारा रस्ता. रस्त्यावर असंख्य खड्डे पडल्याने त्यावरून वाहन चालविणे अवघड झाले आहे. परिसरातून गेलेल्या नाल्यास कठडे नाहीत. त्यामुळे याकडे तातडीने लक्ष देऊन दुरुस्ती करण्यात यावी, नवीन रस्ता तयार करण्यात यावा, तसेच मुले, वयोवृद्धासाठी परिसरात चांगले उद्यान, महापालिकेच्या जागेत सांस्कृतिक सभागृह आदी उभारण्यात यावे, आदी मागण्याही नागरिकांनी केल्या आहेत. यासंदर्भात मृणालिनी फुलगीरकर, प्रज्ञा मुंढे, नेहा गुंडेवार, मीरा जाधव, मीरा कासले आदींनी महापौर भगवान घडमोडे यांची भेट घेत निवेदनही सादर केले आहे. गेल्या २० वर्षात येथील नागरी सुविधा, विकासकांकडे दुर्लक्ष झाले आहे. आतातरी न्याय द्यावा, अशी अपेक्षा नागरिकांनी केली आहे.
मैदान गुंडांना मोकळे --
प्रतापनगरलगत एक भूखंड आहे. रात्रीच्या वेळी त्यावर गुंड प्रवृत्तीच्या लोकांचाच ताबा असतो. अवैधपणे नशेबाजी केली जाते, असा आरोप नागरिकांकडून होत आहे. याप्रकारामुळे परिसरात सुरक्षेचा प्रश्न निर्माण झाला असून पथदिवे अनेक बंद असल्याने त्यात अधिक भर पडत असल्याचे त्यांनी नमूद केले आहे.
सांस्कृतिक सभागृह नाही, पथदिव्यांचा प्रश्न यासह असे अनेक विकासप्रश्न प्रतापनगरात कायम आहेत. त्याकडे तातडीने लक्ष देऊन नागरिकांना न्याय दिला जावा.
- मृणालिनी फुलगीकर, नागरिक, प्रतापनगर
स्मशानभूमीपर्यंत जाणारा रस्ता अत्यंत खराब झाला आहे. स्वर्गरथ येथून जाताना अनेकदा खड्ड्यामुळे अडचण होते. ही गंभीर बाब असून तातडीने नवीन रस्ता तयार व्हावा. मैदान परिसरात रात्रीच्या वेळी होणारी नशेखोरी बंद करण्यासाठी संबंधित विभागाने तातडीने पाऊले उचलावेत.
- संदीप कुलकर्णी, कार्यकर्ते, आमची संस्कृती प्रतिष्ठाण
मोबाइल अॅप डाउनलोड करा आणि राहा अपडेट
