हुंड्याच्या चिंतेने घेतला शीतलचा बळी

April 15, 2017, 5:37 am

≫ Next: वय वाढलं की हुंडा वाढतो म्हणून...

≪ Previous: घाटीत ५८ नव्हे फक्त ४५ रक्षक !

$

0

0

मटा ऑनलाइन वृत्त । लातूर

हुंडा देण्यासाठी वडिलांकडे पैसे नसल्याने लातूरमधील एका शेतकऱ्याच्या २१ वर्षीय मुलीने विहिरीत उडी घेऊन आत्महत्या केल्याचा धक्कादायक प्रकार घडला आहे. जिल्ह्यातील भिसे वाघोली गावात ही घटना घडली. चिंतेची बाब म्हणजे या गावात गेल्यावर्षी अशाच कारणासाठी एका मुलीने आत्महत्या केली होती.

शीतल व्यंकट वायाळ असं आत्महत्या करणाऱ्या मुलीचं नाव आहे. शुक्रवारी तिने आपली जीवनयात्रा संपवली. मृत्यूआधी तिने एक चिठ्ठी लिहून ठेवली असून या चिठ्ठीत तिने मांडलेली व्यथा मन सून्न करणारी आहे.

दहावी झाल्यानंतर शिक्षण थांबवून शीतल आईसोबत घरातील कामं व शेतातील कामांमध्ये हातभार लावत होती. शुक्रवारीही ती आई-वडिलांसोबत सकाळीच शेतावर गेली होती. आठच्या सुमारास विहिरीवरून पाणी पिऊन येते असं सांगून गेलेली शीतल परतलीच नाही. शीतल बराच वेळ झाला तरी परत न आल्याने आईला चिंता वाटू लागली. शीतलला मोठमोठ्याने हाका मारूनही तिने प्रतिसाद दिला नाही. इतक्यात शेजारी शेत असलेल्या दिलीप पाटील यांना विहिरीत शीतलचा मृतदेह दिसला आणि सगळ्यांनाच धक्का बसला.

शीतलचे वडील व्यंकट वायाळ यांची जवळपास ५ एकर जमीन आहे. मात्र, गेल्या पाच वर्षांपासून दुष्काळ पाचवीला पुजलेला असल्याने वायाळ यांची आर्थिक स्थिती हलाखीची बनली. त्यात यंदा दीड एकरातील ऊसही पाण्याअभावी हातचा गेला. बँकांचं कर्ज व उसनवारी वाढून त्यांची पुरती कोंडी झाली. तीनपैकी दोन मुलींची लग्नं त्यांनी साधेपणाने उरकलीही पण शीतलचं लग्न हुंड्यासाठीच लांबलं होतं. याच विवंचनेतून वडिलांवरील भार हलका करण्यासाठी शीतलने टोकाचा निर्णय घेतला असं तिने लिहून ठेवलेल्या चिठ्ठीवरून स्पष्ट होत आहे.



मोहिनी प्रकरणाची पुनरावृत्ती

जानेवारी २०१६ मध्ये भिसे वाघोली गावातच मोहिनी भिसे या तरुणीने हुंड्यामुळे आत्महत्या केली होती. मुलगी पाहायला आले की सर्वात आधी हुंडा किती देणार असं विचारलं जातं. प्रत्येकाला हुंडा हवा असतो. ही प्रथा बंद झाली पाहिजे. प्रत्येकवेळी मुलीच्या वडिलांनीच का झुकायचे?, असा सवाल मोहिनीने आत्महत्येआधी लिहून ठेवलेल्या चिठ्ठीतून विचारला होता. या घटनेने हा गाव संपूर्ण राज्यात चर्चेत आला होता. दरम्यान, ग्रामसभेने यापुढे 'कुणी हुंडा घेणार नाही, कुणी हुंडा देणार नाही', असा ठराव तेव्हा केला होता. मात्र, या ठरावाला शीतलच्या आत्महत्येने एकप्रकारे मूठमातीच मिळाली आहे. भिसे वाघोली गावावर आणखी एका आत्महत्येचा कलंक लागला आहे.

मोबाइल अॅप डाउनलोड करा आणि राहा अपडेट

---

वय वाढलं की हुंडा वाढतो म्हणून...

April 15, 2017, 2:06 pm

≫ Next: मुख्य लेखाधिकारीपदी पालिकेत रामप्रसाद सोळुंके

≪ Previous: हुंड्याच्या चिंतेने घेतला शीतलचा बळी

$

0

0

म. टा. विशेष प्र‌तिनिधी, शिरूर कासार (बीड)

बीड जिल्ह्यातील शिरूर, पाटोदा, धारूर, आष्टी, वडवणी या बालाघाटातल्या तालुक्यांमध्ये दुष्काळ कायम मुक्कामाला असल्याने कर्जबाजारीपणा पाचवीला पुजलेला. खासगी सावकारांचा सुळसुळाट. लहान मुलींना कमी हुंडा. वय वाढलं की लग्न जमत नाही, हुंडा वाढतो म्हणून मुलगी ‘वेळेत’ सासरी पाठवायची मानसिकता इथे आढळते.

लग्नात कर्ज काढावंच लागतं. लग्नात ऊसतोडीची उचल, वरून कर्जही संपतं. ‘पदरात दोन-तीन पोरी असल्या की आई-बापाचं आयुष्य कर्जातच संपतंय’, पुतण्यांच्या लग्नांत झालेल्या कर्जात बुडून आत्महत्या केलेल्या तरुण शेतकऱ्याची विधवा पत्नी आरती सांगत होती. तेराव्या वर्षी लग्न झालेल्या आरतीच्या पदरी एकोणिसाव्या वर्षी तीन मुलं होती! आता मुलांना घेऊन ती शांतिवन संस्थेत राहते.

दुष्काळामुळे या हंगामात ऊस कमी होता. कारखाने जेमतेम दोन महिने चालले. लोक लवकर परतले. मुकादमाकडून घेतलेली उचल अर्धीही फिटली नाही. ‘आता पुढची दोन वर्षे ते फेडण्यात जातील’, शीतलच्या सासूबाई काळजीने सांगतात.

पण म्हणून बालाघाटातले बालविवाह थांबलेले नाहीत. ही बातमी लिहित असताना लेक लाडकी अभियानाच्या कार्यकर्त्यांनी प्रयत्न करून, पोलिसांना सूचना देऊनही पांगरी गावातल्या मुलीचं लग्न लागल्याची बातमी येतेय. कार्यकर्त्यांना मिळालेल्या जन्म दाखल्यात तिचं वय १५ आहे!

मोबाइल अॅप डाउनलोड करा आणि राहा अपडेट

मुख्य लेखाधिकारीपदी पालिकेत रामप्रसाद सोळुंके

April 15, 2017, 2:30 pm

≫ Next: शिपायाने शेतात पुरलेले बॅँकेचे सोळा लाख जप्त

≪ Previous: वय वाढलं की हुंडा वाढतो म्हणून...

$

0

0

म. टा. प्रतिनिधी, औरंगाबाद
महापालिकेच्या मुख्य लेखाधिकारीपदी रामप्रसाद सोळुंके यांची नियुक्ती करण्यात आली आहे. सध्या स्थानिक स्वराज्य संस्था विभागात काम करणाऱ्या सोळुंके यांच्या बदलीचे आदेश शासनाने काढले आहेत. तेथील काम लवकरात लवकर संपवून महापालिकेत रुजू व्हा, असे त्यांच्या आदेशात नमूद करण्यात आले आहे.
महापालिकेचे प्रभारी मुख्य लेखाधिकारी संजय पवार यांना आयुक्त ओम प्रकाश बकोरिया यांनी निलंबित केले आहे. त्यांना निलंबित करण्यापूर्वीच बकोरिया यांनी शासनाशी पत्रव्यवहार करून प्रतिनियुक्तीवर काही अधिकारी देण्याची विनंती केली. त्यात मुख्य लेखाधिकारीपदाचाही समावेश होता. त्यानुसार सहा महिन्यांपूर्वी रामप्रसाद सोळुंके महापालिकेत रुजू होण्यासाठी आले होते, पण कोर्टाच्या आदेशाची प्रत दाखवून त्यांना परत पाठवण्यात आले. शासनाने आता पुन्हा त्यांचीच बदली पालिकेच्या मुख्य लेखाधिकारीपदावर केली आहे. सूत्रांनी दिलेल्या माहितीनुसार; सोळुंके यांना बदलीचे आदेश देण्यात आले आहेत. सोळुंके सध्या औरंगाबादेतच स्थानिक स्वराज्य संस्था विभागात काम करीत आहेत. तेथील काम लवकर संपवून महापालिकेत रुजू व्हा, असे त्यांच्या बदलीच्या आदेशात नमूद करण्यात आले आहे.
उत्तम चव्हाण दोन वर्षापूर्वीपर्यंत महापालिकेत प्रतिनियुक्तीवर मुख्य लेखाधिकारी म्हणून कार्यरत होते. त्यांची बदली झाल्यावर संजय पवार यांच्याकडे या पदाचा अतिरिक्त कार्यभार होता. पवारांच्या निलंबनामुळे हे पद रिक्तच होते. मुख्य लेखा परीक्षक दीपाराणी देवतराज यांच्याकडे मुख्य लेखाधिकारीपदाचा अतिरिक्त कार्यभार देण्यात आला होता. देवतराज यांच्याकडे हा पदभार देण्यास अनेक नगरसेवकांनी आक्षेप घेतला होता.

मोबाइल अॅप डाउनलोड करा आणि राहा अपडेट

शिपायाने शेतात पुरलेले बॅँकेचे सोळा लाख जप्त

April 15, 2017, 2:30 pm

≫ Next: स्टेशनमध्ये एटीव्हीएम मशीन

≪ Previous: मुख्य लेखाधिकारीपदी पालिकेत रामप्रसाद सोळुंके

$

0

0

म. टा. प्रतिनिधी, पैठण
बुलडाणा अर्बन बँकेच्या पाचोड शाखेतील साडेसोळा लाख रुपयांच्या चोरीचा उलगडा झाला आहे. बँकेच्या शिपायाने ही रक्कम शेतात पुरली होती. पोलिसांनी संपूर्ण रक्कम हस्तगत केली आहे.
बँकेचे दिवसभराचे कामकाज संपल्यावर, सहा एप्रिलला स्ट्रॉँगरूममध्ये ठेवलेल्या १६,५०,४२० रूपयांपैकी १६,५०,४१० रूपये गायब झाल्याचे बँकेच्या कर्मचाऱ्यांना आढळून आले होते. पोलिस व बँकेच्या वरिष्ठांनी घटनास्थळाची पाहणी केल्यानंतर चोरीचे कोणतेही पुरावे सापडले नाहीत. स्ट्रॉँग रूमची चावी असलेल्या रोखपाल एकनाथ सुदाम चव्हाण आणि शिपाई कृष्णा विष्णू एरंडे यांच्या विरोधात अखेर संशयित म्हणून पाचोड पोलिस ठाण्यात गुन्हा दाखल करण्यात आला.
पाचोड पोलिसांनी दोघांना पैठण कोर्टात उभे केले होते. कोर्टाने त्यांना पंधरा एप्रिलपर्यंत पोलिस कोठडी सुनावली होती. पोलिसांनी कसून चौकशी केली व पोलिसी खाक्या दाखवताच शिपाई एरंडे याने चोरीची कबुली दिली. चोरीनंतर त्याने पाण्याच्या जारमध्ये रक्कम अंबड फाट्याजवळील एका शेतात खड्डा करुन पुरली होती. त्याने शुक्रवारी रात्री पोलिसांना ती जागा दाखवली. पोलिसांनी पंचासमोर रक्कम हस्तगत केली.
पोलिस अधीक्षक नवीनचंद्र रेड्डी, अप्पर पोलिस अधीक्षक उज्ज्वला वनकर. पैठणचे सहाय्यक पोलिस अधीक्षक बच्चनसिंग यांच्या मार्गदर्शनाखाली पाचोड ठाण्याचे सहाय्यक पोलिस निरीक्षक महेश आंधळे, पोलिस कर्मचारी नरेंद्र आंधळे, रामराव आडे, अनिरुद्ध पवार, रामदास अराख, गोपाळघरे, जीवन गुडेकर, लक्षण बोराडे, राजू राठोड आदींनी गुन्हा उघड केला..

मोबाइल अॅप डाउनलोड करा आणि राहा अपडेट

स्टेशनमध्ये एटीव्हीएम मशीन

April 15, 2017, 2:30 pm

≫ Next: स्पर्धेतून कल्पकतेचे दर्शन

≪ Previous: शिपायाने शेतात पुरलेले बॅँकेचे सोळा लाख जप्त

$

0

0

म. टा. प्रतिनिधी, औरंगाबाद
प्रवाशांना तिकीट देण्यासाठी औरंगाबाद रेल्वे स्टेशनच्या जुन्या इमारतीमध्ये ऑटोमॅटिक तिकीट व्हेंडिंग मशीन (एटीव्हीएम) बसविण्यात आली. त्यामुळे जुन्या इमारतीमध्ये तिकीट घेण्याची सुविधा उपलब्ध झाली आहे.
औरंगाबाद रेल्वे स्टेशनची नवीन इमारत बांधण्यात आली आहे. त्यानंतर जुन्या इमारतीमधील बुकिंग काउंटर नवीन इमारतीमध्ये स्थलांतरित करण्यात आले. यामुळे जुन्या इमारतीमध्ये आलेल्या प्रवाशांना तिकीट घेण्यासाठी फलाट क्रमांक एक वरून नवीन इमारतीत जाऊन तिकीट खरेदी करावे लागत होते. यामुळे अनेकदा तिकिट घेण्यासाठी जाणाऱ्या प्रवाशांवर प्लॅटफॉर्म तिकीट न काढता स्टेशनमध्ये प्रवेश केल्याने दंडात्मक कारवाई केली जात होती. यामुळे जुन्या इमारतीत एटीव्हीएम बसविण्याची मागणी विविध रेल्वे संघटनांकडून करण्यात आली होती. रेल्वे विभागाने स्टेशनच्या जुन्या इमारतीत एक एटीव्हीएम मशीन बसविण्याचे आदेश नांदेड रेल्वे विभागाचे विभागीय व्यवस्थापक डॉ. ए. के. सिन्हा यांनी दिले होता. शनिवारी रेल्वे स्टेशनच्या जुन्या इमारतीत एटीव्हीएम मशीन बसविण्यात आले आहे. या मशीनमधून अनेक प्रवाशांनी तिकीट घेऊन प्रवास केला.

एका मशीनची जागा बदलली
रेल्वे स्टेशनच्या नवीन इमारतीत तीन एटीव्हीएम मशीन लावण्यात आले होते. जुन्या इमारतीत एटीव्हीएम मशीन बसविण्याची मागणी झाल्यानंतर प्रशासनाने तीन मशीनपैकी एक मशीन जुन्या इमारतीत बसविले आहे. नवीन मशीन जुन्या इमारतीत बसविण्याऐवजी एका मशीनची जागा बदलून प्रवाशांना सुविधा देण्याचा प्रयत्न रेल्वे विभागाकडून करण्यात आला आहे.

मोबाइल अॅप डाउनलोड करा आणि राहा अपडेट

स्पर्धेतून कल्पकतेचे दर्शन

April 15, 2017, 2:30 pm

≫ Next: सर्व्हिस रोडकडे पालिकेची पाठ

≪ Previous: स्टेशनमध्ये एटीव्हीएम मशीन

$

0

0

म. टा. प्रतिनिधी, औरंगाबाद
स्वंयचलित अभियांत्रिकी हिट ट्रान्स्फार्मर, रोबोट मेकिंगसह सोलार सिस्टिमची प्रक्रिया कशी चालते इथपासून ते ऑटोमॅटिक ब्रेक फेल्व्युवर सिस्टिम कशी असते, अशा नवनवीन कल्पना प्रकल्पातून विद्यार्थ्यांनी मांडल्या. शनिवारी झालेल्या ‘श्रीयश यंत्राज्’ प्रकल्प स्पर्धेत ४५ प्रकल्पांचे सादरीकरण झाले.
श्रीयश अभियांत्रिकी कॉलेजच्या मेकॅनिकल इंजिनीअरिंग विभागाने या प्रकल्प स्पर्धेचे आयोजन केले होते. अंतिम वर्षाच्या विद्यार्थ्यांसाठी प्रकल्प स्पर्धेचे आयोजन करण्यात आले. विद्यार्थ्यांनी विविध प्रकल्प सादर केले. स्पर्धेत विविध विभागांच्या ४५ संघानी सहभाग नोंदविला. ज्यामध्ये स्वंयचलित अभियांत्रिकी हिट ट्रान्सफॉर्मर, इंटरनेट ऑफ थींग, रोबोट मेकिंगसह ऑटोमॅटिक ब्रेक फेल्व्यूवर सिस्टिम, कंबाइन्ड विंड मिल टरबाइन, सोलार ड्रायर, वेस्ट प्लास्टिक डिस्पोजल सिस्टिम अशा प्रकल्पांचा समावेश होता. उद्योजक आर. बी. कुलकर्णी यांच्याहस्ते प्रकल्प स्पर्धेचे उद्घाटन झाले. अनुराग कल्याणी, ए. एन. कुलकर्णी, विजय साळवे, एस. पी. रत्नपारखी, अमोल दडपे, अनिरुद्ध भुजबळ, एस. पी. अंबेकर, माधव भाले, व्ही. एस. बिचेवार, नितीन ढगे, डॉ. उत्तम काळवणे, डॉ. एम. एस. कदम, डॉ. अशोक केचे यांची प्रमुख उपस्थिती होती. अभियांत्रिकीतील प्रकल्प व प्रदर्शन स्पर्धेसाठी औद्योगिक क्षेत्रातील विविध पदावर कार्यरत १५पेक्षा अधिक तज्ज्ञांनी सहभाग घेत विद्यार्थ्यांना मार्गदर्शन केले. प्रास्ताविक प्राचार्य डॉ. आर. पवार यांनी केले. प्रा. दीपक पवार यांनी सूत्रसंचालन केले व आभार मानले. विभागप्रमुख प्रा. गोविंद ढगे, प्रा. विलास पाटील, प्रा.मंगेश शेंडे, प्रा. कपील पाटील, प्रा. गौरव देशपांडे, प्रा. नितेश काथार, प्रा. जनार्धन भोर, प्रा. अमोल अडकिणे, प्रा. आशिष उमरकर, प्रा. दिपक देशमुख, प्रा. कमलाकर नेमाडे, प्रा. मंगेश सिरसाट, प्रा. अजय इंगळे, प्रा. नागेश डोंगरे यांनी कार्यक्रम यशस्वीतेसाठी परिश्रम घेतले.

हे प्रकल्प ठरले अव्वल
‘श्रीयश यंत्राज्’ स्पर्धेत एकूण ४५ संघांनी सहभाग नोंदविला. स्पर्धेत सहभागी प्रकल्पांपैकी यशस्वी ठरलेली प्रकल्पांची यादी जाहीर करण्यात आली. स्पर्धेमध्ये ऑटोमॅटिक ब्रेक फेल्व्यूवर सिस्टिम या प्रकल्पाने प्रथम क्रमांक पटकाविला. कंबाइन्ड विंड मिल टरबाइन या प्रकल्पाला द्वितीय पारितोषिक मिळाले. तृतीय पारितोषिक सोलार ड्रायर व वेस्ट प्लास्टिक डिस्पोजल सिस्टिम यांना विभागून देण्यात आले

मोबाइल अॅप डाउनलोड करा आणि राहा अपडेट

सर्व्हिस रोडकडे पालिकेची पाठ

April 15, 2017, 2:30 pm

≫ Next: कोऱ्या ठरावावर सह्या!

≪ Previous: स्पर्धेतून कल्पकतेचे दर्शन

$

0

0

म. टा. प्रतिनिधी, औरंगाबाद
मृत्यूचा सापळा म्हणून ओळखल्या जाणाऱ्या बीड बायपासला सर्व्हिस रोड देण्यासंदर्भात जिल्हाधिकाऱ्यांनी तीन दिवसांपूर्वी पुढाकार घेत सर्व संबंधित विभागांची बैठक शनिवारी बोलावली होती. जिल्हाधिकारी कार्यालयातील बैठकीसाठी सार्वजनिक बांधकाम विभाग, जागतिक बँक प्रकल्प विभाग आणि महापालिकेच्या अधिकाऱ्यांना बोलाविण्यात आले होते. त्यात पालिकेकडून कोणीही उपस्थित झाले नाही.
निवासी उपजिल्हाधिकारी विश्वंभर गावंडे यांच्या दालनात शनिवारी सकाळी बैठक झाली. जागतिक बँक प्रकल्प विभागाच्या कार्यकारी अभियंता अरुंधती शर्मा, सार्वजनिक बांधकाम विभागाचे उपअभियंता के. जी. गायकवाड आदींसह अधिकारी उपस्थित होते. पालिकेकडून मात्र कुणीच उपस्थित नव्हते.
बीड बायपास रस्त्यावर अपघातांचे प्रमाण वाढले आहे. चार दिवसांपूर्वी गुरू लॉन्स परिसरात दुचाकीस्वार पती -पत्नींचा मृत्यू झाला. यापूर्वी एमआयटी कॉलेज परिसरात लहान मुलगी, कॉलेज विद्यार्थिनीचा मृत्यू झाला होता. वाढते अपघात कमी करण्यास प्रशासनाला अपयश येत असल्यामुळे नागरिकांनी निवेदन देऊन बीड बायपासला सर्व्हिस रोड असावा, अशी मागणी केली होती. जिल्हाधिकारी डॉ. निधी पांडेय यांनी यात पुढाकार घेऊन बैठक आयोजित केली. शनिवारच्या बैठकीत बीडबायपास, महानुभा‍‍व आश्रम चौक ते पैठण लिंक रोड, रेल्वेस्टेशन उड्डाणपुलाच्या परिसरातील रस्ता या तीन रस्त्यांच्या अडचणींवर चर्चा झाली. तिन्ही रस्त्यांवरील कोंडी होणारी ठिकाणे, आवश्यक त्या ठिकाणी सर्व्हिस रोड करता येईल की नाही याचे सर्वेक्षण करण्याची सूचना गावंडे यांनी केली. पण तिन्ही जागा महापालिकेच्या ताब्यात असल्याने या रस्त्यांचे सर्वेक्षण करणार कोण, असा प्रश्न निर्माण झाला आहे.

बीड बायपासची अडचण
महानुभाव चौक ते पैठण लिंक रोड रस्त्यांचे काँक्रिटीकरण करण्यात येत आहे. सहा पदरी रस्त्यालगत सर्व्हिस रोडची तरतूद करण्यात आल्याचे सार्वजनिक बांधकाम विभागाच्या अधिकाऱ्यांनी सांगितले. बीड बायपासला सर्व्हिस रोड करण्यासंदर्भात चर्चा झाली. या रस्त्याचे सर्वेक्षण करण्यासंदर्भात गावंडे यांनी जागतिक बँक प्रकल्प विभागाच्या अधिकाऱ्यांना सूचना केली. बीड बायपास या विभागांतर्गत ‘बांधा, वापरा व हस्तांतरित करा’ या तत्वावर (बीओटी) बांधला गेला. ३० मीटर रुंदीच्या रस्त्याच्या लगत असलेली जागा महापालिकेच्या ताब्यात आहे. त्यामुळे सर्वेक्षणाचे अधिकार महापालिकेला की जागतिक बँक प्रकल्पाला हा प्रश्न मात्र अनुत्तरित राहिला.

मोबाइल अॅप डाउनलोड करा आणि राहा अपडेट

कोऱ्या ठरावावर सह्या!

April 15, 2017, 2:30 pm

≫ Next: १२ वर्षांपासून ‘वॉटर ऑडिट’ला खो

≪ Previous: सर्व्हिस रोडकडे पालिकेची पाठ

$

0

0

म. टा. प्रतिनिधी, औरंगाबाद
ग्रामीण भागात विकासयोजनांच्या नावाखाली गैरव्यवहार कशा पद्धतीने केले जातात. याची अनेक उदाहरणे समोर येतात. एका ग्रामसेवकाने कोऱ्या ठरावावर ग्रामपंचायत सदस्यांच्या सह्या घेतल्याचा पुरावा शनिवारच्या जिल्हा विकास समन्वय व सनियंत्रण समिती बैठकीत सादर करण्यात आला. हे पाहून उपस्थित अधिकारी, लोकप्रतिनिधी अचंबित झाले. वारंवार तक्रार करूनही अधिकारी कारवाई करीत नसल्याचे तक्रारकर्त्यांनी सांगताच ग्रामसेवकाचे तत्काळ निलंबन करावे, असे आदेश खासदार चंद्रकांत खैरे यांनी दिले.
प्रतापपूरवाडी (ता. गंगापूर) येथील ग्रामसेवकाने हा प्रकार केल्याचे सिल्लेगाव प्रशांत बनसोड यांनी बैठकीत सादर केले. खासदार चंद्रकांत खैरे, जिल्हाधिकारी डॉ. निधी पांडेय, आमदार प्रशांत बंब, अतुल सावे, संदीपान भुमरे, जिल्हा परिषद अध्यक्ष अॅड. देवयानी डोणगावकर यांच्यासह सर्व विभागांचे अधिकारी उपस्थित होते.
बनसोड यांनी प्रतापपूरवाडी ग्रामपंचायतीच्या कारभाराचा नमुना सभेत मांडताना मासिक बैठकीचे रजिस्टर त्यांनी अध्यक्षांसमोर ठेवले. ग्रामसेवक कशा प्रकारे सदस्यांना अंधारात ठेवून कारभार करीत असल्याचे निदर्शनास आणून दिले.
संबंधित ग्रामसेवकाच्या कारभाराविरोधात गेल्या दोन वर्षांपासून तक्रारी केल्या जात आहेत, पाच ते सहा वेळा वरिष्ठांकडे तक्रार करूनही त्यावर काहीच कारवाई केली गेली नसल्याचे निदर्शनास आणून दिले. याप्रकरणी तत्काळ कारवाई करून ग्रामसेवकाचे निलंबन करण्याचे आदेश खासदार खैरे यांनी दिले.

दोन वर्षांपासून तक्रारी
नोव्हेंबर २०१६पासून कोणताही रितसर ठराव लिहिलाच नसल्याचे त्यात आढळून आले. सदस्यांच्या सह्या मात्र ठरावावर घेण्यात आल्या आहेत. नोव्हेंबर १६ ते मार्च २०१७पर्यंतचे मासिक बैठकीचे ठराव कोरे आहेत. बैठक कधी झाली, बैठकीत काय निर्णय घेतल्या गेले याबाबत एक अक्षरही लिहिलेले नाही, मात्र या ठरावावर ग्रामपंचायतीच्या ४ सदस्यांच्या सह्या आहेत. ही गंभीर बाब असून, या ग्रामसेवकावर कारवाई करावी, अशी मागणी बनसोड यांनी केली.

मोबाइल अॅप डाउनलोड करा आणि राहा अपडेट

---

१२ वर्षांपासून ‘वॉटर ऑडिट’ला खो

April 15, 2017, 2:30 pm

≫ Next: रात्र निवारागृहे २४ तास सुरू

≪ Previous: कोऱ्या ठरावावर सह्या!

$

0

0

unmesh.deshpande@timesgroup.com
Tweet : @UnmeshMT
औरंगाबाद ः वॉटर ऑडिट दरवर्षी करणे बंधनकारक आहे, मात्र महापालिकेने तब्बल एका तपापासून पाण्याचे ऑडिटच केले नाही. त्यामुळे पाणीपुरवठ्याच्या नावाखाली केला जाणारा खर्च, नॉन रेव्हेन्यू वॉटरचे प्रमाण, त्यामुळे होणारे महापालिकेचे नुकसान याबद्दल बारा वर्षांत कोणतीच ठोस पावले उचलण्यात आली नाही.
औरंगाबाद शहराला जायकवाडी येथील नाथसागरातून पाणीपुरवठा केला जातो. त्यासाठी ७०० व १४०० मिलीमीटर व्यासाच्या दोन जलवाहिन्या टाकण्यात आल्या आहेत. १९७५ व १९९१ अशा दोन टप्प्यांत या जलवाहिन्या कार्यान्वित करण्यात आल्या. पाणीपुरवठ्याची योजना महापालिकेतर्फे राबवण्यात येत असल्यामुळे दरवर्षी महापालिकेने पाणीपुरवठा योजनेचे ऑडिट करणे गरजेचे असते. सूत्रांनी दिलेल्या माहितीनुसार; महापालिकेने सर्वप्रथम २००५मध्ये वॉटर ऑडिट करून घेतले. त्यानंतर आतापर्यंत ऑडिट करण्यात आले नाही.
२००५मध्ये करण्यात आलेल्या वॉटर ऑडिटमध्ये नॉन रेव्हेन्यू वॉटरवर प्रामुख्याने भर देण्यात आला होता. जायकवाडीपासून नक्षत्रवाडीपर्यंत सुमारे ४५ किलोमीटरच्या अंतरावर दोन्ही जलवाहिन्यांना ठिकठिकाणी गळती लागल्याचे ऑडिटच्या वेळी लक्षात आले होते. या गळत्यांचा समावेश नॉन रेव्हेन्यू वॉटरमध्ये करण्यात आला. शहरात येणाऱ्या एकूण पाण्याच्या पाच ते आठ टक्के गळती ग्राह्य धरली जाते, परंतु प्रत्यक्षात गळतीचे प्रमाण २५ टक्के असल्याचे ऑडिटच्या वेळी लक्षात आले होते. सध्याही हेच प्रमाण कायम आहे, किंबहुना त्यात वाढ झाल्याचे चित्र आहे. मार्च महिन्यात झालेल्या महापालिकेच्या सर्वसाधारण सभेत आयुक्तांनी पाणीपुरवठ्याची वस्तुस्थिती स्पष्ट केली. जायकवाडीहून १५० ते १५५ एमएलडी (दशलक्ष लिटर रोज) पाणी उचलले जाते. शहरात मात्र ९० एमएलडी पाणीच येते, असे त्यांनी सांगितले होते. यावरून पाण्याच्या गळतीचे प्रमाण लक्षात येते.

सूत्रांनी दिलेल्या माहितीनुसार; २००५मध्ये करण्यात आलेल्या वॉटर ऑडिटमध्ये पंपिंगचा डिस्चार्ज वाढवणे, प्रत्येक नळकनेक्शनला मीटर लावणे, जास्तीतजास्त गळत्या बंद करणे यावर भर देण्यात आला होता. या तिन्ही क्षेत्रात ठोस काम करणे महापालिकेला अद्याप शक्य झाले नाही. वॉटर ऑडिटसंदर्भात शिवसेनेचे नगरसेवक नंदकुमार घोडेले यांनी महापालिकेच्या प्रशासनाला माहिती मागीतली आहे.

‘समांतर’चे कारण
२००५नंतर आतापर्यंत वॉटर ऑडिट का झाले नाही, याचा शोध घेण्याचा प्रयत्न केला असता २००५ - २००६पासून समांतर जलवाहनिची प्रक्रिया सुरू झाल्याचे कारण सांगितले जाते. समांतर जलवाहिनीचे कारण सांगितले जात असले तरी शहराचा पाणीपुरवठा २०१४मध्ये महापालिकेने समांतर जलवाहिनीचे काम करणाऱ्या कंपनीच्या ताब्यात दिला. तोपर्यंत पाणीपुरवठ्याचे काम महापालिकेचीच यंत्रणा करीत होती. त्यामुळे २००५ ते २०१४ या काळात महापालिकेने वॉटर ऑडिट करणे गरजेचे होते, असे मानले जाते.

मोबाइल अॅप डाउनलोड करा आणि राहा अपडेट

रात्र निवारागृहे २४ तास सुरू

April 15, 2017, 2:30 pm

≫ Next: अन् उलगडला लेखन प्रवास

≪ Previous: १२ वर्षांपासून ‘वॉटर ऑडिट’ला खो

$

0

0

म. टा. प्रतिनिधी, औरंगाबाद
शहरातील विविध रात्र निवारागृहांची महापालिका आयुक्त ओम प्रकाश बकोरिया यांनी शनिवारी अचानक पाहणी केली. केवळ रात्री सुरू ठेवण्यात येणारी रात्र निवारागृहे २४ सुरू ठेवण्याचे आदेश त्यांनी दिले. स्पर्धा परीक्षेची तयारी करणाऱ्या बेघर तरूणांना या निवारागृहात स्थान देण्याची सूचना त्यांनी अधिकाऱ्यांना केली.
रात्र निवारागृहांच्या देखभाल दुरुस्तीसाठी व तेथील साहित्य खरेदी करण्यासाठी महापालिकेला शासनाकडून अडीच कोटी रुपये मंजूर झाले आहे. येत्या काही दिवसांत ही रक्कम पालिकेच्या तिजोरीत जमा होईल. हा पैसा आल्यावर त्याचा विनियोग कसा करायचा, हे ठरविण्यासाठी बकोरिया यांनी काही अधिकाऱ्यांसह निवारागृहांची पाहणी केली. चिकलठाणा, सिडको एन ६, गांधीनगर व मोतीकारंजा येथील निवारागृहांना त्यांनी भेट दिली.
महापालिकेने शहराच्या विविध भागात दहा निवारागृहे सुरू केली आहेत. त्यापैकी चार निवारागृहांची पाहणी केल्यावर अनेक त्रुटी असल्याचे त्यांच्या लक्षात आले. निवारागृहात अनेक सुधारणा कराव्या लागतील, असे मत त्यांनी व्यक्त केले. शासनाकडून मिळणाऱ्या निधीतून निवारागृहांचा दर्जा सुधारण्याच्या दृष्टीने नियोजन करण्याची सूचना त्यांनी अधिकाऱ्यांना केली.
मोतिकारंजा येथील निवारागृहात दोन विद्यार्थी स्पर्धा परीक्षेचा अभ्यास करीत असल्याचे बकोरिया यांच्या लक्षात आले. त्यांनी या विद्यार्थ्यांची आस्थेवाईकपणे चौकशी केली. औरंगाबाद शहरात घर नसल्यामुळे निवारागृहात राहून अभ्यास करीत असल्याचे त्या विद्यार्थ्यांनी बकोरिया यांना सांगितले. निवारागृह रात्रीच सुरू राहतात त्यामुळे दिवसा अभ्यास करण्यासाठी निवारागृहाची जागा अपवादानेच उपलब्ध होते, ही बाबही विद्यार्थ्यांशी चर्चा करताना बकोरिया यांच्या लक्षात आली. त्यामुळे त्यांनी यापुढे निवारागृहे २४ तास सुरू ठेवण्याचे आदेश अधिकाऱ्यांना दिले.
निवारागृहाच्या पाहणीच्या वेळी कार्यकारी अभियंता सिकंदर अली, अफसर सिद्दिकी, राष्ट्रीय नागरी उपजीविका अभियानचे अधिकारी उदय जराड, सचिन बैनाडे उपस्थित होते.

अभ्यासासाठी स्वतंत्र कक्ष
प्रत्येक निवारागृहात विद्यार्थ्यांच्या अभ्यासासाठी स्वतंत्र कक्षाची उभारणी करण्याचे आदेश बकोरिया यांनी दिले. शासनाकडून मिळणाऱ्या निधीतून हे काम केले जाणार आहे. या कक्षात स्पर्धा परीक्षेसाठीची पुस्तके उपलब्ध करून दिली जाणार असून, आवश्यक ते फर्निचर देखील करून दिले जाणार आहे.

मोबाइल अॅप डाउनलोड करा आणि राहा अपडेट

अन् उलगडला लेखन प्रवास

April 15, 2017, 2:30 pm

≫ Next: कामे टाळणाऱ्यांवर कारवाई करा ः खैरे

≪ Previous: रात्र निवारागृहे २४ तास सुरू

$

0

0

म. टा. प्रतिनिधी, औरंगाबाद
‘प्रत्येक लेखकाला परंपरेने लिहिण्याचे संचित मिळतेच असे नाही. भाषेच्या चुंबकीय ओढीने लिहिते होणे घडावे लागते. घरातील अज्ञात गुणसूत्रे आणि शाळेची ज्ञात गुणसूत्रे यातून लेखन प्रवास घडला’ असे प्रतिपादन प्रसिद्ध साहित्यिक रमेश इंगळे-उत्रादकर यांनी केले. ‘माझ्या लेखन प्रेरणा’ या विषयावरील प्रकट मुलाखतीत ते बोलत होते.
दुसऱ्या राज्यस्तरीय शिक्षक साहित्य संमेलनाचे दुसरे सत्र प्रसिद्ध साहित्यिकांच्या प्रकट मुलाखतीने रंगले. कादंबरीकार रमेश इंगळे-उत्रादकर, कादंबरीकार कृष्णात खोत आणि कवयित्री संजीवनी तडेगावकर यांची कवी केशव खटींग व कवी संदीप जगदाळे यांनी प्रकट मुलाखत घेतली. लेखन प्रवास मांडताना साहित्यिकांनी चिंतनशील मांडणी केली. ‘नोकरीला लागल्यानंतर शाळेतील ग्रंथालयाची ओळख झाली. ग्रामीण साहित्य वाचून आपणसुद्धा काही लिहू शकतो असा आत्मविश्वास आला. माझे जगणे मला रचता येते का असा प्रश्न पडला पाहिजे. प्रत्येकजण घटना-प्रसंग रचत असतो. अर्थात, प्रत्येकजण मनात काहीतरी लिहितो आणि लेखक कागदावर उतरवतो एवढाच फरक आहे’ असे कृष्णात खोत म्हणाले.
‘निशाणी डावा अंगठा’ कादंबरी देशातील कोणत्याही योजनेवरची कादंबरी आहे. माझे लेखन जगण्याच्या जवळ ठेवतो. जगणे व लिहिण्यात अंतर ठेवत नाही’ असे रमेश इंगळे यांनी सांगितले. ‘शेतात फिरणे, निसर्ग न्याहाळणे लहानपणापासून आवडत होते. शिकण्याची आस्था नव्हती. उलट पुस्तकातील कविता खरी करण्यासाठी मनसोक्त भटकण्याचा छंद होता,’ असे संजीवनी तडेगावकर म्हणाल्या. ‘दप्तर’ या कवितेने रमेश इंगळे यांनी प्रकट मुलाखतीचा समारोप केला.

प्रत्येक काळात संकोच
‘लेखन संकोच ही गोष्ट प्रत्येक काळात घडली आहे. एखाद्याची स्पेस कमी करणे म्हणजे त्याला जास्त शक्यता पडताळून पाहण्याची संधी देणे असते. संत तुकारामांचा लेखन संकोच झाल्यानंतर त्यांनी शेकडो पिढ्यांना पुरेल एवढे साहित्य लेखन केले. लेखन संकोच म्हणजे शक्यता बळकट होणे याची व्यवस्थेला जाणीव नसते,’ असे परखड मत कृष्णात खोत यांनी मांडले.

मोबाइल अॅप डाउनलोड करा आणि राहा अपडेट

कामे टाळणाऱ्यांवर कारवाई करा ः खैरे

April 15, 2017, 2:30 pm

≫ Next: शेतीची मर्यादा १५ एकर ग्राह्य धरा

≪ Previous: अन् उलगडला लेखन प्रवास

$

0

0

औरंगाबाद : सरकारकडून जाहीर केलेल्या योजनांसाठी मोठ्या प्रमाणावर निधी प्राप्त होते. त्याचा योग्य उपयोग होण्यासाठी वेळेच्या आत कामे करा. विकासे कामे प्रलंबित ठेवणाऱ्या अधिकाऱ्यांवर थेट कारवाई करा, असे आदेश खासदार चंद्रकांत खैरे यांनी दिले.
जिल्हा विकास समन्वय व संनियंत्रण समितीची बैठक शनिवारी जिल्हाधिकारी कार्यालयात खासदार खैरे यांच्या अध्यक्षतेखाली झाली. आमदार प्रशांत बंब, अतुल सावे, संदीपान भुमरे, झेडपी अध्यक्ष अॅड. देवयानी डोणगावकर, जिल्हाधिकारी डॉ. निधी पांडेय,महापालिका आयुक्त ओम प्रकाश बकोरिया, झेडपीचे अतिरिक्त मुख्य कार्यकारी अधिकारी सुरेश बेदमुथा, विश्वंभर गावंडे, म्हाडाचे मुख्याधिकारी अनिल रामोड यांची प्रमुख उपस्थिती होती. जिल्ह्यातील विकास कामांसाठी केंद्र व राज्य सरकारच्या विविध योजनांतर्गत मोठ्या प्रमाणात निधी उपलब्ध करुन दिला जातो. त्याचा योग्य विनियोग करण्याच्या दृष्टीने अधिकारी, कर्मचारी कार्यवाही करत नाही. परिणामी अनेक कामे रखडतात. ही गंभीर बाब असून जिल्हाधिकाऱ्यांनी या प्रकरणातील संबंधितांकडून अंमलबजावणी अहवाल मागवून दोषींवर कारवाई करावी, ग्रामीण भागात पाण्याची परिस्थिती दिवसेंदिवस बिकट होत आहे. या नागरिकांना पाणी उपलब्ध करून द्यावे, तालुक्यातून टँकरची मागणी येताच गटविकास अधिकाऱ्यांनी या प्रस्तावाला मंजुरी देवून टँकर उपलब्ध करुन देण्यास प्राधान्य द्यावे. महात्मा गांधी ग्रामीण रोजगार हमी योजनेंतर्गत प्रलंबित कामे, झालेल्या कामांची राहिलेली देयके अदा करण्यात यावीत, अशी मागणी आमदार भुमरे यांनी केली. प्रधानमंत्री ग्राम सडक योजनेंतर्गत दर्जेदार कामे करणाऱ्या कंत्राटदारांनाच कामे द्यावीत. स्थानिक नागरिकांच्या तक्रारी असलेले; तसेच कामे प्रलंबित ठेवलेल्या कंत्राटदारांच्या कामाची तपासणी करून कारवाई करण्यात यावी, अशी मागणी आमदार बंब यांनी केली. अधिकारी, कर्मचाऱ्यांनी याकडे गांभीर्याने पाहावे, अशी सूचना खैरेंनी केली.

मोबाइल अॅप डाउनलोड करा आणि राहा अपडेट

शेतीची मर्यादा १५ एकर ग्राह्य धरा

April 15, 2017, 2:30 pm

≫ Next: मालमत्ता कराच्या वसुलीसाठी बडगा

≪ Previous: कामे टाळणाऱ्यांवर कारवाई करा ः खैरे

$

0

0

म. टा. प्रतिनिधी, औरंगाबाद
मराठवाड्यातील अल्पभूधारक शेतकऱ्यांची कमाल मर्यादा १५ एकर ग्राह्य धरण्यात यावी, अशी मागणी राष्ट्रवादी काँग्रेसचे आमदार सतीश चव्हाण यांनी मुख्यमंत्री देवेंद्र फडणवीस यांच्याकडे केली आहे.
मुख्यमंत्री देवेंद्र फडणवीस यांना दिलेल्या पत्रात आमदार चव्हाण यांनी म्हटले आहे की, ‘राज्यात पश्चिम महाराष्ट्र, कोकण, उत्तर महाराष्ट्र या विभागात सिंचनाची सोय झाल्याने येथील शेतकरी चांगले उत्पन्न घेताना दिसून येतात, मात्र मराठवाडा, विदर्भात सिंचनाचा अनुशेष अद्यापही पूर्ण झाला नसल्याने या भागातील शेतकऱ्यांना पर्जन्यवृष्टीवर अवलंबून राहावे लागते. परिणामी शेतकरी आत्महत्याचे प्रमाण मराठवाडा व विदर्भात अधिक आहे. दुष्काळी भाग म्हणून ओळखल्या जाणाऱ्या मराठवाडा व विदर्भात कोरडवाहू जमिनीचे प्रमाण इतर विभागापेक्षा जास्त आहे. त्यामुळे मराठवाड्यात १५ एकर जमीन असलेला शेतकरी वर्षाला जेवढे शेती उत्पादन घेतो त्यापेक्षा पश्चिम महाराष्ट्र, कोकण, उत्तर महाराष्ट्रातील दोन एकर शेती असलेला अल्पभूधारक शेतकरी अधिक उत्पादन घेत असल्याचे दिसून येते. मराठवाडा व विदर्भात कोरडवाहू जमीन अधिक असल्याने येथील शेतकऱ्यांना बँका कमी प्रमाणात कर्ज देतात, तर पश्चिम महाराष्ट्र व कोकणातील शेतकर्यांना बँका अधिक प्रमाणात कर्ज देतात. त्यामुळे कर्ज वाटपात देखील फार मोठी तफावत जाणवत असल्याचे आमदार चव्हाण यांनी म्हटले आहे.

कोकण, पश्चिम महाराष्ट्राला जास्त लाभ
राज्य सरकार महाराष्ट्रातील अल्पभूधारक शेतकऱ्यांचे कर्ज माफ करणार असल्याचे समजते, मात्र यामुळे पश्चिम महाराष्ट्र, उत्तर महाराष्ट्र व कोकणातील अल्पभूधारक शेतकऱ्यांचा फार मोठ्या प्रमाणात फायदा होणार आहे. त्यामुळे अल्पभूधारकाच्या व्याख्येत अंशत: बदल करणे गरजेचे आहे. पश्चिम महाराष्ट्र, कोकण, उत्तर महाराष्ट्र यासाठी अल्पभूधारकाची कमाल मर्यादा चार एकर असल्यास मराठवाडा व विदर्भातील अल्पभूधारकांची कमाल मर्यादा १५ एकर ग्राह्य धरण्यात यावी. जेणे करून मराठवाडा व विदर्भातील शेतकऱ्यांना याचा फायदा होईल. यासंदर्भात आपण सकारात्मक विचार करावा, अशी मागणी आमदार चव्हाण यांनी मुख्यमंत्र्यांकडे केली आहे.

मोबाइल अॅप डाउनलोड करा आणि राहा अपडेट

मालमत्ता कराच्या वसुलीसाठी बडगा

April 15, 2017, 2:30 pm

≫ Next: देशाची वाटचाल साम्राज्यवादाकडे

≪ Previous: शेतीची मर्यादा १५ एकर ग्राह्य धरा

$

0

0

म. टा. प्रतिनिधी, औरंगाबाद
मालमत्ता कराच्या दोन लाख तीन हजार डिमांड नोटीस तयार करण्यात आल्या असून, पालिकेच्या वॉर्ड कार्यालयांना सोमवारपासून त्याचे वाटप केले जाणार आहे. मे महिन्यात मालमत्ताधारकांपर्यंत नोटीस पोचवल्या जाण्याची शक्यता आहे.
नवीन आर्थिक वर्षात मालमत्ता कर वसुलीवर विशेष लक्ष देण्यात येणार असल्याचे आयुक्त ओम प्रकाश बकोरिया यांनी स्पष्ट केले होते. वर्षाच्या सुरुवातीपासूनच कर वसुलीचे काम केले जाणार असल्याचे सांगून त्यांनी या कामासाठी टास्क फोर्स नेमण्यात येणार असल्याचे सांगितले होते. त्यानुसार मालमत्ता कराच्या डिमांड नोटीसची छपाई करून घेण्यात आली आहे. सुमारे दोन लाख तीन हजार छापील डिमांड नोटीस शनिवारी महापालिकेला प्राप्त झाल्या. कम्प्युटर विभागाकडून या नोटीसची छपाई करण्यात आली. छापलेल्या नोटीस करमूल्य निर्धारक व संकलक विभागाच्या स्वाधीन करण्यात आल्या.
सोमवारपासून या नोटीसचे वाटप वॉर्ड कार्यालयनिहाय केले जाणार आहे. पुढील आठ दिवसांत डिमांड नोटीस वॉर्ड कार्यालयांमध्ये पोचवल्या जातील. त्यानंतर वॉर्ड कार्यालयांच्या माध्यमातून डिमांड नोटीस प्रत्येक मालमत्ताधारकापर्यंत पोचवल्या जाणार आहेत. पहिल्या तीन महिन्यांत नागरिकांना मालमत्ता कर भरला, तर त्यांना सामान्य करात सुमारे २५ टक्के सूट दिली जाते. तीन महिन्यांनंतर कर भरणाऱ्यांना प्रत्येक महिन्याला दोन टक्के व्याज भरावे लागणार आहे. मालमत्ता कर वसुलीचे २०१६-१७ या वर्षाचे उद्दिष्ट २९० कोटी रुपये ठरविण्यात आले होते. यापैकी १३० कोटी रुपयांची चालू वर्षाची वसुली होती, तर उर्वरित रक्कम थकबाकीच्या स्वरुपात होती. मालमत्ता कर वसुलीचे काम संथ गतीने झाल्यामुळे १३० कोटी रुपयांच्या वसुलीचे उद्दिष्ट शंभर कोटी रुपये करण्यात आले. शंभर कोटी रुपयांपैकी ८९ कोटी रुपये मार्च अखेरपर्यंत वसुल झाले. थकबाकी वसुल करण्याच्या कामाला पालिकेच्या यंत्रणेने हात लावला नाही. उद्दिष्टापेक्षा कमी वसुली झाल्यामुळे नवीन आर्थिक वर्षात सुरुवातीपासून मालमत्ता कराच्या वसुलीवर लक्ष केंद्रित करण्याचे ठरविण्यात आले आहे. पालिकेच्या प्रशासनाने नवीन आर्थिक वर्षात थकबाकीसह मालमत्ता कर वसुलीचे उद्दिष्ट २३० कोटी रुपये निश्चित केले आहे. गेल्या वर्षी हे २९० कोटी रुपये होते.

- २०१६-१७ वर्षाचे मालमत्ता कर वसुलीचे मूळ उद्दिष्ट ः २९० कोटी
- सुधारित उद्दिष्ट ः १०० कोटी
- प्रत्यक्ष झालेली वसुली ः ८९ कोटी
- नवीन आर्थिक वर्षात मालमत्ता कर वसुली उद्दिष्ट ः २३० कोटी
(मालमत्ता कर रुपयांत)

मोबाइल अॅप डाउनलोड करा आणि राहा अपडेट

देशाची वाटचाल साम्राज्यवादाकडे

April 15, 2017, 2:30 pm

≫ Next: मुलगी सातवी पास झाली? लग्नाचं बघा...

≪ Previous: मालमत्ता कराच्या वसुलीसाठी बडगा

$

0

0

म. टा. प्रतिनिधी, औरंगाबाद
‘सांस्कृतिक अंधारलेपण आल्यामुळे बिनधास्तपणे बोलू-लिहू शकत नसल्याची स्थिती आहे. सत्ता प्राप्तीसाठी लोकशाही मार्गाऐवजी राजकीय पक्ष इतर मार्गांचाच वापर करीत आहेत. पहिल्या महायुद्धानंतर जेत्या राष्ट्रांनी साम्राज्यवादाकडे वाटचाल केली आणि दुसरे महायुद्ध झाले. भारतातील प्रमुख पक्षांची वाटचाल साम्राज्यवादाच्या दिशेने सुरू आहे. यावरून भविष्यात काय घडेल हे सांगायला राजकीय विश्लेषकाची गरज नाही’ असे प्रतिपादन दुसऱ्या राज्यस्तरीय शिक्षक साहित्य संमेलनाचे अध्यक्ष बालाजी मदन इंगळे यांनी केले. ते अध्यक्षीय भाषणात बोलत होते.
यशवंतराव चव्हाण प्रतिष्ठान विभागीय केंद्र, शिक्षण विकास मंच आणि महात्मा गांधी मिशन यांच्या वतीने दुसरे राज्यस्तरीय साहित्य संमेलन आयोजित करण्यात आले आहे. एमजीएम कॅम्पसमधील रूक्मिणी सभागृहात शनिवारी संमेलनाचे उद्‍घाटन झाले. यावेळी अध्यक्ष इंगळे, राज्य साहित्य संस्कृती मंडळाचे अध्यक्ष बाबा भांड, ज्येष्ठ साहित्यिक रा. रं. बोराडे, साहित्यिक आसाराम लोमटे, प्रतिष्ठानचे अध्यक्ष नंदकिशोर कागलीवाल, स्वागताध्यक्ष आमदार विक्रम काळे, कवी दासू वैद्य, माजी आमदार किशोर पाटील, वसंत काळपांडे, दत्ता बाळसराफ, विजय कान्हेकर, नीलेश राऊत, बसंती रॉय यांची प्रमुख उपस्थिती होती.
साहित्य आणि सामाजिक वातावरणावर इंगळे यांनी अध्यक्षीय भाषणात भाष्य केले. ‘आपला जन्म लोकशाहीमध्ये झाला, मात्र आपण झुंडशाहीमध्ये राहतो. अनामिक भीती, अस्वस्थता आणि असुरक्षित वाटत आहे. लोकशाहीने दिलेले हक्क आणि अधिकार आपल्यासाठी नसल्याचे वाटते. निर्धोकपणे व्यक्त होता येत नाही. विनाअनुदानित शाळेतील शिक्षकांच्या मोर्चावर लाठीमार होतो आणि मंत्रालयात शेतकऱ्याला लाथाबुक्क्या खाऊन बाहेर यावे लागते. जिथे सामान्य माणसांचा आवाज दाबला जात असेल आणि व्यक्तिस्वातंत्र्य हिरावून घेतले जात असेल तिथे लेखक-कलावंतांना पुरस्कार परत करावे वाटणारच’ असे इंगळे म्हणाले.
माणसांचे जगणे केंद्रस्थानी ठेवून लिहिण्याची गरज आसाराम लोमटे यांनी व्यक्त केली. ‘लेखकाचे ह्दय विशाल मानवतेने ओतप्रोत भरलेले असते. लेखक कोणत्याही गटाचा, जातीचा आणि लिंगाचा नसतो. लिहिणारी माणसं सृजनाच्या विचाराने प्रेरित झालेली असतात. समाजाच्या जटील प्रश्नाची कोंडी फोडण्याचे काम शिक्षकांनी केले. विचारी समाज आतून हलेल असे लेखन करा,’ असे लोमटे म्हणाले.
‘जगण्याचे प्रश्न सुटल्याशिवाय मन भरून कला जोपासना करता येत नाही. या भयावह स्थितीत चांगले लेखन कसे होणार’ असा सवाल रा. रं. बोराडे यांनी केला.
दरम्यान, ‘साहित्य अकादमी’प्राप्त साहित्यिक आसाराम लोमटे, प्रा. रवी कोरडे व प्रा. विरा राठोड यांचा विशेष सत्कार करण्यात आला. डॉ. कुमुद बन्सल उत्कृष्ट शैक्षणिक ग्रंथ पुरस्काराने शारदा बर्वे, डॉ. राजा दांडेकर आणि डॉ. श्रुती पानसे यांचा सन्मान करण्यात आला. ‘धुळाक्षरे’ स्मरणिका, गिरीश जोशी लिखित ‘काव्यकस्तुरी’, ज्योती कपिले, काझी नासेर, दीपक ठाकूर, प्रज्ञा देशपांडे, विश्वनाथ ससे यांच्या पुस्तकांचे प्रकाशन करण्यात आले. भुसणे येथील जिल्हा परिषद शाळेतील विद्यार्थ्यांच्या ‘शब्दांकूर’ विशेषांकाचे मान्यवरांनी प्रकाशन केले. या कार्यक्रमाचे प्रास्ताविक नंदकिशोर कागलीवाल यांनी केले, तर महेश अचिंतलवार यांनी सूत्रसंचालन केले. यावेळी राज्यभरातील शिक्षक, साहित्यिक व रसिक उपस्थित होते.

ग्रंथदिंडीचा उत्साह
राज्यस्तरीय शिक्षक साहित्य संमेलनाची सुरूवात ग्रंथदिंडीने झाली. संत तुकाराम नाट्यगृह ते रूक्मिणी सभागृहापर्यंत दिंडी काढण्यात आली. शालेय विद्यार्थ्यांनी लेझीम खेळत दिंडीत रंग भरले. संमेलनाध्यक्ष बालाजी मदन इंगळे, स्वागताध्यक्ष विक्रम काळे व उद्‍घाटक बाबा भांड यांचे बैलगाडीतून संमेलनस्थळी आगमन झाले. फुगडी खेळून मान्यवरांनी संमेलनाचा उत्साह वाढवला. यावेळी ग्रंथ प्रदर्शन भरवण्यात आले आहे.

मोबाइल अॅप डाउनलोड करा आणि राहा अपडेट

---

मुलगी सातवी पास झाली? लग्नाचं बघा...

April 15, 2017, 3:38 pm

≫ Next: सिल्लोड तालुक्यात मग्रारोहयोला घरघर

≪ Previous: देशाची वाटचाल साम्राज्यवादाकडे

$

0

0

शिरूर कासार(बीड) : शिरूर तालुक्यात बडेवाडीची रूपाली. वडिलांचं छत्र हरवलेलं. गेल्या एप्रिलमध्ये दहावीची परीक्षा झाली आणि तिचं लग्न झालं. नवरा हमाल. दारू पिऊन मारहाण करायचा. एक दिवस चाकू घेऊन मागे लागला. दीपाली जीव वाचवायला माहेरी परत आली ती परतलेली नाही

वडवली तालुक्यातल्या चिंचवणच्या वस्तीवरची शीतल. सातवी पास झाली आणि गेल्या जुलैमध्ये लग्न झालं. तीनच महिन्यांत सासरच्या लोकांसोबत कर्नाटकात ऊस तोडायला जावं लागलं. ‘पहाटे चार वाजता शेतात कोयता घेऊन धावायचं. ऊस तोडून मोळ्या बांधून गाडीत टाकायच्या. दुपारी कोपीवर येऊन सैपाक, धुणी-भांडी. लय अवघड होतं सारं’, कसनुसं हसत ती सांगते.

रूपाली आणि शीतलसारख्या लग्न ठरलेल्या, झालेल्या, मोडलेल्या आणि विधवा झालेल्या शाळकरी वयाच्या मुली बालाघाटात गावागावांत दिसतात. उघड्या बोडक्या बालाघाट डोंगरांच्या आडोशाला पहुडलेल्या या तालुक्यांत दुष्का मुलगी सातवी पास झाली? लग्नाचं बघा...ळ कायमचा मुक्कामी. जमीन रेताड. खरीपाचं जमेल तेवढं पीक घेऊन दसरा झाला की बैलगाड्या जुंपून इथली ७५ टक्के जनता ऊस तोडणी कामगार म्हणून पश्चिम महाराष्ट्र, कर्नाटक, गुजरातेत जाते. बीडमधून ४ लाख लोक ऊस तोडायला बाहेर जातात, त्यात बालाघाटातले सर्वाधिक. चार ते सहा महिने तिकडेच. तान्ही लेकरं सोबत, जाणती घरी. वयात आलेली मुलगी गावात ठेऊन जाणं लोकांना असुरक्षित वाटतं. कारखान्यांवर उघड्यावर संसार. तिथे मुलगी सोबत असणं धोक्याचं. लग्न करून जबाबदारी संपवणं हा एकच पर्याय उरतो. ‘इपरीत झालं तर गरीबाच्या अब्रूचं खोबरं व्हतंय, पोरीच्या जातीचा जीवाला लय घोर’, मातोरी गावातल्या सुमन जरांगे सांगतात. बीडमध्ये बलात्कार, अपहरण या गुन्ह्यांचं प्रमाण प्रचंड आहे. त्यांची मुलगी शिकतेय, पण नातेवाईकांनी लग्नाचा तगादा लावलाय. पती आजारपणात गेल्यामुळे जबाबदारी अंगावर पडलेल्या सुमनबाई तणावात होत्या.

या पट्ट्यात वंजारी समाजाची लोकसंख्या मोठी. त्यांच्यात हुंड्याची मोठी प्रथा. तेच अनुकरण इतर समाजातही दिसतं. ‘पोरगं नावाला शिकल्यालं, ऊस तोडणारं असलं तरी लाखभर रुपय मोजावं लागतेत. नोकरदार आसंल तर तीन चार लाख’, वारणीचे पोलिस पाटील श्रीनिवास बोटे सांगत होते. ऊसतोडणीला एक कोयता म्हणजे एक जोडपं. पूर्ण कोयत्याला जास्त पैसे मिळतात. मुलगा जाणता झाला की त्याचं लग्न उरकायची घाई. पुष्कळदा मुलगाही २१ हून कमी वयाचा असतो!

मोबाइल अॅप डाउनलोड करा आणि राहा अपडेट

सिल्लोड तालुक्यात मग्रारोहयोला घरघर

April 16, 2017, 2:30 pm

≫ Next: ‘गुणवत्तेच्या पिकाला गैरहजेरीचा रोग’

≪ Previous: मुलगी सातवी पास झाली? लग्नाचं बघा...

$

0

0

म. टा. प्रतिनिधी, सिल्लोड
मागेल त्याला १०० दिवस हमीने रोजगार मिळेल या उद्दिष्टाने चालू असलेल्या महाराष्ट्र ग्रामीण रोजगार हमी योजनेवर तालुक्यातील ६० कामावर फक्त ६२० मजूर काम करत आहेत. अधिकारी व कर्मचाऱ्यांच्या उदासीनतेमुळे ही योजना फक्त नावालाच सुरू आहे.
महाराष्ट्र ग्रामीण रोजगार हमी योजनेच्या माध्यमातून गावातील मजुरांना गावाच्या हद्दीतच वर्षातून १०० दिव काम देण्याचे आश्वासन देण्यात आले आहे. सध्या शेतातील कामे संपली असून अनेक जण रोजगाराच्या शोधात आहेत. यंदा गारपीट होण्याच्या भीतीने शेतकऱ्यांनी गहू मळणी व सोंगणी हार्वेस्टर यंत्राद्वारे केली. त्यामुळे गावात मार्च महिन्यापासूनच कामाची कमतरता आहे. तालुक्यातील १२८ गावांपैकी फक्त १९ गावातच सध्या मग्रारोहयोची कामे सुरू आहेत. या कामांची संख्या ६० असून त्यावर फक्त ६२० मजूर काम करीत आहेत. आजच्या स्थितीत १११ गावात योजनेचे काम नाही. त्यामुळे काही वर्षांपूर्वी मोठ्या प्रमाणात मजुराच्या हाताला काम देणाऱ्या योजनेला तालुक्यात यंदा घरघर लागल्याचे दिसून येत आहे. काही वर्षांपूर्वी रोहयोत तालुक्यात झालेल्या गैरव्यवहारप्रकरणी तत्कालीन अधिकारी, कर्मचाऱ्यांवर गुन्हे दाखल झाले आहेत. त्यामुळे ही योजना तालुक्यात प्रभावीपणे राबविण्यास अधिकारी, कर्मचारी धजावत नाहीत.
तालुक्यातील वांगी, निल्लोड, गोळेगाव (खुर्द), पिरोळा, मांडणा, तांडागव्हाली, आमसरी, सारोळा, वांगी (खुर्द), शिवना, गोळेगाव (खुर्द), लिहाखेडी, केऱ्हाळा, पेंडगाव, बोरगावसारवणी, देऊळगावबाजार, उंडणगाव या गावांत वैयक्तिक सिंचन विहीरी, रस्ते, घरकुल आदी कामे सुरू आहेत. वैयक्तिक लाभाच्या योजनेवरच भर असल्यामुळे मंजुर संख्या दिसत आहे. दहा वैयक्तिक लाभाच्या सिंचन विहिरी, रस्त्याची दोन कामे, घरकुलाची पाच कामे सुरू आहेत.

मोबाइल अॅप डाउनलोड करा आणि राहा अपडेट

‘गुणवत्तेच्या पिकाला गैरहजेरीचा रोग’

April 16, 2017, 2:30 pm

≫ Next: शाळांची गुणवत्ता तपासणी थांबल

≪ Previous: सिल्लोड तालुक्यात मग्रारोहयोला घरघर

$

0

0

म. टा. प्रतिनिधी, औरंगाबाद
‘गुणवत्तेच्या पिकाला गैरहजेरीचा रोग आहे, बापाला ताप आला होता काल तुझं शाळेत न येण्याच कारण, गुरुजी ढोरं सोडायला कुणी नव्हत, आज तुझ्या घरी राहण्याची सबब...’ अशा एकाहून एक सामाजिक आणि ग्रामीण भागातील शाळेची स्थिती, शाळेतून गैरहजर राहण्याच्या कौटुंबिक परिस्थितीवर भाष्य करणाऱ्या कव‌ितांचे मुक्त कवी संमेलन रविवारी रंगले.
राज्यस्तरीय शिक्षक साहित्य दुसऱ्या दिवशी पहिल्या सत्रात कवी कट्टा (मुक्त कवी संमेलन) पार पडले. या कट्ट्यावर राज्यभरातून आलेल्या शिक्षकांनी उत्स्फर्त सहभागी नोंदवला. संमेलनाची सुरुवातच ‘ताप’ या कवितेने करण्यात आली. शेतीच्या हंगामात ग्रामीण भागातील मुले शाळा कशी बुडवतात याचे वास्तव या कवितेत मांडण्यात आले. जया तायडे यांनी ‘घात’ या कवितेतून ‘आई नको करूस घात, मी तर तुझ्या जीवनाची वात’ ही स्त्रीभ्रुण हत्येवरील कविता सादर केली. किशोर बडवे यांनी ‘उम्मीदे’ मधून नोटबंदीनंतर निर्माण झालेल्या स्थितीवर भाष्य केले. ‘बहोत उम्मीदे रखी थी हमने आपसे, कुछ पलके लिए हमारे पैसे लुटे गये’ या शद्बात त्यांनी सामान्याची फरफट व्यक्त केली. विवेक कोळसुरे यांनी ‘भ्रष्ट झाली नीतीमूल्ये, भ्रष्ट झाल्या संवेदना’, कालीदास चौडेकर यांनी ‘रोज येथे युद्ध केले पाहिजे, अन् स्वत:ला सिद्ध केले पाहिजे’ ही गजल सादर केली. आधुनिक काळात स्त्रियांवरील अन्याय करणाऱ्यांवर कोरडे ओढणारी ‘ती’ सध्या काय करते, ही कविता कस्तुरी कुलकर्णी यांनी सादर केली. या कवितेत ‘ती लढते स्वत:च्या जीवाशी भोगते असंख्य वेदना ’ या शब्दातून अनेकांना आंतरमुख केले. कस्तुरी कुलकर्णी, गिरीश जोशी यांनी सूत्रसंचालन केले. त्यापूर्वी कथाकथन घेण्यात आले. अनिता येलमटे यांनी ‘गुरुजी सर झाले’, एकनाथ आव्हाड यांनी ‘माझ्या गावची कहान’, तर संभाजी आंधळे यांनी ‘महारु’ आदी कथा सादर केल्या.

मोबाइल अॅप डाउनलोड करा आणि राहा अपडेट

शाळांची गुणवत्ता तपासणी थांबल

April 16, 2017, 2:30 pm

≫ Next: मांगीरबाबा यात्रेहून परतताना अपघात

≪ Previous: ‘गुणवत्तेच्या पिकाला गैरहजेरीचा रोग’

$

0

0

म. टा. प्रतिनिधी, औरंगाबाद
शाळांच्या गुणवत्ता तपासणीसाठी सुरू करण्यात आलेला शाळा सिद्धी उपक्रम शिक्षण विभागाला अर्धवट सोडावा लागला आहे. पहिल्या टप्प्यात राज्यातील १८०० शाळांची तपासणी करण्याची सुरू झालेली प्रक्रिया अर्ध्यावर सोडावी लागली आहे. उन्हाचे कारण शिक्षण विभाग पुढे करत असले, तरी शाळांचा आक्षेप आणि तपासणीसाठी प्रशिक्षित शिक्षकांची कमतरता यामुळे गुणवत्ता तपासणी यंदा कागदावरच राहणार आहे.
राज्यातील सर्व शाळांचे मूल्यांकन व प्रमाणीकरण करून शाळांचा दर्जा ठरविण्यात येणार होता. त्यात पहिल्या टप्प्यात शाळांना स्वयंमूल्यमापन करायचे होते. त्यात अनेक शाळांनी ‘अ’ दर्जाच पात्र असल्याचे स्पष्ट केले. राज्यात ‘अ’ गटात ९ हजार ३०० शाळा आहेत. त्यासह इतर गटांतील शाळा आहेत. त्याला अनेक शाळांनी खो दिला. स्वयंमूल्यमापनानंतर राज्यातील शाळांचे शिक्षण विभागाकडून तपासणी करत ग्रेड दिले जाणार होते. पहिल्या टप्प्यात १८०० शाळांची यादी काढण्यात आली. त्यात औरंगाबाद विभागात २०० शाळांचा समावेश आहे. या शाळांची तपासणीची प्रक्रिया सुरू करण्यात आली. ही तपासणी अर्धवट सोडण्याची वेळ शिक्षण विभागावर आली आहे. त्यामुळे शाळांची गुणवत्ता तपासणीबाबत आग्रही असलेल्या सरकारच्या धोरणाला धक्का बसला आहे. या उपक्रमाबाबत अनेक शाळांची अनास्था समोर आल्याने शिक्षण विभागावर ही वेळ आल्याची चर्चा आहे.

नवीन वर्षाचे वेळापत्रक
शिक्षण विभागाकडून एप्रिलमध्ये मूल्यमापन केले जाणार होते. त्याचे वेळापत्रक तयार करण्यात आले. त्यात १२ एप्रिलपर्यंत प्रक्रिया पार पडली. पुढची प्रक्रिया रद्द करण्यात करण्यात आली आहे. शाळांना प्रथम स्वयंमूल्यांकन करायचे असते. त्यात सोयीसुविधा, निकाल अशा विविध सात क्षेत्रांतील ९९९ गुणांची चाचणी असेल. त्या गुणवत्तेवर ‘अ’, ‘ब’, ‘क’, ‘ड’ असे चार गट तयार करण्यात येणार आहेत. हे मानांकन पाच वर्षांसाठी वैध असेल.

तपासणीसांचा तुटवडा
स्वयंमूल्यमापनामध्ये ९० टक्क्यांपेक्षा अधिक गुण असलेल्या शाळांची एका त्रयस्थ यंत्रणेमार्फत फेरतपासणी करण्यात येणार आहे. त्यासह इतर शाळांचीही तपासणी होणार होती. त्यामध्ये राज्य निर्धारक ही तपासणी करणार होते. राज्यात असे १३२ निर्धारकही शिक्षण विभागाने नेमले आहेत. मूल्यांकनामुळे शाळांचा दर्जा, गुणवत्ता विद्यार्थी, पालकांना समजणार आहे. असे असले तरी निर्धारकांची अपुरी संख्या, प्रशिक्षणाचा अभाव यांमुळे ही मोहीम अर्धवट राहिल्याचे सूत्रांनी सांगितले.

मोबाइल अॅप डाउनलोड करा आणि राहा अपडेट

मांगीरबाबा यात्रेहून परतताना अपघात

April 16, 2017, 2:30 pm

≫ Next: अ. भा. साहित्य संमेलन फक्त उत्सवापुरते

≪ Previous: शाळांची गुणवत्ता तपासणी थांबल

$

0

0

म. टा. प्रतिनिधी, औरंगाबाद
शेंद्रा येथील मांगीरबाबा यात्रेहून गावी परत जाणाऱ्या भाविकांची रिक्षा समोरच्या छोटा हत्तीला जोराची धडकली. यात रिक्षातील एका बालक, चार महिला व रिक्षाचालक जखमी झाला. त्यांना रुग्णालयात दाखल करण्यात आले. हा अपघात मोंढा नाका उड्डाणपुलावर रविवारी दुपारी १ वाजेच्या सुमारास घडला.
माया थोरात (वय २५), राजश्री आस्वार (वय २४), शकुंतला पंडित सरवदे (वय ५९), जया दीपक आस्वार (वय २७), ओम आस्वार (वय ६, सर्व रा. मोंढा रोड, वैजापूर, जि. औरंगाबाद) व रिक्षाचालक किशोर वाघ (वय ३६, रा. चिकलठाणा, औरंगाबाद), अशी जखमींची नावे आहेत. जखमी व त्यांचे नातेवाईक शेंद्रा येथील मांगीरबाबा यात्रेसाठी गेले होते. ही मंडळी रविवारी दुपारी शेंद्रा येथून दोन वेगवेगळ्या रिक्षाने औरंगाबादेतील मध्यवर्ती बसस्थानक येथे जात होते. एका रिक्षात (एमएच-२०, एटी ७९४४) महिला, तर दुसऱ्या रिक्षात पुरुष मंडळी होती. महिलांच्या रिक्षाच्या पुढे छोटा हत्ती (एमएच-२० ईजी ०६८७) होता. त्यासमोर एक तवेरा कार होती. तवेरा चालकाने अचानक मोंढा नाका उड्डाणपुलाच्या चढावर ब्रेक लावल्याने छोटा हत्तीचालकानेही ब्रेकवर पाय ठेवताच मागून वेगात आलेला रिक्षा हा छोटा हत्तीवर जाऊन धडकला. या घटनेत रिक्षाच्या समोरच्या भागाचा चुरडा झाला आणि रिक्षातील ६ वर्षांच्या चिमुकला आणि चार भाविक महिलांना दुखापत झाली. रिक्षाचालकासही मुका मार लागला. या घटनेनंतर जवाहरनगर पोलिस दाखल झाले. या प्रसंगी दुसऱ्या रिक्षातून जखमींना रुग्णालयात हलविण्यात आले. यावेळी छोटा हत्तीचालक, रिक्षाचालक, जखमी यांच्यात आर्थिक तडजोड झाल्याचे पोलिसांकडून सांगण्यात आले.

मोबाइल अॅप डाउनलोड करा आणि राहा अपडेट