‘साहित्य क्षेत्रात नेमके काय चालले आहे याविषयी काहीच माहिती नसते, तरी देखील आर्थिक मानपानासाठी अखिल भारतीय मराठी साहित्य संमेलनाचा उत्सव घेण्यात येतो. त्यातून काहीच निष्पन्न होत नाही. त्यामुळे अशा संमेलनांपासून दूर राहणेच बरे,’ अशा परखड शब्दात ज्येष्ठ साहित्यिक प्रा. रंगनाथ पठारे यांनी जाहीर टीका केला.
यशवंतराव चव्हाण प्रतिष्ठान, औरंगाबाद शिक्षण विकास मंच यांच्यातर्फे आयोजित राज्यस्तरीय शिक्षक साहित्य संमेलनाचा समारोप करताना ते रविवारी बोलत होते. यावेळी व्यासपीठावर आमदार विक्रम काळे, ज्येष्ठ पत्रकार पद्मभूषण देशपांडे, एमजीएमचे अंकुशराव कदम, डॉ. श्रीरंग देशपांडे, बसंती रॉय, डॉ. वसंत काळपांडे, विजय कान्हेकर, सुहास तेंडुलकर, डॉ. नरेंद्र काळे, निलेश राऊत यांची उपस्थिती होती.
प्रा. पठारे म्हणाले, साहित्य आणि शिक्षण हा संस्कार आहे. तो परिवर्तनासाठी आणि जबाबदारी म्हणून गांभिर्याने घेतला पाहिजे. कथा, कव‌िता, कांदबरी लिहिणे म्हणजेच लेखन, हा गैरसमज दूर व्हायला हवा. आज शिक्षकांच्या अनेक अडचणी असून त्यांना काम करणे देखील अवघड आहे. या परिस्थितीतही काही शिक्षक खूप चांगले काम करतात. मुळात शिक्षकाने सर्वप्रथम ज्ञान-विज्ञानात परिपूर्ण असावे. ज्या क्षेत्रात काम करतो त्यात पूरिपूर्ण असलेच पाहिजे, असेही प्रा. पठारे म्हणाले.
मराठी भाषेविषयी बोलताना ते म्हणाले, मराठी भाषा समृद्ध होण्यासाठी तिच्याबद्दल आदर असावा लागतो. भाषा म्हणजे केवळ शब्दसाठा नाही. मातृभाषेतून ज्ञान-विज्ञानाचे शिक्षण आधुनिक काळात मिळावे. त्यासाठी नवज्ञान देखील विकसित करता यायला हवे. ही जबाबदारी शिक्षकांनी घ्यावी. त्यासाठी वाचनाचा संस्कार आवश्यक आहे, असे मत पठारे यांनी व्यक्त केले.
दरम्यान, संमेलनाध्यक्ष बालाजी इंगळे म्हणाले की, शिक्षकांनी आता मुलांनाही लिहिते केले पाहिजे. परिस्थिती कशीही असो, लिखाण-वाचनासोबतच विद्यार्थ्यांच्या विकासासाठी ज्ञानाच्या कक्षा वाढवा. स्वतःचे पुस्तक लगेच प्रकाशित झाले पाहिजे, याची घाई करू नका. वाचकांसमोर तयारीने या, असे आवाहन इंगळे यांनी केले. संमेलनातील ग्रंथप्रदर्शनात जवळपास एक लाख रुपयांपर्यंत पुस्तक विक्री झाल्याचे आमदार विक्रम काळे यांनी सांगितले.
मोबाइल अॅप डाउनलोड करा आणि राहा अपडेट
