औरंगाबादः अल्पवयीन विद्यार्थिनीवर अत्याचार करणाऱ्या शिक्षकाचा जामीन अर्ज मुंबई हायकोर्टाच्या औरंगाबाद खंडपीठाचे न्या. टी. व्ही. नलावडे यांनी फेटाळला. आरोपीविरुद्धचा गुन्हा लक्षात घेता, त्याला सदर गुह्यात नाहक अडकविल्याचा युक्तीवाद ग्राहय धरता येणार नाही. इतर आरोपींना जामीन दिल्याच्या धर्तीवर याचिकाकर्त्याला जामीन देता येणार नाही, असे खंडपीठाने स्पष्ट केले.
गेल्यावर्षी ऑगस्ट महिन्यात जिन्सी भागातील एका शाळेत आरोपी शिक्षक अहमद खान अमीन खान याने अत्याचार केल्याची तक्रार आठ वर्षाच्या विद्यार्थिनीने दिली होती. तक्रारीनंतर हा धक्कादायक प्रकार उजेडात आला होता. मुलीने ही बाब आपल्या आजीला सांगितल्यानंतर प्रकरणाला वाचा फुटली होती. वैद्यकीय तपासणीनंतर शिक्षकाविरुद्ध बलात्कार आणि बाल लैगिंक अत्याचार प्रतिबंधक कायद्यानुसार गुन्हा दाखल करण्यात आला होता. आरोपीसह इतर दोघांनाही प्रकरणात अटक करण्यात आली होती. त्यात एक शिक्षक व एका रिक्षा चालकाचा समावेश होता. या प्रकरणात आरोपीने जामीन मिळावा यासाठी औरंगाबाद अर्ज केला होता, पण सरकारी पक्षाने प्रकरण गंभीर असल्याने आरोपीच्या जामीनाला कडाडून विरोध केला. सुनावणीअंती जामीन अर्ज फेटाळून लावण्यात आला.
मोबाइल अॅप डाउनलोड करा आणि राहा अपडेट
