कॅन्सर, हृदयविकार आदी मोजक्याच उपचार-शस्त्रक्रियांसाठी असलेल्या पूर्वीच्या जीवनदायी योजनेत आमूलाग्र बदल करून ९७१ प्रकारच्या उपचार-प्रक्रिया-शस्त्रक्रियांचा समावेश ‘राजीव गांधी जीवनदायी आरोग्य योजने’मध्ये करण्यात आला व त्याची अंमलबजावणी २०१२पासून राज्यात झाली. या योजनेच्या माध्यमातून गोरगरीब रुग्णाला नामांकित खासगी रुग्णालयात पूर्णपणे निःशुल्क उपचार उपलब्ध झाले. एक लाखापर्यंतचे वार्षिक उत्पन्न असणाऱ्यांना, केशरी, पिवळे रेशन कार्डधारकांना ही योजना लागू करण्यात आली होती. दुष्काळाचा विचार करून मराठवाडा व विदर्भातील काही जिल्ह्यातील सर्व शेतकऱ्यांनादेखील योजना सरसकट लागू करण्यात आली. सात-बारा दाखवा आणि उपचार घ्या, असे त्याचे स्वरूप आहे, मात्र उपचारांचे पॅकेज कमी असल्याच्या तक्रारी होत्या. त्यामुळे योजनेची व्याप्ती वाढवण्याची मागणी होती. या पार्श्वभूमीवर मुख्यमंत्र्यांनी मागेच ‘राजीव गांधी योजने’चे नाव सुधारणांसह ‘महात्मा फुले जनआरोग्य योजना’ करण्याचे जाहीर केले होते. त्याआधीपासूनच नव्या योजनेची प्रतीक्षा होती. आरोग्य मंत्र्यांनीही नव्या योजनेसाठी १३२६ कोटी रुपयांची तरतूद अर्थसंकल्पात जाहीर केली होती. त्यानंतरही योजनेची अंमलबजावणी नव्हती. दरम्यान, १३ एप्रिल रोजी योजनेच्या नामांतराचा शासन आदेश काढण्यात आला; परंतु एक एप्रिल २०१७ ते ३० जून २०१७पर्यंत योजनेतील विमा कंपन्यांना मुदतवाढ देण्यात येत असल्याचेही स्पष्ट करण्यात आले. परिणामी, ३० जूनपर्यंत ही योजना आहे तशी राबविण्यात येणार आली.
नव्या योजनेतील बदलांच्या अनुषंगाने विमा कंपन्यांसाठी निविदा काढण्यात येणार आहे आणि एक जुलैपासून नव्या स्वरुपातील योजना प्रत्यक्षात येईल. त्याआधीसुद्धा योजनेची अंमलबजावणी होऊ शकते, असेही सांगण्यात येत आहे.
विमा कवच दोन लाखांपर्यंत
‘राजीव गांधी’मध्ये संपूर्ण कुटुंबाला एका वर्षासाठी दीड लाखांपर्यंतचे विमा कवच होते. नव्या योजनेत कुटुंबाला दोन लाखांपर्यंतचे विमा कवच मिळणार आहे; तसेच नी-रिप्लेसमेंट, हिप-रिप्लेसमेंटचा समावेश नव्याने असेल व बहुतांश उपचारांचे पॅकेज वाढवण्यात येणार असल्याचे सांगितले जात आहे. सद्यस्थितीत योजनेमध्ये ‘किडनी ट्रान्स्प्लान्ट’चे पॅकेज अडीच लाखांचे असून, ते नव्या योजनेत तीन लाखांपर्यंत होईल, असे विश्वसनीय सूत्रांनी सांगितले.
एक मे पासून राजीव गांधी योजना ही महात्मा फुले जनआरोग्य योजना होणार आहे. त्यासंदर्भातील ‘जीआर’ प्राप्त झाला असून, लवकरच योजनेमध्ये विविध सुधारणा होणे अपेक्षित आहे.
- डॉ. योगेश लोखंडे, जिल्हा समन्वयक, राजीव गांधी जीवनदायी आरोग्य योजना
मोबाइल अॅप डाउनलोड करा आणि राहा अपडेट
