वर्षभरापूर्वी पैठण रोडवर अपघातात पोटचा मुलगा गेला. त्याला धडक मारणाऱ्याचा ठावठिकाणा लागेना. पोलिस दरबारी ‘अज्ञान वाहन’ अशी नोंद. हीच अज्ञान वाहन अशी नोंद एका मातेला अस्वस्थ करून गेली. ‘माझ्या मुलाच्या अपघाताचा तपास करा. अपघाताला कारणीभूत कोण, याचा शोध घ्या,’ अशी मागणी करीत त्यांनी पोलिस ठाण्याचे उंबरठे झिजविले, पण हाती काही लागले नाही. मग त्यांनी सरकारचे लक्ष वेधण्यासाठी उपोषणाचा मार्ग निवडला. गेल्या ४२ दिवसांपासून जिल्हाधिकारी कार्यालयासमोर उपोषण सुरू केले, पण सरकारी यंत्रणेपर्यंत या मातेच्या वेदना पोचू शकलेल्या नाहीत.
जिल्हाधिकारी कार्यालायसमोर मीना रघुनाथ म्हस्के (रा. त्रिवेणीनगर, सिडको, एन-७) यांचे उपोषण सुरू आहे. बुधवारी त्यांच्या उपोषणाचा ४२वा दिवस. त्यांचा एकुलता एक मुलगा सतीश पैठण रोडवरील एका कंपनीत नोकरी करीत होता. गेल्या वर्षी २१ एप्रिल रोजी त्याचा अपघात झाला. या अपघातात त्याचा मृत्यू झाला. पोलिस दप्तरी सतीशच्या दुचाकीला धडक देणारे वाहन ‘अज्ञात’ आहे.
या अपघाताची नोंद चिकलठाणा पोलिस ठाण्यात करण्यात आली. मुलाला धडक देणारे वाहन अज्ञात असल्याने ही माता अस्वस्थ झाली. तिने हे अज्ञात वाहन पोलिसांनी शोधून काढावे, यासाठी पोलिस ठाण्याचे तीन महिने उंबरठे झिजविले. ‘पोलिस ठाण्यात मी सकाळ-संध्याकाळ जात होते, पण तिथे उडवाउडवीची उत्तरे दिली जात होती,’ असे त्यांनी सांगितले.
त्यानंतर म्हस्के यांनी १५ मार्चपासून जिल्हाधिकारी कार्यालयासमोर उपोषणाला सुरुवात केली. अपघातास कारणीभूत अज्ञात वाहनाचा तपास लावावा. अपघातात जबाबदार असलेल्या आरोपीवर कठोर कारवाई करण्यात यावी, अशी त्यांनी मागणी आहे.
या उपोषणाची दखल जिल्हाधिकारी कार्यालयाने कागदोपत्री घेतली. यासंदर्भात पोलिसांनी पत्रही पाठविण्यात आली. पोलिस अनेकवेळा उपोषणस्थळी आले. ते म्हस्के यांना उपोषण मागे घेण्याची विनंती करतात, मात्र म्हस्के,‘माझ्या मुलाच्या तपासाचे काय झाले,’ अशी विचारणा करतात. त्यावर ‘आम्ही लवकरात लवकर न्याय मिळवून देऊ. उपोषण मागे घ्यावे,’ असे विनंतीपत्र पोलिस देतात. गेल्या ४२ दिवसांत जिल्हा प्रशासनाकडून एकाही वरिष्ठ अधिकाऱ्यांनी उपोषणार्थी म्हस्के यांची भेट घेतली नाही. त्यांची मागणी जाणून घेतली नाही. केवळ पोलिसांशी पत्रव्यवहारावर प्रशासनाचे काम थांबते.
पोलिसांशी पत्रव्यवहार
निवासी उपजिल्हाधिकारी विश्वंभर गावंडे म्हणाले की, पोलिसांनी या प्रकरणाचा तपास लावावा, अशी महिलेची अपेक्षा गैर नाही. यासंदर्भात पोलिस प्रशासनाकडेही वारंवार पत्रव्यवहार करण्यात आला, मात्र वाहनधारक अज्ञात आहे, त्याला कोण काय करू शकतो.
मोबाइल अॅप डाउनलोड करा आणि राहा अपडेट
