म. टा. प्रतिनिधी, लातूर
‘लातूर एक्सप्रेस’ ही रेल्वे बिदरपर्यंत विस्तारित केल्यानंतर लातूर जिल्ह्यातील प्रवाशांमध्ये असंतोष पसरला आहे. या असंतोषामुळे, तसेच बिदर-मुंबई एक्सप्रेस रेल्वे नियमित करावी या आणि अन्य मागण्यांसाठी गुरुवारी ‘उदगीर बंद’चे आंदोलन करण्यात आले. या आंदोलनाला उदगीरात जोरदार प्रतिसाद मिळाला.
शुक्रवारी सकाळपासून उदगीरातील दुकाने, व्यापाऱ्यानी बंद ठेवली होती. उदगीर बंद करण्यासाठी रेल्वे संघर्ष समितीचे सचिव आणि रेल्वे सल्लागार समितीचे सदस्य मोतीलाल डोईजोडे, नगराध्यक्ष बस्वराज बागबंदे, माजी आमदार मनोहर पटवारी, माजी आमदार शिवराज तोंडचिरकर, राम मोतीपवळे, चंद्रकांत वैजापुरे यांच्यासह विविध राजकीय पक्षाच्या नेत्यांनी पुढाकार घेतला होता. डॉ बाबासाहेब आंबेडकर यांच्या पुतळ्यापासून सर्वपक्षीय नेते शहराच्या प्रमुख मार्गावरून ‘बंद’चे आवाहन करीत होते. त्यानंतर उपजिल्हाधिकारी यांना एक निवेदनही सादर करण्यात आले.
रेल्वे संघर्ष समितीचे सचिव मोतीलाल डोईजोडे यांनी सांगितले की,बिदर-मुंबई रेल्वेमुळे उदगीर आणि परिसरातील प्रवाशांची सोय झाली आहे. या रेल्वेविषयी जनतेच्या भावना तीव्र आहेत. शुक्रवारी उदगीर बंदला चांगला प्रतिसाद मिळाला आहे. बंदमध्ये उदगीरकर स्वंयस्फूर्तीने सहभागी झाले आहेत. उपजिल्हाधिकाऱ्यांना देण्यात आलेल्या निवेदनात तीन प्रमुख मागण्या करण्यात आल्या आहेत. त्यामध्ये बिदर-मुंबई ही सध्या आठवड्यातून तीन दिवस असलेली रेल्वे नियमित करावी, त्याचप्रमाणे बिदर-यशवंतपूर, बिदर-हैदराबाद या दोन रेल्वेंचा विस्तार लातूरपर्यंत करण्यात यावा, या मागण्यांचा समावेश आहे.
आज लातूर बंद
रेल्वेशी संबंधित मागण्यांसाठी पुकारलेल्या उदगीर बंदला जोरदार प्रतिसाद मिळाल्यानंतर
लातूर-मुंबई या लातूर एक्सप्रेसचे बिदरपर्यंत झालेले विस्तारीकरण रद्द करावे या व इतर मागण्यांसाठी शुक्रवारी रेल्वे बचाव कृती समितीच्या वतीने बंदचे आवाहन करण्यात आले आहे. बंदची तयारी शहरामध्ये मोठ्या प्रमाणावर करण्यात आली असून व्यापाऱ्यांनी सोशल मीडियावर मी माझा व्यापार बंद ठेवणार आहे, अशा आशयाचे संदेश पाठवले आहेत.
मोबाइल अॅप डाउनलोड करा आणि राहा अपडेट
