'एवढी तूर घेतली तरी रडतात साXXX'

May 10, 2017, 8:53 am

≫ Next: ६२ कोटी खर्चून २९९वा क्रमांक

≪ Previous: बायपासवर पुन्हा जड वाहनांना बंदी

$

0

0

मटा ऑनलाइन वृत्त । जालना

तुरीचा प्रश्न आधीच चिघळलेला असताना भाजपचे प्रदेशाध्यक्ष रावसाहेब दानवे यांनी आज शेतकऱ्यांच्या जखमेवर मीठ चोळणारं विधान केलं. 'राज्य सरकारने एवढी तूर खरेदी केली तरी रडतात साxxx' अशा असभ्य भाषेत दानवे यांनी शेतकऱ्यांची चेष्टा केली. दानवे यांच्या या वक्तव्याचा काँग्रेस आणि राष्ट्रवादीने निषेध केला असून दानवे यांनी तत्काळ शेतकऱ्यांची माफी मागायला हवी व दानवेंना भाजपने पदावरून हटवायला हवे, अशी मागणीच दोन्ही पक्षांनी केली.

पालकमंत्री बबन लोणीकर यांच्या संपर्क कार्यालयाचं उद्घाटन दानवे यांच्या हस्ते झालं. यावेळी भाजपच्या एका कार्यकर्त्याने तूर खरेदीबाबत आम्ही लोकांना काय उत्तर द्यायचं असा प्रश्न केला. त्यावर दानवे यांनी संतप्त स्वरातच उत्तर दिले. 'तू जास्त पेपर वाचतो का? वाचू नको!' असा सल्ला देत दानवेंनी प्रश्न विचारणाऱ्या कार्यकर्त्याला झापलंच पण तुरीविषयी बोलताना शेतकऱ्यांबाबत असभ्य भाषाही वापरली.

दानवे नेमके काय म्हणाले?

'तूर खरेदी, ऊस खरेदी, बाजरी खरेदी हे विषय तुम्ही सध्या बंद करा. जे झालं त्यावर बोला. तुम्हाला माहिती आहे का काही? ज्या मालाचे हमीभाव केंद्र सरकारने ठरवलेले आहेत. तो माल जर का बाजारामध्ये हमी भावापेक्षा कमी भावाने खरेदी केला जात असेल तर सरकार बाजारात उतरतं आणि बाजारामध्ये स्थिरता राहावी म्हणून २५ टक्के माल खरेदी करतं. आतापर्यंतच्या इतिहासात मागच्या सरकारनेही असंच केलंय. आपल्या सरकारने तर सारीच्या सारी तूर घ्यायला सुरुवात केलीय. स्वातंत्र्यानंतर पहिल्यांदाच ४०० रुपयांपेक्षा जास्त अनुदान तुरीला दिलंय. त्यामुळे रडे धंदे करू नका. तुरीचं असं झालं... कापसाचं तसं झालं...नाही राव यंदाचं साल बेकारच आहे. हे बिलकुल काढून टाका डोक्यातून. इतकं आहे तर मग झेडपीला २२ जागा कशा आल्या ते सांगा? आपल्या कार्यकर्त्याने आता रडायचं नाही, लढायचंय! पुन्हा काढायचा नाही आता तुरीचा विषय. ते कायते आम्ही बघू. सगळी तूर खरेदी करणार आहोत. आता परवाच एक लाख टन तूर खरेदी करायला केंद्राने परवानगी दिलीय तरीही रडतात साxxx...माझ्या बोलण्याचा अर्थ असा आहे की, तुरीबद्दल गैरसमज नको. येत्या ३१ तारखेपर्यंत तूरखरेदी होणार आहे.'

दानवे, शेतकऱ्यांची माफी मागा!

रावसाहेब दानवे यांनी शेतकऱ्यांचा अपमान केला आहे. त्यासाठी त्यांनी तत्काळ माफी मागायला हवी. तसेच त्यांना भाजपने तत्काळ पदावरून हटवायला हवे अशी मागणी काँग्रेस नेते पृथ्वीराज चव्हाण यांनी केली. विधान परिषदेतील विरोधी पक्षनेते धनंजय मुंडे यांनीही दानवेंच्या वक्तव्याचा निषेध केला. शेतकऱ्यांबाबत असभ्य भाषा वापरणाऱ्या दानवे यांची जीभ हासडायला हवी, असे ते म्हणाले. दानवे यांनी याआधीही अशी वादग्रस्त विधाने केली आहे. त्यामुळे ते मुद्दामहून अशी वक्तव्ये करतात का, हेही तपासायला हवे, असे मुंडे म्हणाले.

मोबाइल अॅप डाउनलोड करा आणि राहा अपडेट

---

६२ कोटी खर्चून २९९वा क्रमांक

May 10, 2017, 2:06 pm

≫ Next: मटा विशेष: ८९ वैद्यकीय शिक्षकांच्या बदल्या?

≪ Previous: 'एवढी तूर घेतली तरी रडतात साXXX'

$

0

0

म. टा. प्रतिनिधी, औरंगाबाद
घनकचरा व्यवस्थापनावर वर्षभरात ६२ कोटी खर्चून स्वच्छतेच्या बाबतीत देशपातळीवर शहराचा २९९ वा क्रमांक आल्यामुळे खडबडून जागे झालेल्या महापालिकेची विशेष सर्वसाधारण सभा शुक्रवारी होत आहे. या सभेत घनकचरा व्यवस्थापन विभागाच्या कारभारावर चर्चा करून आवश्यक त्या उपाययोजनांबद्दल प्रशासनाला आदेश दिले जाणार आहेत.
केंद्र सरकारच्या स्वच्छ भारत अभियानाअंतर्गत औरंगाबादची निवड करण्यात आली होती. विविध प्रकारचे निकष देवून या अभियानात पालिकेला शहरातील स्वच्छता करण्याचे टार्गेट देण्यात आले. पालिका प्रशासनाने या कामासाठी वर्षभरात सुमारे ६२ कोटी खर्चले, पण एवढी रक्कम खर्च करून ४४३ शहरांमधून स्वच्छतेबाबत शहराचा क्रमांक २९९ वा लगला. यापूर्वी झालेल्या सर्वेक्षणात ७३ शहरांमधून औरंगाबादचा क्रमांक ५६वा आला होता. त्यामुळे किमान पहिल्या वीस शहरात औरंगाबादचा समावेश झाला पाहिजे, असा दावा करत पालिका प्रशासनाने स्वच्छ भारत अभियानासाठी काम सुरू केले, पण त्याला अपयश आले. त्यामुळे घनकचरा व्यवस्थापन विभागाच्या कामकाजाबद्दल प्रश्नचिन्ह उपस्थित करून ‘स्थायी’च्या चार सदस्यांनी विशेष सर्वसाधारण सभेची मागणी केली. त्यानुसार ही सभा होत आहे.

‘माझी सिटी टकाटक’ची टीमही संशयाच्या घेऱ्यात
स्वच्छ भारत अभियानासाठी पालिका यंत्रणेबरोबर ‘माझी सिटी टकाटक’च्या टीमने देखील काम केले आहे. त्यामुळे या टीमच्या कामाबद्दलही सर्वसाधारण सभेत नगरसेवक प्रश्न उपस्थित करण्याची शक्यता आहे. अभियानात औरंगाबादचा क्रमांक पहिल्या वीसमध्ये यावा यासाठी पालकमंत्री रामदास कदम यांनी पुढाकार घेवून जिल्हा नियोजन समितीच्या माध्यमातून पालिकेला सुमारे ११० रिक्षा उपलब्ध करून दिल्या. त्यापूर्वी कचरा उचलण्यासाठी खासगी रिक्षांची व्यवस्था केली होती. खासगी रिक्षांच्या वापराबद्दलही शंका घेतली जात आहे. अनेक रिक्षा डमी स्वरुपाच्या असल्याचे बोलले जात आहे. घनकचरा व्यवस्थापन विभागाला नसलेला कायमस्वरुपी अधिकारी, पुरेशा कर्मचाऱ्यांचा अभाव, तांत्रिक यंत्रणेत असलेल्या त्रुटी याबद्दल देखील सर्वसाधारण सभेत चर्चा होण्याची शक्यता आहे.

मोबाइल अॅप डाउनलोड करा आणि राहा अपडेट

मटा विशेष: ८९ वैद्यकीय शिक्षकांच्या बदल्या?

May 10, 2017, 2:08 pm

≫ Next: ​ ‘बाहुबली’ने झटकली खुर्च्यांवरील धूळ

≪ Previous: ६२ कोटी खर्चून २९९वा क्रमांक

$

0

0

Nikhil.Nirkhee@timesgroup.com
Tweet-nnirkheeMT
औरंगाबादः शासकीय वैद्यकीय महाविद्यालयामध्ये एकाच ठिकाणी १५ वर्षांपेक्षा जास्त काळ अध्यापन केलेल्या राज्यातील तब्बल ८९ सहयोगी प्राध्यापकांच्या बदल्या करण्याचा निर्णय घेण्यात आला असून, एकाच ठिकाणी १५ वर्षांपेक्षा जास्त काळ अध्यापन केलेल्या राज्यातील सर्व सहयोगी प्राध्यापकांची यादी मागवण्यात आली आहे. मात्र, या बदल्यांच्या धुमाकुळात ‘पीजी’च्या वाढीव जागा धोक्यात येण्याची भीती व्यक्त होत आहे.
शहरातील शासकीय वैद्यकीय महाविद्यालयाचे (घाटी) वैद्यकीय अधीक्षक डॉ. सुधीर चौधरी, डॉ. गजानन सुरवाडे, डॉ. माधुरी कुलकर्णी, डॉ. ज्योती बजाज, डॉ. सोनाली देशपांडे, डॉ. प्रभाकर जिरवणकर, डॉ. जया मुनेश्वर बेग, शासकीय विभागीय कर्करुग्णालयाचे (कॅन्सर हॉस्पिटल) विशेष कार्य अधिकारी डॉ. अरविंद गायकवाड आदी ८ ते १० सहयोगी प्राध्यापकांच्या बदल्या होऊ शकतात, असे सहयोगी प्राध्यापकांच्या यादीवरून स्पष्ट होत आहे. धक्कादायक बाब म्हणजे वैद्यकीय शिक्षण व संशोधन संचालनालयाच्या (डीएमईआर) संचालकांना डालवून वैद्यकीय शिक्षण विभागाच्या प्रधान सचिवांनी हा निर्णय रेटून नेल्याचेही सूत्रांनी सांगितले. ५ मे रोजी झालेल्या बैठकीत हा निर्णय घेण्यात आला व चार दिवसांत सहयोगी प्राध्यापकांची यादी व प्रत्येकाच्या पसंतीची तीन ठिकाणे कळविण्याचे आदेशही संचालकांना देण्यात आले आहेत.
सरकारी अधिकारी-कर्मचाऱ्यांच्या दर तीन वर्षांनी बदल्या होतात; परंतु वैद्यकीय शिक्षकांच्या का होत नाहीत, असे माहितीच्या अधिकारात विचारलेल्या प्रश्नानंतर हा बदल्यांचा धुमाकूळ सुरू झाल्याचे समजते. मात्र, वेगवेगळ्या दृष्टिकोनातून वैद्यकीय शिक्षण विभागाला या नियमातून वगळण्यात आल्याची वस्तुस्थिती आहे.

प्रत्यक्ष अडचणींचा डोंगर मोठा
बदल्यांच्या प्रक्रियेत प्रत्येक सहयोगी प्राध्यापकाने तीन पसंतीची ठिकाणे दिली आहेत. या जागांचा विचार करून बदली करण्यात येणार असल्याचे संचालकांना दिलेल्या पत्रात म्हटले आहे. मात्र, बदली करण्यात आलेल्या महाविद्यालयात संबंधित विषयामध्ये पदव्युत्तर अभ्यासक्रम नसल्यास किंवा ‘पीजी टिचर’ म्हणून मान्यता नसलेल्या सहयोगी प्राध्यापकांची बदली झाल्यास किंवा औरंगाबादमधून एका प्राध्यापकाची नागपूरच्या महाविद्यालयात बदली झाली व नागपूरमधील प्राध्यापकाची औरंगाबादमध्ये येण्याची इच्छा नसल्यास किंवा या प्रकारच्या अनेक अडचणी येऊ शकतात व सहयोगी प्राध्यापकांच्या जागा रिक्त राहू शकतात. त्यातच औरंगाबादच्या शासकीय वैद्यकीय महाविद्यालयामध्ये सहयोगी प्राध्यापकांच्या दोन जागा पूर्वीपासून रिक्त आहेत.

वाढीव २५० पीजी जागांवर गंडांतर?
भारतीय आयुर्विज्ञान परिषदेच्या (एमसीआय) नवीन निकषांनुसार आता एका प्राध्यापकाला ‘पीजी’च्या दोन ऐवजी तीन जागांना मान्यता देण्यात आली आहे, तर एका सहयोगी प्राध्यापकाला एक ऐवजी दोन ‘पीजी’च्या जागांना मान्यता देण्यात आली आहे. यानुसार औरंगाबादच्या ‘शासकीय वैद्यकीय’मध्ये सुमारे ४५ ‘पीजी’च्या जागा वाढणार आहेत व संपूर्ण राज्यात ‘पीजी’च्या २५० ते ३०० जागा वाढणार असल्याचे संकेत आहे. या पार्श्वभूमीवर घाटीसारख्या विविध महाविद्यालयांमध्ये ‘एमसीआय’ची तपासणी अपेक्षित आहे. दर पाच वर्षांनी ही तपासणी होते व घाटीमध्ये २०१२मध्ये अशी तपासणी झाल्यामुळे आता कधीही अशी तपासणी होऊ शकते आणि सहयोगी प्राध्यापकांच्या जागा रिक्त राहिल्यास ‘पीजी’च्या जागा घटू शकतात, अशीही भीती व्यक्त होत आहे.

घाटीमध्ये ‘एमसीआय’ची तपासणी कधीही होऊ शकते. तेव्हा बदल्यांमुळे किंवा जागा रिक्त राहिल्यास ‘पीजी’ जागांसाठी अडचणी निर्माण होऊ शकतात. याचा साकल्याने विचार करूनच बदल्या व्हाव्यात, अशी अपेक्षा आहे. – डॉ. शिवाजी सुक्रे, प्रदेश प्रवक्ते, महाराष्ट्र राज्य वैद्यकीय शिक्षक संघटना

मोबाइल अॅप डाउनलोड करा आणि राहा अपडेट

​ ‘बाहुबली’ने झटकली खुर्च्यांवरील धूळ

May 10, 2017, 2:09 pm

≫ Next: रसदार फळे स्वस्त

≪ Previous: मटा विशेष: ८९ वैद्यकीय शिक्षकांच्या बदल्या?

$

0

0

म. टा. प्रतिनिधी, औरंगाबाद
नवनवीन व्यावसायिक विक्रम करणाऱ्या ‘बाहुबली २’ चित्रपटाने मल्टिप्लेक्स आणि सिंगल स्क्रिनच्या खुर्च्यांवरील धूळ झटकली. दोन आठवड्यांपासून तुफान गर्दी खेचत असलेला ‘बाहुबली’ शहरातील सर्व चित्रपटगृहांना दिलासा देणारा ठरला आहे. आठ चित्रपटगृहात दररोज सकाळी ९ ते रात्री ११ असे जवळपास शंभर शो सुरू असूनही गर्दी कायम आहे. शहरात दोन आठवड्यात तब्बल तीन कोटी रुपयांपेक्षा जास्त व्यवसाय करण्यात ‘बाहुबली’ यशस्वी ठरला.
उन्हाळ्याच्या सुटीत मल्टिस्टार चित्रपट प्रदर्शित करण्याची परंपरा जुनी आहे. विशेषतः लहान मुलांचा प्रेक्षकवर्ग गृहीत धरून काही चित्रपट हमखास प्रदर्शित होतात. मात्र, सर्वस्तरातील प्रेक्षकांची गर्दी खेचणारा चित्रपट मागील काही वर्षांत अपवादानेच प्रदर्शित झाला. यावर्षीच्या उन्हाळी सुट्या चित्रपटगृहांसाठी दिलासादायक ठरल्या आहेत. एस. एस. राजामौली दिग्दर्शित ‘बाहुबली २’ चित्रपटाचे अभूतपूर्व यश चित्रपटगृहांना तारणारे ठरले आहे. प्रभास व अनुष्का शेट्टी यांच्या मुख्य भूमिका असलेला ‘बाहुबली’ ग्राफिक्स आणि अॅक्शनने परिपूर्ण चित्रपट आहे. भव्य सेट, वेगवान लढाई, चपखल संवाद व गाणी पाहताना प्रेक्षकांच्या डोळ्याचे पारणे फिटत आहे. अडीचशे कोटी रुपये बजेट असलेला चित्रपट मोठ्या पडद्यावर पाहण्याला प्राधान्य देत प्रेक्षकांची गर्दी उसळली आहे. मागील दोन आठवडे गर्दी खेचणारा चित्रपट शुक्रवारी तिसऱ्या आठवड्यात पदार्पण करीत आहे. विशेष म्हणजे ‘बाहुबली’चे तगडे आव्हान पेलणे शक्य नसल्यामुळे इतर हिंदी व मराठी चित्रपटांचे प्रदर्शन लांबणीवर पडले आहे. ‘बाहुबली’सोबत प्रदर्शित झालेल्या चित्रपटांचे शो तीन दिवसात संपले. तर गर्दी कमी होत नसल्यामुळे ‘बाहुबली’चे सर्वाधिक शो वाढवण्यात आले. औरंगाबाद शहरातील मल्टिप्लेक्स आणि सिंगल स्क्रिन चित्रपटगृहात ‘बाहुबली २’ प्रदर्शित झाला आहे. तीन दिवसांचे ऑनलाइन बुकिंग फुल्ल होण्याचा बहुमान चित्रपटाने पटकावला आहे. अनेक दिवसानंतर वितरक आणि चित्रपटगृहचालकांना ‘बाहुबली’ने दिलासा दिला आहे. या चित्रपटाच्या सिक्वेलबाबत मोठी उत्सुकता निर्माण झाली होती. उन्हाळ्याच्या सुट्या आणि प्रसिद्धीचे तंत्र गर्दी वाढवण्यास कारणीभूत ठरली आहे. पहिल्या आठवड्यात जवळपास दोन कोटी रुपये आणि दुसऱ्या आठवड्यात एक कोटी रुपयांचा व्यवसाय झाल्याचे जाणकारांनी सांगितले.

धूळ झटकली
शहरात सहा मल्टिप्लेक्स असून शुक्रवार ते रविवार असे तीन दिवस मल्टिप्लेक्समध्ये प्रेक्षकांची गर्दी असते. तर इतर चार दिवस मोजकेच प्रेक्षक असतात. फ्लॉप चित्रपटांचे प्रमाण जास्त असल्यामुळे चित्रपटगृहांचा व्यवसाय जेमतेम असतो. मात्र, ‘बाहुबली’ने सर्वाधिक शो दाखवत मल्टिप्लेक्सच्या खुर्च्यांवरील धूळ झटकली. अंबा-अप्सरा या दोन्ही स्क्रिनवर ‘बाहुबली’ सुरू आहे. प्रेक्षकांच्या उदंड प्रतिसादामुळे दोन्ही चित्रपटगृहात ‘बाहुबली’ दाखवण्याचा निर्णय घेण्यात आला.

‘सैराट’ चित्रपटानंतर ‘बाहुबली’ चित्रपटाने सिंगल स्क्रिन चित्रपटगृहांना व्यावसायिक आधार दिला. वर्षभरात हिट झालेल्या चित्रपटांना मल्टिप्लेक्समध्ये गर्दी होती. मात्र, ‘बाहुबली’ने जुन्या चित्रपटगृहांनाही सावरले. - शौकत पठाण, चित्रपट वितरक

अंबा-अप्सरा या दोन्ही चित्रपटगृहात ‘बाहुबली २’ प्रदर्शित झाला. दोन्ही ठिकाणी प्रेक्षकांचा उत्तम प्रतिसाद मिळाला. पहिल्या आठवड्यात सर्वाधिक गर्दी होती. - अॅलन लाजरस, व्यवस्थापक, अंबा-अप्सरा

मोबाइल अॅप डाउनलोड करा आणि राहा अपडेट

रसदार फळे स्वस्त

May 10, 2017, 2:11 pm

≫ Next: चामडी भरलेला ट्रक पैठणरोडवर पकडला

≪ Previous: ​ ‘बाहुबली’ने झटकली खुर्च्यांवरील धूळ

$

0

0

म. टा. प्रतिनिधी, औरंगाबाद
औरंगाबाद जिल्ह्यासह नाशिक, जळगाव, चाळीसगाव या भागात उत्तम व मुबलक फळ उत्पादन झाले आहे. परिणामी, शहरात किफायतशीर किंमतीत मुबलक फळे उपलब्ध होत आहेत. काही फळे कमीतकमी १० ते २० रुपये किलो व जास्तीत जास्त ४० ते ५० रुपये किलो या दराने विकली जात आहेत.
शहरात सध्या फळांची आवक दुपटीने वाढली आहे. गेल्या महिन्यापेक्षा फळे किलोमागे १० ते ३० रूपयांनी स्वस्त झाले आहेत. त्यामुळे ग्राहकांकडून फळांना मागणी वाढली आहे. ताजी रसदार विविध फळे अधिकाधिक विकली जात आहेत. शहरातील मुख्य बाजारपेठांशिवाय, भाजी मंडई, चौक व गल्लीबोळातही फळांच्या हातगाड्या दिसत आहेत. जाधवाडीतील बाजरात किरकोळ विक्री करणारे फळ विक्रेते प्रभाकर वानखेडे म्हणाले, मोसंबी १५ ते २० रुपये किलो, द्राक्ष २० ते ३० रुपये किलो, टरबूज १८ ते २०, खरबूज २० ते २५ रुपये किलो या दराने विकले जात आहेत. आंब्याची आवकही वाढली आहे. हापूस आंबे २०० ते ३०० रुपयांनी स्वस्त झाली आहेत. केशर आंबे १०० रुपये, बदाम ५० ते ६० रुपये किलो दराने विकले जात आहेत.
सिडको एन-३ स्थित सावता भाजी व फळ विक्रेते सेंटरचे संचालक जर्नादन जाधव यांनी सांगितले की, मागील म‌हिन्यापेक्षा १५ ते २० रुपयांनी फळे स्वस्त झाली आहेत.

फळांचे प्रकार......... दर
डाळींब........... ६० ते ७०
मोसंबी........२० ते २५
चिकू.....४० ते ५०
संत्री....२० ते ३०
अंजीर..२० ते ४०
द्राक्ष (काळे) ४०, (हिरवे) २० ते ३०
पपई....२०
केळी...३० ते ४० रुपये डझन
सफरचंद १४० ते १५०
टरबूज १८ ते२०
खरबूज- २०

-
आंबे (प्रतिकिलो)
केशर -१००
लालबाग - ५०
पायरी ४०
बदाम-६०
हापूस ६०० ते ७०० रुपये डझन

मोबाइल अॅप डाउनलोड करा आणि राहा अपडेट

चामडी भरलेला ट्रक पैठणरोडवर पकडला

May 10, 2017, 2:30 pm

≫ Next: नाल्याची अवस्था पाहून उपमहापौर अस्वस्थ

≪ Previous: रसदार फळे स्वस्त

$

0

0

म. टा. प्रतिनिधी, औरंगाबाद
गोवंशाची चामडी घेऊन जाणारा एक ट्रक छावणी पोलिसांनी मंगळवारी मध्यरात्री पकडला. ट्रकमध्ये असलेले चामडे गोवंशाचे आहे, असून दोषीवर कठोर कारवाई करा, अशी मागणी गौरक्षा समितीच्या कार्यकर्त्यांनी केली. दरम्यान, याप्रकरणी ट्रकचालक मोहमद अकमल मोहम्मद असाउद्दीन याला ताब्यात घेण्यात आले आहे. कातड्याचे नुमने प्रयोगशाळेत पाठविण्यात आल्याची माहिती पोलिसांनी दिली.
एका ट्रकमधून गोवंशाची कातडी नेली जात आहे, अशी माहिती गौरक्षा समितीचे कार्यकर्ते मोहित देशपांडे, अनंत जोशी व इतर कार्यकर्त्यांना समजली. त्याआधारे वेदांतनगर पोलिसांनी मध्यरात्री धूत बंगल्याजवळ सापळा रचत संशयित ट्रक अडविला. तपासणीत ट्रकमध्ये मोठ्या प्रमाणात कातडी तसेच मांस आढळून आले. या कातड्यांची किंमत ५ लाख ८६ हजार ५८० रुपये असून यात असलेले हे मांस कशाचे आहे यांची तपासणी करण्यासाठी पशुवैद्यकीय अधिकाऱ्यांना बोलाविण्यात आले होते. नमुने प्रयोगशाळेत पाठविण्यात आले आहेत. हे प्रकरण छावणी पोलिस हद्दीत असल्याने त्यांच्याकडे वर्ग करण्यात आले. याप्रकरणी दोषीवर कठोर कारवाई करण्यात यावी, अशी मागणी गौरक्षा समितीच्या कार्यकर्त्यांनी केली आहे.

मोबाइल अॅप डाउनलोड करा आणि राहा अपडेट

नाल्याची अवस्था पाहून उपमहापौर अस्वस्थ

May 10, 2017, 2:30 pm

≫ Next: भांडेगावला टँकर सुरू आहे का ?

≪ Previous: चामडी भरलेला ट्रक पैठणरोडवर पकडला

$

0

0

म. टा. प्रतिनिधी, औरंगाबाद
भर वसाहतीतून जाणारा इतका अरूंद नाला, अतिक्रमण, तुंबलेले ड्रेनेजचे पाणी, नाल्यातील घाण पाहूनच पावसाळ्यात या भागात काय होत असेल, याचा अंदाज मला आला. मी तर या भागात पहिल्यांदाच आले. पण तुम्ही इतकी वर्षे हा त्रास कसा सहन करता, असा प्रश्न उपमहापौरांनीच नागरिकांना केला.
उपमहापौर स्मिता घोगरे यांनी मंगळवारी जयभवानीनगरला भेट देत नागरिकांच्या समस्या जाणून घेतल्या. विशेषत: इथल्या नाल्याची पाहणी करायला आलेल्या उपमहापौर चांगले दोन तास जयभवानीनगरमध्ये थांबल्या व त्यांनी नागरिकांच्या प्रत्येक समस्या शांतपणे ऐकून घेतल्या. दीड महिन्यापूर्वी जयभवानीनगरच्या वसाहतीमध्ये ड्रेनेजचे पाणी शिरल्याने हाहाकार माजला होता. हे पाणी बोअरमध्ये मुरले आणि नागरिकांचे आरोग्य धोक्यात आले. महापौर भगवान घडमोडे, आमदार अतुल सावे, खासदार चंद्रकांत खैरे, उपायचक्त रवींद्र निकम यांनी या भागास भेट दिली. मात्र, ड्रेनेजचे पाणी येणे थांबले नाही. नागरिकांनी याबाबत उपमहापौरांना माहिती देत समस्यांचा पाढा वाचला. आमच्याकडे नालेसफाई होत नाही. अतिक्रमण काढले जात नाही. काही नागरिकांनी थेट नाल्यातच ड्रेनेजचे पाणी सोडल्याने हेच पाणी जमिनीत मुरते व आम्हाला टँकरचे पाणी विकत घ्यावे लागते, असे नागरिकांनी सांगितले. उपमहापौर पाहणी करत असतानाच काही नागरिकांनी ड्रेनेजचे सोडलेले पाणी नाल्यात दिसल्यावर घोगरेंनाही आश्चर्य वाटले. या भागात अजूनही पाइपलाइन आली नाही, असा उपमहापौरांच्या दरबारी तक्रारींचा पाऊस पडला होता. स्मिता घोगरेसुद्धा नागरिकांच्या समस्या लक्षात घेत अधिकाऱ्यांसोबत चर्चा करत होत्या. पालिका प्रशासनावर नागरिकांनी थेट रोष व्यक्त केला तेव्हाही त्यांनी अधिकाऱ्यांना कडक शब्दांमध्ये विचारणा केली. यावेळी कार्यकारी अभियंता अफसर सिद्दीकी, पदनिर्देशित अधिकारी सी. एम. अभंग आदी उपस्थित होते. उशिरा आलेल्या उपायुक्त रवींद्र निकम यांनाही त्यांनी लवकरात लवकर समस्या सोडवण्याचे सांगितले. इतक्या वर्षांमध्ये कोणत्या लोकप्रतिनिधीने पहिल्यांदाच आपल्या समह्या ऐकून घेतल्या म्हणून नागरिकही मोठ्या संख्येत उपस्थित होते.

जयभवानीनगरला दिलेल्या पहिल्याच भेटीत मला आश्चर्य वाटले. नागरिकांना किती दयनीय अवस्थेत रहावे लागते याची कल्पनाच करवत नाही. यातून पावसाळ्यापूर्वी मार्ग काढण्याचा आमचा प्रयत्न आहे. या भागात जल पुनर्भरणाचे काम सामूहिक पद्धतीने करता येईल का याबाबत पुन्हा संवाद साधणार आहे.
-स्मिता घोगरे, उपमहापौर

मोबाइल अॅप डाउनलोड करा आणि राहा अपडेट

भांडेगावला टँकर सुरू आहे का ?

May 10, 2017, 2:30 pm

≫ Next: सिल्लोडच्या तेरा ‘जलयुक्त’गावांत टँकर

≪ Previous: नाल्याची अवस्था पाहून उपमहापौर अस्वस्थ

$

0

0

म. टा. प्रतिनिधी, खुलताबाद
तालुक्यातील भांडेगाव येथील पाणीटंचाईवर मात करण्यासाठी जलयुक्त शिवार अभियानांतर्गत कृषी विभागातर्फे राबविण्यात आलेल्या कामांची माहिती जिल्हाधिकारी नवल किशोर राम यांना गोळेगाव येथील श्रमदानप्रसंगी अधिकाऱ्यांनी सांगितली. त्यानंतर त्यांनी, भांडेगावला टँकर चालू आहे का? असा प्रश्न उपस्थित केला. अडवलेले पाणी पाणी जमिनीत जिरून गेल्याने शिल्लक राहिले नसल्याने भांडेगावात टँकर सुरू करावा लागला, असे उत्तर देऊन अधिकाऱ्यांनी वेळ मारून नेली.
उपविभागीय कृषि अधिकारी उदय देवळाणकर, तालुका कृषी अधिकारी वैजनाथ हांगे, मंडळ कृषी अधिकारी अशोक अहिरे, कृषी पर्यवेक्षक मिलिंद कोलंबीकर, कृषी सहायक अशोक पठाडे यांनी जिल्हाधिकाऱ्यांना जलयुक्त शिवार अंतर्गत झालेल्या कामांची माहिती दिली. यावेळी बोलतांना जिल्हाधिकारी नवल किशोर राम म्हणाले, जलयुक्त शिवारमध्ये कामे झालेल्या गावांमध्ये टँकर सुरू आहेत. त्याची कारणे काय आहेत याची तपासणी करण्यात येणार आहे. जलयुक्तच्या कामांचा रब्बी पिकांना फायदा झाला आहे. शेतकऱ्यांनी पीकनिहाय पाणी देण्याचे नियोजन केल्यास भविष्यात पाणीटंचाईचे संकट येणार नसल्याचे कृषी अधिकाऱ्यांनी सांगितले. ज्या गावांनी पावसाचे पाणी अडवून जलसंधारणाच्या माध्यमातून पाणी साठवले. कमीतकमी पाण्याचा वापर करून पीकनिहाय पिकांना आवश्यक तेवढे पाणी दिल्यास पाणी बचतीचा संदेश देणाऱ्या गावांसाठी बक्षीस योजना सुरू केल्यास प्रोत्साहन मिळेल, असे उपविभागीय कृषी अधिकारी उदय देवळाणकर यांनी सांगितले. जिल्हाधिकाऱ्यांनी त्यावर विचार करू, असे सांगितले. यावेळी गोळेगाव येथे श्रमदानातून काम केल्याबद्दल कृषी सहायक अशोक पठाडे यांचा जिल्हाधिकाऱ्यांच्या हस्ते शाल व श्रीफळ देऊन सत्कार करण्यात आला.

अधिकाऱ्यांची पाचावर धारण
जलयुक्त शिवार कामाची माहिती दिल्यानंतर जिल्हाधिकाऱ्यांनी थेट भांडेगावला टँकर सुरू आहे का, अशी विचारणा केली. त्यामुळे अधिकाऱ्यांनी पाचावर धारण बसली. यापुढे जाऊन जलयुक्त शिवाय योजनेची कामे झालेल्या गावांत टँकर सुरू झाल्याची कारणे तपासणार असल्याचे सांगितल्याने अधिकाऱ्यांमध्ये खळबळ उडाली आहे. जलयुक्त शिवार योजनेची कामे अनेक ठिकाणी अशास्त्रीय पद्धतीने सुरू असल्याचा आरोप गेल्या वर्षीपासून होत आहे. जिल्हाधिकाऱ्यांनी कारणे शोधल्यास या आरोपाबद्दलचा खुलासा होणार आहे.

मोबाइल अॅप डाउनलोड करा आणि राहा अपडेट

---

सिल्लोडच्या तेरा ‘जलयुक्त’गावांत टँकर

May 10, 2017, 2:30 pm

≫ Next: अवघे शहर बुद्धमय

≪ Previous: भांडेगावला टँकर सुरू आहे का ?

$

0

0

म. टा. प्रतिनिधी, सिल्लोड
पिण्याच्या पाण्याचे स्त्रोत बळकट करून टँकरमुक्ती करणे हे एक उद्दिष्ट असलेल्या जलयुक्त शिवार योजनेची कामे झालेल्या २८ गावांपैकी १३ गावांत टँकरने पाणीपुरवठा केला जात आहे. या शिवाय ७ गावांमध्ये खासगी विहीर अधिग्रहण करण्यात आले आहे. या २८ गावांमध्ये जलयुक्त शिवार योजनांची कामे करण्यात आली.
गाव, शेत-शिवारातील पाणी शेतातच जिरवण्यासाठी शासनाने जलयुक्त शिवार योजना ही महत्वाकांक्षी योजना सुरुवात केली. या योजनेद्वारे शिवारातील वाहून जाणारे पाणी त्या भागातच अडवण्यात आले. यावर शासनाने तालुक्यात लाखो रुपये खर्च केले. गावे पाणीदार होऊन टंचाईमुक्त करण्याचा शासनाचा मानस होता. योजनेसाठी गावांची निवड करताना पाण्याचे कायम दुर्भीक्ष असलेली गावे निवडण्यात आली होती. या गावांतील पाणीटंचाईमुळे तेथे टँकरने पाणीपुरवठा करणे व विहीर अधिग्रहणावर शासनाला मोठा खर्च करावा लागत होता. त्यामुळे या गावातील टँकर कायमस्वरुपी बंद करण्याचा शासनाचा उद्देश होता. मात्र, या जलयुक्त शिवार योजनेची कामे होऊनही या गावांत टँकरने व विहीर अधिग्रहण करून पाणीपुरवठा करावा लागत आहे. त्यामुळे योजनेवर केलेला खर्च वाया गेल्यात जमा आहे.
या योजनेत शेत शिवारातील वाहून जाणारे पाणी अडविण्यासाठी सिमेंटनाला बांध, समतल चर, नाला बल्डिंग, मातीनाला बांध, नदी खोलीकरण व रुंदीकरण अशी कामे करण्यात आली. गेल्या पावसाळ्यात तालुक्यात जोरदार पाऊस होऊनही जलयुक्त शिवार योजनेची कामे झालेल्या गावात पाणीटंचाई निर्माण झाली आहे. त्यामुळे आता योजना मंजूर असलेल्या गावांतील जलयुक्त शिवार योजनेची कामे योग्य पद्धतीने करण्याची गरज आहे. माथा ते पायथा हे जलसंधारणाच्या कामाचे ब्रीद आहे. त्यानुसार शासनाने कामे केली तरच फलित दिसणार आहे. त्यामुळे कृती आराखड्यास मंजुरी देतांना शासनाने याकडे लक्ष देण्याची गरज आहे.

टँकर सुरू झालेली पाणीदार गावे
जंजाळा, बोरगाव सारवणी, आसडी, पळशी, अंधारी, पिंपळदरी, बाळापूर, वरूड, लोणवाडी, वडोदचाथा, गव्हाली, पानवडोद, पिंपळगाव पेठ.

विहीर अधिग्रहण केलेली गावे
नानेगाव, घाटनांद्रा, डोंगरगाव, सिसारखेडा, भराडी, केळगाव, केऱ्हाळा.

मोबाइल अॅप डाउनलोड करा आणि राहा अपडेट

अवघे शहर बुद्धमय

May 10, 2017, 2:30 pm

≫ Next: ४७ बच्या मालमत्ता आधी नियमित करा

≪ Previous: सिल्लोडच्या तेरा ‘जलयुक्त’गावांत टँकर

$

0

0

म. टा. प्रतिनिधी, औरंगाबाद
मंगलमैत्री हा कल्याणाचा मुख्य मार्ग आहे. तो आत्मसात करण्यासाठी कुठल्याही भांडवलाची गरज नाही. तथागत भगवान गौतम बुद्धांच्या शिकवणीप्रमाणे मंगलमैत्रीचा अभ्यास करणे आवश्यक आहे, असा संदेश भदंत बोधीपालो महाथेरो यांनी बुधवारी धम्मदेशनेतून केला.
बुद्ध जयंतीनिमित्त शहरात विविध ठिकाणी कार्यक्रम घेण्यात आले. बुधवारी सकाळी क्रांती चौकातून काढलेल्या मिरवणुकीने शहरातील वातावरण बुद्धमय झाले होते. पांढरी वस्त्रे, हातात पंचशील ध्वज घेऊन मिरवणुकीत सहभागी झालेले उपासक व उपासिका सोबत बुद्ध शरणं गच्छामि, धम्म शरणं गच्छामी, संघ शरणम गच्छामीच्या संदेशाने शहरात उत्साहाचे वातावरण होते.
साडेनऊ वाजता क्रांती चौकातून धम्म मिरवणूक काढण्यात आली. ‘जग मे बुद्ध का नाम है, यही भारत की शान है’, ‘युद्ध नको बुद्ध हवा’ हा शांतीच्या संदेशमय घोषणा देत पैठण गेट, गुलमंडी, सिटी चौक, भडकल गेट मार्गावरून मिरवणूक काढण्यात आली. पीईएस क्रीडा संकुल येथे भिक्‍खू संघाच्या हस्ते तथागतांच्या मूर्तीची पूजा करण्यात आली. त्यानंतर बुद्धपूजा व धम्मदेसना, सामुदायिक ध्यानसाधना, भिक्‍खू संघाची धम्मदेसना, त्यानंतर भिक्‍खू संघाचा आशीर्वाद व मंगलमैत्री साधना घेण्यात आली. धम्मदेशनेतून भदंत बोधिपालो आणि भिक्‍खू संघाने उपदेश केला. धम्मपीठावर सुगतबोधी महाथेरो, आनंदबोधी महाथेरो, भदंत काश्‍यप थेरो, भदंत महेंद्रबोधी, भदंत करुणासागर यांच्यासह भिक्‍खूसंघाची उपस्थिती होती. दरम्यान, सकाळी तथागत बुद्धांच्या मुर्तीस आमदार अतुल सावे, महापौर भगवान घडमोडे, नगरसेवक गजानन बारवाल, मकरंद कुलकर्णी, माजी सभापती रतनकुमार पंडागळे तसेच महापालिका आयुक्त डी.एम. मुगळीकर, सहायक पोलिस आयुक्त गोवर्धन कोळेकर, पोलिस निरीक्षक प्रेमसागर चंद्रमोरे, लाचलुचपत प्रतिबंधक विभागाचे पोलिस अधीक्षक प्रवीण मोरे, सुरेश वानखेडे, अनिल आढे यांच्यासह उपासकांनी अभिवादन केले.

भारतीय बौद्ध महासभा

तथागत भगवान बुध्द जयंती निमित्त सिद्धार्थ उद्यानात दरवर्षी प्रमाणे यंदाही भारतीय बौद्ध महासभेतर्फे विविध कार्यक्रम घेण्यात आले. सकाळी सात वाजता भारतीय बौद्ध महासभेच्या वतीने परित्रणपाठ घेण्यात आले. सकाळी साडेआठ वाजता समता सैनिक दलाच्या वतीने धम्मध्वजवंदन करण्यात आले. त्यानंतर क्रांती चौकातून मिरवणूक काढण्यात आली. दुपारी सिद्धार्थ उद्यान येथे सेवानिवृत्त शहर अभियंता एन. डी. सोनवणे, वामन खडसे यांच्यावतीने उपस्थितांना भोजन देण्यात आले. दुपारी धम्मदीक्षा सोहळा झाला. यावेळी भिक्खू संघ उपस्थित होता. १००० जणांनी दीक्षा घेतली. त्यांना प्रमाणपत्र वाटप करण्यात आले. यावेळी भारतीय बौद्ध महासभेचे अध्यक्ष अशोक कांबळे, सरचिटणीस किशोर जोहरे,वामन खडसे, चंद्रसेन वंजारे, दिनकर ओंकार, रतन पंडागळे, एस. सी. काळे, डी. सी. अंभोरे, डी.आर.सरदार, प्रमोद पवार, दीपक दाभाडे, किशोर भोळे, ज्ञानोबा घोडके, वामन कांबळे आदींसह पदाधिकारी उपस्थित होते.

बुद्ध लेणीच्या पायथ्याशी गर्दी

डॉ. बाबासाहेब आंबेडकर मराठवाडा विद्यापीठ परिसरातील बुद्ध लेणीच्या पायथ्याशी असलेल्या भगवान गौतम बुद्धांच्या मुर्तीला अभिवादन करण्यासाठी बुधवारी सकाळपासून शेकडो अनुयायांनी गर्दी केली होती.
सकाळपासूनच उपासक व उपासिका पांढरे वस्त्र व हातात पंचशिल ध्वज घेवून लेणीच्या पायथ्याशी आले होते. येथे बुद्ध जयंतीनिमित्त प्रज्ञा, प्रसार धम्म संस्कार केंद्रातर्फे सकाळी विविध कार्यक्रमांचे आयोजन करण्यात आले. भदंत विशुद्धानंद बोधी महाथेरो यांच्याहस्ते धम्म ध्वजवंदन करण्यात आले. यावेळी उपासकांसाठी भोजनदान, खीरदान करण्यात आले. यावेळी २२ प्रतिज्ञांचे वाचन आणि पठण तसेच महापरित्राण पाठ करण्यात आला. यावेळी श्रामणेर संघामध्ये सहभागी झालेल्या श्रामणेरांना प्रमाणपत्राचे वाटप करण्यात आले. बुद्ध जयंतीनिमित्त लेणीचा परिसर नागरिकांनी फुलून गेला होता. लेणीच्या पायथ्याशी बुद्धमुर्ती, धार्मिक पुस्तकांचे स्टॉल लागले होते.

मोबाइल अॅप डाउनलोड करा आणि राहा अपडेट

४७ बच्या मालमत्ता आधी नियमित करा

May 10, 2017, 2:30 pm

≫ Next: तक्रार येताच कारवाई; गुन्हेगारांना इशारा

≪ Previous: अवघे शहर बुद्धमय

$

0

0

म. टा. प्रतिनिधी, सातारा
सातारा, देवळाईतील ३० हजार पेक्षा जास्त मालमत्तांच्या सर्वेक्षणाला महापालिका बिल्डरांची संघटना क्रेडाई व एस. पी. खोत आर्किटेक्चर या संस्थेकडून सुरुवात करण्यात आली आहे. परंतु, या सर्वेक्षणाला नागरिकांनी तीव्र विरोध दर्शवला आहे. पाच वर्षांपूर्वी ४७ बसाठी पैसे भरले त्याचे काय झाले याबद्दल कुणीच काही सांगत नाही. अन् पुन्हा त्याच संस्थेमार्फत सर्वेक्षण करण्याचा घाट का घातला जात आहे, असा सवाल केला आहे.
साताऱ्यातील मालमत्ता ४७ ब करण्यात येईल, असे सांगून पाच वर्षांपूर्वी मोजणी शुल्कापोटी ग्रामपंचायत व जिल्हाधिकाऱ्यांच्या नावे १४५० रुपये डीडी च्या स्वरूपात घेतले होते. त्यावेळी मालमत्ताच्या मोजणीचे काम एस. पी. खोत आर्किटेक्चर संस्थेलाच देण्यात आले. परंतु, आज पाच वर्षे उलटून गेल्यावरही त्याचे काय झाले याबाबत ना जिल्हाधिकारी कार्यालय ना सिडको याबाबत कुणीच काही सांगत नाही. असे असताना आता पुन्हा त्याच मालमत्तांचा सर्वे करण्याचा घाट पालिका खासगी संस्थेमार्फत का घालत आहे, असा सवाल करीत सर्वेक्षणाचे काम महापालिकेनेच करावे, अशी मागणी नागरिक करीत आहेत.

ज्या संस्थेने पूर्वी या भागात सर्वेक्षणाचे काम केले आहे. तोच डाटा आता वापरणार व मोफत काम केले असे सांगणार. आयुक्तांनी प्रत्यक्ष नागरिकांशी चर्चा करून यासंबंधी निर्णय घ्यावा. आमचा याला विरोध आहे.
-सविता कुलकर्णी

संस्थेला मोफतच सर्वेक्षण करायचा असेल, तर पूर्वी भरलेले पैसे वापस करा नाही. नाही तर तोच सर्वे ग्राह्य धरावा. त्याऐवजी येथील नागरी समस्या सोडवण्यासंदर्भात पावले उचलावीत म्हणजे भागाचा विकास होईल.
-अनंत सोन्नेकर

हा भाग महापालिकेच्या ताब्यात आल्यानंतर खासगी संस्थेकडून करण्याचा प्रश्नच येत नाही. त्यामुळे यात दुसऱ्यांचेच फावणार आहे. त्यामुळे या भागातील सर्वेक्षणाचे, मोजण्याचे काम महापालिकेतर्फेच करण्यात यावे.
- बद्रीनाथ थोरात

मोबाइल अॅप डाउनलोड करा आणि राहा अपडेट

तक्रार येताच कारवाई; गुन्हेगारांना इशारा

May 10, 2017, 2:30 pm

≫ Next: चिपको आंदोलन; वृक्षतोड रोखली

≪ Previous: ४७ बच्या मालमत्ता आधी नियमित करा

$

0

0

म. टा. प्रतिनिधी, औरंगाबाद
पोलिसांची नजर हिस्ट्रीशिटर गुन्हेगारांवर आहे. तुमचे गुन्हे खुप झाले असून एखादा तक्रार अर्जही आला, तर कडक कारवाई केली जाईल,’ असा इशारा पोलिस उपायुक्‍त विनायक ढाकणे यांनी दिला.
पोलिसांच्या यादीवर असलेल्या गुन्हेगारांचा दरबार बुधवारी दुपारी क्रांती चौक पोलिस ठाण्यात घेण्यात आला. यावेळी पोलिस आयुक्त यशस्वी यादव हे हजर राहणार होते. मात्र, काही महत्त्वाच्या कामामुळे ते उपस्थित राहिले नाहीत. त्यामुळे पोलिस उपायुक्त विनायक ढाकणे यांच्या अध्यक्षतेखाली हा दरबार पार पडला. यावेळी २३ गुन्हेगारांची उप‌स्थिती होती. या बैठकीत गुन्हेगारांवरील गुन्हे आणि सध्यांची त्यांची वर्तुवणूक याची माहिती घेण्यात आली. अनेक गुन्हेगारांवर २०१४ किंवा त्या पूर्वीचे गुन्हे असून काही जण आपली कामे शांततेत करत असल्याची माहिती देण्यात आली. सहा महिन्यांत तक्रारी ‌किंवा गुन्हे दाखल झालेले आहेत, त्यांना ढाकणे यांनी सक्त ताकीद दिली. त्यांच्यावर वेळप्रसंगी हद्दपाराचीही कारवाई होऊ शकते, असा इशारा त्यांनी दिला. यावेळी सहायक पोलिस आयुक्‍त रामेश्वर थोरात, रविकांत बुआ, नागनाथ कोळे, पोलिस निरीक्षक रामेश्वर थोरात, वसीम हाशमी, चंद्रमोरे, देशमुख, अनिल आळे यांच्यासह अधिकाऱ्यांची उपस्थिती होती.
पोलिस आयुक्त यशस्वी यादव यांनी थेट संवादवर भर दिला आहे. त्यांनी पोलिस अधिकारी आणि कर्मचारी, त्यानंतर सिटी चौक पोलिस ठाण्यात जनता संमेलन व बुधवारी शहरातील गुन्हेगारांचा दरबार भरवला.

अनेकांनी मारली दांडी
गुन्हेगारांचा दरबार भरविण्याबाबत पोलिस आयुक्तांच्या आदेशानंतर सराईत किंवा पूर्वाश्रमीच्या गुन्हेगारांना ठाण्यात हजर होण्याचे आदेश दिले होते. वाळूज पोलिसांसोबत आठ जण क्रांती चौक ठाण्यात आले होते. पण, इतर ठाण्यातून दोन तीन किंवा चार एवढेच गुन्हेगार हजर करण्यात आले. अनेकांनी दांडी मारल्याची चर्चा यावेळी होती.

फाइल आली उशिरा
क्रांती चौक पोलिस ठाण्यात बुधवारी भरलेल्या गुन्हेगारांच्या दरबारात, प्रत्येक पोलिस निरीक्षक तसेच संबंधित अधिकारी त्या भागातील गुन्हेगारांबाबत माहिती देत होता. सिटी चौक पोलिस ठाण्यातील काही गुन्हेगार हजर झाले. मात्र, त्यांची गुन्ह्यांची फाइल उशिरा आल्यामुळे संबंधित अधिकाऱ्यांनी या ठाण्याच्या पोलिस अधिकाऱ्यांना फैलावर घेतले.

८२ गुन्हेगारांना तंबी
सातारा परिसरातील राधा मंगल कार्यालयात परिमंडळ दोन मधील ८२ रेकॉर्डवरील गुन्हेगारांना पोलिस उपायुक्त राहुल श्रीरामे यांच्यासमोर हजर करण्यात आले. यावेळी सहायक पोलिस आयुक्त ज्ञानोबा मुंढे, माणिक बाखरे यांची उपस्थिती होती.

टॉप २० ची यादी
सर्व पोलिस ठाण्यातील टॉप २० गुन्हेगारांची यादी तयार करण्यात आली आहे. त्यांना परिमंडळ निहाय पोलिस उपायुक्तांसमोर हजर करण्यात आले. परिमंडळ दोन मधील सातारा पोलिस ठाण्यातील २३ गुन्हेगार, छावणी ठाण्यातील ४, बेगमपुऱ्यातील ३, वाळूज ८, एमआयडीसी वाळूज ४, दौलताबाद पोलिस ठाण्यातातील ३ सराईत गुन्हेगारांना यावेळी हजर करण्यात आले.

मोबाइल, दुचाकी चोरीत वाढ
शहरात मोबाइल आणि दुचाकी चोरीत वाढ झाली आहे. क्रांती चौक, सिडको, मुकुंदवाडी आणि सातारा पोलिस ठाण्याच्या हद्दीत मोबाइल चोऱ्या वाढल्या आहेत. या गुन्ह्यांचा आढावा घेऊन चोऱ्या उघडकीस आणल्या जातील, असे उपायुक्त विनायक ढाकणे यांनी सांगतिले.

मोबाइल अॅप डाउनलोड करा आणि राहा अपडेट

चिपको आंदोलन; वृक्षतोड रोखली

May 10, 2017, 2:30 pm

≫ Next: बुद्धाच्या तत्वज्ञानाचे अग्रदूत व्हा

≪ Previous: तक्रार येताच कारवाई; गुन्हेगारांना इशारा

$

0

0

म. टा. प्रतिनिधी, औरंगाबाद
पर्यावरणवादी कार्यकर्त्यांनी बुधवारी चिपको आंदोलन करत पैठण रोडवरील झाडांची होणारी कत्तल रोखली. प्रकरण न्यायप्रविष्ठ असून कोणत्याही प्रकाराची वर्कऑर्डर नसताना संबंधित कंत्राटदार वृक्ष तोडत आहे, असा आरोप करत कठोर कारवाईची मागणी केली आहे.
औरंगाबाद-पैठण रोड हा सर्वात वर्दळीचा रस्ता असून रस्ता अरूंद आहे. त्यामुळे महानुभाव आश्रम चौक ते वाल्मी यादरम्यान रस्ता रूंद केला जाणार आहे. या रूंदीकरणामुळे रस्त्यालगतचे १७५ जुने वृक्ष तोडण्यात येत आहेत. ही वृक्षतोड थांबवण्यासाठी विविध पर्यावरणवादी संघटना, वृक्षप्रेमी नागरिक एकत्र आले असून कोर्टातही धाव घेण्यात आली आहे.
दरम्यान, बुधवारी दुपारी अडीचच्या सुमारास पैठण रोडवरील काही झाडे तोडली जात आहे, अशी माहिती इको निड्स फाउंडेशनच्या कार्यकर्त्यांना समजली. अत्तदीप आगळे, प्रणवकुमार, विनय सरोदे, अमित वायकोस, अक्षय खोत, रोहित थोरात आदींनी धाव घेत वृक्षतोडीचा निषेध केला. त्यांनी चिपको आंदोलन करत वृक्षतोड रोखली. प्रकरण कोर्टात असताना, वर्कऑर्डर नसताना वृक्षतोड केली जात असल्याचे या कार्यकर्त्यांनी सांगितले. येथील वृक्षाचे पुनर्रोपन करावे किंवा पर्यायी रस्ता करावा, अशी मागणी केली आहे. या आंदोलनांमुळे कंत्राटदाराने वृक्षतोड थांबवली तसेच वन विभागाच्या अधिकाऱ्यांनीही घटनास्थळी धाव घेत माहिती घेतली. याप्रकरणी दोषींवर कठोर कारवाई करण्यात यावी, अशी मागणी फाउंडेशनच्या कार्यकर्त्यांनी केली.

मोबाइल अॅप डाउनलोड करा आणि राहा अपडेट

बुद्धाच्या तत्वज्ञानाचे अग्रदूत व्हा

May 10, 2017, 2:30 pm

≫ Next: डॉक्टरांना मुख्यालयी राहण्याचे सांगावे

≪ Previous: चिपको आंदोलन; वृक्षतोड रोखली

$

0

0

म. टा. प्रतिनिधी, औरंगाबाद,
माणसाच्या जीवनात दुःख आहे, हे गृहितक मांडून भगवान गौतम बुद्ध यांनी माणसाच्या जीवनाचे तत्वज्ञान मांडले. त्यामुळे मानवाच्या सर्वांगीण विकास मांडणाऱ्या बुद्धाच्या परिवर्तनवादी विचारांचे अग्रदूत बनावे, असे आवाहन प्राचार्य डॉ रामचंद्र क्षीरसागर यांनी केले.
डॉ. बाबासाहेब आंबेडकर मराठवाडा विद्यापीठातील गौतम बुद्ध अध्यासन केंद्रातर्फे भगवान गौतम बुद्ध यांच्या २५६१ व्या जयंतीनिमित्त 'भगवान बुद्धचे तत्वज्ञान' या विषयावर व्याख्यानाचे आयोजन करण्यात आले. बुधवारी झालेल्या कार्यक्रमाच्या अध्यक्षस्थानी कुलगुरू डॉ. बी. ए. चोपडे होते. यावेळी कुलसचिव डॉ. प्रदीप जब्दे, संचालक डॉ. वैशाली खापर्डे, विद्यार्थी विकास संचालक डॉ. सुहास मोराळे यांची प्रमुख उपस्थिती होती. यावेळी डॉ. क्षीरसागर म्हणाले, राजपुत्र सिद्धार्थ जीवनाचे तत्वज्ञान शोधण्यसाठी बाहेर पडले. देवाच्या शोधासाठी बाहेर पडले नव्हते. बुद्ध निराशावादी नव्हते, म्हणूनच डॉ. बाबासाहेब आंबेडकर आंबडेकर यांनी मानवाच्या मुक्तीचे तत्वज्ञान सांगणारा बुद्ध धम्म स्वीकारला. बुद्धाने पंचशील, अष्टांग मार्ग यामधून तत्वज्ञान साऱ्या विश्वाला दिले, यावेळी डॉ. क्षीरसागर यांनी शिल-सदाचार, धम्माचे आचरण, चार दु:ख, आर्यसत्य या विषयीसंबंधी विचार मांडले. यावेळी कुलगुरू डॉ. चोपडे म्हणाले, अडीच हजार वर्षापूर्वी भगवान गौतम बुद्धाने मांडलेले तत्वज्ञान आज साऱ्या जगणे स्वीकारले आहे. अजिंठा व वेरूळ लेण्यामुळे मराठवाड्याचा सांस्कृतिक वारसा हे भारताचे वैभव आहे, असेही त्यांनी सांगितले. प्रास्ताविक डॉ. वैशाली खापर्डे यांनी केले. लक्ष्मीकांत पट्टेबहादूर यांनी सूत्रसंचालन करून आभार मानले.

मोबाइल अॅप डाउनलोड करा आणि राहा अपडेट

डॉक्टरांना मुख्यालयी राहण्याचे सांगावे

May 10, 2017, 2:30 pm

≫ Next: शेतकऱ्यांच्या घरात हजारो क्विंटल तूर

≪ Previous: बुद्धाच्या तत्वज्ञानाचे अग्रदूत व्हा

$

0

0

म. टा. प्रतिनिधी, औरंगाबाद
ग्रामीण भागातील नागरिकांनी आरोग्य सुविधा पुरविण्यासाठी प्राथमिक आरोग्य केंद्रे सरकारने सुरू केली. आपल्याकडील बहुतांश वैद्यकीय अधिकारी मुख्यालयी राहत नाहीत. त्यामुळे नागरिकांना अडचणी येतात. गेल्या आठवड्यात कन्नड तालुक्यातील दुर्घटनेनंतर हे पुन्हा सिद्ध झाले आहे. भविष्यात अशा अडचणी येऊ देऊ नका. डॉक्टरांना मुख्यालयी राहायला सांगा, अन्यथा कडक कारवाया करा, अशी सूचना खासदार चंद्रकांत खैरे यांनी जिल्हा परिषद प्रशासनास केली.
जिल्हा परिषदेच्या कामकाजाचा आढावा बुधवारी खैरेंनी घेतला. मुख्य कार्यकारी अधिकारी मधुकरराजे अर्दड, झेडपी अध्यक्ष अॅड. देवयानी डोणगावकर, अतिरिक्त सीइओ सुरेश बेदमुथा, कार्यकारी अभियंता आर. आर. पवार, गजानन रबडे, जिल्हा आरोग्य अधिकारी डॉ. भीमाशंकर जमादार, उपमुख्य कार्यकारी अधिकारी मंजुषा कापसे, वासुदेव सोळंके, संजय कदम आदींसह अधिकारी उपस्थित होते.
जिल्हा परिषदेला यंदा येणाऱ्या निधीतून काय नियोजन करण्यात येणार आहे ? कोणत्या योजना राबविणार ? रस्त्यांची कामे कशी होणार ? याचा विभागनिहाय आढावा खैरेंनी घेतला. कन्नड तालुक्यात गेल्या आठवड्यात एका तलावात बुडून तीन मुलांचा मृत्यू झाला. या दुर्घटनेनंतर प्राथमिक आरोग्य केंद्रात गेल्यानंतर तिथे वैद्यकीय अधिकारी नव्हते. ग्रामीण भागात वैद्यकीय अधिकाऱ्यांनी राहिलेच पाहिजे. त्यांनी सुविधा पुरविल्या नाही तर उपयोग काय ? यापुढे वैद्यकीय अधिकारी प्राथमिक आरोग्य केंद्रांवर राहिलेच पाहिजेत. अन्यथा कडक कारवाई करा, अशी सूचना त्यांनी केली.
रस्त्यांसाठी यंदा जिल्हा नियोजन समितीतून (डीपीसी) जादा निधी मिळणार आहे. त्याचे नियोजन कोणत्या पद्धतीने करणार आहे ? असे खैरेंनी विचारले. रस्त्यांच्या नियोजनासाठी जिल्हा परिषद कार्यकारी अभियंता, सार्वजनिक बांधकाम विभाग कार्यकारी अभियंता आणि अधीक्षक अभियंता यांच्या नियोजनाने एक संयुक्त समिती स्थापली जाणार आहे. ही समिती रस्त्यांचा टप्पेनिहाय अॅक्शन प्लॅन तयार केला जाईल. रस्त्यांची परिस्थिती पाहून आराखडा करून कोणते रस्ते झेडपीकडून करायचे ? कोणते रस्ते पीडब्ल्यूडी करणार याबाबत निर्णय घेण्यात येईल, असे सांगण्यात आले. हा अॅक्शन प्लॅन लवकरात लवकर तयार करावा, अशी सूचना खैरेंनी केली.

मोबाइल अॅप डाउनलोड करा आणि राहा अपडेट

---

शेतकऱ्यांच्या घरात हजारो क्विंटल तूर

May 10, 2017, 2:30 pm

≫ Next: घाटीची हॉस्पिटलची यंत्रणा डायलिसिसवर

≪ Previous: डॉक्टरांना मुख्यालयी राहण्याचे सांगावे

$

0

0

म. टा. प्रतिनिधी, पैठण
२२ एप्रिलपर्यंत नोंद करण्यात आलेल्या सात हजार क्विंटल तुरीपैकी सहा हजार क्विंटल तूर पैठणच्या शासकीय तूर खरेदी केंद्राद्वारे खरेदी करण्यात आली. पण, नोंद न करण्यात आलेली जवळपास पाच हजार क्विंटल तूर अजूनही शेतकऱ्यांच्या घरांमध्ये शिल्लक आहे. या तुरीची खरेदी शासन कधी करणार, असा सवाल शेतकरी करत आहेत.
पैठण येथील शासकीय तूर खरेदी केंद्रावर २१ जानेवारी ते २२ एप्रिल या काळात २६ हजार २३८.२४ क्विंटल तूर खरेदी करण्यात आली. २२ एप्रिल रोजी खरेदी केंद्र बंद करण्यात आली, पण हजारो टन तूर शिल्लक असल्याने शेतकरी व विरोधी पक्षांनी आंदोलन केल्यानंतर २२ एप्रिल पर्यंत शासकीय खरेदी केंद्रावर नोंद केलेली तूर खरेदी करण्याचा निर्णय राज्य शासनाने घेतला. त्यावेळी खरेदी केंद्रावर शिल्लक असलेल्या सात हजार क्विंटल तुरीचा पंचनामा करून २९ एप्रिलपासून खरेदी सुरू करण्यास आली, ९ मेपर्यंत ६ हजार ११०.०८ क्विंटल तूर खरेदी करण्यात आल्याची माहिती सहायक निबंधक श्रीराम सोन्ने यांनी दिली. उर्वरित एक हजार क्विंटल तूर दोन दिवसांत खरेदी केली जाईल अशी माहिती त्यांनी दिली. शासकीय तूर खरेदी केंद्रावर नोंद न केलेली जवळपास पाच हजार क्विंटल तूर तालुक्यातील शेतकऱ्यांकडे शिल्लक असल्याची माहिती समोर आली आहे. नोंद न केलेली तूर कधी खरेदी करणार याची विचारणा करण्यासाठी शेतकरी शासकीय तूर खरेदी केंद्रावर फेऱ्या मारत आहेत.

शेतकऱ्यांना चिंता
बालानगर, तांबे डोणगाव, आडुळ या भागातील शेतकऱ्यांकडे भरपूर तूर शिल्लक आहे. आमच्या गावातील अनेक शेतकऱ्यांनी नंबर लावला होता. नंबर आल्याची माहिती घेण्यासाठी ते दररोज चकरा मारत होते. परंतु, नंबर आल्यानंतर फोनवर कळवू, असे कर्मचाऱ्यांकडून सांगण्यात आले होते. २२ एप्रिल रोजी तूर खरेदी बंद झाल्यामुळे आमच्या तुरीचा पंचनामा झाला नाही, ती घरातच आहे, अशी माहिती तांबे डोणगाव येथील ईश्वर तांबे, ज्ञानेश्वर तांबे, जीजा तांबे यांनी दिली.

मोबाइल अॅप डाउनलोड करा आणि राहा अपडेट

घाटीची हॉस्पिटलची यंत्रणा डायलिसिसवर

May 10, 2017, 2:30 pm

≫ Next: पाण्यासाठी आजपासून वैजापूरमध्ये उपोषण

≪ Previous: शेतकऱ्यांच्या घरात हजारो क्विंटल तूर

$

0

0

म. टा. प्रतिनिधी, औरंगाबाद
शासकीय वैद्यकीय महाविद्यालय व रुग्णालयातील (घाटी) ‘नेफ्रॉलॉजी बिल्डिंग’मधील नादुरुस्त ‘आरओ मशीन’मुळे डायलिसिस उपचारांवर कमालीच्या मर्यादा आल्या आहेत. त्याचवेळी ‘आरओ मशीन’मध्ये वारंवार होत असलेल्या तांत्रिक बिघाडामुळे सातपैकी केवळ दोन-तीन डायलिसिस मशीन कशाबशा सुरू आहेत. हे चित्र वारंवार समोर येत असतानादेखील कायमस्वरुपी दुरुस्तीसाठी पाऊल उचलले जातच नसल्याचे स्पष्ट झाले असून, त्याचा फटका मात्र गोरगरीब रुग्णांना बसत आहे.
घाटी परिसरातील ‘नेफ्रॉलॉजी बिल्डिंग’चे उद्‍घाटन होऊन तब्बल सव्वातीन वर्षे लोटली आहेत. तत्कालिन वैद्यकीय शिक्षणमंत्री डॉ. विजयकुमार गावित यांच्या हस्ते या स्वतंत्र विभागाचे जंगी उद्‍घाटन झाले, परंतु या सव्वातीन वर्षांत केवळ ‘डायलिसिस’चे उपचार सुरू होऊ शकले आहेत. वस्तुतः मूत्रमार्गाचे व मूत्रपिंडविकारांवरील सर्व प्रकारचे उपचार-शस्त्रक्रिया या विभागात होण्याच्या दृष्टीने या स्वतंत्र विभागाची भव्य-दिव्य इमारत घाटी परिसरात उभी राहिली. याच विभागात मूत्रपिंड प्रत्यारोपण होणेदेखील अपेक्षित आहे. मात्र ‘डायलिसिस’ विभागाशिवाय ही संपूर्ण इमारत धूळखात पडून आहेत. त्याचवेळी अलीकडे ‘आरओ मशीन’ची समस्याही गंभीर बनली असून, या मशीनमध्ये वारंवार तांत्रिक बिघाड होत आहे. ‘डायलिसिस’च्या उपचारांसाठी ‘आओ मशीन’द्वारे प्रक्रिया करण्यात आलेल्या पाण्याची वैद्यकीयदृष्ट्या गरज असते. परंतु, या विभागातील डायलिसिसच्या एकूण सात मशीनला अपेक्षित असलेले प्रक्रियायुक्त पाणी नादुरुस्त आरओ मशीनमुळे पुरेशा प्रमाणात मिळत नसल्याने केवळ दोन ते तीन मशीन एकाचवेळा चालू शकतात. परिणामी, डायलिसिसच्या सात मशीन एकाचवेळी चालू शकत नाही व गोरगरीब रुग्णांची गैरसोय होते. खासगीत ‘डायलिसिस’च्या उपचारांसाठी हजार ते दीड हजार रुपये मोजावे लागतात आणि एवढी रक्कम गोरगरीब रुग्णांना शक्य होत नसल्याने त्यांना घाटीशिवाय पर्याय राहात नाही. सद्यस्थितीत घाटीमध्ये दररोज किमान १५ ते २० रुग्णांवर ‘डायलिसिस’चे उपचार केले जातात. मात्र नादुरुस्त ‘आरओ मशीन’मुळे रुग्णांना प्रतीक्षा करण्याशिवाय पर्याय राहात नाही.

देखभाल दुरुस्तीचा करार कधी?
एकीकडे या विभागातील ‘आरओ मशीन’मध्ये वारंवार बिघाड होत आहे, तर दुसरीकडे मशीनच्या कायमस्वरुपी देखभाल दुरुस्तीसाठी संबंधित कंपनीशी करार करण्यात येत नसल्याचे स्पष्ट होत आहे. अशा प्रकारचा करार करण्यात न आल्यानेच आरओ मशीनची वेळोवेळी दुरुस्ती-सर्व्हिसिंग होत नसल्याचे समोर आले आहे. त्यामुळेच मागच्या आठवड्यात तब्बल तीन ते चार दिवस ‘आरओ मशीन’ पूर्णपणे बंद पडली होती व या विभागातील ‘डायलिसिस’चे उपचार पूर्णपणे थांबले होते. या पार्श्वभूमीवर देखभाल दुरुस्तीचा करार कधी होणार, असा प्रश्न उपस्थित होत आहे.

मोबाइल अॅप डाउनलोड करा आणि राहा अपडेट

पाण्यासाठी आजपासून वैजापूरमध्ये उपोषण

May 10, 2017, 2:30 pm

≫ Next: ऑरिक सिटीत ४० टक्के कामांना गती

≪ Previous: घाटीची हॉस्पिटलची यंत्रणा डायलिसिसवर

$

0

0

म. टा. प्रतिनिधी, वैजापूर
नाशिक पाटबंधारे विभागाने वैजापूर व गंगापूर तालुक्यांसाठी नांदूर मधमेश्वर जलद कालव्यातून पाण्याचे उन्हाळी आवर्तन सोडण्यास नकार दिल्याने लाभधारक शेतकरी संतप्त झाले असून गुरुवारपासून तहसील कार्यालयासमोर आमरण उपोषण करण्याचा इशारा दिला आहे. पाणी न सोडल्यास सामूहिक आत्मदहन करण्यासही मागेपुढे पाहणार नाही असा इशारा देण्यात आला आहे.
बाजार समिती संचालक ज्ञानेश्वर पाटील जगताप यांच्या नेतृताखाली बुधवारी लाभधारक शेतकऱ्यांची बैठक झाली. या बैठकीत ज्ञानेश्वर जगताप, प्रतापराव सोमवंशी यांनी मार्गदर्शन केले. नांदूर मधमेश्वर जलदगती कालव्यातून पाणी सोडण्याची मागणी दोन्ही तालुक्यातील लाभधारक शेतकरी एक महिन्यापासून करत आहेत. मुख्यमंत्री देवेंद्र फडणवीस यांनी सुद्धा पाणी सोडण्याचे आदेश दिले आहेत. ऑगस्टमध्ये जलसंपदा मंत्री गिरीश महाजन यांच्या अध्यक्षतेखाली झालेल्या बैठकीत वैजापूर व गंगापूर तालुक्यांसाठी नियोजन करण्यात आल्यानुसार हक्काचे दीड टीएमसी पाणी शिल्लक आहे. या पाण्याचे बाष्पीभवन झाले सांगून नाशिक पाटबंधारे विभाग पाणी सोडत नाही.

भाजप नेते काय करता?
नाशिक पाटबंधारे विभागाने मुख्यमंत्र्याच्या आदेशाला केराची टोपली दाखवली आहे. तरीसुद्धा दोन्ही तालुक्यातील भाजपाचे नेते गप्प का? पाण्यात सुद्धा राजकारण आडवे येते का, असा सवाल शेतकऱ्यांनी या बैठकीत केला.

मोबाइल अॅप डाउनलोड करा आणि राहा अपडेट

ऑरिक सिटीत ४० टक्के कामांना गती

May 10, 2017, 2:30 pm

≫ Next: जिल्हाधिकाऱ्यांनी केले गोळेगावात श्रमदान

≪ Previous: पाण्यासाठी आजपासून वैजापूरमध्ये उपोषण

$

0

0

म. टा. प्रतिनिधी, औरंगाबाद
औरंगाबाद इंडस्ट्रियल सिटी अर्थात ऑरिकचे काम जोरात सुरू झाले आहे. पायाभूत सुविधांच्या ४० टक्के कामांना गती आली आहे. दोन उड्डाणपुलांच्या ४६ खांबांची उभारणी अंतिम टप्प्यात आहे. शिवाय ३० किलोमीटर रस्त्यांचे काम पूर्ण झाले आहे.
जालना रोडवरून ऑरिक सिटीत प्रवेश करण्यासाठी उभारण्यात येणाऱ्या दिल्ली-मुंबई इंडस्ट्रियल कॉरिडॉरअंतर्गत शेंद्रा परिसरात दोन हजार, तर बिडकीन परिसरात आठ हजार एकर जमिनीचे संपादन करण्यात आले आहे. जालना रोडवरून ऑरिक सिटीत प्रवेश करण्यासाठी दोन रेल्वे उड्डाणपूल तयार केले जात आहेत. करमाडजवळील रेल्वे उड्डाणपुलाच्या ३६ पैकी ३२ खांबांचे, तर सटाण्याजवळील उड्डाणपुलाच्या १८ पैकी १४ खांबांची उभारणी लवकरच पूर्ण होणार आहे. पिण्याच्या पाण्यासाठी १४ किलोमीटर लांब जलवाहिनीचे काम पूर्ण झाले आहे. शेंद्रा परिसरात ४०ते ४५ किलोमीटर लांबीच्या काँक्रीट रस्त्याचे काम सुरू आहे. यापैकी सुमारे ३० किलोमीटर लांबीचे रस्ते तयार झाले आहेत. २० ते ६५ मीटर, अशी या रस्त्यांची रुंदी आहे.

सांडपाण्याचा पूनर्वापर
औरंगाबाद शहरातील सांडपाण्यावर प्रक्रिया करून त्याचा औद्योगिक कारणासाठी वापर केला जाणार आहे. नक्षत्रवाडी येथे सांडपाण्यावर प्रक्रिया केली जाणार असून, ५० लाख लिटर क्षमतेच्याच टाकीत ते साठविले जाणार आहे. या टाकीचा पायाउभारणीचे काम पूर्णत्वास आहे. प्रक्रिया केलेले सांडपाणी कारखान्यांपर्यंत पोहोचविण्यासाठी ४८ किलोमीटरची पाइपलाइनचे टाकण्यात येईल. यापैकी १४ किलोमीटर पाइपलाइनचे काम पूर्णत्वाकडे आहे. औद्योगिक आणि निवासी क्षेत्रातील सांडपाणी वाहून नेण्यासाठी अनुक्रमे ५० किलोमीटर आणि १३ किलोमीटर लांबीच्या मलनि:सारण वाहिन्या टाकल्या जाणार असून, यापैकी १६ किलोमीटरच्या वाहिनीचे काम पूर्ण झाले आहे.

प‌हिल्या टप्प्यात ७२० कोटींचा खर्च
पहिल्या टप्प्यात शेंद्रा परिसरात ७२० कोटी रुपये खर्चून पायाभूत सुविधांच्या उभारणीची कामे हाती घेण्यात आली आहेत. ही कामे पूर्ण करण्यासाठी आणखी आठ महिन्यांची मुदत असून, कामांची गती पाहता मुदतीपूर्वीच ती पूर्ण होण्याची चिन्हे आहेत. ऑरिक सिटीला पाणीपुरवठा करण्यासाठी दोन कोटी लिटर क्षमतेचा भूमिगत जलकुंभ केला जाणार आहे. या जलकुंभाच्या पायाचे काम पूर्ण झाले असून, खांब उभारणी सुरू आहे. या जलकुंभातील पाणी दहा लाख लिटर क्षमतेच्या दुसऱ्या जलकुंभात साठविले जाणार आहे. या जलकुंभाच्या फाउंडेशनचे कामदेखील पूर्ण झाले आहे.

मोबाइल अॅप डाउनलोड करा आणि राहा अपडेट

जिल्हाधिकाऱ्यांनी केले गोळेगावात श्रमदान

May 10, 2017, 2:30 pm

≫ Next: सुरेश धसांना चोख उत्तर देऊ

≪ Previous: ऑरिक सिटीत ४० टक्के कामांना गती

$

0

0

म. टा. प्रतिनिधी, खुलताबाद
जिल्हाधिकारी म्हणजे जिल्ह्याचा राजाच. पण, तोच हातात टिकाव फावडे घेऊन श्रमदान करण्यास सुरुवात करतो तेव्हा इतरांनाही हुरूप येतो. असाच प्रकार खुलताबाद तालुक्यातील गोळेगाव येथे घडला. जिल्हाधिकारी सहभागी झाल्याने येथी वॉटर कप स्पर्धेत सहभागी नागरिकांनी अवघ्या दोन तासात पाच हजार खड्डे खोदले.
जिल्हाधिकारीपदाची सूत्रे हाती घेतल्यानंतर नवल किशोर राम यांनी बुधवारी जिल्ह्यात पहिली भेट गोळेगाव येथील श्रमदान साइटला दिली. त्यांनी गुलाबी टी शर्ट घालून महसूल अधिकारी व कर्मचाऱ्यांसह श्रमदान केले. दोन तासात खोदण्यात आलेल्या पाच हजार खड्ड्यांत वृक्षलागवड करून संगोपन करण्यात येणार आहे. त्याबद्दल जिल्हाधिकाऱ्यांनी आनंद व्यक्त केला. ‘एकजुटीने काम करणाऱ्या गावाची प्रगती कोणीच रोखू शकत नाही,’ या शब्दात त्यांनी गावकऱ्यांना प्रोत्साहन दिले. गोळेगाव येथे वॉटर कप स्पर्धेसाठी छान काम होत असल्याची माहिती मिळाल्यामुळे प्रोत्साहन देण्यासाठी भेट दिल्याचे त्यांनी सांगितले. यावेळी सरपंच संतोष जोशी यांनी गावाची माहिती दिली. २२ मेपर्यंत एक लाख ५३ हजार घनमीटर काम पूर्ण करण्याचे उद्दिष्ट असल्याचे त्यांनी जिल्हाधिकाऱ्यांना सांगितले.
यावेळी पंचायत समिती सभापती अर्चना अंभोरे, उपसभापती गणेश अधाने, जिल्हा परिषद सदस्य एल. जी. गायकवाड, निवासी उपजिल्हाधिकारी विश्वंभर गावंडे, उपविभागीय कृषी अधिकारी उदय देवळाणकर, तहसीलदार डॉ. अरूण जऱ्हाड, तहसीलदार रोशन मकवाने, तालुका कृषी अधिकारी वैजनाथ हांगे, गटविकास अधिकारी हारकचंद कहाटे, तलाठी संघटनेचे राज्य अध्यक्ष सतीश तुपे, मंडळ कृषी अधिकारी अशोक अहिरे, कृषी पर्यवेक्षक मिलिंद कोलंबीकर, कृषी सहायक अशोक पठाडे, तलाठी प्रकाश बंड, ग्रामसेवक डी. डी. थोरे, लघुसिंचन उपविभागीय अभियंता एन. ए. कटके आदी उपस्थित होते.

रानमेव्याची चव
गोळेगाव येथील काळा छापा तलावाजवळील डोंगरात सकाळी सात वाजेपासून जिल्हाधिकारी व इतर अधिकाऱ्यांनी श्रमदान केले. यावेळी गोळेगाव येथील काही मुलींनी डोंगरातून करवंदे आणून जिल्हाधिकारी नवल किशोर राम यांना दिली. त्यांनी आधी त्या मुलींना करवंदे खाऊ घातले, नंतर स्वतः आस्वाद घेतला.

गाळमुक्त तलाव मोहीम
जिल्ह्यात सध्या ३५० टँकर सुरू असून २०० टँकरची मागणी आहे. इतके टँकर का लागतात हे तपासले जाणार आहे. जलयुक्त शिवार योजना, मूलस्थानी जलसंधारण, गाळ मुक्त तलाव आदी कामांमुळे टंचाई दूर होऊ शकते. जिल्ह्यात जूनपर्यंत गाळमुक्त तलाव मोहीम राबविली जाणार आहे. सीसीटी, मातीनाला बांध, समतलचर या कामांना प्राधान्याने चालना देण्यात येत आहे. जिल्ह्यात १४ लाख वृक्षलागवड करण्याचा मनोदय जिल्हाधिकारी नवल किशोर राम यांनी ‘मटा’ शी बोलताना व्यक्त केला.

मोबाइल अॅप डाउनलोड करा आणि राहा अपडेट