म. टा. प्रतिनिधी, औरंगाबाद
मुंबई-नागपूर या समृद्धी महामार्गासाठी औरंगाबाद जिल्ह्यातील जमीन मोजणीचे काम पूर्ण झाले असून, येत्या महिन्याभरात शेतकऱ्यांसोबत वाटाघाटीने दर ठरवण्यासाठी येत्या आठ दिवसांत दरनिश्चितीचा प्रस्ताव सादर करण्याचे आदेश जिल्हाधिकारी नवलकिशोर राम यांनी दिले.
समृद्धी महामार्गासंदर्भात गुरुवारी (१८ मे) जिल्हाधिकारी नवलकिशोर राम यांनी भूसंपादन, नगररचना, रस्ते विकास महामंडळाच्या अधिकाऱ्यांसोबत बैठक घेतली. यावेळी त्यांनी आवश्यक असलेल्या जमिनीचे तत्काळ नकाशे तयार करा, शेतकऱ्यांच्या जमिनीवर असलेल्या विहिरी, तलाव, झाडे, इतर बांधकामांचे मूल्यांकन वेगाने पूर्ण करा, भूमीअभिलेख कार्यालयाकडून क्षेत्र निश्चिती करून शेतकऱ्यांची यादी आणि आराखडा तयार करण्याचे काम सुरू तातडीने पूर्ण करावे, शेतकऱ्यांकडून १५ दिवसांत हरकती मागवण्यात येऊन त्यावर सुनावणी घेण्यात यावी; तसेच शेतकऱ्यांची जमीन वाटाघाटीने खरेदी करावी लागणार असल्याने त्यासाठी संबंधित गटांचा रेडिरेकनर दर आणि मागील तीन वर्षांत झालेल्या खरेदी-विक्री व्यवहाराच्या नोंदींची माहिती घेऊन दर निश्चितीचा प्रस्ताव ८ दिवसांत तयार करावा, असे निर्देश यावेळी देण्यात आले दिले. यावेळी समृद्धी महामार्गासाठी जमीन मोजणीचे काम पूर्ण झाल्याची माहिती यावेळी अधिकाऱ्यांनी दिली.
जिल्हाधिकाऱ्यांनी घेतलेल्या आढावा बैठकीसाठी औरंगाबादचे उपविभागीय अधिकारी शशिकांत हदगल, रस्ते विकास महामंडळाचे उपजिल्हाधिकारी आर. व्ही. आरगुडे, भूमीअभिलेख कार्यालयातील अधिकारी; तसेच वैजापूर आणि गंगापूर तालुक्यांचे भूसंपादन अधिकारी, तहसीलदार सतीश सोनी यांच्यासह अधिकारी कर्मचाऱ्यांची उपस्थिती होती.
मूल्यांकन समिती स्थापन
जिल्हा मूल्यांकन समितीची स्थापना करण्यात आली असून, या समितीमध्ये जिल्हाधिकारी, कार्यकारी अभियंता सार्वजनिक बांधकाम, कार्यकारी अभियंता जलसंपदा, जिल्हा सरकारी अभियोक्ता, कार्यकारी अभियंता रस्ते विकास, निवासी उपजिल्हाधिकारी यांचा समावेश आहे. दर निश्चितीचा प्रस्ताव समितीसमारे सादर करून त्याला मान्यता मिळाल्यानंतर शेतकऱ्यांशी वाटाघटीने जमीनखरेदीची प्रक्रिया राबवली जाणार आहे.
सप्टेंबरपर्यंत जमिनीचा ताबा
सप्टेंबर महिन्यापर्यंत जमिनी ताब्यात घेण्याचा प्रयत्न आहे. मराठवाड्यातील औरंगाबाद (११२.३१ किलोमीटर) आणि जालना (४२ किलोमीटर) या जिल्ह्यांतील पाच तालुक्यांतून महामार्ग जाणार अाहे. औरंगाबादसह औरंगाबाद, वैजापूर आणि गंगापूर तालुक्यातील ६२ गावांमध्ये सुमारे ११२.२१ किलोमीटरपैकी ११० किलोमीटरवरील जमिनीची मोजणी पूर्ण करण्यात आली आहे. औरंगाबाद जिल्ह्यात समृद्धी महामार्गासाठी ५९ गावांमधल १३८० हेक्टर जमीन संपादन करण्यात येणार आहे, वैजापूर व गंगापूर तालुक्यांच्या तुलनेत औरंगाबाद तालुक्यामध्ये जमीन देण्यासंदर्भात शेतकऱ्यांनी विरोध आहे. शेतकऱ्यांचा विरोध असतानाही अधिकाऱ्यांनी गावांत जाऊन शेतकऱ्यांशी संवाद साधला व महामार्गाविषयी जनजागृती केली. त्यामुळेच संपूर्ण मोजणी पूर्ण करणे शक्य झाले.
मोबाइल अॅप डाउनलोड करा आणि राहा अपडेट
