एकीकडे ‘मागेल त्याला शेततळे’ योजनांचा सरकार डंका पिटत असताना मराठवाड्यात मात्र ही योजना कासवगतीने सुरू आहे. विभागात ३९ हजार ४०० शेततळी तयार करण्याचे टार्गेट आहे. प्रत्यक्षात केवळ ४ हजार शेततळीपूर्ण करण्यात आले आहेत.
पावसाची अनियमितेमुळे शेतकऱ्यांचे नुकसान होऊ नये म्हणून त्यांच्याकडे शेतातच मुबलक पाणी असावे, यासाठी शासनाने शेतकऱ्यांची गरज ओळखून ‘मागेल त्याला शेततळे’ ही योजना सुरू केली होती. मराठवाड्यातील आठही जिल्ह्यांमध्ये ३९ हजार ६०० शेततळे वाटप करण्याचे उद्दिष्ट होते. शेततळे बांधल्यानंतर प्रत्येक शेततळ्यासाठी ५० हजार रुपयांचे अनुदान देण्यात येणार होते, मात्र आतापर्यंत यातील केवळ १२ हजार ५५७ शेततळे (३२ टक्के) पूर्ण करण्यात आली आहेत. या योजनेसाठी ५२ हजार २११ शेतकऱ्यांनी अर्ज केले होते. शासकीय निकष पूर्ण करून ४६ हजार शेतकऱ्यांना पात्र ठरवण्यात आले होते. यातील ३३ हजार ५२८ अर्जांना तालुकास्तरीय समितीने मंजुरी दिली होती, तर २९ हजार ४१० शेततळ्यांना कार्यारंभ आदेश देण्यात आला होता. येत्या काही दिवसांत पावसाला सुरुवात होणार असल्यामुळे मागेल त्याला शेततळ्यांच्या कामाला चार महिने ब्रेक लागण्याची शक्यता आहे. प्रशासनाच्या ढिसाळ नियोजनामुळे ‘जलयुक्त शिवार अभियाना’तील कामांप्रमाणेच मराठवाड्यात मागेल त्याला शेततळे योजनांची कामे कासगवती सुरू आहेत.
आयुक्तांच्या पुढाकाराने दीड महिन्यात ६ हजार शेततळी पूर्ण
मार्चअखेर विभागात केवळ ६ हजार ३९० शेततळ्यांचे कामे पूर्ण झाली होती. त्यानंतर विभागीय आयुक्त डॉ. पुरुषोत्तम भापकर यांनी मराठवाड्यातील प्रत्येक जिल्ह्यामध्ये दौरा करून शासनाच्या विविध योजनांबाबत अधिकारी, कर्मचाऱ्यांची कानउघाडणी केली. त्यानंतर अवघ्या दीड महिन्यात मराठवाड्यात तब्बल ६ हजार १६७ शेततळे पूर्ण करण्यात आली.
नांदेड, लातूरची पिछाडी
मागेल त्याला शेततळे योजनेमध्ये जालना व हिंगोली जिल्ह्याने लक्षांकाच्या तुलनेत ५७ टक्के शेततळे पूर्ण करण्यात आली आहेत मात्र नांदेड (१२ टक्के) व लातूर जिल्हा (२१ टक्के) इतर जिल्ह्यांच्या तुलनेत मागे आहेत.
पुर्ण झालेल्या शेततळ्यांची स्थिती
जिल्हा........उद्दिष्ट..........पूर्ण शेततळे.......टक्केवारी
जालना...........६०००............३४४४.............५७
हिंगोली...........१५००.............८५९..............५७
औरंगाबाद.......९१००.............३१९६............३५
उस्मानाबाद.....३७००.............१२१२............३३
परभणी...........३०००.............७५३.............२५
बीड...............६५००.............१४६५...........२३
लातूर..............४८००.............०२९.............२१
नांदेड.............५०००.............५९९..............१२
एकूण.............३९६००..........१२५५७...........३२ टक्के
मोबाइल अॅप डाउनलोड करा आणि राहा अपडेट
म. टा. प्रतिनिधी, जालना 
