![]()
म. टा. प्रतिनिधी, लातूर
लातूर पालिकेच्या महापौरपदी भाजपचे सुरेश पवार तर उपमहापौरपदी देवीदास काळे विजयी झाले. या दोघांनाही प्रत्येकी ३६ मते मिळाली तर काँग्रेसच्या उमेदवारांना राष्ट्रवादी काँग्रेसच्या एका नगरसेवकांनी साथ दिल्यामुळे ३४ मते मिळाली. पीठासीन अधिकारी तथा जिल्हाधिकारी जी. श्रीकांत यांनी या दोघांची निवड घोषीत केली. आमदार अमित देशमुख यांनी आम्ही फोडाफोडीचे राजकारण करणार नाहीत हे स्पष्ट केले होते. त्याप्रमाणे त्यांनी राष्ट्रवादी काँग्रेसच्या एका नगरसेवकाची साथ घेत स्थायी समितीची एक जादा जागा मिळवली.
सोमवारी झालेल्या विशेष बैठकीत सभागृह नेत्याचे नाव घोषीत करण्याची मागणी करत विरोधी पक्षनेते अॅड दीपक सूळ, अशोक गोविंदपूरकर, विक्रांत गोजमगुंडे यांनी जोरदार मागणी करून भाजपला कोंडीत पकडण्याचा प्रयत्न केला. दीपक सूळ यांनी तर डायसवर चढून घोषणाबाजी केली. उपमहापौर देवीदास काळे यांनी पक्षनेतृत्वाशी संपर्क साधून अखेर तो विषय मार्गी लावला. आणि भाजपचे गटनेते अॅड. शैलेश गोजमगुंडे हेच सभागृह नेते असल्याचे पत्र घेऊन त्यांची निवड महापौराला घोषीत करण्यास भाग पाडले. या प्रश्नावर आयुक्त म्हणून पिठासीन अधिकारी असलेल्या जिल्हाधिकाऱ्यांनी नियम ही वाचून दाखवले. परंतु, त्याचा उपयोग झाला नाही. सभागृहात गोंधळ करून पुढील वाटचाल कशी असेल याची चुणूक काँग्रेसने दाखवून दिली.
या बैठकीतच महापालिकेतील पाच स्वीकृत सदस्यांचीही निवड करण्यात आली. भाजपतर्फे प्रकाश पाठक, गुरुनाथ मगे, अनंत गायकवाड तर काँग्रेसच्यावतीने पुनीत पाटील आणि चाँदपाशा घावटी यांचे नावे देण्यात आल्याने त्यास सभागृहाने संमती दिली. नियुक्त सदस्यांचे पिठासीन अधिकाऱ्यांनी स्वागत केले.
स्थायी समितीमध्ये काँग्रेसच्या वाट्याला येणारी एक जागा राष्ट्रवादी काँग्रेसचे राजा मणियार यांना देण्यात आली. शिल्लक सात जागेवर विक्रांत गोजमगुंडे, पप्पु देशमुख, अशोक गोविंदपूरकर, रविशंकर जाधव, अहमदखान पठाण, सचिन बंडापल्ले, युनुस मोमीन, यांचा समावेश आहे. भाजपने अॅड. शैलेश गोजमगुंडे, शैलेश स्वामी, दीपा गिते, शितल मालू, नितीन वाघमारे, विशाल जाधव, संजय रंदाळे, अजय कोकाटे यांना संधी दिली. यासर्व प्रक्रिया पूर्ण होईपर्यंत जिल्हा परिषदेचे उपाध्यक्ष रामचंद्र तिरुके, सभापती देशमुख, जिल्हा अध्यक्ष नागनाथ निडवदे, निरीक्षक मनोज पांगारकर आदि पालिकेत ठाण मांडून बसले होते. पालकमंत्री संभाजी पाटील-निलंगेकर दुरध्वनीवरून सर्व नियंत्रण करीत होते.
‘पालिकेचा कारभार सर्वांना सोबत घेऊन’
महापालिकेच्या बाहेर भाजपच्या सदस्यांनी गुलाल उधळून आनंदोत्सव साजरा केला. पत्रकारांशी बोलताना महापौर सुरेश पवार म्हणाले, ‘लातूर शहरात पाणी, कचरा हे विषय तातडीने मार्गी लावण्याचा प्रयत्न केला जाणार आहे. पालिकेचा कारभार सर्वांना सोबत घेऊन पारदर्शीपणे केला जाईल.’
म. टा. प्रतिनिधी, लातूर
