मराठी माध्यमांच्या शाळांची पटसंख्या कमी होत असल्याची चर्चा होत असली, तरी अनेक शाळा अपवाद आहेत. जिल्हा परिषदेच्या असा शाळांच्या प्रगतीचे रिपोर्टकार्ड पोर्टलद्वारे विद्या परिषद पालकांसमोर ठेवणार आहे. जिल्ह्यातील निवडक ५०० शाळांचे हे रिपोर्टकार्ड असेल. शाळेतील उपक्रम, सुविधांपासून ते भविष्यातील संकल्प जाणून घेता येणार आहेत. या शाळांमधील विद्यार्थी संख्येचा वाढता आलेख तर, थक्क करणारा आहे. येत्या दोन-तीन दिवसांत प्रगती पुस्तकाची वेबसाइट सर्वांना उपलब्ध होईल.
मराठी शाळांच्या तुलनेत इंग्रजी शाळा स्वतःची मार्केटिंग करण्यात आघाडीवर असतात. मराठीची पटसंख्या कमी होत असताना, अनेक जिल्हा परिषद शाळांनी कात टाकली आहे. इंग्रजी शाळांच्या स्पर्धेत मराठी शाळा टिकाव्यात, यासाठी प्रगत शाळांचे प्रगती पुस्तक आता नव्या स्वरुपात पालकांसमोर, समाजासमोर ठेवण्यासाठी पोर्टल तयार केले जात आहे. प्रादेशिक विद्या परिषद त्यासाठी प्रयत्न करीत आहे. प्रगत तंत्रज्ञानाचा वापर आणि शिक्षकांचे प्रयत्न यांमुळे शाळांचा दर्जा उंचावला आहे. अशा ५०० शाळांचे प्रगती पुस्तक तयार करण्यात येत आहे.
या शाळांच्या प्रगतीची माहिती पोर्टलद्वारे उपलब्ध करून दिली जाणार आहे. पाच वर्षांत शाळेने केलेली प्रगती, अध्यापन पद्धती, विद्यार्थी संख्या, इतरांपेक्षा वेगळे उपक्रम, स्थलांतर रोखण्यासाठी केलेले उपक्रम आणि त्याचे परिणाम, लोकसहभाग, उपलब्ध सुविधा अशा विविध निकषांवर शाळांची प्रगती मांडली आहे. या बदलांमुळे शाळेच्या गुणवत्तेत पडलेला फरक, मागील पाच वर्षांत विद्यार्थी संख्येत झालेली वाढ, विशेष उपक्रम अशी शाळेची सगळी माहिती वेबसाइटवर उपलब्ध असेल. या उपक्रमाला ‘माझी शाळा-यशोगाथा’ असे नाव देण्यात आले आहे.
प्रगती पुस्तकात काय...
शाळेत आयोजित होणारे उपक्रम, उपलब्ध सुविधांचा उल्लेख प्रगती पुस्तकात आहे. त्याचबरोबर शाळेचे विशेष उपक्रम, संकल्पही मांडण्यात आले आहे. शाळेतील उपक्रमांची दखल घेऊन विविध वर्तमानपत्रांनी प्रसिद्ध केलेल्या माहितीचेही संकलन करण्यात आले आहे. पाच वर्षांत विद्यार्थी संख्येतील वाढ, शिक्षक संख्या, मंजूर शिक्षक संख्या याची माहितीही प्रगती पुस्तकात असेल. मुख्याध्यापक, त्यांचा मोबाइल क्रमांकही देण्यात उपलब्ध असेल. त्यामुळे शाळेचे प्रगती पुस्तक पाहून प्रवेश घेऊ इच्छिणारे विद्यार्थी व पालकांची सोय होईल.
जिल्हा परिषदेच्या शाळांबाबत पाहण्याचा दृष्टिकोन बदलावा या हेतूने आमचे प्रयत्न सुरू आहेत. जिल्ह्यातील शंभर टक्के प्रगत शाळांची संख्या १६००पेक्षा अधिक आहे. त्यातील ५०० शाळांची माहिती उपलब्ध करून देण्यात आली. प्रवेशाच्या सुरुवातीलाच आम्हाला आमच्या शाळांची माहिती पोर्टलद्वारे पालकांना उपलब्ध करून द्यायची आहे. रिपोर्टकार्ड पाहून पाल्याला कोठे प्रवेश द्यायचा, हे त्यांना ठरवणे सोपे येईल.
- सुभाष कांबळे, संचालक, प्रादेशिक विद्या परिषद, औरंगाबाद
मोबाइल अॅप डाउनलोड करा आणि राहा अपडेट
