जिन्सी भागातील रनमस्तपुरा येथे सुरू असलेले बेकायदा गर्भपात केंद्र पोलिसांनी बुधवारी छापा टाकून उघड केले. याप्रकरणी महिला डॉक्टर व एका मदतनीस महिलेला अटक करण्यात आली आहे. पोलिसांनी गर्भपातासाठी वापरण्यात येणारे साहित्य जप्त केले.
या कारवाईबाबत पोलिस उपायुक्त राहुल श्रीरामे यांनी सांगितले की, किलेअर्क भागात राहणाऱ्या सुमैय्या अंजूम सय्यद इफ्तेखारोद्दीन (२५) यांचा त्यांचे पती सय्यद सल्लाहुद्दीन सय्यद शहाबुद्दीन यांनी १९ एप्रिल रोजी त्यांच्या मर्जीविरुद्ध डॉ. चंद्रकला आर. गायकवाड यांच्या गर्भपात केंद्रात गर्भपात केला. याबाबत त्यांनी पोलिस आयुक्त यशस्वी यादव यांच्याकडे तक्रार केली होती. पोलिस आयुक्तांच्या आदेशानंतर जिन्सी पोलिस ठाण्याचे पोलिस निरीक्षक श्याम सुंदर वसूरकर यांनी उपनिरीक्षक वर्षा काळे व काही महिला कर्मचाऱ्यांचे विशेष पथक स्थापन केले.
तक्रारदार महिलेसोबत पोलिस २४ मे रोजी वेश बदलून हॉस्पिटलमध्ये गेले. ‘गर्भपात करायचा आहे,’ असे त्यांनी तेथे सांगितले. डॉ. गायकवाड यांनी, ‘संबंधित रुग्णाची तपासणी करावी लागेल,’ असे त्यांना सांगितले. ‘गर्भवती नसतानाही महिला गर्भवती आहे, असे सांगून गर्भपात करण्यासाठी डॉक्टर तयार झाले. त्यासाठी दोन हजार रुपये लागतील. एक इंजेक्शन आणावे लागेल. त्यासाठी उद्या या, असे सांगण्यात आले, अशी माहिती श्रीरामे यांनी दिली. दुपारी दोनच्या सुमारात तक्रारदाराची नातेवाईक महिला, अर्जदाराची आई व पोलिस उपनिरीक्षक वर्षा काळे या वेश बदलून गायकवाड यांच्या हास्पिटलमध्ये गेले. तेथे डॉक्टरांनी गर्भपात करण्याची प्रक्रिया सुरू केली. उपनिरीक्षक वर्षा काळे यांनी आतमधून इशारा करताच आजुबाजुला दबा धरून बसलेल्या पथकाने हॉस्पिटलवर छापा मारला.
या प्रकरणात डॉ. चंद्रकला रामराव गायकवाड (६०, रा. राज कॉम्प्लेक्स रोजेबाग) व त्यांची मदतनीस शांता गोकुळ सातदिवे (४६, रा. मोतीकारंजा) यांना अटक केली. हॉस्पिटलमधून गर्भपात करण्याचे साहित्य व औषधी ताब्यात घेतले आहे.
अनेक प्रकरणे उघडकीस येतील?
रनमस्तपुरा येथे पोलिसांनी उघड केलेल्या बेकायदा गर्भपात केंद्रात आतापर्यंत अनेक गर्भपात करण्यात आल्याचा संशय आहे. या केंद्रात स्त्री भ्रूण हत्या करण्यात आल्याची शक्यता पोलिसांनी वर्तविली आहे.
मोबाइल अॅप डाउनलोड करा आणि राहा अपडेट
