म. टा. प्रतिनिधी, लातूर
पंढरीची वारी पर्यावरणपूर्वक करून पर्यावरणासाठी वारकरी, संतानी प्रबोधन करण्याचे आवाहन राज्याचे अर्थ आणि वनमंत्री सुधीर मुनगुंटीवार यांनी केले. लातूर येथील सहाव्या अखिल भारतीय मराठी संत साहित्य संमेलनाचे उद्घाटनप्रसंगी ते बोलत होते.
यावेळी प्रमुख पाहुणे म्हणून राज्यमंत्री दीपक केसरकर, खासदार डॉ. सुनील गायकवाड, महापौर सुरेश पवार, जिल्हा परिषदेचे अध्यक्ष मिलिंद लातूरे, आमदार विनायकराव पाटील, माजी आमदार पाशा पटेल, माजी आमदार सुनील धांडे, माजी खासदार रुपा पाटील-निलंगेकर, उपमहापौर देवीदास काळे उपस्थितीत होते.
तत्पुर्वी सकाळी आठ वाजता मार्केट यार्डातून दिंडी सोहळ्याची सुरुवात आमदार दिलीपराव देशमुख यांच्या हस्ते करण्यात आली. यावेळी मान्यवरांच्या हस्ते संतकृपा स्मरणीकेचे प्रकाशन ही करण्यात आले. माजी संमेलनाध्यक्ष हभप बद्रीनाथ महाराज तनपुरे यांच्याकडून नूतन संमेलनाध्यक्ष हभप गहिनीनाथ महाराज औसेकर यांनी सूत्रे स्वीकारली. वारकरी संप्रदायाची विशेष सेवा केल्याबद्दल ज्ञानेश्वर महाराज-जळगावकर यांना अर्थमंत्र्यांच्या हस्ते वाहन भेट देण्यात आले.
वारकरी साहित्य परिषदेचे अध्यक्ष विठ्ठल पाटील यांनी प्रास्ताविक केले. संत साहित्य संमेलनाला राज्य सरकाराने कायमस्वरुपी पन्नास लाख रुपये दर वर्षी मदत करण्याची मागणी केली.
यावेळी बोलताना गृह राज्यमंत्री दीपक केसरकर म्हणाले, ‘समाजामध्ये वाढत जाणारा द्वेष कमी करण्यासाठी वारकरी संप्रदाय मोठी भूमिका निभावत आहे. पंढरीची वारी सुखकर होण्यासाठी लवकरच सर्व विभागांची बैठक होणार आहे.’
अर्थमंत्री सुधीर मुनगुंटीवर यांनी संत साहित्य संमेलन निरंतर सुरू राहावीत यासाठी राज्य सरकार मदत करेल असे आश्वासन दिले. आर्थिक दारिद्र दूर होण्या सोबतच मानसिक दारिद्र दूर होण्यीची आवश्यकता असल्याचे सांगून मुनगुंटीवार यांनी मानसिक दारिद्र दूर करण्याचे काम संत साहित्यच करू शकते असा विश्वास व्यक्त केला.
यावेळी खासदार डॉ. सुनील गायकवाड, महापौर सुरेश पवार, माजी खासदार रुपाताई पाटील-निलंगेकर, नूतन संमेलनाध्यक्ष गहिणीनाथ महाराज यांची भाषणे झाली.
करामुळे महागाई वाढेल ही अफवा - मुनगुंटीवार
संमेलनाच्या उदघाटनानंतर पत्रकारांशी बोलताना अर्थमंत्री सुधीर मुनगुंटीवार यांनी वस्तु आणि सेवा करामुळे महागाई वाढेल ही अफवा असल्याचे स्पष्ट केले. जगातील १६० देशात हा कर लावण्यात आला आहे. कर लावलेल्या देशातील महागाई कमी झालेली आहे. त्यामुळे आपल्या देशात सुद्धा महागाई वाढणार नाही, याची काळजी घेतली जात आहे. मध्यवधी निवडणुकीची चर्चा करण्याची गरज नसल्याचे ही मुनगुंटीवार यांनी स्पष्ट केले.
मोबाइल अॅप डाउनलोड करा आणि राहा अपडेट
