अकरावी प्रवेश प्रक्रियेला मंगळवारपासून सुरुवात होणार होती, परंतु शिक्षण विभागाच्या अर्धवट तयारीमुळे पहिल्या दिवशी एकही ऑनलाइन प्रवेश होऊ शकला नाही. अद्याप शाळांपर्यंत माहिती पुस्तिकाच पोचल्या नाहीत तर, प्रवेश प्रक्रिया शाळेतून राबवायची याची माहितीच अनेक शाळांना नसल्याचे कळते.
यावर्षीपासून औरंगाबाद महापालिका हद्दीत अकरावी प्रवेश ऑनलाइन पद्धतीने केले जाणार आहेत. त्यासाठी सोमवारी बैठक घेत शिक्षण विभागाने मंगळवारपासून प्रवेश प्रक्रिया सुरू होत असल्याचे जाहीर केले. प्रत्यक्ष आज प्रवेशाची वेबसाइट दुपारी एक वाजता सुरू झाली. शिक्षण विभागाकडून अद्याप माहिती पुस्तिकाच शहरातील पाच झोन केंद्रापर्यंत पोचल्या नव्हत्या. विभागाच्या अर्धवट तयारीमुळे प्रवेश प्रक्रियेचा मुहूर्त पहिल्याच दिवशी हुकला. झोन केंद्रावर दुपारनंतर माहिती पुस्तिका पोचविण्यात आल्या. त्यानंतर शाळांना केंद्रावरून पुस्तिका घेऊन जाण्याचे आदेश देण्यात आल्याचे कळते. आता उद्यापासून प्रक्रिया सुरळीत होईल, असे सांगण्यात येत आहे.
माहिती पुस्तिकेसह विद्यार्थ्याला स्वतंत्र लॉग-इन आयडी व पासवर्ड दिला जाणार आहे. ही माहिती पुस्तिका शाळेमध्येच उपलब्ध करून देण्यात येणार आहे. शहरातील १०४ ज्युनिअर कॉलेजांमधील २२ हजार ९४० जागांवर ऑनलाइन प्रवेश दिले जाणार आहेत.
अनेक शाळा माहितीपासून दूरच
ऑनलाइन प्रवेश प्रक्रियेसाठी शिक्षण विभागाने शहरात पाच झोन केले. एक झोनसाठी एक कॉलेज सेंटर दिले आहे. झोनअतंर्गत शाळांनी माहिती पुस्तिका संबंधित ठिकाणाहून घेऊन जायच्या आहेत. विद्यार्थ्यांची प्रवेश प्रक्रियेत गैरसोय होऊ नये. यासाठी शाळांची मदत घेतली जात आहे, परंतु अनेक शाळांनाही प्रवेश प्रक्रियेबाबत शिक्षण विभागाकडून स्पष्ट सूचना नसल्याचे चित्र आहे. त्यामुळे निकाल जाहीर झाल्यावर हा गोंधळ वाढण्याची भीती व्यक्त केली जात आहे.
आजपासून वेबसाइट सुरू झाली, परंतु प्रवेश झाले नाहीत. शाळांना आम्ही सूचना दिलेल्या आहेत. माहिती पुस्तिका झोन केंद्रामध्ये उपलब्ध करून दिल्या असून, एक-दोन दिवसात प्रक्रियेला चांगल्या पद्धतीने गती येईल.
- वैजनाथ खांडके, विभागीय उपसंचालक, शिक्षण विभाग.
मोबाइल अॅप डाउनलोड करा आणि राहा अपडेट
