भाजप नेते सुधीर पाटील यांच्या पुढाकाराने कळंब तालुक्यातील हळदगाव-सातेफळ व सौदना येथील नदी खोलीकरण व रुंदीकरणचे काम पूर्ण झाले आहे. नुकत्याच झालेल्या पावसाने हळदगाव-सातेफळ नदी खोलीकरणाच्या ठिकाणी २५ लाख लिटर पाणी साठले आहे. येत्या काळात काम झालेल्या ठिकाणी जवळपास ३५ कोटी लिटर पाणीसाठा होणार असून या परिसरातील शेती सिंचनाबरोबरच येथील पाणी पुरवठा विहिरींचे शिवाय शेतातील विहिरींचे पाणी वाढण्यास मोठी मदत होणार आहे.
दुष्काळावर शाश्वत उपाययोजनेसाठी येथील युवकांनी एकत्र येत जलसंधारणाचे काम हाती घेतले होते. येथील कामासाठी त्यांनी सुधीर पाटील यांच्याकडे यंत्रसामुग्री व निधीची मागणी केली होती. येथील गरज लक्षात घेत पाटील यांनी त्यांना नदी खोलीकरण व रुंदीकरणसाठी यंत्रसामग्री व निधीची उपलब्धता करून दिली. यातूनच हळदगाव-सातेफळ व सौदना येथील नदी खोलीकरण व रुंदीकरणचे काम हाती घेण्यात आले.
या तीनही ठिकाणचे मिळून नदीचे सुमारे ५ किलो मीटरचे काम पूर्ण झाले आहे. या तीनही ठिकाणी मिळून सुमारे ३५ कोटी लिटर पाणी साठणार आहे. हळदगाव-सातेफळ येथे जवळपास २१ कोटी लिटर आणि सौदना येथे १४ कोटी लिटरचा पाणीसाठा होणार आहे. या तीनही ठिकाणी सुमारे ३५० टीसीएम पाणी उभे राहणार आहे. येथील कामांवर लोकसहभागाबरोबरच सुधीर पाटील यांनी १० लाख ६५ हजार रुपये इतका खर्च केला आहे. या तिन्ही ठिकाणी मिळून ३ लाख ५० हजार घनमीटर इतके काम झाले आहे. सुधीर पाटील यांच्या पुढाकाराने व लोकसहभागातून झालेल्या या तीनही कामाचे शासन मूल्य हे २ कोटी पेक्षा जास्त आहे.
दरम्यान, हळदगाव-सातेफळ येथील तीन हजार मीटर लांब, ३२.५० मीटर रुंद व २.१५ मीटर खोलीकरणाचे सुमारे २ लाख १० हजार चौरस घनमीटरचे काम पूर्ण करण्यात आले आहे. दोनच दिवसांपूर्वी या परिसरात मान्सूनपूर्व पावसाने हजेरी लावल्याने २१ कोटी २३ लाख लिटर पाणी साठवण क्षमता असलेल्या ठिकाणी सुमारे २५ लाख लिटर पाणी साठले आहे. या पाणीसाठ्याचा फायदा परिसरातील शेती सिंचनाबरोबरच येथील पाणी पुरवठा करीत असलेल्या विहिरींचे शिवाय शेतातील विहिरींचे पाणी वाढण्यास मोठी मदत होणार आहे.
वाशी तालुक्यात काम सुरू
वाशी तालुक्यातील बावी येथील नदी खोलीकरण व रुंदीकरणाचे सुमारे पाच किलो मीटरचे काम सुधीर पाटील यांनी हाती घेतले आहे. याठिकाणी सुमारे ८ कोटी ५७ लाख लिटर पाणी साठा होणार आहे. या कामावर ही सुमारे ४ लाख रुपयांची तरतूद सुधीर पाटील यांनी केली आहे. सततच्या दुष्काळावर मात करण्यासाठी भाजप नेते सुधीर पाटील हे त्यांच्या आदर्श शिक्षण प्रसारक मंडळाच्या माध्यमातून सतत प्रयत्नशील आहेत.
मोबाइल अॅप डाउनलोड करा आणि राहा अपडेट