म. टा. प्रतिनिधी, औरंगाबाद
आपल्यातील क्षमता काय आहेत, हे ओळखायला शिका. आपली आवड, स्ट्राँग पॉइंट ओळखून करिअर निवडा. करिअर म्हणजे केवळ मेडिकल, इंजिनीअरिंगच नाही. अर्थशास्त्र, सांख्यिकी, कृषी, बीएस्सी, एमएस्सी, वाणिज्य, व्यवस्थापनशास्त्र अशा विविध क्षेत्रांतही तुम्ही यशोशिखर गाठू शकता, असे प्रसिद्ध करिअर मार्गदर्शक डॉ. अजित थेटे यांनी शुक्रवारी येथे सांगितले. ‘महाराष्ट्र टाइम्स’तर्फे आयोजित ‘बारावीनंतर काय’ या मार्गदर्शन कार्यक्रमात ते बोलत होते. नागरी सेवा, माध्यम क्षेत्र, हॉस्पिटॅलीटी मॅनेजमेंट, स्पेस इंजिनीअरिंग, बेसिक सायन्स अशा विविध क्षेत्रांतील करिअरची आणि त्यातील संधीची माहिती विद्यार्थ्यांना मिळाली.
बारावीनंतर विद्यार्थ्यांना विविध क्षेत्रात करिअरच्या कोणत्या संधी उपलब्ध आहेत. याबाबत योग्य ती माहिती व्हावी, याबाबत ‘महाराष्ट्र टाइम्स’तर्फे या उपक्रमाचे आयोजन करण्यात आले होते. महात्मा गांधी मिशन संस्था उपक्रमाची व्हेन्यू पार्टनर होती. संस्थेच्या आइन्स्टाइन सभागृहात झालेल्या या मार्गदर्शन उपक्रमात डॉ. थेटे म्हणाले,‘जागतिकीकरणाच्या युगात नवनवी क्षेत्रे करिअरसाठी खुणावत आहेत. स्पेशलाइझेशनच्या या युगात आपल्या आवडीच्या क्षेत्रात करिअर करण्यासाठी संधी वाढल्या आहेत. फक्त त्या संधी ओळखता यायला हव्यात.’
केवळ एक-दोन क्षेत्रांचा विचार करण्याची चूक विद्यार्थी, पालकांनी करू नये, असे आवाहन करत त्यांनी वेगवेगळ्या क्षेत्रांची माहिती दिली व त्यातील संधी सांगितल्या. अधिक चौकस राहून भविष्यातील संधी समजून घ्या. क्षेत्र निवडताना अॅप्टिट्यूट टेस्टही उपयुक्त ठरू शकते. आपली आवड, विषयाचे ज्ञान आणि आपण जे क्षेत्र निवडतो आहोत त्यातील वातावरण कसे असेल, त्याच्याशी आपण समरस होतो की नाही हे आपल्याला समजले तर उपयुक्त ठरते. कोणत्याही क्षेत्रात करिअर करताना, नवीन काही करण्याची जिद्द, सृजनशीलता, मेहनत करण्यासाठी तयारी असल्यास ते क्षेत्र तुमच्यासाठी उपयुक्त ठरते. कोणी सांगते म्हणून इंजिनीअरिंग, मेडिकल अशा ठराविक क्षेत्राकडे पाहू नका. लॉ, फॅशन डिझाइनिंग, बँकिंग, विमा, कॉर्मस, डिजिटल बँकिंग, परफॉर्मिंग आर्ट, डिझाइन, फॉरेंन्सिक सायन्स, कंपनी सेक्रेटरी, टुरिझम, फूड टेक्नॉलॉजी असे अनेक क्षेत्र आहेत. तुम्हाला तुमच्या आवडीनुसार त्यात करिअर करण्याची संधी आहे. त्यासह अर्थशास्त्र, सांख्यिकी, गणित अशा विषयांचाही विचार करा. बेसिक सायन्समध्ये फिजिक्स, केमिस्ट्री, बायोलॉजी अशा विषयांमध्ये संशोधनाची संधी आहेत. जे तुम्हाला शास्त्रज्ञ म्हणूनही ओळख निर्माण करून देऊ शकते. त्यासाठी तुमची विषयाची आवड महत्त्वाची ठरते. विषयाची आवड आपल्याला किती आहे हे पहा. त्यासाठी स्वतःमधील क्षमता, कमतरता या लक्षात यायला हव्यात. गुण कमी मिळाले म्हणून निराश होण्याचे कारण नाही. गुण कमी होण्याची अनेक कारणे असतात. त्यातून बाहेर पडत करिअरमध्ये चांगले ते करण्यावर अधिक भर द्यायला हवा. स्वलःला प्रामाणिक राहून नवनवीन कौशल्ये शिकत राहणे महत्त्वाचे असते. क्षेत्रात होणारे बदल लक्षात घेत, त्यानुसार स्वतःमध्ये बदल घडविता येणे महत्त्वाचे असल्याचे ते म्हणाले. ‘आयटी’, ‘कम्प्युटर सायन्स’, ‘अॅनिमेशन’, ‘हॉस्पिटॅलीटी मॅनेजमेंट’, ‘माध्यम क्षेत्र’, त्यासह मेडिकल, पॅरामेडिकल त्यातील संधी याबाबतही त्यांनी माहिती दिली. मार्गदर्शन कार्यक्रमाला विद्यार्थी पालकांनी गर्दी केली होती. अनेक विद्यार्थी, पालकांनी उभे राहून लक्ष देऊन करिअरची माहिती जाणून घेतली.
माध्यम क्षेत्रातही करिअरच्या नानाविध संधी
माध्यमांचे बदलते स्वरूप त्यामुळे निर्माण झालेल्या संधी एमजीएम वृत्तपत्र व जनसंवाद महाविद्यालयाच्या डॉ. आशा देशपांडे यांनी विद्यार्थ्यांसमोर मांडल्या. माध्यम क्षेत्रात आज करिअरच्या अमर्याद संधी आहेत, असे त्या म्हणाल्या. डिजिटल मीडियामध्ये वेब पत्रकारिता, फोटाेग्राफी, इलेक्ट्रॉनिक्स माध्यमांसह शासकीय नोकरीतील संधीची माहिती दिली.
‘महाराष्ट्र टाइम्स’हा मार्गदर्शनपर उपक्रम अतिशय चांगला होता. करिअर निवडताना प्रत्येकाला भविष्याची चिंता असते. अशावेळी करिअरची क्षेत्र, त्यातील बदल, संधी याची माहिती मिळणे गरजेचे असते आणि ही माहिती मार्गदर्शनातून मिळाली.
- दीपा सुखिया, विद्यार्थी
सीईटी निकालाचे गुण आल्यानंतर अनेकांना चांगल्या कॉलेजांना प्रवेश मिळेल का? अशी भीती होती, परंतु सरांनी उत्तम रित्या प्रवेशाची माहिती दिली. त्यातील संधी आणि इतर करिअरसाठी उपयुक्त विविध क्षेत्र कोणती आहेत, याची माहिती दिली.
- साक्षी पांडे, विद्यार्थी
अभियांत्रिकी, मेडिकल म्हणजेच करिअर नाही. हे सरांनी अतिशय सुरेखपणे सांगितले. वेगवेगळी क्षेत्र जी करिअरसाठी उत्तम आहेत. त्याची माहिती मिळाल्याने प्रवेश घेताना आपण अधिक ठाम असू. ‘मटा’चा हा उपक्रम विद्यार्थ्यांसाठी अतिशय उपयुक्त ठरला.
- साक्षी ठोंबरे, विद्यार्थी
मला नागरी सेवेत काम करण्यासाठी कोणकोणत्या विद्याशाखेला महत्त्व द्यावे, त्यातील संधी याची मला माहिती हवी होती. मी कला शाखेला प्रवेश घेण्याचा विचार करते आहे. ‘मटा’च्या या उपक्रमामुळे मला प्रोत्साहन मिळाले. त्याचा निश्चित फायदा होईल.
- कीर्ती वैष्णव, विद्यार्थी
मेडिकलशी निगडित असलेल्या अनेक शाखांची माहिती सरांनी दिली. जी क्षेत्रे करिअरसाठी उत्तम ठरू शकतात. पॅरामेडिकल, फिजीओथेरपी त्यातील संधी याची माहिती मिळाली. आवड तर महत्त्वाची असतेच, परंतु आपल्याला करिअरसाठी वेगवेगळ्या क्षेत्रांची माहिती ‘मटा’च्या या उपक्रमातून मिळाली.
- मानसी वैष्णव, विद्यार्थी
आपल्यातील बलस्थाने ओळखत करिअर कसे निवडावे याची सविस्तर माहिती ‘महाराष्ट्र टाइम्स’च्या या उपक्रमातून मिळाली. मोजक्याच क्षेत्रांचा अनेकदा विचार होतो. त्यातूनच करिअर निवडण्यावर भर दिला जातो, आज अनेकविध क्षेत्रांची माहिती मिळाली.
- विजयश्री लोखंडे, विद्यार्थी
करिअरबाबत अनेक साशंकता असते. कमी माहिती असल्याने चूक होऊ शकते. आजच्या मार्गदर्शनातून खूप वेगवेगळी करिअरची क्षेत्रे, त्यांची बेस्ट कॉलेज यांची माहिती मिळाली. करिअरसाठी ठराविक क्षेत्र आहेत, असे नाही, हे त्यांनी उदाहरणांसह सांगितले.
- अनीस सदरे, विद्यार्थी
कमी गुण मिळाल्याने मी थोडासा नाराज होतो. सरांच्या मार्गदर्शनामुळे माझा ताण खूप हलका झाला. आपण नेहमी प्रयत्न करत रहावे. आमच्या भावना समजून घेऊन त्यांनी केले मार्गदर्शन हे प्रोत्साहन देणारे ठरले. त्यामुळे ‘मटा’च्या या उपक्रमाचे कौतुक करायलाच हवे.
- श्रीजित फाळके, विद्यार्थी
मला माध्यम क्षेत्रामध्ये करिअर करण्याची इच्छा आहे. त्या दृष्टिकोनातून चांगले मार्गदर्शन मिळाले. करिअर निवडताना आपल्यातील क्षमता काय आहेत, त्याची जाणिव आपल्याला हवी. तसे असेल तर, आपण निवडलेल्या क्षेत्रात चांगले करू शकतो.
- ऋतुजा करपे, विद्यार्थी
मला अभियांत्रिकीला प्रवेश घ्यायचा आहे. त्यात सरांनी असलेल्या मुळशाखा, उपशाखा त्यासह नवनवीन स्पेशलाइझेशन आमच्यासमोर मांडले. हे ज्ञान प्रवेशासाठी अतिशय महत्वाचे आहे. आपल्याला निवड करताना सोपे होते.
- ययाती तुपे
माझ्यासमोर अनेक करिअरचे पर्याय आहेत. त्यातून कोणते निवडावे हा प्रश्न होता. माझी आवड असलेल्या हॉटेल मॅनेजमेंटमध्ये मला करिअर करायचे तर, काय संधी आहेत? याची योग्य ती माहिती मला मिळू शकली.
- अमर तुपे
करिअरच्या वेगवेगळ्या संधी आणि त्याची माहिती उपक्रमातून मिळाली. आपण ज्या क्षेत्रात जाऊ तेथे बेस्ट केले की, करिअरच्या संधी अधिक वाढतात. हे त्यांचे वाक्य अनेकांना प्रोत्साहन देणारे आहे. हा उपक्रम अतिशय उपयुक्त ठरेल असे मला वाटते.
- वरद कवाडे
मोबाइल अॅप डाउनलोड करा आणि राहा अपडेट
