‘शैक्षणिक क्षेत्रात झपाटयाने होत असलेले बदल लक्षात घेऊन विद्यापीठे, शैक्षणिक संकेतस्थळ ‘अपडेट’ ठेवली पाहिजेत. विद्यापीठाचे अद्ययावत संकेतस्थळ लवकरच सुरू करण्यात येईल,’ अशी माहिती कुलगुरू डॉ. बी. ए. चोपडे यांनी डॉ. बाबासाहेब आंबेडकर मराठवाडा विद्यापीठातील विभागाप्रमुखांच्या शनिवारी महात्मा फुले सभागृहात झालेल्या बैठकीत दिली.
विद्यापीठाची अद्ययावत वेबसाइट लवकरच सुरू करण्यात येणार आहे. याबाबत ही बैठक घेण्यात आली. बैठकीला प्रभारी अधिकारी डॉ. सतीश पाटील, ‘युनिक‘चे संचालक डॉ. सचिन देशमुख, अधिष्ठाता डॉ. वाल्मिक सरवदे उपस्थित होते. प्रोग्रामर यशपाल साळवे यांनी संकेतस्थळातील बदलाबाबत माहिती दिली. यावेळी चोपडे म्हणाले, ‘पुढील काळात वि़द्यापीठाची एकमेव वेबसाइट असणार आहे. संकेतस्थळावर विद्यापीठाच्या अॅचिव्हमेंट, राष्ट्रीय-आंतरराष्ट्रीय स्तरावर झळकलेल्या माजी विद्यार्थ्यांची छायाचित्रे असतील. तसेच विभागाची स्थापना, उद्दिष्टे, व्हिजन-मिशन, संशोधन, संशोधनपर लेख, अध्यापकांचा बायोडाटा, अभ्यासक्रमांची फोटो गॅलरी, अॅवॉर्डस आदी विस्तृत माहिती असणार आहे’. दरम्यान, बैठकीतील तज्ज्ञांनी काही सूचना केल्या. या सूचनेनुसार वेबसाइटमध्ये सुधारणा करण्यात येणार आहेत.
‘रँकींग’साठी फायदा
‘संकेतस्थळाबाबत निर्णय व सूचनांसाठी सल्लागार समिती स्थापन करण्यात येईल. ‘एनआयआरएफ’ यासह राष्ट्रीय-आंतरराष्ट्रीय विद्यापीठांचे रँकींगसाठी वेबसाइट अद्ययावत, माहितीपूर्ण असणे आवश्यक आहे. याचा फायदा रँकींगला होईल,’ असे कुलगुरू म्हणाले. संकेतस्थळाच्या आजपर्यंतच्या प्रगतीचा आढावा डॉ. सचिन देशमुख यांनी घेतला. प्रणाली विश्लेषक अरविंद भालेराव, प्रोग्रामर यशपाल साळवे, दिनेश कोलते यांनी संयोजन केले.
मोबाइल अॅप डाउनलोड करा आणि राहा अपडेट