म. टा. प्रतिनिधी, सिल्लोड
आमदार अब्दुल सत्तार यांची बदनामी थांबवावी या मागणीसाठी काँग्रेसतर्फे आयोजित बंदला शंभर टक्के प्रतिसाद मिळाला. काँग्रेसतर्फे काढलेल्या मूक मोर्चातील गर्दीमुळे शहरवासियांचे लक्ष वेधले.
आमदार अब्दुल सत्तार यांनी दहिगाव शिवारातील शेतकऱ्याला मारहाण व हिंदू देवताचे नाव घेऊन शिविगाळ केल्याचे कथित प्रकरण जिल्ह्यात गाजत आहे. याचे राजकीय भांडवल करणाऱ्या भाजपसह हिंदुत्ववादी संघटना जनतेस वेठीस धरत असून आमदारांची बदनामी करत आहेत, हा प्रकार थांबवावा, या मागणीसाठी सोमवारी दुपारी एकपर्यंत बंदची हाक देण्यात आली होती. शिवाय आमदारांच्या समर्थनार्थ छत्रपती शिवाजी महाराज पुतळ्यापासून तहसील कार्यालयापर्यंत मूक मोर्चा काढण्यात आला. या मोर्चात शहर व ग्रामीण भागातील हजारो काँग्रेस कार्यकर्ते, सामान्य नागरिक सामील झाले. या मोर्चाचे तहसील कार्यालयाजवळ सभेत रुपांतर झाले. काँग्रेसतर्फे नायब तहसीलदार संजय सोनवणे यांना निवेदन देण्यात आले.
‘भाजप व हिंदुत्ववादी संघटना काँग्रेस व आमदार सत्तार यांची बदनामी करण्याचा कुटील प्रयत्न करीत आहेत. त्यांचा हा प्रयत्न मतदारसंघातील जनता कदापि यशस्वी होऊ देणार नाही, असे प्रतिपादन जिल्हा परिषदेचे माजी अध्यक्ष प्रभाकरराव पालोदकर यांनी या सभेत बोलताना केले. राजकीय दबावाचा वापर करून दाखल केलेले खोटे गुन्हे परत घ्यावे अन्यथा काँग्रेस तीव्र आंदोलन पुकारेल, असा इशारा या सभेत बोलताना विविध नेत्यांनी दिला. या सभेत तालुकाध्यक्ष गणेश दौड, जिल्हा परिषदेचे माजी अध्यक्ष श्रीराम महाजन, जिल्हा परिषध उपाध्यक्ष केशवराव तायडे, महिला काँग्रेस जिल्हा उपाध्यक्ष दुर्गाताई पवार, रमेश दांडगे, विठ्ठलराव सपकाळ, लक्ष्मण कल्याणकर यांची भाषणे झाली.
मूक मोर्चात बाजार समिती सभापती रामदास पालोदकर, उपसभापती नंदकिशोर सहारे, काशिनाथ जंजाळ, नरसिंग चव्हाण, विजय दौड, कौतिकराव बडक, उपनगराध्यक्षा शकुंतला बनसोड, जिल्हा परिषद सदस्य सीमा गव्हाणे, मीना गायकवाड, दामू गव्हाणे, कुशीवर्ता बडक, भीमराव गाडेकर, नाना कळम, शांतीलाल अग्रवाल, दशरथ सुरडकर आदींसह शहर व ग्रामीण भागातील पदाधिकारी सामील झाले होते.
खुलताबादेत अटकेची मागणी
हिंदू देवतेचा अपमान केल्याप्रकरणी काँग्रेसचे आमदार अब्दुल सत्तार यांना अटक करण्यात यावी, या मागणीसाठी भारतीय जनता पक्षाच्या कार्यकर्त्यांनी तहसीलदारांना निवेदन दिले. यावेळी कार्यकर्त्यांनी पंचायत समिती ते तहसील कार्यालयापर्यंत पायी जात आमदार सत्तार यांच्याविरोधात घोषणा दिल्या.
या निवेदनात म्हटले आहे की, सिल्लोड विधानसभा मतदारसंघाचे काँग्रेसचे आमदार अब्दुल सत्तार यांनी सिल्लोड येथील एका प्रकरणात हिंदू देवीदेवतांच्या नावाने शिवीगाळ करून भावना दुखावल्या आहेत. त्यांच्याविरुद्ध धार्मिक उद्रेक होण्याची शक्यता नाकारता येत नाही. यावेळी तालुकाध्यक्ष ज्ञानेश्वर नलावडे, भद्रा मारुती संस्थानचे अध्यक्ष मिठ्ठू पाटील बारगळ, पंचायत समिती सभापती अर्चना अंभोरे, उपसभापती गणेश अधाने, जिल्हा परिषद सदस्य एल. जी. गायकवाड, उपनगराध्यक्ष सुरेश मरकड, शहराध्यक्ष ज्ञानेश्वर बारगळ यांच्यासह नगरसेवक, भाजप पदाधिकारी, पंचायत समिती सदस्यांची उपस्थिती होती.
भाजपचा पैठण बंद फसला
शेतकऱ्याला शिवीगाळ व मारहाण करत हिंदू देवतांविषयी अपशब्द काढणारे सिल्लोडचे आमदार अब्दुल सत्तार यांच्या निषेधार्थ भाजपतर्फे आयोजित बंदला पैठणकरांनी अजिबात प्रतिसाद दिला नाही. शहरातील व्यवहार सोमवारी सुरळीत सुरू होते.
शहरातील बहुतांशी व्यापारी सोमवारी साप्ताहिक बंद पाळतात, त्यांची दुकाने बंद होती. उर्वरित बाजारपेठ नेहमीप्रमाणे सुरळीत सुरू होती. दरम्यान, आमदार अब्दुल सत्तार यांच्या विरोधात कडक कारवाई करण्याची मागणी करणारे निवेदन पैठण भाजपतर्फे पोलिस स्टेशन व तहसीलदार यांना देण्यात आले. निवेदनावर भाजप तालुकाध्यक्ष तुषार शिसोदे, नगराध्यक्ष सूरज लोळगे, शहराध्यक्ष विजय चाटुपळे, रेखाताई कुलकर्णी, घनश्याम शेळके, सतीश आहेर आदींच्या सह्या आहेत.
वैजापुरात निदर्शने
सिल्लोड तालुक्यातील दहिगाव शिवारात जमिनीचा ताबा घेतांना हिंदू देवतांबाबत अपमानकारक वक्तव्य केल्याबद्दल आमदार अब्दुल सत्तार यांनी राजीनामा द्यावा, अशी मागणी भाजपतर्फे करण्यात आली. या प्रकाराचा निषेध करण्यासाठी भाजपचे जिल्हाध्यक्ष एकनाथ जाधव यांच्या नेतृत्वाखाली येथील आंबेडकर पुतळ्यासमोर सोमवारी निदर्शने करण्यात आली. आमदार सत्तार यांना त्वरित अटक करावी, अन्यथा भाजपचे कार्यकर्ते गावोगावी रस्त्यावर उतरतील व तालुका बंदची हाक देण्यात येईल, असा इशारा जाधव यांनी दिला. याप्रसंगी तहसीलदारांना निवेदन देण्यात आले. प्रकाश गायके, प्रशांत कंगले, बाबासाहेब डांगे, कचरू आण्णा डिके, अनिल वाळुंज, ज्ञानेश्वर इंगळे, राजाराम शिंदे, नारायण कवडे, हर्षल तोडरवल, उदय सोनवणे, सुरेश निकम, शशिकांत निकाळे, सुधाकर डगळे, महेश भालेराव, सचिन दाढे, दीपक त्रिभुवन, केतन आव्हाळे, कडू बागुल, बबन गायके, सविता पुणे, ज्ञानदेव कदम आदींची उपस्थिती होती.
मोबाइल अॅप डाउनलोड करा आणि राहा अपडेट
