ठेवीदारांना आकर्षक व्याजदर देण्याचे आमीष दाखवून कोट्यवधी रुपयांचा गंडा घालणाऱ्या जळगावच्या भाईचंद हिराचंद रायसोनी मल्टिस्टेट को-ऑपरेटिव्ह सोसायटीचे अध्यक्ष आणि संचालक मंडळातील एका महिलेसह १४ जणांना सीआयडीने (राज्य गुन्हे अन्वेषण शाखा) जळगाव कारागृहातून हस्तांतरित करून घेतले. त्यांना मंगळवारी (२० जून) कोर्टात हजर करण्यात आले असता, शुक्रवारपर्यंत (२३ जून) पोलिस कोठडीत ठेवण्याचे आदेश दिले.
भाईचंद हिराचंद रायसोनी मल्टिस्टेट को-ऑपरेटिव्ह सोसायटीने मुदत संपल्यानंतरही ठेवीवरील व्याज व आकर्षक बक्षीसे न देता गंडा घातल्याप्रकरणी भालचंद्र ओंकार खोडे (रा. जयभवानीनगर, औरंगाबाद) यांनी ८ जानेवारी २०१६ रोजी सिडको पोलिस ठाण्यात तक्रार दिली होती. सेवानिवृत्त खोडे यांनी १७ एप्रिल २०१३ ते ३१ जानेवारी २०१५ या काळात भाईचंद हिराचंद रायसोनी मल्टिस्टेट को-ऑपरेटिव्ह सोसायटीच्या सिडको (एन-६) येथील शाखेत ९५ हजार ७६८ रुपयांची गुंतवणूक केली होती. त्यावर आकर्षक व्याजदर, परतावा मिळेल, असे सोसायटीने सांगितले होते. खोडे यांच्याप्रमाणेच मच्छिंद्र सूर्यभान सुरासे (रा. सिडको एन-८, महालक्ष्मी कॉलनी, औरंगाबाद) व अन्य काही जणांनी एकूण ५ लाख ७६ हजार रुपये गुंतवले होते. मात्र, मुदत संपल्यानंतरही ठेवीची रक्कम व त्यावरील व्याज देण्यास सोसायटीने टाळाटाळ केली. पाठपुरावा करूनही पैसे मिळत नसल्याने सभासदांनी सिडको पोलिस ठाण्यात फसवणुकीचा गुन्हा दाखल केला होता. अशाच स्वरुपाच्या तक्रारी यवतमाळ, वैजापूर, जळगाव याठिकाणी दाखल झाल्या. हजारो कोटींवर हा घोटाळा असल्याचे समोर येताच शासनाने सोसायटीवर प्रशासक नेमून या प्रकरणाचा तपास सीआयडीकडे सोपवला. दरम्यान, जळगाव पोलीसांनी सोसायटीचा अध्यक्ष व संचालक मंडळातील प्रमोद भाईचंद रायसोनी (रा. प्रतापनगर, जामनेर), दिलीप कांतीलाल चोरडिया (रा. तळेगाव), मोतीलाल ओंकार जिरी (रा. शेळगाव), सुकलाल शहादू माळी (रा. नवीन भगवाननगर), सूरजमल बभुतमल जैन, भागवत संपत माळी, भगवान हिरामन वाघ, शेख रमजान शेख अब्दुल नबी, ललिता राजू सोनवणे, (रा. सर्वजण तळेगाव, जामनेर), राजाराम काशीनाथ कोळी, यशवंत ओंकार जिरी, दादा रामचंद्र पाटील (रा. तिघे शेळगाव, ता. जामनेर), डॉ. हितेंद्र यशवंत महाजन (रा. शनिपेठ, जळगाव), इंद्रकुमार आत्माराम ललवाणी (रा. सिंधी कॉलनी) यांना अटक केली होती. सर्वजणांना जळगाव कारागृहातून सीआडीच्या पथकाने शहरात आणून कोर्टात हजर करण्यात आले होते.
मोबाइल अॅप डाउनलोड करा आणि राहा अपडेट