विमानतळ विस्तारीकरणाचा थंड बस्त्यात पडलेला तिढा येत्या काही दिवसात सुटणार आहे. पुढील आठवड्यात महापालिका, सिडको, सार्वजनिक बांधकात तसेच महसूल विभागातील अधिकाऱ्यांची संयुक्त बैठक घेण्यात येणार आहे, अशी माहिती जिल्हाधिकारी नवलकिशोर राम यांनी दिली.
आंतरराष्ट्रीय विमानतळाच्या विस्तारीकरणासाठी लागणाऱ्या १८२ एकर जमिनीच्या भूसंपादनासाठी सार्वजनिक बांधकाम विभाग ही सर्व्हेक्षण आणि संपादन संस्था राहणार असून जमीन मोजणीसाठी २९ लाख ७४ हजार रुपयांची आवश्यकता आहे. हे शुल्क भरल्यानंतर आवश्यक जमिनीची मोजणी करण्यात येणार आहे. आंतरराष्ट्रीय विमानतळाच्या विस्तारीकरणासाठी लागणाऱ्या १८२ एकर जमिनीची १० नोव्हेंबर रोजी सिडको, महापालिका तसेच महसूल, विमानतळ प्राधिकरणाच्या अधिकाऱ्यांनी स्थळपाहणी केली होती. या पाहणीअंती प्राथमिक अहवाल तयार केला होता. त्यानंतर भूसंपादनाचा पुन्हा सुधारित अहवाल तयार करून मुंबई येथे पाठवण्यात आला. मात्र, त्यानंतर अनेक दिवस प्रकरण जैसे थे होते. आता जिल्हाधिकारी नवल किशोर राम सर्व यंत्रणांची संयुक्त बैठक घेणार असून सर्वांसोबत चर्चा करून आढावा घेणार आहेत.
मालमत्ता ताब्यात घेणार
विस्तारीकरणासाठी यापूर्वी महापालिका तसेच सिडकोने केलेल्या सर्व्हेक्षणानुसार १८२ एकर जमीन, ६३१ एनए प्लॉट ताब्यात घ्यावे लागणार आहेत, तर १२९६ मालमत्ता बाधित होणार आहेत. यामध्ये सिडकोच्या खासगी ३१६, म्हाडाच्या ३५० मालमत्तांचा समावेश आहे. यामध्ये शासनाचे ८२ आर, महापालिकेची १५ आर, सिडकोच्या ४३ आर खुल्या जमिनीचे संपादन करण्यात येणार आहे.
विस्तारीकरणासाठी आवश्यक जमीन
संपादन खासगी क्षेत्र…………१५५. ८५ एकर
मनपा (अतिक्रमित)………….. २०.७५ एकर
सिडको ………………………२ एकर
मनपा (एसटीपी)……………… ३.४० एकर
एकूण संपादन करावयाचे क्षेत्र………..१८२ एकर
मोबाइल अॅप डाउनलोड करा आणि राहा अपडेट
