वेरूळ अभ्यागत केंद्राकडे पर्यटकांना आकर्षित करू

June 28, 2017, 2:30 pm

≫ Next: मुर्डेश्वर देवस्थान विकास; ६७ लाखांचा निधी मंजूर

≪ Previous: मुदतवाढीने विद्यार्थ्यांना दिलासा

$

0

0

म. टा. प्रतिनिधी, खुलताबाद
‘महाराष्ट्रात औरंगाबाद जिल्ह्यात पर्यटनाला मोठा वाव असून त्याला प्रोत्साहन देण्याच्या उद्देशाने वेरूळ, अजिंठा अभ्यागत केंद्राकडे पर्यटकांना आकर्षित करण्यात येईल,’ अशी माहिती एमटीडीसीचे व्यवस्थापकीय संचालक विजय वाघमारे यांनी ‘मटा’शी बोलताना दिली.
एमटीडीसीचे व्यवस्थापकीय संचालक म्हणून पदभार घेतल्यानंतर विजय वाघमारे यांनी बुधवारी वेरूळ व अजिंठा येथील अभ्यागत केंद्राला भेट देऊन पाहणी केली. त्याप्रसंगी ते बोलत होते. त्यांनी वेरूळ पर्यटक अभ्यागत केंद्राची संपूर्ण माहिती घेतली. यावेळी एमटीडीसीचे उपमहाव्यवस्थापक चंद्रशेखर जैस्वाल, कार्यकारी अभियंता शैलेंद्र बोरसे, वरिष्ठ प्रादेशिक व्यवस्थापक अण्णासाहेब शिंदे, पुरातत्व विभागाचे उपअधीक्षक शिवकांत वाजपेयी, राजेश वाकलेकर, आर्किटेक्ट प्रदीप देशपांडे आदी मान्यवर उपस्थित होते.
यावेळी एमटीडीसी आणि भारतीय पुरातत्व विभाग यांच्या संयुक्त विद्यमाने वेरूळ व अजिंठा येथे पर्यटनाला चालना देण्यासाठी काय करता येईल, याविषयी त्यांनी संबंधीत अधिकाऱ्यांशी चर्चा केली. अनेक पर्यटनस्थळे असल्याने औरंगाबाद जिल्ह्याला ऐतिहासिक, सांस्कृतिक ओळख आहे. पर्यटन व्यवसायावर लक्ष केंद्रीत करणे गरजेचे आहे. पर्यटनाला चालना देण्यासाठी व यासंदर्भातील योजनांचा पाठपुरावा करण्यासाठी महाराष्ट्र पर्यटन विकास महामंडळ प्रयत्नशील आहे, असेही वाघमारे यांनी यावेळी सांगितले. राज्यात येणाऱ्या परदेशी पर्यटकांचे प्रमाण सर्वाधिक असून देशाच्या विविध भागातूनही महाराष्ट्रात मोठ्या प्रमाणात पर्यटक येतात. एमटीडीसीमार्फत सुरू करण्यात येणाऱ्या विविध योजनेतून वेरूळ-अजिंठा येथे हेलिकॉप्टर पर्यटन सेवा यासारखे उपक्रमाबाबत माहितीही त्यांनी यावेळी घेतली. राज्यातील पर्यटन व्यवसायात वेरूळ व अजिंठा येथील अभ्यागत केंद्र महत्वपूर्ण योगदान देईल, असा विश्वास त्यांनी व्यक्त केला. स्थानिकांना रोजगार निर्माण करण्यासाठी स्थानिक नागरिकांनी केलेल्या सूचनांचा विचार करण्यात येईल, असे त्यांनी सांगितले.

नगारखाना गेटची पाहणी
एमटीडीसीचे व्यवस्थापकीय संचालक विजय वाघमारे यांनी खुलताबाद शहराचे मुख्य प्रवेशद्वार नगारखाना गेटच्या कामांचीही पाहणी केली. यावेळी कार्यकारी अभियंता शैलेंद्र बोरसे व आर्किटेक्ट प्रदीप देशपांडे यांनी त्यांना कामांची माहिती दिली. काम पाहून वाघमारे यांनी समाधान व्यक्त केले.

मोबाइल अॅप डाउनलोड करा आणि राहा अपडेट

---

मुर्डेश्वर देवस्थान विकास; ६७ लाखांचा निधी मंजूर

June 28, 2017, 2:30 pm

≫ Next: शहीद जाधवांच्या पत्नीला वैद्यनाथ बँकेत नोकरी

≪ Previous: वेरूळ अभ्यागत केंद्राकडे पर्यटकांना आकर्षित करू

$

0

0

म. टा. प्रतिनिधी, सिल्लोड
भाजपचे प्रदेशाध्यक्ष खासदार रावसाहेब दानवे यांच्या प्रयत्नामुळे मुर्डेश्वर संस्थान केळगाव येथील तीर्थक्षेत्र विकासासाठी ६७ लाख रूपायचा निधी मंजूर झाला आहे. खासदार दानवे यांनी संस्थानचे पीठाधिश काशीगीरी महाराज यांना सोमवारी निधी मंजूर झाल्याची माहिती दिली.
प्रभू रामचंद्राच्या पदस्पर्शाने अजिंठा डोंगरांगामधील मुर्डेश्वर संस्थान पावन झाल्याची आख्यायिका आहे. येथे श्रावण महिन्यात मोठ्या प्रमाणात भाविकांची गर्दी होते. खासदार दानवे यांनी गेल्या वर्षी मंदिर विकासासाठी एक कोटी १० लाख रुपये मंजूर केले होते, त्या निधीतून भक्त निवासाचे बांधकाम केले जात आहे. यावर्षीही ६७ लाखांचा निधी मंजूर करण्यात आला आहे. तीर्थक्षेत्र विकास निधीकरिता सचिन पाखरे व ज्ञानेश्वर वाघ यांनी पाठपुरवठा केला होता.

निधीतील कामे
या निधीतून मंदिर परिसरात ३४ लाख रुपये खर्च करून पेव्हर ब्लॉक, १४ लाख रुपयांची स्वच्छतागृहे, १६ लाख रुपयांतून संरक्षण भिंत बांधण्यात येणार आहे.

मोबाइल अॅप डाउनलोड करा आणि राहा अपडेट

शहीद जाधवांच्या पत्नीला वैद्यनाथ बँकेत नोकरी

June 28, 2017, 2:30 pm

≫ Next: ...तर वाहनचालकाचे लायसन्स होणार रद्द

≪ Previous: मुर्डेश्वर देवस्थान विकास; ६७ लाखांचा निधी मंजूर

$

0

0

म. टा. प्रतिनिधी, सिल्लोड
पाकिस्तानी सैनिकांशी लढताना वीरमरण आलेले संदीप जाधव यांच्या पत्नीला वैद्यनाथ सहकारी बँकेत नोकरी देणार असल्याची माहिती राज्याच्या ग्रामविकास आणि महिला बालविकास मंत्री पंकजा मुंडे यांनी मंगळवारी रात्री केळगाव येथे सांगितले. जाधव यांच्या दोन्ही मुलांच्या शिक्षणासाठी कै. गोपीनाथ मुंडे प्रतिष्ठानतर्फे प्रत्येकी एक लाख रुपयांची मुदत ठेव ठेवण्याचा निर्णय त्यांनी घेतला आहे.
मंत्री. पंकजा मुंडे यांनी मंगळवारी रात्री शहीद संदीप जाधव यांच्या केळगाव येथील घरी जाऊन कुटुंबीयांचे सांत्वन केले. जाधव यांच्या पत्नीस वैद्यनाथ बँकेत एक जुलै पासून नोकरीत सामावून घेण्याचे आश्वासन यावेळी दिले. याप्रसंगी सैनिकांचे गाव असल्याने येथे व्यायामशाळा स्थापन करावी, अशी मागणी गावकऱ्यांनी केली. त्यांनी हा मागणी तातडीने मान्य करत त्याकरिता २५ लाख रुपयांचा निधी जाहीर केला. गावातील शहीद सैनिकांचे स्मारक बांधण्यासाठी सर्वतोपरी मदत करण्याचे आश्वासन दिले. यावेळी भाजप जिल्हाध्यक्ष एकनाथ जाधव, माजी आमदार किशनचंद तनवानी, सुरेश बनकर, ज्ञानेश्वर मोठे, इद्रीस मुलतानी, गंगाबाई ताठे आदींची उपस्थिती होती.

चौकाचे नामकरण
सिल्लोड तालुक्याचे सुपुत्र संदीप जाधव हे जम्मू-काश्मीरच्या सीमेवर लढतांना शहीद झाले. त्यांच्या स्मरणार्थ सिल्लोड शहरातील मुख्य चौकाचे शहीद संदिप जाधव चौक असे नामकरण करण्यात येणार आहे, अशी माहिती नगराध्यक्ष अब्दुल समीर यांनी दिली. तालुक्यातील सुमारे १९०० तरूण भारतीय सैन्यात कर्तव्य बजावत आहेत. शहीद संदीप जाधव यांचे बलिदान कधीही विसरणार नाही, असे म्हणाले.

मोबाइल अॅप डाउनलोड करा आणि राहा अपडेट

...तर वाहनचालकाचे लायसन्स होणार रद्द

June 28, 2017, 2:30 pm

≫ Next: ​ शिक्षणाबरोबरच विद्यार्थ्यांवर संस्काराची गरज

≪ Previous: शहीद जाधवांच्या पत्नीला वैद्यनाथ बँकेत नोकरी

$

0

0

म. टा. प्रतिनिधी, औरंगाबाद
वाहतूक नियमाचे वाहनधारकाने उल्लंघन केल्यास लायसन्स जप्त करण्यात येणार आहे. नियम मोडणाऱ्यांचे लायसन्स पंच करण्यात येणार असून, तीन वेळा पंच झाल्यास लायसन्स जप्त करण्यासाठी आरटीओंकडे प्रस्ताव पाठवण्यात येणार असल्याची माहिती पोलिस आयुक्त यशस्वी यादव यांनी दिली. लायसन्स नसताना वाहन चालवल्यास वाहन जप्त करण्यात येणार आहे.
शहरातील वाहतुकीला शिस्त लावण्यासाठी पोलिस विभागाकडून विविध मोहिमा राबवण्यात येत आहे. १ जुलैपासून नवीन मोहीम सुरू करण्यात येणार असल्याची मा‌हिती आयुक्त यादव यांनी दिली. दुचाकी, चार चाकी वाहनधारकांकडून वाहतूक नियमाचे उल्लंघन झाल्यास त्यांचे लायसन्स जप्त करण्यात येणार आहे. पहिल्या वेळेस दंडात्मक कारवाईसोबतच त्याच्या लायसन्सवर पंचिंग मशीनद्वारे ‘पंच’ करण्यात येईल. वाहनधारकाला समज देऊन सोडण्यात येणार आहे. दुसऱ्या वेळी हाच वाहनधारक नियमांचे उल्लंघन करताना पकडला गेल्यास दंडात्मक कारवाईसोबतच त्याच्या लायसन्सवर पंचिंग करून त्याला समज देण्यात येणार आहे. तिसऱ्या वेळी हा वाहनधारक पकडल्या गेल्यास त्याचे पूर्वीचे दोन पंचिंग पाहून थेट लायसन्स जप्त करण्यात येणार आहे. हा वाहनधारक वाहन चालवण्यासाठी योग्य नसून, त्याचे लायसन्स रद्द करण्यासाठी आरटीओ कार्यालयाकडे पाठवण्यात येणार असल्याची माहिती आयुक्त यशस्वी यादव यांनी दिली.

वाहन होणार जप्त
अनेक वाहनधारक लायसन्स वापरत नाहीत. या वाहनधारकांना वाहतूक नियमाचे उल्लंघन करताना पकडल्यास त्यांचे वाहन जप्त करण्यात येणार असल्याची माहिती आयुक्त यादव यांनी दिली.

मोबाइल अॅप डाउनलोड करा आणि राहा अपडेट

​ शिक्षणाबरोबरच विद्यार्थ्यांवर संस्काराची गरज

June 28, 2017, 2:51 pm

≫ Next: श्रेयासाठी सत्ताधाऱ्यांत जुंपली

≪ Previous: ...तर वाहनचालकाचे लायसन्स होणार रद्द

$

0

0

म. टा. प्रतिनिधी, लातूर
प्रत्येक शाळांमध्ये विद्यार्थ्यांना शिक्षण दिले जाते. शिक्षणामुळेच माणूस मोठा होतो. शिक्षणाबरोबरच विद्यार्थ्यांवर चांगले संस्कार करण्याची गरज आहे, हे काम शिक्षकांनी केले पाहिजे, असे मत जिल्हाधिकारी जी. श्रीकांत यांनी व्यक्त केले.
येथील श्री केशवराज शैक्षणिक संकुलात भारतीय शिक्षण प्रसारक संस्थेचा ६६ वा वर्धापन दिन साजरा करण्यात आला. या निमित्त जिल्हाधिकारी जी. श्रीकांत यांचे हस्ते ध्वजारोहण करण्यात आले. त्यानंतर संस्थेतील विविध परीक्षेतील गुणवंत विद्यार्थ्यांचा त्यांच्या पालकांसह सत्कार करण्यात आला. त्या प्रसंगी ते बोलत होते. या प्रसंगी मंचावर वास्तू विशारद अजय बरमदे, राष्ट्रीय बहुविकलांग संस्थेचे कार्यकारी सदस्य सुरेश पाटील, संस्थेचे पदाधिकारी जितेश चापसी, यशवंतराव देशपांडे, शिवदास मिटकरी, आनंदराज देशपांडे, योगिनी खरे, किशोर कुलकर्णी, विश्वनाथ जाधव, किरण भावठाणकर, मुख्याध्यापक उमेश सेलूकर, सुधीर कुलकर्णी, अमरजा कुलकर्णी आदींची उपस्थिती होती.

विद्यार्थ्यांनी मोठी स्वप्ने पहावीत, आपण ठरवले तर काहीही करू शकतो त्यासाठी जिद्द, परिश्रम आवश्यक आहेत असे सांगून जी. श्रीकांत म्हणाले, ‘जिथे चांगले संस्कार घडवले जातात ते विद्यार्थी मोठे होतात. त्यामुळे शिक्षणाबरोबरच विद्यार्थ्यांवर चांगले संस्कार घडविण्याची गरज आहे. मातृभाषेवर अगोदर प्रभुत्व मिळवा, मग अन्य भाषा अवगत करा, शिक्षणामुळेच माणूस मोठा होतो, शिक्षणापासून कोणीही वंचित राहणार नाही याची खबरदारी आपण सर्वांनी घेतली पाहिजे.’
शाळेचे माजी विद्यार्थी अजय बरमदे यांनी केशवराज विद्यालय हे संस्काराचे केंद्र आहे, परीक्षेत मिळविलेल्या गुणांबरोबरच आपल्या अंगभूत गुणांनाही विद्यार्थ्यांनी वाव द्यावा, असे मत व्यक्त केले.
सुरेश पाटील यांनी शिक्षण सध्या खूप महागले आहे. सामान्य कुटूंबातील विद्यार्थ्यांसाठी सध्या हे शिक्षण परवडणारे नाही, आर्थिकदृष्ट्या दुर्बल घटकांनाही शिक्षणाची संधी मिळाली पाहिजे, असा विचार संस्थाचालकांनी करण्याची गरज असल्याचे सांगितले.
उपमुख्याध्यापिका सुनंदा धर्मपात्रे यांनी प्रास्ताविक केले. किरण भावठाणकर यांनी संस्थेचा परिचय करून दिला. सूत्रसंचालन अनुपमा पाटील यांनी केले, आभार सुधीर कुलकर्णी यांनी मानले.

मोबाइल अॅप डाउनलोड करा आणि राहा अपडेट

श्रेयासाठी सत्ताधाऱ्यांत जुंपली

June 28, 2017, 3:04 pm

≫ Next: ​ महामार्गांच्या कामांसाठी स्वतंत्र कक्ष स्थापन

≪ Previous: ​ शिक्षणाबरोबरच विद्यार्थ्यांवर संस्काराची गरज

$

0

0

श्रेयासाठी सत्ताधाऱ्यांत जुंपली
म. टा. प्रतिनिधी, औरंगाबाद
रस्ते विकासासाठी शासनाने शंभर कोटी मंजूर केल्याची घोषणा बुधवारी (२८ जून) भाजप प्रदेशाध्यक्ष रावसाहेब दानवे यांनी एकट्याने केल्यामुळे महापालिकेत सत्ताधारी असणाऱ्या शिवसेनेचा तीळपापड झाला आहे. या आनंदात आम्हाला सहभागी करून का घेतले नाही, हीच तुमची पारदर्शकता का, असा सवाल करीत रस्त्यांच्या यादीची चिरफाड करण्याचा इशारा शिवसेनेने दिला आहे. तर एमआयएमने थेट महापौरांच्या पुतळा दहनाचा प्रयत्न केला. मात्र, हे आंदोलन पक्षाच्याच नगरसेवकांनी पाठ फिरवल्यामुळे फुसका बार ठरले.
‘शिवसेना कोणतेही काम लपून-छपून करत नाही. समांतर जलवाहिनी, भूमिगत गटार योजना या कामांना शिवसेनेमुळेच मंजुरी मिळाली. त्याची घोषणा आम्ही खुले आम केली. शहरातील रस्त्यांसाठी शासनाने निधी दिला ही चांगली बाब आहे, पण त्याची घोषणा भाजपने लपून-छपून कशासाठी केली. रस्ते प्रकरणात त्यांनी आम्हाला विश्वासात घेतले नाही. आम्ही आहोत म्हणून ते खुर्चीवर आहेत, याचे भान त्यांनी ठेवावे,’ अशा इशारा सभागृहनेते गजानन मनगटे यांनी बुधवारी दिला.
उपमहापौर स्मिता घोगरे यांच्यासह मनगटे यांनी संयुक्त पत्रकार परिषद घेतली यावेळी ते बोलत होते. मनगटे म्हणाले, ‘रस्त्यांच्या निधीसाठी महापौर दोन-तीन वेळा मुंबईला गेले, पण त्यांनी आम्हाला विश्वासात घेतले नाही. दीड-दोन महिन्यांपासून आम्ही महापौरांना रस्त्यांची यादी मागत आहोत, पण त्यांनी यादी देखील दिली नाही. शंभर कोटी रुपयांचा निधी मिळाल्याची घोषणा करताना त्यात लपवण्यासारखे काहीच नव्हते. मित्रपक्ष म्हणून त्यांनी आम्हाला बोलवायला हवे होते. त्यांनी आम्हाला बोलावून पारदर्शक कारभार कसा असतो, हे दाखवून द्यायला हवे होते. त्यांनी आम्हाला बोलावले असते, तर त्यांच्या हातातला माईक आम्ही हिसकावून घेतला नसता. रस्त्यांची यादी अजूनही जाहीर केली नाही. त्यामुळे त्यात काही गौडबंगाल आहे का, अशी शंका येऊ लागली आहे. यादीची चिरफाड आम्ही करणार आहोत. त्यांना यादी बदलण्यास भाग पाडू. रस्त्यांच्या टेंडर प्रक्रियेवर बारीक लक्ष ठेऊ. आयुक्तांनी रस्त्यांच्या कामासाठी सक्षम अधिकारी नेमला पाहिजे,’ अशी मागणी केली.

उपमहापौरांचे शरसंधान
उपमहापौर स्मिता घोगरे म्हणाल्या, ‘रस्त्यांसाठी शासनाकडून शंभर कोटी रुपयांचा निधी मिळाला ही आनंदाची बाब आहे, पण या आनंदात त्यांनी आम्हाला सहभागी करून घेतले नाही. यालाच पारदर्शकता म्हणायचे का ?’

एमआयएमच्या आंदोलनाचा फज्जा
शहरातील रस्त्यांसाठी शासनाने शंभर कोटींचे अनुदान दिल्याची घोषणा भाजपच्या नेते व पदाधिकाऱ्यांनी एकतर्फी केल्याचा निषेध करण्यासाठी एमआयएमने आयोजित केलेल्या आंदोलनाचा पुरता फज्जा उडाला.
महापौरांच्या पुतळ्याचे दहन करण्याचे आंदोलन विरोधीपक्षनेता फेरोज खान यांनी ठरविले होते. या आंदोलनाकडे एमआयएमच्याच नगरसेवकांनी पाठ फिरवली. शेवटी पालिकेच्या आवारात असलेल्या कार्यकर्त्यांना एकत्र करून पुतळा जाळण्याचा प्रयत्न केला, पण पोलिसांनी तो हाणून पाडला.
रस्त्यांच्या कामासाठी शंभर कोटी रुपयांचा निधी मिळाल्याची घोषणा भाजप प्रदेशाध्यक्ष खासदार रावसाहेब दानवे यांनी दुपारी केली. या वेळी महापालिकेतील अन्य पक्षाचे गटनेते, पदाधिकाऱ्यांना डावलण्यात आले. याचा महापालिकेतील विरोधीपक्ष असलेल्या एमआयएमने निषेध केला. सर्व पदाधिकाऱ्यांना विश्वासात घेऊन निधी मिळाल्याची घोषणा करायला हवी होती, पण भाजपच्या नेत्यांनी, महापौरांनी तसे केले नाही. वास्तविक पाहता सर्वांना सोबत घेण्याची जबाबदारी महापौरांची आहे. त्यांनी पालिकेतील पदाधिकाऱ्यांना टाळले, असा आरोप विरोधीपक्षनेते फेरोज खान यांनी केला. महापौरांनी आपल्या जबाबदारीची जाण ठेवली नाही, त्यामुळे त्यांच्या पुतळ्याचे दहन आम्ही करणार आहोत, असे त्यांनी जाहीर केले. लगेचच पुतळा दहन करण्याच्या आंदोलनाची तयारी केली. एका कार्यकर्त्याने बाटलीत पेट्रोल आणले. दहन करण्यासाठी पुतळा तयार झाला. विरोधीपक्ष नेतेही तयार झाले, पण त्यांच्या पक्षाचा कोणताच नगरसेवक पुतळा दहन आंदोलनात सहभागी झाला नाही.

मोबाइल अॅप डाउनलोड करा आणि राहा अपडेट

​ महामार्गांच्या कामांसाठी स्वतंत्र कक्ष स्थापन

June 28, 2017, 3:09 pm

≫ Next: ​ शाळेची इमारत अर्धवट; मलिदा लाटला

≪ Previous: श्रेयासाठी सत्ताधाऱ्यांत जुंपली

$

0

0

औरंगाबाद : ‘मराठवाड्यातून जाणाऱ्या राष्ट्रीय महामार्गांच्या भूसंपादन प्रक्रियेत आलेल्या अडचणी दूर करून प्रक्रियेला वेग देण्यासाठी विभागीय आयुक्त कार्यालयात स्वतंत्र कक्ष स्थापन करण्यात येणार आहे,’ अशी माहिती विभागीय आयुक्त डॉ. पुरुषोत्तम भापकर यांनी दिली.
भापकर म्हणाले, ‘या कक्षाद्वारे ज्या-ज्या ठिकाणी भूसंपादनाची प्रक्रिया रखडलेली आहे, तेथील अडचणी सोडवण्यात येतील. प्रकल्पाच्या एकूण निधीतून तीन टक्के निधी प्रशासकीय खर्चासाठी दिला जातो. या कक्षासाठी अतिरिक्त अधिकारी-कर्मचाऱ्यांसह साधन-सामुग्रीसाठी होणारा खर्च हा प्रशासकीय खर्चातून भागवण्यात येईल. मराठवाड्यात सध्या सोलापूर-धुळे (राष्ट्रीय महामार्ग क्रमांक २११), सोलापूर-संगारेड्डी (राष्ट्रीय महामार्ग क्रमांक ९) आणि रत्नागिरी-नागपूर (राष्ट्रीय महामार्ग क्रमांक ६३१) या तीन महामार्गांसाठी तसेच समृद्धी महामार्गाचे भूसंपादन करण्यात येत आहे. सोलापूर-धुळे महामार्गाचे येडशी ते औरंगाबाद या दरम्यानचे काम अंतिम टप्प्यात असले, तरी काही ठिकाणी भूसंपादनाचे प्रश्न कायम आहेत. हा मार्ग उस्मानाबाद, बीड, जालना औरंगाबाद या जिल्ह्यातून जातो, तर सोलापूर - संगारेड्डी हा महामार्गही विभागात येतो. रत्नागिरी-नागपूर हा महामार्ग उस्मानाबाद, लातूर, नांदेड, आणि हिंगोलीतून जाणार आहे, तर सोलापूर-संगारेड्डी हा महामार्ग उस्मानाबाद जिल्ह्यातून जातो. या दोन्ही महामार्गांसाठी सध्या भूसंपादनाची प्रक्रिया राबवण्यात येत असून काही ठिकाणी अडचणी आहेत. शासनाचा महत्वकांक्षी प्रकल्प असलेल्या नागपूर-मुंबई समृद्धी महामार्गासाठी भूसंपादन सुरू आहे. मात्र‌, जमिनीच्या किमतीवरून शेतकऱ्यांचा या महामार्गासाठी विरोध कायम आहे.’

मोबाइल अॅप डाउनलोड करा आणि राहा अपडेट

​ शाळेची इमारत अर्धवट; मलिदा लाटला

June 28, 2017, 3:10 pm

≫ Next: ​ जीएसटीविरोधात व्यापारी आंदोलन छेडणार

≪ Previous: ​ महामार्गांच्या कामांसाठी स्वतंत्र कक्ष स्थापन

$

0

0

औरंगाबाद : गंगापूर तालुक्यातील नेवरगाव येथील जिल्हा परिषद शाळेच्या वर्गखोल्या आणि पीरवाडी येथील अंगणवाडीचे बांधकाम पूर्ण न करताच निधी उचलला गेला. प्रशासनाला बनवून कंत्राटदारांनी निधी लाटला, असा गौप्यस्फोट भाजपचे जिल्हा परिषद सदस्य मधुकर वालतुरे यांनी स्थायी समिती बैठकीत केला. याप्रकरणी चौकशीचे आदेश प्रशासनाने दिले.
मंगळवारी झालेल्या स्थायी समितीच्या बैठकीत वालतुरे यांनी ऐनवेळच्या चर्चेत हा मुद्दा उपस्थित केला. पीरवाडी (ता.गंगापूर) येथील अंगणवाडीचे बांधकाम करण्यासाठी रितसर परवानगी १२ -१३ मध्ये दिली गेली होती. त्याचे बिलही उचलण्यात आले. मी अंगणवाडीचे बांधकाम प्रत्यक्ष पाहिले असता तिथे केवळ चार फुटाच्या चार भिंती उभ्या असल्याचे चित्र आहे. अंगणवाडी दुसऱ्याच ठिकाणी भरविली जाते. बोगस बिले दाखल करून निधी लाटला गेला. असाच प्रकार नेवरगाव येथील जिल्हा परिषद शाळेच्या खोल्या बांधकामात घडला. प्रत्यक्ष काम न करता निधी उचलला गेला. अशी अनेक प्रकरणे जिल्ह्यात घडलेली असू शकतात. बांधकाम विभागाने तपासणी न करताच बिले कशी काय अदा केली ? एवढ्या मोठ्या प्रमाणावर गैरव्यवहार होऊनही काहीच कारवाई आजवर झाली नाही, याबद्दल त्यांनी आश्चर्य व्यक्त केले. यावर प्रशासनाने बांधकाम विभागास चौकशीचे आदेश दिले.

९८ शाळांची कामे रखडली
जिल्हा नियोजन समितीने गेल्यावर्षी जिल्हा परिषद शाळांच्या खोल्या दुरुस्तीसाठी साडेचार कोटींचा निधी मंजूर केला होता. त्यावेळी शाळांची यादी तयार करतानाच प्रचंड गोंधळ झाला होता. दरम्यान या प्रस्तावाची फाइल पाच महिने जिल्हा परिषदेत फिरत होती. त्यामुळे अखेरपर्यंत या कामांना मुहूर्त लागलेला नाही. आता पावसाळा सुरू झाल्याने पुढचे चार महिने ही कामे करता येणार नाहीत.

मोबाइल अॅप डाउनलोड करा आणि राहा अपडेट

---

​ जीएसटीविरोधात व्यापारी आंदोलन छेडणार

June 28, 2017, 3:12 pm

≫ Next: आर्थिक मदतीसाठी निदर्शने

≪ Previous: ​ शाळेची इमारत अर्धवट; मलिदा लाटला

$

0

0

म. टा. प्रतिनिधी, औरंगाबाद
‘जीएसटीच्या माध्यमातून छोट्या व्यापाऱ्यांना संपविण्याचा घाट घातला आहे. आमच्या अडचणी फार मोठ्या आहेत. त्या समजून घ्या असे आम्ही सरकारला सांगू इच्छितो. याअनुषंगाने आता शासनास व लोकप्रतिनिधींना निवेदन देणार आहोत. या धोरणाचा फेरविचार करावा अन्यथा व्यापक आंदोलन छेडू,’ असा इशारा जिल्हा व्यापारी महासंघाचे अध्यक्ष अजय शहा यांनी ‘मटा’शी बोलताना दिला.
महावीर भवन कुंभारवाडा येथे मंगळवारी सर्वसमावेशक बैठक झाल्यानंतर महासंघाने मोठे ‌पाच पानी पत्रक काढले आहे. याबाबत शहा यांनी बुधवारी ‘मटा’शी संवाद साधला. ‘जीएसटीमुळे सर्व लहान-मोठ्या व्यापारीवर्गास मोठे नुकसान पोचणार आहे. अनेक कार्यशाळा, परिषदा घेऊनही जीएसटीबाबत संभ्रम कायम आहे. या कायदयाच्या जवळ आम्ही जसेजसे गेलो तसेतसे त्यातील क्लिष्टता आणि संभ्रम आम्हाला समजला. यातील अडचणी समोर आल्या. यातून प्रत्यक्ष आणि अप्रत्यक्षपणे व्यापारी वर्गास धोका वाटत आहे, असे सर्व सद्स्यांचे आणि ७२ संघटनांचे मत आहे. कम्पोझिशन स्कीम, २० लाखावरील उलाढाल, नियम, अटी, इनपुट रिटर्न, या सर्व बाबी व्यापारीवर्गाच्या दृष्टीने लाँगटर्ममध्ये नुकसान करणाऱ्या आहेत. मोठे आणि छोटे व्यापारी यात दुजाभाव केला जात आहे. नियम आणि अटी शर्ती सन्मानपूर्वक असाव्यात आणि आमच्यावर विश्वास ठेऊनच कर संकलन करवून घ्यावे असे आम्हाला वाटते.’ महावीर भवन येथे झालेल्या बैठकीतही हाच सूर निघाला. या बैठकीला भागचंद बिनायके, राजन हौजवाला, विजय जैस्वाल, प्रफुल मालानी, आदेशपालसिंग छाबडा, मदनभाई जालनावाला, दीपक पहाडे, शैलेंद्र रावत, संजय कांकरीया, सरदार हरिसिंग, शिवशंकर स्वामी, प्रवीण कुलकर्णी, लक्ष्मीनारायण राठी, कचरू वेळंजकर, विनोद भट्टड, मनिष भंडारी, सतीश लोणीकर, नीलेश सेठी, मनोज शहा, प्रवीण पाटील, दिलीप चोटलाणी, विनोद अग्रवाल, मंगल पटेल, भवानजीभाई पटेल, गुलाम हक्कानी आदींची उपस्थिती होती.

जीएसटीमुळे कम्प्युटर व सॉफ्टवेअरचा खर्च वाढणार आहे. मानसिक ताणासोबत, आर्थिक बोजाही पडणार आहे. व्यापाऱ्यांच्या समस्या सरकार व प्रशासनाने जाणून घ्याव्यात. - अजय शहा, अध्यक्ष, जिल्हा व्यापारी महासंघ

मोबाइल अॅप डाउनलोड करा आणि राहा अपडेट

आर्थिक मदतीसाठी निदर्शने

June 28, 2017, 3:13 pm

≫ Next: पोलिस ठाण्यालगत धाडसी चोरी

≪ Previous: ​ जीएसटीविरोधात व्यापारी आंदोलन छेडणार

$

0

0

म. टा. प्रतिनिधी, औरंगाबाद,
विधवा, परित्यक्त्या, निराधार महिलांना तीन हजारांची पेन्शन विनाअट सुरू करा, दरमहा ३५ किलो धान्य दोन रुपये दराने वाटप करा यासह विविध मागण्यांसाठी महाराष्ट्र राज्य शेतमजूर युनियनच्या वतीने बुधवारी (२८ जून) विभागीय आयुक्त कार्यालयावर धरणे आंदोलन करण्यात आले.
मराठवाड्यातील सततचा दुष्काळ, वाढती महागाई व रोजगार नसल्याने विधवा परित्यक्ता निराधार महिलांना घर चालवणे अवघड झाले आहे. पुरुषी मानसिकतेमुळे महिलांना निम्म्या मजुरीवर काम करावे लागते. सतत काम नसल्यामुळे काय करावे, हा प्रश्न महिलांसमोर पडतो. अनेक मान, अपमान व संकट सहन करत महिला कसेबसे जीवन जागत असून यासाठी विधवा, परित्यक्ता, निराधार महिलांना आर्थिक मदत करा, मनरेगाच्या कामावर ३५० रुपये रोज व २०० दिवस काम द्या, संजय गांधी योजना, श्रावणबाळ योजनेत पात्र होण्यासाठी महिलांना पंचनाम्याच्या आधारे उत्पन्न प्रमाणपत्र द्या, सामाजिक अर्थसहाय्य योजनेचे अनुदान नियमित वाटप करा आदी मागण्या आंदोलनकर्त्यांनी केल्या. मागण्यांचे निवेदन आयुक्तांना देण्यात आले. निवेदनावर बळीराम भुंबे, मारोती खंदारे, सरिता शर्मा, अशोक बुरखुंडे, भारत गायकवाड, भास्कर वीर, अशोक काळे आदींसह मराठवाड्याच्या विविध जिल्ह्यातून आलेल्या महिलांची मोठ्या संख्येने उपस्थिती होती.

मोबाइल अॅप डाउनलोड करा आणि राहा अपडेट

पोलिस ठाण्यालगत धाडसी चोरी

June 28, 2017, 3:15 pm

≫ Next: ​ केंद्रीय प्रवेश प्रक्रियेत गुरुकृपाला सामावून घ्या

≪ Previous: आर्थिक मदतीसाठी निदर्शने

$

0

0

म. टा. प्रतिनिधी, औरंगाबाद
सिडको एन ७ पोलिस ठाण्यालगत पोलिसांच्या नाकावर टिच्चून चोरट्यांनी दोन व्यावसायिकांची घरे फोडल्याची घटना बुधवारी घडली. चोरट्यांनी अमेरिकन डॉलर्ससह सोन्या-चांदीचे दागिने लंपास केले आहेत. या धाडसी चोरीच्या घटनेने खळबळ उडाली असून पोलिसांसमोर तपासाचे मोठे आव्हान उभे केले आहे.
पोलिस ठाण्याच्या भिंतीलगतच असलेल्या केशरदीप अपार्टमेंटमधील रहिवासी अमोल रामलिंग भाले यांचे झेरॉक्स सेंटर आहे. मंगळवारी रात्री साडेनऊ-दहाच्या सुमारास ते बीडबायपास येथे भावाच्या घरी गेले होते. बुधवारी सकाळी भाले हे एकटेच घरी परतले. ३० जून रोजी त्यांना बाहेरगावी जायचे होते. त्यामुळे कपाटातील सोन्याचे दागिने एका कापडी बॅगमध्ये ठेवले होते. चांदीच्या मूर्ती कपाटाच्या ड्रॉव्हरमध्ये ठेवल्या होत्या. दुपारी एकच्या सुमारास भाले यांनी कपाटात असलेले २७ हजार रुपये सोबत घेतले आणि ही रक्कम त्यांनी बँकेत भरली. तेथून बाहेर पडताच त्यांचा मोबाइल खणखणला. घराच्या दरवाजाला फक्त कडी दिसून येत असल्याचे त्यांना सांगण्यात आले. त्यांनी तात्काळ घर गाठले. त्यावेळी त्यांच्या दरवाजाचे कुलूप व किल्ली देखील चोराने लांबवल्याचे निदर्शनास आले. तसेच कपाटातील चांदीची मूर्ती कपाटाजवळच पडलेली होती. सोन्याचे दागिने त्यांच्या हाती लागले नाहीत. त्यानंतर तिसऱ्या मजल्यावर राहणारे विकास त्र्यंबक कापरे यांची वाळूजमधील घाणेगावात बॅटरी केमिकलची कंपनी आहे. तर त्यांचे एपीआय कॉर्नरजवळ कार्यालय आहे. बुधवारी दुपारी कापरे यांनी पत्नीशी संपर्क साधत जेवणाचा डबा आणायचे सांगितले. त्यामुळे कापरे यांची पत्नी व मुलगी डबा घेऊन दुपारी १२.४० वाजता घराला कुलूप लावून बाहेर पडल्या होत्या. याच दरम्यान चोरट्यांनी त्यांच्या घराचे कुलूप तोडत कपाटाच्या ड्रॉव्हरमधील अडीच हजार अमेरिकन डॉलर्स (भारतीय चलनानूसार एक लाख ६५ हजार रुपये), एक तोळ्याचे कानातील वेल व टाप्स लांबवले. याशिवाय मोबाइल व छोट्या पर्ससह कापरे यांचा नवीन-जुना पासपोर्ट, मुलीचा वाहन परवाना, एटीएम कार्ड लंपास केले. या घटनेची माहिती समजताच पोलिस निरीक्षक कैलास प्रजापती यांनी सहकाऱ्यांसह धाव घेतली. घटनास्थळाचा पंचनामा करत श्वान पथकाला पाचारण केले. या प्रकरणी सिडको पोलिस ठाण्यात गुन्हा दाखल करण्यात आला आहे. उपनिरीक्षक एस. बी. काचोळे हे पुढील तपास करीत आहेत.

चोरटा निसटला
काळा-सावळा रंग, बारीक कुरळे केस आणि पांढऱ्या रंगाचा ठिपक्यांचा शर्ट घातलेला चोरटा अपार्टमेंटमधून खाली उतरत असताना कापरे यांच्या पत्नीने पाहिला. मात्र, तोपर्यंत त्यांना घर फोडल्याची कल्पना नव्हती. एक चोरटा अपार्टमेंटमध्ये शिरला होता, तर दुसरा त्याला सावध करण्याकरिता रस्त्यावर थांबलेला होता. घटनेनंतर पोचलेल्या सायबर सेलसह गुन्हे शाखा पोलिसांनी काही अंतरावरील एका मेडिकल दुकानाच्या सीसीटीव्हीचे फुटेज तपासले. त्यात दुचाकीसह जाताना दोघे दिसत आहेत. कापरे यांच्या पत्नीने सांगितलेल्या वर्णनानुसार चोराचे स्केच तयार करण्याचे काम रात्री उशिरापर्यंत सुरू होते.

मोबाइल अॅप डाउनलोड करा आणि राहा अपडेट

​ केंद्रीय प्रवेश प्रक्रियेत गुरुकृपाला सामावून घ्या

June 28, 2017, 3:18 pm

≫ Next: ​ जिल्हाधिकाऱ्यांनी मागितले सीईओंना स्पष्टीकरण

≪ Previous: पोलिस ठाण्यालगत धाडसी चोरी

$

0

0

म. टा. विशेष प्रतिनिधी ,औरंगाबाद
माळी पारगाव (ता. माजलगाव, जि. बीड) येथील याचिकाकर्त्या गुरुकृपा सेवाभावी संस्थेच्या फार्मसी महाविद्यालयाच्या संदर्भात विद्यापीठाकडून वेळेत योग्य कार्यवाही झाली नाही. त्याविरोधात दाखल याचिकेत या संस्थेला केंद्रीय प्रवेश प्रक्रियेत सामावून घ्यावे, असे आदेश मुंबई हायकोर्टाच्या औरंगाबाद खंडपीठाचे न्या. अनुप मोहता व न्या. सुनील कोतवाल यांनी दिले.
गुरुकृपा संस्थेने औषधनिर्माण शास्त्र (फार्मसी) महाविद्यालय सुरू करण्याचा निर्णय घेतला होता. त्यानुसार संस्थेने अखिल भारतीय तंत्र परिषदेने १० एप्रिल २०१७ रोजी २०१७-१८ या वर्षासाठी फार्मसी महाविद्यालय सुरू करण्याची परवानगी दिली होती. त्यानुसार राज्य शासनानेही मान्यता दिली. तंत्रशिक्षण संचालनालयानेही २२ जून २०१७ रोजी विना अनुदान तत्वावर नवीन फार्मसी महाविद्यालय सुरू करण्याची परवानगी दिली. मात्र, डॉ. बाबासाहेब आंबेडकर मराठवाडा विद्यापीठाकडून आवश्यक ती कार्यवाही झाली नाही. त्यामुळे २५ जूनपासून सुरू होणाऱ्या २८ जून रोजी संपणाऱ्या ऑनलाइन केंद्रीय प्रवेश प्रक्रियेच्या पहिल्या फेरीत संस्थेचे नाव सामाविष्ट झाले नाही. त्यामुळे या विरोधात याचिका दाखल करण्यात आली. याचिकाकर्त्याची बाजू संदीप राजेभोसले यांनी मांडली. त्यांना मोहित देशमुख यांनी सहाय्य केले. शासनातर्फे अनिकेत देशमुख, तर तंत्रशिक्षण परिषदेकडून श्रीकात अदवंत व विद्यापीठाकडून संभाजी टोपे हे काम पाहत आहेत. या याचिकेची सुनावणी तीन जुलै रोजी होणार आहे.

मोबाइल अॅप डाउनलोड करा आणि राहा अपडेट

​ जिल्हाधिकाऱ्यांनी मागितले सीईओंना स्पष्टीकरण

June 28, 2017, 3:20 pm

≫ Next: ​ १२ लोटाबहाद्दरांवर फसवणुकीचा गुन्हा

≪ Previous: ​ केंद्रीय प्रवेश प्रक्रियेत गुरुकृपाला सामावून घ्या

$

0

0

औरंगाबाद : जिल्हा परिषद, पंचायत समिती तसेच शिक्षक मतदारसंघ निवडणुकीच्या आचारसंहिता काळात ४२ कर्मचाऱ्यांना पदोन्नती दिल्याबाबत जिल्हाधिकारी नवलकिशोर राम यांनी झेडपी सीईओ मधुकरराजे अर्दड यांना या प्रकरणी तीन दिवसांत स्पष्टीकरण देण्याचे आदेश दिले आहेत. यासंदर्भात राजेंद्र राठोड यांनी जिल्हाधिकाऱ्यांकडे तक्रार केली होती.
जिल्हा परिषद प्रशासनाने जानेवारी महिन्यात आरोग्य विभागातील ४२ कर्मचाऱ्यांच्या वर्ग ‘ड’ मधून वर्ग ‘क’ मध्ये पदोन्नती आदेश दिले होते. वास्तविक या काळात शिक्षक तसेच आठवडाभरात जिल्हा परिषद व पंचायत समिती सार्वत्रिक निवडणुकीची आचारसंहिता लागू झाली होती. आचारसंहिता काळात कुठलीच पदोन्नती देता येत नाही. यासंदर्भात राठोड यांनी जिल्हाधिकाऱ्यांकडे तक्रार केली. झेडपीच्या २ जानेवारी १७ च्या आदेशाद्वारे जिल्ह्यातील प्राथमिकआरोग्य केंद्रात पदोन्नती दिलेले कर्मचारी रुजू झाल्याचा अहवालही दाखल केला होता. त्याची दखल घेऊन जिल्हाधिकाऱ्यांनी २१ जून रोजी झेडपी सीइओंना पत्र दिले आहे.

मोबाइल अॅप डाउनलोड करा आणि राहा अपडेट

​ १२ लोटाबहाद्दरांवर फसवणुकीचा गुन्हा

June 28, 2017, 3:21 pm

≫ Next: ​ मानधन आता थेट खात्यात

≪ Previous: ​ जिल्हाधिकाऱ्यांनी मागितले सीईओंना स्पष्टीकरण

$

0

0

औरंगाबाद : वैयक्तिक शौचालयाच्या बांधकामासाठी शासकीय अनुदानाच्या पहिल्या हप्त्याची रक्कम उचलूनही बांधकाम न केलेल्या बारा लोटाबहाद्दरांवर फसवणुकीचा गुन्हा दाखल करा, अशी तक्रार महापालिकेतर्फे मुकुंदवाडी पोलिस स्टेशनमध्ये देण्यात आली आहे.
स्वच्छ महाराष्ट्र अभियानाअंतर्गत केंद्र व राज्य शासनाकडून ज्या कुटुंबाच्या घरी वैयक्तिक शौचालय नाही, अशा कुटुंबांना शौचालयाचे बांधकाम करण्यासाठी १२ हजार रुपयांचे अनुदान दिले जाते. या अनुदानाचा सहा हजार रुपयांचा पहिला हप्ता वितरित केल्यानंतरही शौचालयाचे बांधकाम न केलेल्या व अनुदानाचा दुरुपयोग केलेल्या बारा जणांवर फसवणुकीचा गुन्हा दाखल करा, अशी तक्रार प्रभाग - ई च्या अधिकाऱ्यांनी मुकुंदवाडी पोलिसांकडे केली आहे. श्याम शिंदे (राजनगर), हरिश्चंद्र पाल (मुकुंदवाडी), गणेश चिंतामणे (मुकुंदवाडी), किसन शिंदे (मुकुंदनगर), शांताबाई गायकवाड (राजनगर), प्रमिला शिरसाठ (श्रद्धानगर, मुकुंदवाडी), मदन गायकवाड (मुकुंदनगर), संदीप शेजुळ (मुकुंदवाडी), काकासाहेब कल्याणकर (राजनगर), कैलास रणहर (राजनगर), नर्गीस शेख ( मुकुंदनगर), समाधान वानखेडे (पंचशिलनगर) ही त्या बारा जणांची नावे आहेत. या व्यक्तींचे मोबाइल क्रमांकही पोलिसांना देण्यात आले आहेत.

गुलाबपुष्पाने सत्कार
बुधवारी सकाळी पालिका आयुक्त डी. एम. मुगळीकर यांनी गुडमॉर्निंग पथकाच्या सोबत जाऊन राजनगर परिसरात उघड्यावर शौचास बसणाऱ्या नागरिकांचा गुलाबपुष्प देऊन सत्कार केला. या गांधीगिरीमुळे नागरिकही अवाक झाले. यावेळी कार्यकारी अभियंता अफसर सिद्दिकी, वॉर्ड अधिकारी मीरा चव्हाण, स्वच्छता निरीक्षक आठवले उपस्थित होते.

मोबाइल अॅप डाउनलोड करा आणि राहा अपडेट

​ मानधन आता थेट खात्यात

June 28, 2017, 3:22 pm

≫ Next: ​ चीनमधील परिषदेसाठी महापौर, आयुक्तांना निमंत्रण

≪ Previous: ​ १२ लोटाबहाद्दरांवर फसवणुकीचा गुन्हा

$

0

0

म. टा. प्रतिनिधी, औरंगाबाद
महिला व बालकल्याण विभागांतर्गत राज्यभर असलेल्या अंगणवाड्यांमध्ये कार्यरत अंगणवाडी कार्यकर्ते आणि सेविकांना यापुढे मानधनासाठी वाट पाहावी लागणार आहे. महिला बालकल्याण आयुक्तालयाकडून यापुढे दर महिन्याच्या एक तारखेला थेट संबंधितांच्या बँक खात्यात मानधन जमा करण्यात येणार आहे. ३४ जिल्हा परिषदांमधून ६० कोटी रुपये या माध्यमातून जमा होणार आहेत.
ग्रामीण भागातील विद्यार्थ्यांना शाळेची गोडी लागावी यासाठी केंद्र सरकारच्या पुढाकाराने अंगणवाडी प्रकल्प सुरू करण्यात आला. एकात्मिक बाल विकास योजनेंतर्गत महिला व बालकल्याण खात्याच्या मदतीने राज्यात हा प्रकल्प राबविला जातो. ग्रामीण भागातील प्रशासन यंत्रणा जिल्हा परिषद यंत्रणेच्या देखरेखीखाली चालते. याठिकाणी कार्यरत अंगणवाडी सेविका आणि मदतनीसांना दरमहा मानधन दिले जाते. आजवर या घटकांना मिळणारे मानधन राज्यातून जिल्हा परिषदांमध्ये येत होते. तिथून तालुकास्तरावर त्यानंतर प्रकल्पांकडे हा निधी दिला जात होता आणि शेवटी अंगणवाडी कार्यकर्ती व मदतनीसांना मानधनाचे वाटप होत होते. या प्रक्रियेला कायम विलंब होत होता. दुसरीकडे बजेटची तरतूद नसली की तीन - तीन महिने मानधन मिळत नव्हते. ग्रामीण भागातील कार्यकर्त्यांची ही अडचण पाहून आयुक्तालयाने जुलै महिन्यापासूनचे मानधन ऑनलाइन जमा करण्याचा निर्णय घेतला आहे. त्यानुसार एक जुलै रोजी जून महिन्याचे मानधन थेट बँकेत जमा केले जाईल. ही प्रक्रिया मुंबईहून पार पडणार आहे. ३४ जिल्हा परिषदांमधून मानधनापोटी ६० कोटींची रक्कम दरमहा दिली जाते. ऑनलाइन प्रक्रियेमुळे आता सुलभता निर्माण होणार आहे.

मोबाइल अॅप डाउनलोड करा आणि राहा अपडेट

---

​ चीनमधील परिषदेसाठी महापौर, आयुक्तांना निमंत्रण

June 28, 2017, 3:24 pm

≫ Next: चांगले शिक्षक नाथ व्हॅलीची ओळख

≪ Previous: ​ मानधन आता थेट खात्यात

$

0

0

म. टा. प्रतिनिधी, औरंगाबाद
चीनमध्ये १४ ते १७ जुलैच्या दरम्यान होणाऱ्या विकास परिषदेसाठी महापौर भगवान घडमोडे व आयुक्त डी. एम. मुगळीकर यांना निमंत्रित करण्यात आले आहे. चीन सरकारचे निमंत्रण आपण स्वीकारल्याचे मुगळीकर यांनी सांगितले.
चीनमधील ड्युहाँग हे शहर सिस्टर सिटी म्हणून केंद्र व राज्य शासनाने औरंगाबाद शहराशी जोडले आहे. या शहरात ड्युहाँग सिटी ब्रिक्स फ्रेंडशीप सिरीज अँड लोकल गव्हरमेंट फोरम तर्फे ‘इंटिग्रेटेड डेव्हलपमेंट’ या विषयावर परिषदेचे आयोजन करण्यात आले आहे. या परिषदेसाठी मुंबईतून संजय भाटिया, नितीन करीर, मिलिंद भारंबे, कुणालकुमार, अश्विन मुदगल हे अधिकारी जाणार आहेत. त्यांच्याशिवाय औरंगाबाद महापालिकेचे आयुक्त व महापौरांना देखील निमंत्रित करण्यात आले आहे. परिषदेसाठी जाण्या-येण्याचा खर्च चीन सरकारतर्फे केला जाणार आहे. या परिषदेला आपण जाणार आहोत, असे मुगळीकर यांनी सांगितले.

मोबाइल अॅप डाउनलोड करा आणि राहा अपडेट

चांगले शिक्षक नाथ व्हॅलीची ओळख

June 29, 2017, 2:30 pm

≫ Next: अश्लिल वर्तन; कोचिंग क्लास मॅनेजर, शिक्षकाला चोप

≪ Previous: ​ चीनमधील परिषदेसाठी महापौर, आयुक्तांना निमंत्रण

$

0

0

चांगले शिक्षक नाथ व्हॅलीची ओळख

नाथ व्हॅली स्कूलच्या रौप्यमहोत्सवी कार्यक्रमात पोलिस महासंचालक माथूर यांचे गौरवोद्गार

म. टा. प्रतिनिधी, औरंगाबाद

गुणवत्तापूर्ण शिक्षण देणाऱ्या शैक्षणिक संस्थांची समाजाच्या विकासात महत्त्वाची भूमिका असते. चांगल्या शिक्षकांमुळे विद्यार्थी शिक्षणात आणि आयुष्यातही उच्चस्तरावर पोहचतात. त्यामुळे चांगले शिक्षक हीच त्या शाळेची खरी ओळख असते, असे प्रतिपादान राज्याचे पोलिस महासंचालक सतीश माथूर यांनी केले. नाथ व्हॅली स्कूलच्या रौप्य महोत्सवी वर्षानिमित्त आयोजित सोहळ्यात ते बोलत होते.

शाळेच्या सभागृहात झालेल्या सोहळ्यात व्यासपीठावर प्राचार्य रणजीत दास, संस्थेचे अध्यक्ष अरविंद माछर, उपाध्यक्ष सतीश कागलीवाल, मुकुंद भोगले, एन. के. गुप्ता, नंदकिशोर कागलीवाल, ऋषी बागला, आर. के. लिला, मधुसुदन अग्रवाल, माजी उपप्राचार्य देवेंद्र कापडिया यांची प्रमुख उपस्थिती होती. माथूर पुढे म्हणाले एकविसाव्या शतकात विद्यार्थ्यांच्या पूर्ण क्षमता विकसीत करण्याची जबाबदारी शिक्षकांची आहे. सामाजिक विकासात चांगल्या शाळांचा मोठा वाटा आहे. त्यामुळे शिक्षकांची जबाबदारी मोठी असते. अधिकाधिक गुणवत्तेवर भर देत विद्यार्थी घडविले पाहिजेत. चांगले बिजारोपण केले तर, चांगलेच उगवते, चांगले फळ मिळते, असेही ते म्हणाले. अशाच शाळांच्या यादीत नाथ व्हॅली शाळेचा समावेश असल्याचे गौरउद्गार त्यांनी काढले.

प्राचार्य दास म्हणाले, शहराच्या विस्तारीकरणात शाळेचा विस्तार अतिशय वेगाने झाला. आज विविध क्षेत्रात शाळेचे विद्यार्थी देश-विदेशात आपले आणि शाळेचे नाव उज्ज्वल करत आहेत. देवेंद्र कपाडिया यांनी शाळेच्या जुन्या आठवणी सांगितल्या. तर, यावेळी माछर यांनी शाळेच्या कार्याचा आढावा घेतला. यावेळी शिक्षक, गुणवंत विद्यार्थ्यांचा गौरव करण्यात आला. ज्यामध्ये उपप्राचार्य डॉ. राजकुमारी दीक्षित, डॉ. शारदा गुप्ता, प्रशासकीय अधिकारी सुधीर हंप्रस, सरबजीत दासगुप्ता यांचा समावेश आहे. विद्यार्थ्यांनी सांस्कृतिक कार्यक्रमही यावेळी सादर केले.

विविध शहर, राज्यातील विद्यार्थी

१९९२ साली स्थापन झालेल्या शाळेत आज राज्यभरातील विविध शहरांसह, राज्यातील विद्यार्थी शिक्षण घेत असल्याची माहिती प्राचार्य दास यांनी दिली. आज विविध स्तरावरील बाराशे विद्यार्थी शिक्षण घेत असल्याचेही त्यांनी सांगितले.

मोबाइल अॅप डाउनलोड करा आणि राहा अपडेट

अश्लिल वर्तन; कोचिंग क्लास मॅनेजर, शिक्षकाला चोप

June 29, 2017, 2:30 pm

≫ Next: अधिसभा निवडणुकीचा सावळा गोंधळ

≪ Previous: चांगले शिक्षक नाथ व्हॅलीची ओळख

$

0

0

म. टा. प्रतिनिधी, औरंगाबाद
शिकवणीसाठी येणाऱ्या विद्यार्थिनींशी अश्लील वर्तन व संभाषण करणाऱ्या आकाश इन्स्टिट्युट क्लासेचा ब्रँच मॅनेजर व शिक्षकाला गुरुवारी दुपारी शिवसैनिकांनी बेदम चोप देऊन पोलिसांच्या हवाली केले. हा प्रकार दुपारी तीनच्या सुमारास जालना रोडवरील आकाशवाणी चौकात घडला.
आकाशवाणी समोरील बग्गा इंटरनॅशनल हॉटेलजवळ आकाश इन्स्टिट्युट क्लासेस आहे. येथे मेडिकल व इंजिनीअरिंग (नीट व जेइई) प्रवेश परीक्षेचे क्लास घेतले जातात. येथे ब्रँच मॅनेजर म्हणून शिवहरी वाघ व स्टाफ इन्चार्ज म्हणून रोहित सुळ हे काम पाहतात. गेल्या काही दिवसापासून हे दोघे विद्यार्थिनीसोबत अश्लिल संभाषण करत होते. ड्रेसवरून अश्लिल कॉमेंट करणे, मोबाइल क्रमांकाची मागणी, विद्यार्थिनी क्लासला येत नाहीत, चित्रपट पाहण्यासाठी जाणाता असे घरी फोनवरून सांगून ब्लॅकमेल करणे आदी प्रकार हे दोघे करत होते, अशी माहिती विद्यार्थिनींनी दिली. एका विद्यार्थीनीला बुधवारी बॅचची वेळ बदलून हवी होती. तिच्यासोबतही अश्लिल भाषेत संभाषण करण्यात आले. तिने हा प्राकर भावाला सांगितला. तिच्या भावासह गुरुवारी दुपारी शिवसैनिकांनी क्लास गाठला. इतर विद्यार्थिंनीनी देखील हा प्रकार गेल्या काही दिवसापासून सुरू असल्याचे सांगितले. या दोघांना जाब विचारत संतापलेल्या शिवसैनिक व युवा सेनेच्या कार्यकर्त्यांनी दोघांना बेदम चोप दिला. जिन्सी पोलिसांना माहिती दिल्यानंतर चार्लींनी घटनास्थळी धाव घेतली. मॅनेजर शिवहरी वाघ व रोहित सुळ यांना ताब्यात घेत जिन्सी पोलिस ठाण्यात नेण्यात आले. जिन्सी पोलिस ठाण्यात यावेळी जिल्हाप्रमुख अंबादास दानवे, शहरप्रमुख बाळासाहेब थोरात, संजय रिडलॉन, गणेश अंबीलवादे, राजेंद्र दानवे, अभिजित थोरात यांच्यासह इतरांची उपस्थिती होती. या प्रकरणी मुलीच्या तक्रारीवरून रात्री उशिरापर्यंत गुन्हा दाखल करण्याची प्रक्रिया सुरू होती.

त्रास वाढल्यानंतर घरी सांगितले
जून २०१६ मध्ये येथे प्रवेश घेतल्यापासून वाघ व सुळ यांच्याकडून हे प्रकार सुरू होते, असे विद्यार्थिनींनी सांगितले. सुरुवातीला पालकांना सांगितले नाही, मात्र नंतर त्रास वाढल्याने हा प्रकार घरी सांगितल्याची माहिती दिली.

मोबाइल अॅप डाउनलोड करा आणि राहा अपडेट

अधिसभा निवडणुकीचा सावळा गोंधळ

June 29, 2017, 2:30 pm

≫ Next: ‘पेट’ अनिश्चित काळासाठी रद्द

≪ Previous: अश्लिल वर्तन; कोचिंग क्लास मॅनेजर, शिक्षकाला चोप

$

0

0

म. टा. प्रतिनिधी, औरंगाबाद
डॉ. बाबासाहेब आंबेडकर मराठवाडा विद्यापीठाच्या अधिसभा निवडणुकीचे वेळापत्रक जाहीर झाल्यानंतर मतदान नोंदणीला वेग आला आहे. प्राचार्य, प्राध्यापक आणि पदवीधर प्रवर्गाची नोंदणी सुरू आहे, मात्र सशुल्क अर्ज जमा करण्यासाठी विद्यापीठाचे काउंटर सुरू नसल्यामुळे गोंधळ उडाला आहे. ऑनलाइन नोंदणी आणि अर्ज जमा करण्यातील गलथानपणा उघडकीस आल्यानंतर विद्यापीठाने सारवासारव केली आहे.
विद्यापीठाच्या अधिसभा निवडणुकीचे मतदार नोंदणी ते मतमोजणी वेळापत्रक जाहीर झाले आहे. पहिल्या टप्प्यात प्राचार्य (१० जागा), प्राध्यापक (१० जागा) आणि पदवीधर अधिसभा सदस्य (१० जागा) अशा ३० जागांसाठी नोंदणी होणार आहे. या प्रवर्गात प्रत्येकी पाच जागा खुल्या प्रवर्गासाठी आणि अनुसूचित जाती-जमाती, इतर मागासवर्ग, भटके विमुक्त जाती-जमाती व महिलांसाठी प्रत्येकी एक जागा आहे. दोन वर्षे अधिकार मंडळे नसल्यामुळे निवडणुकीची प्रतीक्षा होती. येत्या ३१ ऑगस्टपूर्वी अधिकार मंडळाच्या निवडणुकीचा कार्यक्रम पूर्ण करण्याचे नियोजन आहे. निवडणुकीसाठी राजकीय पक्षांचा भरभक्कम पाठिंबा असलेले विविध पॅनल रिंगणात उतरले आहेत. मतदार नोंदणी वाढवून विजय निश्चित करण्यावर भर देण्यात आला आहे; तसेच काही जागरूक मतदार स्वतः नोंदणी करीत आहेत, मात्र ऑनलाइन नोंदणीत त्रुटी असल्यामुळे मतदारांचा भ्रमनिरास झाला आहे. नोंदणीनंतर फॉर्मची कॉपी १० रुपये शुल्क भरून विद्यापीठात जमा करणे अनिवार्य आहे. विद्यापीठाने अर्ज जमा करून घेण्यासाठी काउंटर नसल्यामुळे मतदारांचा गोंधळ उडाला आहे. २० जून रोजी काउंटर सुरू करणे अपेक्षित होते. विद्यापीठाने निवडणूक वेबपोर्टलवर २०१० यावर्षीची पदवीधर मतदार यादी प्रदर्शित केली आहे. या यादीतील मतदारांना नोंदणीसाठी पदवी प्रमाणपत्र व नोंदणी शुल्क भरण्याची आवश्यकता नाही. पण, अशा मतदारांनी पुरावा म्हणून कोणती कागदपत्रे सादर करावी याची स्पष्ट सूचना नाही. ऑनलाइन अर्ज भरताना माहिती विचारल्यानंतर पोर्टलवर माहिती मिळत नसल्याचा आक्षेप आहे. या त्रुटी त्वरित दूर करण्याची मागणी मतदारांनी केली आहे.

‘सीईटी’ची गडबड
ऑनलाइन प्रक्रियेबाबत विद्यापीठ प्रशासन नेहमी गलथानपणा दाखवत असते. यावर्षी ‘पीजी सीईटी’ घेण्यात येणार आहे, मात्र आतापर्यंत किती विद्यार्थ्यांनी ‘सीईटी’साठी नोंदणी केली याची आकडेवारी विद्यापीठाकडे उपलब्ध नाही. तसेच सीईटी अर्ज भरताना अनेक शाखांचे पर्याय नसल्यामुळे विद्यार्थी संभ्रमात आहेत. विद्यार्थ्यांची माहिती नसल्यामुळे परीक्षेचे नियोजन कसे होणार, असा सवाल निर्माण झाला आहे.

मोबाइल अॅप डाउनलोड करा आणि राहा अपडेट

‘पेट’ अनिश्चित काळासाठी रद्द

June 29, 2017, 2:30 pm

≫ Next: अल्पवयीन मुलाचा सात वर्षांच्या मुलीवर अत्याचार

≪ Previous: अधिसभा निवडणुकीचा सावळा गोंधळ

$

0

0

म. टा. प्रतिनिधी, औरंगाबाद
डॉ. बाबासाहेब आंबेडकर मराठवाडा विद्यापीठाची पीएचडी पूर्वपरीक्षा (पेट) अनिश्चित काळासाठी रद्द करण्यात आली आहे. दोन जुलै रोजी होणारी ‘पेट’ परीक्षा ऐनवेळी रद्द झाल्यानंतर पुढील वेळापत्रक गुरुवारी जाहीर करणार असल्याचे कुलगुरूंनी सांगितले होते, मात्र विद्यापीठ प्राधिकरण निवडणुकीच्या बैठकीसाठी कुलगुरू मुंबईला गेले असल्यामुळे वेळापत्रक जाहीर झाले नाही. प्रशासकीय अधिकाऱ्यांनी ‘पेट’चे संभाव्य वेळापत्रक सांगण्यास स्पष्ट नकार दिला.
डॉ. बाबासाहेब आंबेडकर मराठवाडा विद्यापीठाची पीएचडी पूर्वपरीक्षा (पेट) रद्द झाल्यामुळे राज्यभरातील विद्यार्थ्यांची निराशा झाली आहे. या परीक्षेसाठी राज्यातील १४ हजार विद्यार्थ्यांनी नोंदणी केली आहे. गेली अडीच वर्षे रखडलेली परीक्षा दोन जुलै रोजी घेण्याची घोषणा कुलगुरू डॉ. बी. ए. चोपडे यांनी केली होती, पण परीक्षेचे नियोजन नसल्यामुळे ऐनवेळी परीक्षा रद्द करण्यात आली. परीक्षा कोणत्या कारणांमुळे रद्द झाली याची माहिती कुलगुरूंनाही नसल्यामुळे विद्यापीठातील सावळागोंधळ पुन्हा चव्हाट्यावर आला. ‘पेट’ परीक्षेचे वेळापत्रक गुरुवारी (२९ जून) जाहीर करण्यात येईल, असे कुलगुरू डॉ. चोपडे यांनी सांगितले होते, पण मुंबई येथे गुरुवारी विद्यापीठ प्राधिकरण निवडणुकीच्या बैठकीसाठी रवाना झाले. त्यामुळे ‘पेट’चे नियोजित वेळापत्रक जाहीर झाले नाही. विद्यापीठाशी संलग्न चार जिल्ह्यात पेट परीक्षा घेण्यात येणार आहे. परीक्षेचे नियोजन करण्याचे काम खासगी कंपनीला सोपवले आहे. या कंपनीने सर्वेक्षण करून परीक्षेचे काही प्रमाणात नियोजन केले होते. या नियोजनात प्रचंड त्रुटी असल्यामुळे परीक्षा ऐनवेळी रद्द करण्यात आली, असे विद्यापीठाच्या सूत्रांनी सांगितले.
दरम्यान, राज्यभर ‘पेट’ परीक्षा घेण्याचे नियोजन विस्कळीत झाले आहे. किमान चार जिल्ह्यात सुरळीत परीक्षा घेण्याचे विद्यापीठ प्रशासनासमोर आव्हान आहे. विद्यापीठाच्या वेबसाइटवर ‘पेट’बाबत सूचना नसल्यामुळे विद्यार्थी संभ्रमात आहेत. कुलगुरू डॉ. चोपडे मुंबईहून परतल्यानंतर ‘पेट’चा निर्णय घेतला जाण्याची शक्यता आहे.

अनिर्णित बैठक
‘पेट’ परीक्षा आणि विद्यापीठ निवडणुकीच्या पार्श्वभूमीवर गुरुवारी विद्यापीठात बैठक झाली. प्रभारी अधिकारी डॉ. सतीश पाटील आणि चार अधिष्ठाता बैठकीला उपस्थित होते, मात्र बैठकीत ‘पेट’बाबत काय निर्णय घेतला याची माहिती समजू शकली नाही. प्रशासकीय अधिकाऱ्यांनीही परीक्षेचे संभाव्य वेळापत्रक सांगण्यास नकार दिला. हा प्रकार विद्यार्थ्यांना गोंधळात टाकण्यास कारणीभूत ठरला आहे. ‘पेट’च्या मुद्द्यावर विद्यार्थी संघटनांनी जोरदार आंदोलन करण्याचा निर्णय घेतला आहे.

मोबाइल अॅप डाउनलोड करा आणि राहा अपडेट