चॉकलेटचे आमिष दाखवून एका १६ वर्षीय मुलाने सात वर्षीय मुलीवर बलात्कार केल्याची घटना बुधवारी सायंकाळी साडेसहा वाजता तालुक्यातील सराई येथे घडली. याप्रकरणी खुलताबाद पोलिस ठाण्यात अल्पवयीन आरोपीविरुद्ध कलम ३७६ व बाललैंगिक अत्याचार कायद्यानुसार गुन्हा दाखल करण्यात आला आहे. पोलिसांनी अल्पवयीन मुलाला ताब्यात घेतले आहे.
पोलिसांत दाखल झालेल्या फिर्यादीनुसार, पीडित मुलगी सराई येथील जिल्हा परिषद शाळेच्या मैदानावर खेळत होती. त्यावेळी संशयित आरोपी तेथे आला, त्याने तिला चॉकलेटचे आमिष दाखवून ओढत नेले व अत्याचार केला. ही घटना पीडित मुलीने तिच्या आईला सांगितली. त्यानंतर मुलीची आई व आजोबा यांनी खुलताबाद पोलिस ठाण्यात जाऊन ही माहिती दिली. दरम्यान, पोलिसांनी बुधवारी रात्रीच सराई येथे जाऊन संशयित आरोपीला ताब्यात घेतले. या प्रकरणी मुलीच्या आईच्या फिर्यादीवरून गुन्हा दाखल करण्यात आला असून सहायक पोलिस निरीक्षक ई. जी. पाटील हे तपास करीत आहेत.
गुन्हा दाखल करण्यास विलंब लावल्याचा आरोप करून फिर्यादीच्या नातेवाईकांनी बुधवारी रात्री पोलिस ठाण्यात गोंधळ घालण्याचा प्रयत्न केला. या प्रकरणी रात्री साडेअकरा वाजता गुन्हा दाखल करून मुलीला वैद्यकीय तपासणीकरिता औरंगाबाद येथील घाटी हस्पिटलमध्ये घेऊन जाताना पोलिस आणि फिर्यादीच्या नातेवाईकांत बाचाबाची झाल्याचे समजते. दरम्यान, पोलिसांनी मारहाण केल्याचा आरोप नातेवाईकांनी केला आहे. फिर्यादी व दोन नातेवाईक वगळता पोलिसांनी जमावाला पोलिस ठाण्याबाहेर काढल्याने तणाव निर्माण झाला होते. कोणालाही मारहाण झाली नसल्याचे पोलिस निरीक्षक हरीष खेडकर यांनी सांगितले.
मोबाइल अॅप डाउनलोड करा आणि राहा अपडेट
