मुंबई-नागपूर या ७१० किलोमीटरच्या समृद्धी महामार्गासाठी जिल्ह्यातील शेतकऱ्यांना भरपाई देण्यासाठी गंगापूर व वैजापूर तालुक्यात जवळपास दर निश्चित झाले आहेत, मात्र गोळाबेरीज केल्यानंतर या दोन तालुक्यांच्या तुलनेत औरंगाबाद तालुक्यातील दरांमध्ये मोठी तफावत असल्यामुळे हे दर घेऊन शेतकऱ्यांपुढे जायचे कसे, असा पेच प्रशासनाला पडला आहे. इतकेच काय औरंगाबाद तालुक्यातील शहराजवळ असलेल्या ११ गावांच्या दर ठरवण्यासाठी प्रशासनाची दमछाक होत आहे.
जिल्ह्यातील औरंगाबाद, वैजापूर आणि गंगापूर तालुक्यांतील ६२ गावांमधील ११२.२१ किलोमीटरवरील जमिनीची मोजणी पूर्ण करण्यात आली असून १६०० हेक्टर जमीन संपादनासाठी सुमारे १३०० कोटी रुपये लागणार आहेत. औरंगाबाद तालुक्यातील ३६पैकी २५ गावांमधील जमिनीचे दर ठरवण्यात आले आहेत, मात्र शहरालगत असलेल्या काही गावांमध्ये जमिनीचे दर हे गगनाला भिडले असून शेतकऱ्यांना जमिनीची भरपाईच पटीत द्यावी लागणार आहे. इतर गावांना देण्यात आलेल्या भरपाईमध्ये आणि शहरालगत जमिनीच्या भरपाईमध्ये मोठी तफावत आहे. शिवाय जमिनीचा प्रकार तसेच शहरालगत असलेल्या जमिनीचे दर हे वेगवेगळे असल्यामुळे प्रशासनाची दमछाक होत आहे. ११ गावांचा दर ठरवण्याबाबत प्रशासनाकडून काथ्याकूट सुरू आहे. दरम्यान समितीने ज्या गावांची दरनिश्चिती केली आहे, ते दरही तूर्त गुलदस्त्यात ठेवले आहेत. औरंगाबाद शहरालगत असलेल्या गावांच्या तुलनेत वैजापूर आणि गंगापूर तालुक्यातील गावांमधील जमिनीचे दर कमी असून गेल्या काही वर्षांमध्ये या तालुक्यांमध्ये खरेदी विक्रीचे व्यवहारही कमी झाले आहेत. शिवाय येथील व्यवहारामध्ये एकसुत्रता आहे. मात्र त्या तुलनेत औरंगाबाद शहरालगत असलेल्या जमिनींचे मोठ्याप्रमाणावर खरेदी विक्रीचे व्यवहार झाले आहेत. दर निश्चिती करताना संबंधित गटामध्ये गेल्या काही वर्षांपूर्वी झालेले खरेदी विक्रीचे व्यवहार तसेच रेडिरेकनर दराची तपासणी करण्यात येत आहे. जिल्ह्यातील तिन्ही तालुक्यातील गावांमधील जमिनींच्या खरेदी विक्री व्यवहाराची गोळाबेरीज केली असता सुमारे ३० टक्के गावांचा दर अत्यंत कमी ठरत आहे.
तलाठ्यांमार्फत संपर्क
जिल्ह्यात शेतकऱ्यांना समृद्धी प्रकल्प समजावून सांगण्यासाठी तसेच मोजणी करून घेण्यासाठी प्रशासनाने तलाठी तसेच नेमलेल्या समन्वयकांचे माध्यम वापरले असून दर निश्चिती झाल्यानंतरही इतर माध्यमातून जमिनीचे दर जाहीर न करता प्रत्यक्ष शेतकऱ्यांना तलाठी व समन्वयकामार्फत सांगण्यात येणार आहेत.
मोबाइल अॅप डाउनलोड करा आणि राहा अपडेट