डिलर्सकडून विक्रीनुसार इंधनाची ऑर्डर; उतरत्या दरांमुळे ग्राहक खुश
Abdul.Wajed
@timesgroup.com
Tweet : @sourabhsMT
औरंगाबाद ः मागील काही दिवसांपासून पेट्रोल-डिझेलचे दर कमी झाल्याने ग्राहकांना याचा थेट फायदा होऊ लागला आहे. दुसरीकडे महागात इंधन खरेदी करून स्वस्त दरात विक्री करावी लागत असल्याने पेट्रोल डिलर्स त्रस्त झाले आहेत. तोटा थांबविण्यासाठी शहरातील पेट्रोल पंपचालकांनी इंधनाची अतिरिक्त आवक थांबविली आहे. दररोज विक्री होणाऱ्या इंधनाचा आढावा घेऊन तेवढेच इंधन कंपनीकडून खरेदी केले जात आहे. त्यामुळे आगामी काळात शहरात पेट्रोलचा कृत्र‌िम तुटवडा होण्याचा धोका आहे.
शहरातील ४१ पेट्रोल पंपावरून औरंगाबादेत दररोज ३ लाख लिटर पेट्रोलची विक्री होत आहे. गेल्या १६ जूनपासून इंधनाचे दर दररोज ठरविले जात आहेत. १६ जूनपासून ते १ जुलैपर्यंत पेट्रोलच्या दर सर्वसाधारणपणे ३ रुपये ६० पैशांनी लिटरमागे कमी झालेले आहेत. तर याच काळात डिझेलचे दर २ रुपये ७१ पैशांनी कमी झाले आहेत.
दररोज दर बदलल्यामुळे व ते कमी होत असल्यामुळे ग्राहक खुश आहेत. तथापि, दररोजच्या दर कमी होण्याने पेट्रोलपंपचालक त्रस्त झाले आहेत. आपला तोटा टाळण्यासाठी त्यांनी पूर्वीप्रमाणे एक-दोन दिवसांचा स्टॉक करून ठेवणे बंद केले आहे. त्याऐवजी दररोज जेवढी विक्री होत आहे तेवढेच इंधन कंपनीकडून मागविले जात आहे. त्यामुळे आगामी काळात शहरात पेट्रोलची कृत्र‌िम टंचाई होण्याची
शक्यता आहे.
मोबाइल अॅप डाउनलोड करा आणि राहा अपडेट
