Tweet : @giridharpMT
औरंगाबाद ः मुलांच्या भविष्यासाठी दिवसभर शेतात काबाडकष्ट करणारे वडील... संसाराचा रथ ओढण्यासाठी वडिलांना हातभार लागावा म्हणून शेतावर काम करणारी आई... दहा बाय दहापेक्षा कमी जागेत असलेले दोन खोल्यांचे घर, अशी बिकट परिस्थिती बदलून कोमल पळसकरला आपल्या घरात सुखाचा, आनंदाचा दरवळ आणायचा आहे. त्यासोबतच समाजसेवाही तिला करायची आहे. म्हणूनच तिने निश्चय केला आहे खूप शिकण्याचा अन् डॉक्टर होण्याचा. त्यासाठी हवे आहेत समाजाचे आशीर्वाद अन् आपल्यासारख्या दानशूर व्यक्तींची साथ.
औरंगाबाद शहरापासून हाकेच्या अंतरावर असलेल्या पळशी गावात अत्यंत बिकट आर्थिक परिस्थितीशी दोन हात करून कोमल भगवान पळसकर या विद्यार्थिनीने दहावीमध्ये ९३.२० टक्के मिळवित घवघवित यश मिळविले आहे. या टक्केवारीवरच हे यश थांबत नाही तर कोमलने पळशीच्या आपल्या धारेश्वर हायस्कूलमध्ये पहिला क्रमांकही पटकावला. सगळ्या गावानं तिच्या या यशासाठी तिची पाठ थोपटली.
शिक्षकांनी, वडीलधाऱ्यांनी दिलेल्या शाबासकीने कोमलला मोठं बळ मिळालं अन् तिने वैद्यकीय शिक्षण घेण्याचा निर्णय घेतला खरा, पण घरची आर्थिक परिस्थिती तिचा अडसर ठरू लागली. वडिलांची अवघी दीड एकर शेती, ती सुद्धा कोरडवाहू. त्यात मराठवाड्यावर पाऊस नेहमीचाच रुसलेला, त्यामुळे वर्षाकाठी शेतातून घरच्यांची पोटं भरावीत एवढंही कसंबस धान्य निघत नाही, तिथे उच्च शिक्षणाचा विचार कुठून करणार? आईच्या शेतावरून काम करण्यानं कितीसा पैसा मिळणार. वडील शेतीतून भाजी-भाकरी मिळवितात, तर आईचा मिठाचा आधार. कोमलचा छोटा भाऊ आठवीत शिकतोय, त्याचाही खर्च आहेच. त्यामुळे दहावीनंतर कोमलला पुढे शिकविण्याची कितीही इच्छा असली तरी मायबापांचे हात थिटे पडतात.
डॉक्टर व्हायचंच, असं तिनं मनाशी पक्क केलं आहे. दिवसभर घरातली कामे, आईला स्वयंपाकात मदत आणि रात्रीचा दिवस करून दहावीमध्ये घवघवीत यश मिळविल्यानंतर परिस्थितीपुढे शरण जायचं नाही, ही तिच्या मनाची जिद्द आहे. त्यामुळेच तिच्या जिद्दीला सलाम तर करायलाच हवा आणि सोबतच तिला वैद्यकीय शिक्षण घेण्यासाठी, डॉक्टर होण्यासाठी समाजातून मदतीचे काही हात पुढे येण्याची नितांत आवश्यकता आहे. तुमच्या मदतीने ती निश्चितच तिचे ध्येय गाठण्यात यशस्वी होईल, यात शंका नाही.
मोबाइल अॅप डाउनलोड करा आणि राहा अपडेट
