पोलिसांच्या रेकॉर्डवरील कुख्यात गुन्हेगार पऱ्या उर्फ प्रवीण साबळे याने गळ्यावर ब्लेड मारून घेत आत्महत्येचा प्रयत्न केला. हा प्रकार शनिवारी सायंकाळी पावणेसात वाजता सिडको पोलिस ठाण्यात घडला. रेकॉर्डवरील तीन गुन्हेगारांची चौकशी सुरू असताना मद्यप्राशन करून आलेल्या प्रवीणने हे कृत्य केले.
सिडको पोलिस ठाण्याचे पथख शनिवारी मिसारवाडीमध्ये गस्त घालत असताना रेकॉर्डवरील गुन्हेगार किशोर कसारे, अमोल घुगे व हर्षद मुळे हे संशयितरित्या फिरताना आढळले. त्यांना चौकशीसाठी सिडको पोलिस ठाण्यात आणले होते. पोलिस ठाण्यातील गुन्हे प्रकटीकरण पथकाच्या खोलीत त्यांची चौकशी सुरू असताना रेकॉर्डवरील कुख्यात गुन्हेगार प्रवीण सोपान साबळे उर्फ पऱ्या (वय ३१, रा. आंबेडकरनगर) हा मद्यधुंद अवस्थेत पोलिस ठाण्यात आला. गुन्हे प्रकटीकरण खोलीच्या बाहेर पऱ्याने हातातील ब्लेडने गळ्यावर वार करून घेतले. या प्रकाराने एकच खळबळ उडाली. पोलिसांनी त्याच्या हातातील ब्लेड हिसकावून घेतली. पऱ्याच्या पाठोपाठ त्याची आई देखील पोलिस ठाण्यात आली होती. त्यांच्यासमोर हा प्रकार घडला. पोलिसांनी त्याला उपचारासाठी तातडीने घाटी हॉस्पिटलमध्ये रवाना केले. या प्रकरणी पोलिस कॉन्स्टेबल राजेंद्र महादू सुरे याच्या तक्रारीवरून पऱ्याविरुद्ध सिडको पोलिस ठाण्यात आत्महत्येचा प्रयत्न केल्याप्रकरणी गुन्हा दाखल करण्यात आला आहे. या प्रकरणी पोलिस जमादार पवार हे तपास करीत आहेत.
यापूर्वी देखील प्रयत्न
प्रवीण साबळे याच्यावर विविध गंभीर स्वरुपाचे गुन्हे सिडको पोलिस ठाण्यात दाखल आहेत. चाकूचा धाक दाखवून नागरिकांना लुबाडण्याचा गुन्ह्याचा जास्त समावेश आहे. यापूर्वी देखील पऱ्याने सिडको पोलिस ठाण्यातच मद्यधुंद अवस्थेत लॉकअपवर डोके फोडून घेत आत्महत्येचा प्रयत्न केला होता. या प्रकरणी देखील त्याच्यावर गुन्हा दाखल आहे.
पोलिसांनी प्रवीण साबळेला ताब्यात घेतले नव्हते. मिसारवाडी येथे ताब्यात घेतलेल्या तीन संशयितांची चौकशी सुरू असताना दारू पिलेल्या अवस्थेत तो स्वतः पोलिस ठाण्यात आला होता. गळ्यावर ब्लेड मारल्यानंतर त्याला तातडीने हॉस्पिटलला रवाना करण्यात आले.
कैलास प्रजापती, पोलिस निरीक्षक, सिडको पोलिस ठाणे
मोबाइल अॅप डाउनलोड करा आणि राहा अपडेट
