एसटी महामंडळाच्या कर्मचाऱ्यांना वेतनश्रेणीसह सातवा वेतन आयोग लागू करावा, सातवा वेतन आयोग लागू करेपर्यंत २५ टक्के अंतरिम वेतनवाढ द्यावी, एक वर्षांपासून प्रलंबित महगाई भत्ता द्यावा, या मागण्यांसाठी एसटी कामगारांतर्फे २० जुलै रोजी राज्यभर निदर्शने करण्यात येणार आहेत, अशी माहिती संघटनेचे सरचिटणीस हनुमंत ताटे यांनी दिली.
संघटनेच्या प्रदेश मेळाव्यानिमित्त रविवारी शहरात आले असता त्यांनी कामगार भवन येथे पत्रकारांशी संवाद साधला. ‘राज्यातील सर्व एसटी कामगारांनी मतदान करून सातवा वेतन आयोग लागू करा, अशी भूमिका स्पष्ट केली आहे. त्यामुळे आयोग लागू झाला नाही, तर संपाशिवाय पर्याय राहणार नाही. सध्याचे प्रशासन कामगारांविरोधात परिपत्रके काढत आहे. एसटी चालक व वाहकांच्या टायमिंगबद्दल संघटनेशी चर्चा न करता पत्रक काढले आहे. कामगारांवर अतिरिक्त कामाचा बोझा टाकण्यात येत आहे,’ असे त्यांनी सांगितले.
एसटी कामगारांना जुलै २०१६ महिन्यात महागाई भत्ता दिला होता, त्यानंतर हा भत्ता दिलेला नाही, याकडे त्यांनी लक्ष वेधले. परिपत्रकांचा भंग करून आकसापोटी घेतलेले निर्णय रद्द करावेत, नवीन बस बांधणीसाठी चेसीसचा पुरवठा करून भाड्याने बस घेण्याचा निर्णय रद्द करावा आदी मागण्यांसाठी राज्यभर आंदोलन करण्यात येणार असल्याचे ताठे यांनी सांगितले.
ना कापड ना ड्रेस
ड्रेस बदलण्यासाठी नवीन समिती स्थापन करून डिझाईनरमार्फत नवीन ड्रेस दाखवण्यात आला. पण, त्याबद्दल प्रशासनाने निर्णय घेतलेला नाही. हा घोळ दोन ते तीन वर्षांपासून सुरू आहे. कर्मचाऱ्यांच्या अंगावरील ड्रेस फाटण्याची वेळ आली असतानाही कापड मिळत नसल्याचा आरोप एसटी कामगार संघटनेचे सरचिटणीस हनुमंत ताटे यांनी केला.
मोबाइल अॅप डाउनलोड करा आणि राहा अपडेट