अत्यंत प्रतिकूल परिस्थितीशी दोन हात करून दहावीच्या परीक्षेत नेत्रदीपक यश मिळविलेल्या विद्यार्थ्यांना पुढील शैक्षणिक वाटचालीसाठी आर्थिक मदतीची गरज आहे. बिकट आर्थिक परिस्थितीमुळे कोणत्याही साधन-सुविधांशिवाय त्यांनी हे यश संपादन केले आहे. करिअर घडविण्यासाठी त्यांना आता मदत हवी आहे. या विद्यार्थ्यांच्या मदतीसाठी ‘मटा हेल्पलाइन’ सुरू असून, समाजातील दानशूरांना आवाहन करण्यात आले आहे.
दहावीच्या परीक्षेत कठोर परिश्रम करून यशस्वी होणाऱ्या विद्यार्थ्यांसमोर पुढील शिक्षणासाठी असंख्य प्रश्न असतात. अशा विद्यार्थ्यांना ‘मटा हेल्पलाइन’च्या माध्यमातून आर्थिक मदत करण्यात येते. वाचकांच्या भक्कम पाठबळावर हा उपक्रम सुरू आहे. दानशूरांनी विद्यार्थ्यांना मदत करावी.
महापालिकेच्या शाळेत शिकणाऱ्या शुभम दांडगेने दहावीच्या परीक्षेत ९०.४० टक्के गुण मिळविले आहेत. लहानशा खोलीत दांडगे कुटुंबाचा संसार तेथे अभ्यासासाठी पुरेशी जागा नाही. खासगी शिकवणी लावणेही त्याला शक्य नव्हते. अशावेळी शाळेतील शिक्षकांनी घेतलेल्या एक्स्ट्रा क्लासचा त्याला फायदा झाला. शुभमला मेडिकलला प्रवेश घ्यायचा आहे. त्यानंतर त्याला केंद्रीय लोकसेवा आयोगाचे आव्हान पार करायचे आहे. स्वप्न पूर्ण करण्यासाठी त्याच्यासमोर आर्थिक संकटाचे आव्हान आहे.
कोमल पळसकरचे वडील शेतीत राबतात. शेतीतून कुटुंबाला पुरेल एवढेही धान्य निघत नाही. कोमलने दहावीत ९३.२ टक्के गुण मिळविले. कोमलला वैद्यकीय शिक्षण घेण्यासाठी, डॉक्टर होण्यासाठी समाजातून मदतीचे काही हात पुढे येण्याची आवश्यकता आहे.
घरची परिस्थिती बेताची आणि टेन्शनमुळे ऐन परीक्षेच्या काळात आलेले आजारपण यांवर मता करीत ऋतुजा जाधवने दहावीत ९२.२ टक्के गुण मिळविले. तिचे वडील कापड दुकानात कामाला आहेत. तिला डॉक्टर व्हायचे आहे. त्यासाठी तिच्यासमोर आर्थिक परिस्थितीचे आव्हान आहे. ते पार करण्यासाठी समाजातून मदत मिळणे गरजेचे आहे.
वडील कारागीर, आई आजारी, घरची परिस्थिती बिकट. अशा कठीण परिस्थितीवर मात करीत सूरज सवणेने कठोर परिश्रम केले आणि दहावीच्या परीक्षेत ९०.२ टक्के गुण मिळविले. आईचे आजारपण डोळ्यासमोर असलेल्या सूरजला डॉक्टर व्हायचे आहे. हे स्वप्न पूर्ण करण्यासाठी समाजातून त्याला मदतीचा हात हवा आहे.
कोरडवाहू जमिनीवर संसाराचा डोलारा असलेल्या कुटुंबातील रोहिणी जाधवने दहावीच्या परीक्षेत ९३.२ टक्के गुण मिळविले. पावसाने पाठ फिरविली तर संपूर्ण वर्षभर आर्थिक संकटाला तोंड द्यावे लागते. अशा स्थितीत रोहिणीला वडिलांनी शिक्षणासाठी औरंगाबादेत ठेवले. तिला आर्किटेक्ट व्हायचे आहे. तिच्या स्वप्नांच्या पूर्णतेसाठी समाजातून मदतीची अपेक्षा आहे.
चेक स्वीकारण्याचा पत्ता
महाराष्ट्र टाइम्स साई स्क्वेअर, दुसरा मजला, उस्मानपुरा सर्कल, रेल्वे स्टेशन रोड, औरंगाबाद
विशेष सूचना : चेक विद्यार्थ्यांच्या नावे 'म.टा.' कार्यालयातच द्यावेत. चेक जमा करण्यासाठी ‘मटा’ने अन्य कोणाचीही नेमणूक केलेली नाही.
मोबाइल अॅप डाउनलोड करा आणि राहा अपडेट
