प्रदर्शनापूर्वीच ट्रेलरला मिळाले हजारो लाइक्स
म. टा. प्रतिनिधी, औरंगाबाद
शहरातील तरुणाई सोशल मीडियाच्या सहाय्याने आजकाल सकारात्मक प्रयोग करू लागली आहे. यु ट्युबसाठी तरुणांनी एक लघुपट बनवला असून तो १५ ऑगस्टला प्रदर्शित होत आहे. त्याच्या ट्रेलरला प्रदर्शित २ हजार व्ह्यूज मिळाले आहेत. तर हजारावर लाइक्सही मिळाले आहेत.
सफाई कामगारांना कचरेवाले म्हणू नका, आदराने त्यांना दादा, काका, मामा असे संबोधा, आपण जर ठरवले तर बदल सहज घडू शकतो, असा साधा सरळ संदेश या लघुपटातून दिला जाणार आहे. हा लघुपट यु ट्युबवर १५ ऑगस्टच्या मुहूर्तावर रिलीज होईल. भारत स्वच्छता अभियानावर आधारित ‘इज इट पॉसिबल???’ लघुपटाची शहरातील तरुणांनी निर्मिती केली आहे. लघुपटाची कथा विशाल ढेंबरे आणि सुरेश बोरूळकर यांनी लिहिली आहे. कॅमरामन म्हणून अमोल गायकवाड यांनी जबाबदारी सांभाळली असून हा लघुपट अर्जुन पवार यांच्या पवार स्टुडिओत बनवण्यात आला आहे. या लघुपटात आकाश गुरूभय्ये, अरमारन शहा, हुशारसिंग चव्हाण, किरण नाईक, शॅरोन रॉड्रिग्ज, जेनिफर रॉड्रिग्ज, आकाश बैनाडे, कपिल शिंदे, आदित्य घुसळे, आकाश ढेंबरे, प्रथमेश सोनवणे, राहुल बोरले, सौरभ नाईक, अमित सोनवणे, महेश पांचाळ यांची भूमिका आहे. दिग्दर्शन गौरव कुलकर्णी याचे आहे. या लघुपटाची निर्मितीची जबाबदारी अब्दुल फारूख शहा यांनी घेतली आहे. या लघुपटासाठी औरंगाबाद महापालिकेनेही विशेष सहकार्य केले आहे.
शहरवासियांना स्वच्छतेचे महत्त्व आम्ही या लघुपटातून पटवून दिले आहे. याच लघुपटाचा ट्रेलर आम्ही नुकताच यु ट्युबवर टाकला असून त्याला २ हजार व्ह्युज मिळाले आहे. यावरून त्याची लोकप्रियता लक्षात येईल.
- गौरव कुलकर्णी, दिग्दर्शक
मोबाइल अॅप डाउनलोड करा आणि राहा अपडेट