एक प्रेमी जोडपे शहरात फिरताना भावाच्या नजरेस पडले. त्याच्या तळपायाची आग मस्तकात पोचली व त्याने भरचौकात तरुणाला झोडपून काढण्यास सुरुवात केली. सिल्लेखाना चौकातील हा प्रकार पाहण्यासाठी शेकडो जण जमले होते. पण, सिटी चौक ठाण्यातील दोन कर्मचाऱ्यांनी हस्तक्षेप करून
दोघांना प्रियकराची सुटका केली. त्यांना क्रांती चौक पोलिस ठाण्यात नेऊन समुपदेशन करण्यात आले.
सिल्लेखाना चौकातून बुधवारी सायंकाळी एक तरूण व तरुणी पायी बोलत जात होते. ही तरुणी गावाकडून शहरात बहिणीकडे शिक्षणासाठी आली आहे, तर तरूण तिला भेटण्यासाठी आला होता. त्यांना तरुणीच्या भावाने पाहिले. त्याने या तरुणाला सिल्लेखाना चौकातच बदडण्यास सुरुवात केली. एक तरुणी व दोन तरूण एकमेकांशी भांडत असल्याचे पाहून तेथे काही क्षणात शेकडो लोक जमले. पण, भांडण सोडवण्यासाठी कोणीच जात नव्हते. गर्दी जमल्याने सिटी चौक पोलिस ठाण्याचे कर्मचारी संजय नंद व संदीप तायडे हे तेथे गेले, त्यांनी भांडण सोडवून माहिती घेतली असता हा वेगळाच प्रकार असल्याचे लक्षात आले. त्यांनी तिघांना क्रांती चौक पोलिस ठाण्यात आणले. या ठिकाणी सहायक पोलिस निरीक्षक नरेंद्र पाडळकर यांनी तिघांची वेगवेगळी चौकशी केली. त्यानंतर जोडप्याचे समुपदेशन व तरुणीच्या भावाला समजावण्यात आले. तरुणीने भावाची माफी मागितली. पुन्हा एकमेकांना भेटणार नाही अशी कबुली दिल्यानंतर तिघांना घरी पाठवण्यात आले.
पोलिस असल्याची जाणीव
सिटी चौक पोलिस ठाण्यात कार्यरत कॉन्सटेबल संजय नंद व संदीप तायडे हे कार्यालयीन रबरी स्टँप तयार करण्यासाठी सिल्लेखाना चौकात आले होते. पण, हाणामारी व गर्दी पाहून धाव घेतली. त्यांच्या पोलिस ठाण्याची हद्द नसतानाही दोघांनी जमावाला पांगवले. सुरक्षिततेच्या दृष्टीने तिघांना क्रांती चौक पोलिस ठाण्यात आणून कर्तव्य बजावले. हद्दीच्या वादातून नेहमी टाळाटाळ करणाऱ्या पोलिसांनी नंद व तायडे यांच्या कामगिरीतून धडा घेण्याची गरज आहे.
तरुणी, तिचा भाऊ व तरुणाची चौकशी, समुपदेशन करण्यात आले. मुलीला चुकीची जाणीव झाल्याने तिने भावाची माफी मागितली. त्यांची एकमेकाविरुद्ध तक्रार नसल्याने त्यांना समजावून घरी पाठवण्यात आले.
नरेंद्र पाडळकर, सहायक पोलिस निरीक्षक
मोबाइल अॅप डाउनलोड करा आणि राहा अपडेट