म. टा. प्रतिनिधी, खुलताबाद
शासनाने मुदतवाढ देऊनही खुलताबादेत कोणतीच बँक पीकविमा स्वीकारत नसल्याने संतप्त शेतकऱ्यांनी तहसील कार्यालयासमोर गुरुवारी निदर्शने केली. महा ई सेवा केंद्रातही तांत्रिक कारणामुळे पीकविमा भरला जात नसल्याने शेतकऱ्यांच फरफट होत आहे. शेतकऱ्यांची अचानक आंदोलन केल्याने तहसील कार्यालयात खळबळ उडली.
तालुक्यात यंदा मोठ्या प्रमाणावर शेतकरी पीकविमा भरण्यासाठी बँकेसमोर गर्दी करत आहेत. मात्र बँकेच्या मनमानी कारभारामुळे शेतकरी पीकविमा भरण्यापासून वंचित राहत आहेत. शेकऱ्यांनी गुरुवारी सकाळपासून बँकेत गर्दी केली. परंतु, बँक कर्जाचे थकबाकीदार असलेल्या शेतकऱ्यांचा पीकविमा भरून घेत नसल्याने ते आक्रमक झाले व थेट तहसील कार्यालय गाठून गाठले. त्यांनी मुख्य दरवाजासमोर ‘बँकेने पीकविमा स्वीकारलाच पाहिजे,’ अशा घोषणा दिल्या. यावेळी तहसीलदार डॉ. अरूण जऱ्हाड यांनी निवेदन स्वीकारले. शिवसेना तालुकाप्रमुख राजू वरकड, भाऊसाहेब जाधव, सांडू जाधव, बंडू जाधव, केशव लहोळकर, दत्ता मालोदे, साईनाथ मातकर, मनोज मालोदे, अरूण गोल्हार, रंगनाथ मालोदे, पंडित मोरे, उत्तम चव्हाण, किसन जाधव, सुभाष जाधव, संजय काळे, महादू मालोदे, नवनाथ गोरे, रोहिदास वाकळे, भाऊसाहेब वाघचौरे, सखाहरी जाधव, रामचंद्र जाधव, साहेबराव जाधव आदींसह मोठ्या संख्येने शेतकरी हजर होते.
मुदतवाढ फक्त बिगर कर्जदार शेतकऱ्यांना
वैजापूरः पीकविमा भरण्यासाठी शासनाने मुदतवाढ दिली असून तो ऑनलाइन भरायचा आहे. शेतकऱ्यांनी जनसुविधा केंद्र किंवा सेतू सुविधा केंद्रातून विमा भरावा, असे आवाहन उपविभागीय कृषी अधिकारी उदय देवळाणकर यांनी केले आहे. ही मुदतवाढ केवळ बिगर कर्जदार शेतकऱ्यांसाठी असून प्रस्तावास ३१ जुलै किंवा त्यापूर्वीचे पीक पेरा प्रमाणपत्र जोडणे आवश्यक असल्याचे मंडळ कृषी अधिकारी सी. एम. जवणे यांनी सांगितले. दरम्यान, बँकेकडून मिळालेल्या माहितीनुसार, ३१ जुलैपर्यंत तालुक्यातील १५ हजार १४८ शेतकऱ्यांनी एक कोटी सहा लाख ९ हजार ९०७ रुपयांचा पीकविमा भरला आहे. वाढीव मुदतीत पीक विमा भरण्यास शेतकरी उत्सुक असून ते जनसुविधा व सेतू सुविधा केंद्रावर गर्दी करत आहेत. तालुक्यातील लोणी खुर्द येथील जनसुविधा केंद्रावर बुधवारी ९३ शेतकऱ्यांनी ऑनलाइन विमा भरला.
जिल्हा बँकेला फुलंब्रीत टाळे
फुलंब्रीः येथील जिल्हा मध्यवर्ती सहकारी बँकेने पीकविमा घेण्यास नकार दिल्याने गुरुवारी काँग्रेसतर्फे बँकेला टाळे ठोकण्यात आले. तालुक्यातील शेतकरी पीकविमा भरण्यास तयार असताना बँकानी नकार दिल्याने शेतकरी हवालदिल झाले आहेत.
शेतकरी हवालदिल झाल्याने शुक्रवारी तहसील कार्यालयाला कुलूप लावण्यात येणार आहे, असा इशारा देणारे पत्र काँग्रेसने पोलिस ठाण्याला दिले आहे. तालुक्यात खरिपाच्या शंभर टक्के पेरण्या झाल्या असून पावसाने डोळे वटारल्याने शेतकरी अडचणीत आहेत. त्यातच पीकविमा भरण्यासाठी बँकांनी दारे बंद केली आहेत. काँग्रेसतर्फे गुरुवारी पीरबावडा येथे पीकविमा भरण्यासाठी सहायता केंद्र सुरू करण्यात आले. जिल्हा मध्यवर्ती बँक पीकविमा स्वीकारत नसल्याने बँकेला टाळे लावून ऑनलाइन प्रक्रियेत अडथळे असतील, तर ऑफलाइन अर्ज घ्यावेत, अशी मागणी तहसीलदारांना दिलेल्या निवेदनात केली आहे. निवेदनावर काँग्रेस तालुकाध्यक्ष सुदाम मते, बाजार समिती सभापती संदीप बोरसे, जिल्हा परिषद सदस्य किशोर बलांडे, माजी उपसभापती अजगर पटेल, रंगनाथ शिरसाठ, जनार्धन तुपे, अंबादास गायके, रामेश्वर गाडेकर, बाबुराव डकले, नदीम मुलतानी, शिवाजी खरात यांच्या सह्या आहेत.
सोयगावात शेतकऱ्यांचे उपोषण
औरंगाबादः सोयगाव येथील बँक ऑफ महाराष्ट्र, जिल्हा मध्यवर्ती सहकारी बँकेच्या शाखेत पीकविमा भरण्यासाठी टाळाटाळ होत असल्याने शेतकऱ्यांनी सोयगाव तहसील कार्यलायसमोर उपोषण सुरू केले होते. तहसील प्रशासनातर्फे अव्वल कारकून बी. एन. समिंद्रे यांनी उपोषणार्थी शेतकऱ्यांची भेट घेऊन उपोषण सोडवले. तालुक्यातील शेतकरी दोन्ही बँकांच्या शाखेत विमा भरण्यासाठी खेट्या घालत आहेत. पम व्यवस्थापक त्यांना दाद देत नव्हते. बँकांतून ऑनलाइन अर्ज भरण्यात चुकारपणा करण्यात येत आहे, असा आरोप शेतकऱ्यांनी केला. विकास काळे, विठ्ठल आगे, धनंजय चौधरी, रामदास पवार, साईंदास राठोड, देवीदास पवार, सांडू मंडवे, रानिदा चव्हाण, कडुबा गाडेकर, सुभाष पवार, गीताबाई राठोड आदी शेतकऱ्यांनी उपोषण केले.
मोबाइल अॅप डाउनलोड करा आणि राहा अपडेट
म. टा. प्रतिनिधी, लातूर
म. टा. प्रतिनिधी उस्मानाबाद
