म. टा. प्रतिनिधी, औरंगाबाद
चीनमधील पाणी व्यवस्थापनासारखा प्रकल्प औरंगाबादमध्ये राबवण्याची तयारी चीनच्या शिष्टमंडळाने शुक्रवारी (४ ऑगस्ट) दाखवली. पाणी व्यवस्थापनासाठी राबवण्यात येणाऱ्या विविध प्रकल्पांचे सादरीकरणही त्यांनी केले.
चीनमधील चार सदस्यांचे शिष्टमंडळ शुक्रवारी महापालिकेत आले होते. शिष्टमंडळात ओरिसी डिपार्टमेंटचे संचालक ली सियुआन, बास्को कंपनीचे भारतातील प्रतिनिधी अभिजित चौधरी, केमिकल विभागाचे व्यवस्थापक हुआंग बिंगुई, व्यवसाय व्यवस्थापक लिऊ क्रियाहोन्ग यांचा समावेश होता.
शिष्टमंडळातील सदस्यांनी सकाळी महापालिकेचे आयुक्त डी. एम. मुगळीकर यांची भेट घेतली. चीनमध्ये पाणी व्यवस्थापनासाठी कार्यरत असलेल्या प्रकल्पांची माहिती या सदस्यांनी मुगळीकर यांना दिली. प्रकल्पांच्या कामकाजाचे सादरीकरण देखील त्यांनी केले. तशाच प्रकारचे प्रकल्प समन्वयाने औरंगाबादमध्ये देखील राबवता येतील, असे त्यांनी आयुक्तांना सांगितले.
महापालिका प्रशासनाने या संबंधीच्या करारासाठी पुढाकार घ्यावा असे आवाहन त्यांनी केले. शिष्टमंडळातील सदस्यांनी दिल्लीगेट परिसरातील डॉ. सलीम अली सरोवराची पाहणी केली. पर्यटकांना आकर्षित करणारे काही प्रकल्प या ठिकाणी राबवता येतील, असे मत यावेळी व्यक्त करण्यात आले. नारेगाव येथील कचरा डेपोला देखील या सदस्यांनी भेट दिली.
‘ते’ कार्यकर्ते ताटकळले
शिष्टमंडळआतील सदस्य आयुक्तांशी चर्चा करीत होते तेव्हा आयुक्तांच्या दालनाच्या बाहेर संविधान बचाव युवा परिषदेचे कार्यकर्ते जमा झाले होते. त्यांना आयुक्तांनी भेटण्याची वेळ दिली होती, पण चीनचे शिष्टमंडळ आल्यामुळे युवा परिषदेच्या कार्यकर्त्यांना दोन तास ताटकळत बसावे लागले. त्यामुळे त्यांनी दालनाच्या बाहेर ठिय्या दिला व घोषणाबाजी सुरू केली. आयुक्तांशी चर्चा करून शिष्टमंडळातील सदस्य बाहेर पडले तेव्हा त्यांना ठिय्या आंदोलनातून वाट काढत पुढे जावे लागले.
मोबाइल अॅप डाउनलोड करा आणि राहा अपडेट
