म. टा. प्रतिनिधी, औरंगाबाद
कार्पोरेट वर्ल्डमधील विविध कंपन्यांचा ‘डीएनए’ वेगवेगळा असतो. तेथील कामाचे स्वरूप, त्याचे स्वप्न, आराखडा, तेथील वातावरण हे वेगवेगळे असते. याचा आनंद कसा घ्यायचा आणि आपलेच काम आपण कसे चोख बजावायचे, हे शिकता आले की कार्पोरेट क्षेत्रात टिकता येते, असे प्रतिपादन रिलायन्स इंडस्ट्रीज लिमिटेडचे मनुष्यबळ विकास विभागाचे उपाध्यक्ष सुभाष जैन यांनी केले.
सीए इन्स्टिट्यूटच्या विकासा या विद्यार्थ्यांच्या विंगतर्फे आयोजित व्याख्यानात रविवारी जैन यांना ‘कार्पोरेट क्षेत्रातील करिअर’ या विषयावर मार्गदर्शन करण्यासाठी आमंत्रित करण्यात आले होते. यावेळी बोलताना त्यांनी हे प्रतिपादन केले. यावेळी व्यासपीठावर सीए विद्यार्थी संघटनेचे चेअरमन रोहन आचलिया, ऐश्वर्या ब्रह्मेचा, रोहन खंडेलवाल यांची उपस्थिती होती.
जैन म्हणाले, ‘कॉलेजमधील जीवन हे वेगळे असते, कार्पोरेट मध्ये आल्यावर त्यातील काम हळुहळु कळते. इंजिनीअर, एचआर, सीए, अकाउंटंट कोणत्याही क्षेत्राचा उमेदवार असो त्याला मॅनेजमेंट ट्रेनिंग करावेच लागते. या ट्रेनिंगमध्ये खूप काही शिकायला मिळते. आम्ही कॅम्पस इंटरव्ह्यूमधून माणसे निवडत असतो. रिलायन्स कंपनीत सुमारे ९०० ते १००० विद्यार्थी वेगवेगळ्या कॉलेजमधून निवडले जातात. यात जीवघेणी स्पर्धा असते. करिअर घडणे हे फार साधे सरळ नाहीच. त्यासाठी मेहनत, श्रम, सचोटी आणि कामातील सातत्य ठेवावेच लागते. संस्था काय करते हे फार महत्त्वाचे नसते, आपण संस्थेसाठी काम करत असताना त्याचेच मूल्यमापन केले जाते. कामावरील श्रद्धा आणि सातत्य हीच काम करत असलेल्यांसाठी महत्त्वाचे असते. तीच कंपनीची अॅसेट म्हणून संबोधली जाते. आज मनुष्यबळ विकास होताना प्राइड मॅनेजमेंट ट्रेनिंग महत्त्वाचे मानले जात आहे. संस्थेला आजकाल रिजल्ट हवा असतो, तो रिझल्ट आला नाही, तर कार्पोरेट क्षेत्रात बाहेरचा दरवाजा दाखवला जातो. संस्था तुम्हाला बोलावत नाही, संस्थेला तुम्ही निवडले असते. तेव्हा संस्थेला रिझल्ट द्यावाचा लागतो.’
कार्पोरेट क्षेत्रातील ताण-तणाव, कामाचे स्वरूप हे तुमच्या वर्तवणुकीवर अवलंबून असल्याचेही जैन यांनी सांगितले. यानंतर जैन यांनी कार्पोरेट क्षेत्रातील वागणूक, सकारात्मकता, नकारात्मता, रिझल्ट ओरिएंटेड वर्ल्ड यावषियी माहिती दिली. कार्पोरेट वर्ल्डमध्ये या अनुभव घ्या, आनंदाने जगा हा सल्ला त्यांनी दिला. सुरुवातीला आचलिया यांनी जैन यांचे स्वागत केले. ऐश्वर्या ब्रह्मेचा यांनी परिचय करून दिला. रोहन खंडेलवाल यांनी सूत्रसंचालन केले.
जैन यांनी दिलेल्या टिप्स
- कॉलेजचे शिक्षण आणि कार्पोरेटमधील नोकरी नंतरचे शिक्षण वेगळेच
- कामावर लक्ष देत आपले काम करत राहा
- कॉर्पोरेटमध्ये काम करताना आनंद घ्या
- काम, काळ, वेळ, यांचा योग्य मेळ महत्वाचा
- कोणतीही मोठी कंपनी वाईट किंवा चांगली नाही, त्याचे स्वरूप ओळखता आले पाहिजे
- कार्पोरेट क्षेत्रात तुम्ही तुमचे शिक्षक निवडा, त्यांचे मार्गदर्शन फलदायी ठरते
- डेडलाइन्स पाळणे, गॉसिपिंग टाळणे, फक्त प्रोजेक्टवर लक्ष्य ठेवणे आदींवर लक्ष केंद्रित करा
- कार्पोरेट कल्चर सांभाळून कसे राहता येईल हे शिका
मोबाइल अॅप डाउनलोड करा आणि राहा अपडेट
म. टा. प्रतिनिधी, औरंगाबाद
निसर्ग पर्यटनासाठी गौताळ्यात गर्दी
‘शिवसेना, जरा इकडे पण लक्ष द्या’
