​ उद्योजक दाम्पत्याला कारावासाची शिक्षा

August 12, 2017, 3:18 pm

≫ Next: ​ धनादेश अनादरप्रकरणी व्यावसायिकास सक्तमजुरी

≪ Previous: ​ झेडपी सिंचनमध्ये चौकशी

$

0

0

म. टा. प्रतिनिधी, औरंगाबाद
धनादेश न वटल्याबद्दल दोषी ठरवून न्यायालयाने उद्योजक दाम्पत्य प्रभावतीबाई आणि पांडुरंग अव्हाड यांना प्रत्येकी सहा महिने साध्या कारावासाची शिक्षा आणि प्रत्येकी दोन लाख रुपये दंड अशी शिक्षा प्रथमवर्ग न्यायदंडाधिकारी रितेश आर. मावतवाल यांनी ठोठावली आहे.

संजय पाडळकर यांनी उद्योजक असलेल्या अव्हाड दाम्पत्याला आपला शेंद्र्यातील प्लॉट दरमहा २० हजार रुपये भाडेतत्त्वावर दिला होता. वीज आणि पाण्याचे बिल आव्हाड यांनीच भरायचे, असे त्यांच्यात ठरले होते. त्यापोटी आव्हाड यांनी एक लाख रुपये सुरक्षा अनामत म्हणून पाडळकर यांच्याकडे दिली होती. कालांतराने आव्हाड दाम्पत्य हा प्लॉट सोडून अन्यत्र निघून गेले. त्यांचे भाड्याचे व इतर खर्चाचे मिळून ३,२०,९३० रुपये झाले होते. त्यापैकी एक लाख रुपये सुरक्षा अनामत वळवून घेता दोन लाख २० हजार ९३० रुपये बाकी होते. यातील ९३० रुपये नगद देण्यात आले व एक २० हजारांचा आणि दुसरा दोन लाखांचा असे दोन धनादेश आव्हाड दाम्पत्याने पाडळकर यांना दिले. मात्र, खात्यात पुरेशी रक्कम नसल्याच्या कारणावरून धनादेश न वाटल्याने होऊन परत आला.

पाडळकर यांनी या प्रकरणी आव्हाड दाम्पत्याला चेक बाऊन्सिंगची नोटीस दिली. त्याचे उत्तर न मिळाल्याने पाडळकर यांनी खटला दाखल केला. यात आव्हाड दाम्पत्याने असा बचाव घेतला की, त्यांनी जो आपसात करार केलेला आहे, त्यावरील आव्हाड यांची सही सिद्ध झालेली नाही. त्यांनी पाडळकर यांना पैसा न पैसा दिलेला आहे, पण त्यांनी सुरक्षा अनामत म्हणून दिलेल्या धनादेशाचा वापर केलेला आहे. हा दिलेल्या धनादेशाचा गैरवापर आहे.

उलट तपासणीत कबुली
आव्हाड यांनी आपल्या जबाबात आणि उलट तपासणीत ते देणे असल्याच्या मुद्द्यासह सर्व गोष्टी कबूल केलेल्या आहेत व धनादेश अनादरित झाल्याच्या सर्व गोष्टी पाडळकर यांच्या वतीने सिद्ध केलेल्या आहेत. आरोपी मात्र आपला बचाव सिद्ध करू शकलेले नाहीत. उभय युक्तीवादानंतर न्यायालयाने शिक्षा ठोठावली.

मोबाइल अॅप डाउनलोड करा आणि राहा अपडेट

---

​ धनादेश अनादरप्रकरणी व्यावसायिकास सक्तमजुरी

August 12, 2017, 3:19 pm

≫ Next: ​ गोदावरी खोरे जल आराखड्यावर मतभेद

≪ Previous: ​ उद्योजक दाम्पत्याला कारावासाची शिक्षा

$

0

0

म. टा. प्रतिनिधी, औरंगाबाद
धनादेश अनादरप्रकरणी शहरातील व्यावसायिकाला तीन महिने सक्तमजुरी व चार लाख रुपये दंडाची शिक्षा प्रथम वर्ग न्यायदंडाधिकारी एस. एस. जांभळे यांनी ठोठावली.

या प्रकरणी चाणक्य नागरी सहकारी पतसंस्थेच्या वतीने फिर्याद देण्यात आली होती. फिर्यादीनुसार, व्यावसायिक व आरोपी संतोष सुधाकर देव (रा. अजबनगर, औरंगाबाद) याने चाणक्य नागरी सहकारी पतसंस्थेकडून कर्ज घेतले होते व हप्ते थकल्यामुळे आरोपीने पतसंस्थेला ८ ऑक्टोबर २०१२ रोजी आयडीआय बँकेचा दोन लाख रुपयांचा धनादेश दिला होता. मात्र खात्यात रक्कम नसल्याने धनादेश वटला नाही. त्यानंतर पतसंस्थेने ९ नोव्हेंबर २०१२ रोजी आरोपीला १५ दिवसांत रक्कम भरण्याची नोटीस बजावली. त्यानंतरही आरोपीने रक्कम न भरल्याने पतसंस्थेने ‘द निगोशिएबल इन्स्ट्रुमेन्ट अॅक्ट’च्या कलम १३८ अन्वये तक्रार दाखल केली होती. खटल्यावेळी, कोर्टाने आरोपीला दोषी ठरवले आणि दोन्ही बाजुंच्या युक्तिवादानंतर व साक्ष-पुराव्यांवरुन कोर्टाने आरोपीला तीन महिने सक्तमजुरी व चार लाख रुपये दंड व दंड न भरल्यास १५ दिवसांच्या साध्या कारावासाची शिक्षा ठोठावली. तसेच दंडाच्या रकमेपैकी ३ लाख ७५ हजार रुपये पतसंस्थेला नुकसान भरपाईपोटी, तर कोर्टात खटला चालवण्यासासाठी पतसंस्थेला दहा हजार रुपये देण्याचेही आदेश कोर्टाने दिले. त्याचवेळी दहा हजारांची रक्कम न दिल्यास आरोपीला १० दिवस साध्या कारावासाची शिक्षा ठोठावली.

मोबाइल अॅप डाउनलोड करा आणि राहा अपडेट

​ गोदावरी खोरे जल आराखड्यावर मतभेद

August 12, 2017, 3:21 pm

≫ Next: ​ हज यात्रेसाठी २५ हजार कोटी द्या

≪ Previous: ​ धनादेश अनादरप्रकरणी व्यावसायिकास सक्तमजुरी

$

0

0

म. टा. प्रतिनिधी, औरंगाबाद
‘गोदावरी खोरे जल आराखडा आणि मराठवाडा’ या विषयावर प्रा. प्रदीप पुरंदरे यांचे स्वामी रामानंद तीर्थ मराठवाडा संशोधन संस्थेत शनिवारी व्याख्यान झाले. मात्र, ‍व्याख्यानापूर्वी जल आराखडा मराठवाड्याचे वाळवंट करणारा असल्याचा आरोप करीत रिपाइं (डेमोक्रॅटिक) पक्षाच्या कार्यकर्त्यांनी घोषणाबाजी केली. तर आराखड्यातील विसंगती दाखवत ज्येष्ठ जल अभ्यासकांनी प्रश्न उपस्थित केले. त्यामुळे गोदावरी जल आराखडा वादग्रस्त ठरण्याची शक्यता आहे.

स्वामी रामानंद तीर्थ मराठवाडा इन्स्टिट्यूट ऑफ सोशिया - इकॉनॉमिक रिसर्च अँड नॅशनल इंटीग्रेशन यांच्या वतीने ‘गोदावरी खोरे जल आराखडा आणि मराठवाडा’ या विषयावर प्रा. प्रदीप पुरंदरे यांचे एसआरटी सभागृहात दुपारी व्याख्यान झाले. यावेळी मंचावर कृषीतज्ज्ञ डॉ. एस. बी. वऱ्हाडे व डॉ. शरद अदवंत उपस्थित होते. आराखडा निर्मिती आणि सद्यस्थितीवर प्रा. पुरंदरे यांनी पॉवर पॉईंट प्रेझेंटेशन केले. ‘गोदावरी खोरे जल आराखडा निर्मितीसाठी २०१२पासून लेखन केले. राज्य सरकार दखल घेत नसल्यामुळे २०१४ मध्ये हायकोर्टात याचिका दाखल केली. या लढ्यानंतर आराखडा निर्मिती झाली. पहिल्या टप्प्यात सरकारने गोदावरी खोरे निर्मितीचा निर्णय घेतला. यानंतर तापी, कृष्णा, नर्मदा आणि पश्चिमी वाहिनी नद्या या आराखड्यांची निर्मिती होईल. भूसंपादन, पुनर्वसन, दुष्काळ निर्मूलन, आपत्ती व्यवस्थापन अशा अनेक बाबींचा आराखड्याशी संबंध आहे, पण आराखडा निर्मितीत अनेक मर्यादा जाणवल्या. माहिती व आकडेवारी उपलब्ध नसणे, कालखंड समान नसणे, प्रशासकीय उत्तरे नसणे, उपखोरे व खोरेनिहाय आकडेवारी जुळत नसल्याची स्थिती आहे. आराखड्यासाठी ३० उपखोऱ्यांचा अभ्यास केला. पाऊस व बाष्पीभवनाचे प्रमाण व्यस्त असून हे प्रमाण कमी करण्याची गरज आहे. पाणी वाटपाचे नियोजन प्रकल्पनिहाय न करता खोरेनिहाय करावे लागणार आहे. स्वायत्त उच्चाधिकार असलेले जलरेखा प्राधिकरण स्थापन करण्याची गरज आहे. आराखड्याची दिशा आणि दृष्टिकोन योग्य आहे. मात्र, आकेडवारीची अचूकता आणि विश्वासार्हता वाढवणे आवश्यक आहे,’ असे प्रा. पुरंदरे म्हणाले. यावेळी उपस्थित नागरिकांच्या प्रश्नांचे पुरंदरे यांनी शंका निरसन केले.

रिपाइंकडून निषेध
प्रा. पुरंदरे यांचे व्याख्यान सुरू होण्यापूर्वी रिपाइं (डेमोक्रॅटीक) पक्षाच्या कार्यकर्त्यांनी आराखड्यावर आक्षेप घेतला. ‘आराखडा मराठवाड्याचे वाळवंट करणारा आहे. पक्षाने वारंवार मागणी करूनही योग्य काम करण्यात आले नाही. जलतज्ज्ञ काय दिवे लावतात ते कळू द्या’ असे म्हणत घोषणाबाजी केली. प्रा. पुरंदरे जल आराखड्याचे सदस्य असल्यामुळे त्यांचाही धिक्कार करीत कार्यकर्ते सभागृहाच्या बाहेर गेले.

आकेडवारी विसंगत ?
गोदावरी खोरे जल आराखडा जाहीर होण्यापूर्वीच तांत्रिक चुकांमुळे चर्चेत आहे. आराखड्यानुसार मराठवाड्याचे सिंचन वाढणार असल्याचे म्हटले आहे. मात्र, पाणी वाढणार असल्याचा कुठेच उल्लेख नाही. ही सर्व आकेडवारी विसंगत असल्याचे मत ज्येष्ठ जलतज्ज्ञ या. रा. जाधव यांनी मांडले. या मुद्द्यावर पुरंदरे व जाधव यांच्यात वाद-विवाद रंगला. प्रा. एच. एम. देसरडा, प्राचार्य प्रताप बोराडे यांनी मध्यस्थी करीत मत आणि माहिती यांची गल्लत करू नका, असे म्हणत वादावर पडदा टाकला. तर आराखड्याला मर्यादा असल्याचे पुरंदरे यांनी स्पष्ट केले.

मोबाइल अॅप डाउनलोड करा आणि राहा अपडेट

​ हज यात्रेसाठी २५ हजार कोटी द्या

August 12, 2017, 3:23 pm

≫ Next: देशात सध्या फक्त संघच सुरक्षित!: काँग्रेस

≪ Previous: ​ गोदावरी खोरे जल आराखड्यावर मतभेद

$

0

0

म. टा. प्रतिनिधी, औरंगाबाद
‘सुप्रीम कोर्टाच्या आदेशानुसार हज यात्रेसाठी दिले जाणारे अुनदान २०१८मध्ये बंद होत आहे. त्यानंतर केंद्र सरकारने या यात्रेसाठी हज कमिटीला २५ हजार कोटींचा निधी एकरकमी द्यावा,’ अशी मागणी केंद्रीय हज कमिटीचे सदस्य तथा राज्य हज कमिटीचे अध्यक्ष हाजी इब्राहिम भाईजान यांनी शनिवारी केली.

हाजी इब्राहिम म्हणाले, ‘कोर्टाच्या आदेशानंतर वर्ष २०१५ रोजी शासनाने ४०५ कोटी रुपये दिले. २०१६मध्ये ३८० कोटी, तर २०१७मध्ये २०० कोटींचे अनुदान दिले. यंदा हजला जाण्यासाठी यात्रेकरुंना मागील वर्षीपेक्षा पन्नास हजार रुपये जास्त द्यावे लागत आहेत. आगामी वर्षात हजचा खर्च अधिकच वाढेल. हज यात्रेचे नियोजन करताना, चार्टर फ्लाइट बुकिंगवर सर्वात जास्त खर्च करावा लागत आहे. यामुळे शासनाने २५ हजार कोटींचा निधी केंद्रीय हज कमिटीला दिल्यास या पैशातून विमान खरेदी केली जाईल. हे विमान वर्षभर राष्ट्रीय आंतरराष्ट्रीय विमानमार्गावर धावेल. हज यात्रेच्या काळात मात्र देशभरातील साडेतीन लाख हाजींना यात्रेसाठी नेण्याचे काम करेल. ही संपूर्ण व्यवस्था ना नफा ना तोटा राबविण्यात येईल. असा प्रस्ताव केंद्रीय अल्पसंख्यांक विभाग तसेच पंतप्रधान मोदी यांच्याकडे सादर केला आहे. याशिवाय यंदाच्या वर्षी हज कमिटीला दिलेल्या पत्रात महाराष्ट्रातून हज यात्रेकरूंसाठी २५० हाजींसाठी एक खादीम पाठविण्यात येत असतो. अनेकदा तामिळनाडूच्या खादीमकडे महाराष्ट्राच्या हाजींची व्यवस्था देण्यात येते. यामुळे यंदा महाराष्ट्रातून गेलेल्या खादीमला महाराष्ट्रातील हज यात्रेकरूंच्या सेवेसाठी ठेवावे, असाही प्रस्ताव दिला आहे,’ अशी माहिती इब्राहिम भाईजान यांनी दिली.

कोटा वाढविण्याची विनंती
‘सौदी अरेबियात मक्का येथील बांधकाम सुरू असल्याने भारताचा हज यात्रेचा कोटा कमी करण्यात आला होता. आता मक्का येथील काम पूर्णत्वाला आले आहे. यामुळे पुढील वर्षी हज यात्रेकरूंचा कोटा वाढवून दयावा,’ अशी मागणीही इब्राहिम भाईजान यांनी केंद्रीय हज कमिटीद्वारे सौदी अरेबिया शासनाकडे केली आहे.

मोबाइल अॅप डाउनलोड करा आणि राहा अपडेट

देशात सध्या फक्त संघच सुरक्षित!: काँग्रेस

August 13, 2017, 3:16 am

≫ Next: भाजपविरुद्ध लढण्यासाठी सज्ज व्हा

≪ Previous: ​ हज यात्रेसाठी २५ हजार कोटी द्या

$

0

0

म. टा. प्रतिनिधी, औरंगाबाद

‘देशभरात सध्या असुरक्षितेचे वातावरण आहे. दलित, अल्पसंख्याक, युवती, महिला, गरीब, शेतकरी असे सारे घटक त्रस्त आहेत. त्यांना कुठेच सुरक्षितता वाटत नाही. भाजपप्रणित सरकारमुळे देशात सध्या फक्त राष्ट्रीय स्वयंसेवक संघच सुरक्षित आहे,’ अशी बोचरी टीका राज्यसभेतील विरोधी पक्षनेते गुलाम नबी आझाद आझाद यांनी रविवारी केली.

माजी पंतप्रधान दिवंगत इंदिरा गांधी यांच्या जन्मशताब्दी महोत्सवाच्या निमित्तानं ते औरंगाबादेत येथे आले होते. त्यावेळी त्यांनी भाजप सरकारवर जोरदार टीका केली. ‘फोडा आणि राज्य करा या तत्वानुसार सध्याचे सरकार वाटचाल करत आहेत. पंतप्रधान सत्तेवर येण्यापूर्वी केलेल्या सर्व घोषणा विसरले आहेत. हे सरकार फक्त टेलिव्हिजन सरकार आहे. टीव्हीवर भाषणं करून सरकार चालविलं जात आहे. जुन्या योजनांचे नाव बदलून उद्‍घाटने केली जात आहेत. जम्मू, काश्मीरचा मुख्यमंत्री असताना आठ वर्षांपूर्वी मी ज्या योजना राबविल्या, त्यापैकी काहींची उद्‍घाटने आता हे करत आहेत. सफदरजंग येथे १४०० खाटांचे रुग्णालय आमच्या काळात मंजूर झाले. ते आता उभं राहिलं आहे. उद्‍घाटन मात्र केलं जात नाही. विचारणा केली असता असं सांगितलं गेलं की तीन वर्षांनी करू म्हणजे आमच्या काळात उभारले असे सांगता येईल. अशी विचित्र परिस्थिती सध्या पाहायला मिळत आहे,' असं आझाद म्हणाले.

'जयराम रमेश यांनी काँग्रेसमधील अंतर्गत परिस्थितीविषयी नुकतंच भाष्य केलं. त्याविषयी विचारलं असता आझाद म्हणाले, ‘काँग्रेसमध्ये कोणत्याही नेत्याला बोलण्याचा पूर्ण अधिकार आहे. योग्य असेल तर ती टीकाही विचारात घेतली जाते. मात्र भाजपमध्ये पूर्ण उलट आहे. जयराम रमेश यांच्यासारखं भाजपमधून कुणी बोललं असतं त्याला जेलमध्ये टाकलं असतं. भाजपमध्ये सुरवातही मोदी आणि शेवटही मोदीच आहे. अशी परिस्थिती काँग्रेसमध्ये नाही.’ असा दावाही त्यांनी केला.

सरकार भ्रष्ट मंत्र्यांना पाठिशी घालतंय: अशोक चव्हाण

सुभाष देसाई, प्रकाश मेहता यांच्या भ्रष्टाचाराबाबत सरकारची भूमिका दुटप्पी आहे. एकनाथ खडसे यांच्या प्रकरणात राजीनामा घेतला गेला. मग या दोन मंत्र्यांना वेगळा न्याय का? सरकारची ही भूमिका भ्रष्ट मंत्र्यांना पाठिशी घालण्याची आहे, असा आरोप काँग्रेस प्रदेशाध्यक्ष अशोक चव्हाण यांनी यावेळी केला.

मोबाइल अॅप डाउनलोड करा आणि राहा अपडेट

भाजपविरुद्ध लढण्यासाठी सज्ज व्हा

August 13, 2017, 2:30 pm

≫ Next: सुकेशिनीसह चालकास तिसऱ्यांदा पोलिस कोठडी

≪ Previous: देशात सध्या फक्त संघच सुरक्षित!: काँग्रेस

$

0

0

म. टा. प्रतिनिधी, औरंगाबाद
‘देश आज वेगळ्या वळणावरून जात आहे. भाजप हिंदू-मुस्लिमांना वेगळे करून राजकारण करण्याचा प्रयत्न करत आहे. काँग्रेसमध्ये मात्र एका पराभवाने काहीशी नाराजी आहे. आपल्या पक्षाचा इतिहास लढण्याची ताकद देतो. स्वातंत्र्यपूर्व काळापासून आपण संघर्ष करत आलो आहोत. आपण अन्याय, अत्याचार कधीच सहन करणार नाही. एका पराभवाने खचून जाऊ नका. पुढच्या लढाईला सज्ज रहा. ही राजकीय लढाई आपण गांधी विचारांनी लढायची आहे,’ असे आवाहन राज्यसभेतील विरोधीपक्ष नेते गुलाम नबी आझाद यांनी रविवारी येथे केले.
माजी पंतप्रधान (कै.) इंदिरा गांधी जन्मशताब्दी वर्षानिमित्त राज्यातील महोत्सवाची सुरुवात रविवारी करण्यात आली. यानिमित्त आयोजित कार्यक्रमात ते बोलत होते. काँग्रेस प्रभारी मोहन प्रकाश, विधान परिषदेचे उपसभापती माणिकराव ठाकरे, काँग्रेस प्रदेशाध्यक्ष अशोक चव्हाण, खासदार रजनी पाटील, माजी खासदार तुकाराम रेंगे पाटील, काँग्रेस जिल्हाध्यक्ष आमदार अब्दुल सत्तार, शहराध्यक्ष नामदेव पवार, आमदार सुनील केदार, सुभाष झांबड, माजी आमदार डॉ. कल्याण काळे यांच्यासह काँग्रेस पदाधिकारी उपस्थित होते.
आझाद म्हणाले, इंदिरा गांधी यांचे संपूर्ण जीवन संघर्षात गेले. त्यात खचून न जाता त्यांनी आपल्या कार्यशैलीने जग जिंकले. पाकिस्तानशी झालेल्या संघर्षानंतर बांगलादेशची निर्मिती, सिक्किमचे भारतात विलिनीकरण यात इंदिरा गांधी यांची महत्त्वाची भूमिका होती. त्यांच्या मुत्सद्देगिरीने जगात भारताचे अव्वल स्थान निर्माण झाले. भाजप, तत्कालीन जनसंघाने इंदिरा गांधींवर अनेक आरोप केले पण त्याचा समर्थ मुकाबला इंदिराजींनी केला. आज देशातील परिस्थिती आणखी बिकट झाली आहे. भाजप हिंदू मुस्लिमांमध्ये भेद निर्माण करण्याचा प्रयत्न करत आहे. पण देशवासीय त्याला बळी पडणार नाहीत. काँग्रेसमध्ये एका पराभवाने थोडे भीतीचे वातावरण आहे. पण खचून जाऊ नका. राजकीय लढाईला सज्ज व्हा, असे आवाहन केले.
अशोक चव्हाण म्हणाले, की इंदिरा गांधींसारख्या कणखर नेत्याला देश कधीच विसरू शकणार नाही. इंदिरा गांधींना बदनाम करण्याचा प्रयत्न आज होत आहे. पण हे सहन केले जाणार नाही. भाजपला देशाच्या सत्तेपासून दूर करण्याची गरज आहे. कारण हा पक्ष देशातील खरेदी-विक्री संघ आहे. विद्यापीठांमधून विचार बदलले जात आहेत. जो विरोधात बोलेल त्याला देशद्रोही ठरविले जात आहे. हे चित्र बदलण्यासाठी तीव्र लढा उभारला गेला पाहिजे. त्यासाठी मराठवाडा अग्रेसर राहील. सरकार स्वतःचे डोके स्वच्छ करू शकत नाही ते देश काय स्वच्छ करणार ? सरकारच्या धोरणाविरोधात रस्त्यावर उतरावे लागेल, असे त्यांनी स्पष्ट केले.
माणिकराव ठाकरे, ज्येष्ठ पत्रकार सुरेश द्वादशीवार,नामदेव पवार यांनीही आपले विचार मांडले. आमदार अब्दुल सत्तार यांनी प्रास्ताविक केले. आमदार सुभाष झांबड यांनी आभार मानले.

गांधी टोपी विरुद्ध काळी टोपीचा संघर्ष

मोहन प्रकाश यांनी पंतप्रधान नरेंद्र मोदी, मुख्यमंत्री देवेंद्र फडणवीस यांच्यावर जोरदार टीका केली. सध्या देशात गांधी टोपी विरुद्ध संघाची काळी टोपी असा संघर्ष सुरू आहे. आपण काँग्रेसवासियांचा संघर्ष व त्याग मोठा आहे. तसा भाजपने कधीच त्याग केला नाही. मोदी आरएसएसचे प्रचारक आहेत. शामाप्रसाद मुखर्जी हे सुद्धा इंग्रजांच्या बाजूने विचार करणारे होते. तशीच परिस्थिती आज आपण अनुभवत आहोत. चीन व पाकिस्तानशी एकतर्फी मैत्री निभावण्याचा प्रयत्न मोदी करत आहेत. त्यामुळे दोन्ही देशांशी संबंध बिघडले आहेत. देशातील प्रत्येक घटक आज त्रस्त आहे. येणाऱ्या निवडणुकीतून भाजपला याचे उत्तर निश्चितपणे मिळेल.

मोबाइल अॅप डाउनलोड करा आणि राहा अपडेट

सुकेशिनीसह चालकास तिसऱ्यांदा पोलिस कोठडी

August 13, 2017, 2:30 pm

≫ Next: ‘ब्रेन डेथ रिपोर्टिंग’ बंदच

≪ Previous: भाजपविरुद्ध लढण्यासाठी सज्ज व्हा

$

0

0

म. टा. प्रतिनिधी, औरंगाबाद
सिडकोतील बंगला कवडीमोल भावात विकून घरातील दागिने व कार घेऊन पळून गेलेल्या डॉ. सुकेशिनी येरमे व कारचालक राजू मोटे याच्या पोलिस कोठडीत मंगळवारपर्यंत (१५ ऑगस्ट) वाढ करण्याचे आदेश प्रथम वर्ग न्यायदंडाधिकारी एस. डब्ल्यू. उगले यांनी दिले. विशेष म्हणजे सुकेशिनीला आतापर्यंत तिसऱ्यांदा कोठडी सुनावण्यात आली आहे.
अमेरिकेतील डॉ. शिवाजी गुणाले यांचा सिडको एन-४ येथे बंगला आहे. हा बंगला आरोपी सुकेशिनी येरमे व कारचालक राजू मोटे यांनी संगनमत करून बंगल्यातील बेडरूममध्ये असलेल्या कपाटातील रोख ५ लाख रुपये, २५ तोळे दागिने, घरगुती फर्निचर, कार, लॅपटॉप व दुचाकी घेऊन पळ काढला. त्यापूर्वी बंगला ६७ लाख रुपयांत विकल्याबद्दल दोघांविरोधात मुकुंदवाडी पोलिस ठाण्यात चोरी, फसवणुकीचा गुन्हा दाखल होऊन दोघांना ६ ऑगस्ट रोजी अटक करण्यात आली होती. अटक केल्यानंतर आतापर्यंत दोघांना दोन वेळेस पोलिस कोठडी देण्यात आली होती. दोघांच्या पोलिस कोठडीची मुदत संपल्यामुळे त्यांना रविवारी तिसऱ्यांदा कोर्टात हजर करण्यात आले असता, आरोपींकडून १३ लाख ९५ हजार रुपयांचे साहित्य जप्त करण्यात आले असून, सुकेशिनीने बंगला विकल्यानंतर स्वतःच्या नावे घेतलेल्या १५ लाख रुपयांच्या धानादेशाची रक्कम तिच्या ताब्यातून हस्तगत करणे बाकी आहे, तसेच रजिस्ट्रीसाठी मदत करणाऱ्या साथीदारांची चौकशी करावयाची असल्यामुळे दोघांना पोलिस कोठडी देण्यात विनंती करण्यात आली. ही विनंती मानव्य करुन कोर्टाने आरोपींना मंगळवारपर्यंत (१५ ऑगस्ट) पोलिस कोठडी सुनावली.

मोबाइल अॅप डाउनलोड करा आणि राहा अपडेट

‘ब्रेन डेथ रिपोर्टिंग’ बंदच

August 13, 2017, 2:30 pm

≫ Next: अज्ञात वाहनाच्या धडकेने तरूण ठार

≪ Previous: सुकेशिनीसह चालकास तिसऱ्यांदा पोलिस कोठडी

$

0

0

‘ब्रेन डेथ रिपोर्टिंग’ बंदच
तीन महिन्यांपासून रुग्णालयांमधून एकही रिपोर्ट नाही; अवयवदान चळवळीला मरगळ
म. टा. प्रतिनिधी, औरंगाबाद
प्रत्येक रुग्णालयातील ‘ब्रेन डेड’ रुग्ण जाहीर करणे आणि त्याची माहिती तात्काळ ‘झेडटीसीसी’ला कळवणे अनिवार्य असतानादेखील मागच्या तब्बल तीन महिन्यांपासून शहरातीलच नव्हे तर संपूर्ण मराठवाड्यातील एकाही रुग्णालयाने एकही ‘ब्रेन डेड’ रुग्ण जाहीर केलेला नाही किंवा तसे ‘झेडटीसीसी’ला कळविलेले नाही. त्याचवेळी अवयवदानासाठी ‘रिट्राव्हल सेंटर’ची संख्यादेखील वाढत नसल्याची वस्तुस्थिती कायम असल्यामुळे, अवयवदान चळवळीला काहिशी मरगळ आल्याचे दिसून येत आहे. डॉक्टरांनी-रुग्णालयांनीच ‘ब्रेन डेड’ रुग्ण जाहीर केला नाही तर अवयवदान होणार तरी कसे, असा प्रश्न ‘ऑर्गन डोनेशन डे’निमित्ताने उपस्थित होत आहे.
‘ब्रेन डेड’ रुग्णांकडून अवयवदान व्हावे म्हणजेच ‘कॅडेव्हर ट्रान्स्प्लान्ट’चे प्रमाण वाढावे आणि अनेकांना जिवनदान मिळावे, या हेतुने १३ ऑगस्ट रोजी देशभरामध्ये ‘ऑर्गन डोनेशन डे’ पाळला जातो. यानिमित्ताने दरवर्षी देशभर अयवदानासाठी जनजागृतीपर उपक्रम राबविले जातात. येत्या २९ व ३० ऑगस्ट रोजीही महाअवयवदान मोहीम राबविली जाणार आहे. औरंगाबाद शहरातही अनेक कार्यक्रम होऊ घातले आहे. या पार्श्वभूमीवर, एकीकडे अवयवदानासाठी देशभर जनजागृती केली जात आहे; परंतु दुसरीकडे शहरातील रुग्णालयांतर्फे ‘ब्रेन डेड’ रुग्ण जाहीर केले जात नसल्याचे निष्पन्न झाले आहे. कोणत्याही रुग्णालयामध्ये जेव्हा उपचाराअंती एखादा रुग्ण ‘ब्रेन डेड’ होतो, त्यावेळी संबंधित रुग्णालयातील ‘ब्रेन डेथ कमिटी’ने संबंधित रुग्ण ‘ब्रेन डेड’ झाला असल्याचे तात्काळ जाहीर करणे व ‘झोनल ट्रान्स्प्लान्ट कोऑर्डिनेशन कमिटी’ला (झेडटीसीसी) कळविणे शासकीय नियमानुसार अनिवार्य आहे. ही कायदेशीर प्रक्रिया झाल्यानंतरच अवयवदानाच्या दृष्टीने पहिले पाऊल पडते. मात्र ही प्रक्रियाच शहरामध्ये चक्क मे महिन्यापासून खंडित झाली आहे.
महिन्याला १० रुग्ण होतात ‘ब्रेन डेड’
तीन मे रोजी शहरातील माणिक हॉस्पिटलमध्ये मराठवाडा विभागातील १२ वे, तर शहरातील १० वे अवयवदान झाले. त्यानंतर संपूर्ण मराठवाडा विभागात एकही ‘ब्रेन डेड’ रुग्ण रुग्णालयांकडून जाहीर झालेला नाही किंवा तसे ‘झेडटीसीसी’ला कळविण्यात आलेले नाही, असे ‘झेडटीसीसी’चे अध्यक्ष डॉ. सुधीर कुलकर्णी यांनी ‘मटा’ला सांगितले. सूत्रांनी दिलेल्या माहितीनुसार, शहरातील किमान डझनभर मोठी व मध्यम रुग्णालये तसेच विविध आयसीयू सेंटरमध्ये दर महिन्याला किमान १० ते १५ रुग्ण उपचाराअंती ‘ब्रेन डेड’ होतात. कधी-कधी हा आकडा त्याहीपेक्षा जास्त असतो. त्यामुळे शहरामध्ये तीन महिन्यांत एकही ‘ब्रेन डेड’ रुग्ण नाही, असे होऊ शकत नाही, असेही सूत्रांनी सांगितले. संबंधित ‘ब्रेन डेड’ रुग्णांकडून अवयवदान होईल किंवा नाही, हा नंतरचा भाग आहे; परंतु ते आधी जाहीर होणे व ‘झेडटीसीसी’ला कळविणे आणि नातेवाईकांपुढे अवयदानाचा पर्याय ठेवणे गरजेचे आहे. मात्र दुर्दैवाने ही प्रक्रियाच थंडावल्याचे सध्यातरी चित्र आहे.
सव्वावर्षांत पन्नास अवयवांचे दान
१५ जानेवारी २०१६ रोजी शहरामध्ये पहिल्यांदा ‘ब्रेन डेड’ रुग्णाकडून अवयवदान झाले. त्यानंतर औरंगाबाद व नांदेड येथे १२ जणांकडून २४ मूत्रपिंड, ११ यकृत, ७ हृदय व २० पेक्षा जास्त डोळ्यांच्या ‘कॉर्निया’चे दान झाले आहे.

मागच्या किमान तीन महिन्यांत एकाही रुग्णालयाकडून ‘ब्रेन डेथ रिपोर्टिंग’ झालेले नाही, जे निराशाजनक आहे. डॉक्टरांनी संबंधित रुग्ण ‘ब्रेन डेड’ असल्याचे सांगितल्याशिवाय अवयवदान होणार तरी कसे?
– डॉ. सुधीर कुलकर्णी, झेडटीसीसी अध्यक्ष

मोबाइल अॅप डाउनलोड करा आणि राहा अपडेट

---

अज्ञात वाहनाच्या धडकेने तरूण ठार

August 13, 2017, 2:30 pm

≫ Next: भाजपच्या पोटात गोळा; विरोधकांवर तिसरा डोळा

≪ Previous: ‘ब्रेन डेथ रिपोर्टिंग’ बंदच

$

0

0

म. टा. प्रतिनिधी, फुलंब्री
अज्ञात वाहनाच्या धडकेत दुचाकीवरील एक जण जागीच ठार, तर एक गंभीर जखमी झाल्याची घटना औरंगाबाद-जळगाव महामार्गावरील पाथ्री येथील दूध डेअरीसमोर शनिवार रात्री साडेनऊच्या सुमारास घडली. बाबासाहेब आप्पा बेडके (वय २८, रा. शेवता ता. फुलंब्री), असे मृताचे नाव आहे. राजेंद्र नारायण तुपे (वय२०, रा, शेवता) हा जखमी झाला.
मिळालेल्या माहितीनुसार, हे दोघे मित्र दुचाकीवरून (एम. एच. २०, ई. एम. ५१६७) फुलंब्रीकडे जात होते. त्यावेळी पाथ्री येथील शासकीय दूध डेअरीसमोर अज्ञात वाहनाने त्यांच्या दुचाकीला जोराची धडक दिली. अपघातात दुचाकीचा चुराडा झाला, तर दुचाकीस्वार हे रस्त्याशेजारील खोल खड्ड्यात जखमी अवस्थेत जवळपास अर्धा तास पडून होते. अंधार असल्याने त्यांच्याकडे कोणाचेही लक्ष गेले नाही. राजेंद्र तुपे यांनी शुद्ध आल्यानंतर मदतीसाठी हाका मारल्यानंतर पाथ्री येथील ग्रामस्थांनी घटनास्थळी धाव घेवून दोघांना रुग्नवाहिकेतून फुलंब्री येथील ग्रामीण रुग्णालयात उपचारासाठी दाखल केले. तेथे डॉक्टरांनी तपासून बाबासाहेब बेडके यास मृत घोषित केले. तुपे यांना औरंगाबादच्या घाटी हॉस्पिटलमध्ये दाखल केले आहे. वडोदबाजार पोलिस ठाण्याचे पोलिस उपनिरीक्षक ए. ओ. पठाण, साळवे, राजू तेलगोटे यांनी घटनास्थळी भेट देऊन मदत कार्य केले.

दोघेही एकुलते

अपघातातील मृत बाबासाहेब बेडके व जखमी राजेंद्र तुपे हे दोघेही एकुलते एक आहेत. बेडके याच्या मागे आई-वडील, पत्नी व एक मुलगी, असा परिवार आहे. या दुर्घटनेमुळे शेवता गावावर शोककळा पसरली आहे.

मोबाइल अॅप डाउनलोड करा आणि राहा अपडेट

भाजपच्या पोटात गोळा; विरोधकांवर तिसरा डोळा

August 13, 2017, 2:30 pm

≫ Next: मालट्रकच्या धडकेत सैनिक जागीच ठार

≪ Previous: अज्ञात वाहनाच्या धडकेने तरूण ठार

$

0

0

म. टा. प्रतिनिधी, खुलताबाद
येथील पंचायत समिती सभागृहामध्ये सीसीटीव्ही कॅमेरे बसविण्यात आल्याने सभागृहावर तिसऱ्या डोळ्याची नजर राहणार आहे. जिल्हा परिषदेच्या सत्तेतील शिवसेना, काँग्रेस पदाधिकाऱ्यांची ऊठ-बस वाढल्याने सभागृहात सीसीटीव्ही कॅमेरे बसविण्यात आल्याची चर्चा होत आहे.
पंचायत समितीची इमारत लहान असल्याने अनेक कार्यालये आवारातील छोट्या-मोठ्या इमारतीमध्ये विखुरलेली आहेत. कार्यालयाच्या आवारात अनेक वाहनांचे पार्किंग, अनोळखी व्यक्तींचा वावर असल्याने सुरक्षिततेच्या दृष्टीने येथे सीसीटीव्ही कॅमेरे लावणे आवश्‍यक होते. सीसीटीव्हीमुळे कार्यालय, सभागृहात कामकाज कसे चालते, कर्मचारी यांच्यावर लक्ष ठेवता येते. इतकेच नव्हे तर सुरक्षिततेच्या दृष्टीने अत्यंत महत्त्वाचे असल्याने पंचायत समितीमध्ये सीसीटीव्ही बसविण्याचा निर्णय यापूर्वीच घेतला होता.
खुलताबाद पंचायत समितीत भाजपची सत्ता आहे. भाजपचे सभापती, उपसभापतीसह एकूण सहापैकी पाच सदस्य आहेत. औरंगाबाद जिल्हा परिषदेत शिवसेना-काँग्रेसची सत्ता आहे. पंचायत समिती सभागृहात जिल्हा परिषद अध्यक्षा देवयानी पाटील डोणगावकर या दर बुधवारी जनता दरबार आयोजित करून जनतेचे प्रश्न सोडविताना दिसत आहे. त्यामुळे पंचायत समिती कार्यालयात शिवसेना व काँग्रेस पदाधिकाऱ्यांचा वावर वाढला आहे. त्यामुळे सत्ताधारी भाजप गोटात अस्वस्थता आहे. यामुळेच पंचायत समिती सभागृहात सीसीटीव्ही कॅमेरे बसविण्यात आल्याची चर्चा सुरू आहे.

सुरक्षेसाठी आवश्यक

पंचायत समिती सभापती अर्चना अंभोरे यांनी सांगितले की, सुरक्षिततेच्या दृष्टीने सीसीटीव्ही बसविणे गरजेचे असल्याने ते बसविण्यात आले आहेत. याबरोबरच पंचायत समितीमध्ये कर्मचाऱ्यांसाठी बायोमॅट्रिक मशीन बसविण्यात आली आहे. आमदार प्रशांत बंब यांच्या मार्गदर्शनाखाली खुलताबाद पंचायत समिती हायटेक करण्याचा आमचा मानस आहे.

मोबाइल अॅप डाउनलोड करा आणि राहा अपडेट

मालट्रकच्या धडकेत सैनिक जागीच ठार

August 13, 2017, 2:30 pm

≫ Next: खासदार दानवेंनी भरले वीज बिल

≪ Previous: भाजपच्या पोटात गोळा; विरोधकांवर तिसरा डोळा

$

0

0

म. टा. प्रतिनिधी, फुलंब्री
मालवाहू आयशर आणि दुचाकी यांच्यात झालेल्या अपघातात भारतीय सैन्यदलात कार्यरत जवान जागीच ठार झाला. हा अपघात औरंगाबाद-जळगाव महामार्गावरील पाथ्री गावाजवळील वळणावर शनिवारी दुपारी चार वाजता झाला. ज्ञानेश्वर नथ्थू काबंळे (वय ४३, रा. अंधारी, ता. सिल्लोड, हमु औरंगाबाद), असे मृताचे नाव आहे.
मिळालेल्या माहितीनुसार ज्ञानेश्वर काबंळे हे जम्मू येथे कार्यरत होते व सध्या सुटीवर आले होते. अंधारी येथे आई-वडिलांची भेट घेण्यासाठी ते औरंगाबादहून दुचाकीवरून (एम. एच. २०,ए. जे. ६०६४) जात होते. त्यावेळी पाथ्री गावाजवळील वळणावर विरुद्ध दिशेने येणाऱ्या आयशरने (एम. एच. ०४, डी. के. ३८९२) दुचाकीला धडक केली. या अपघातात काबंळे यांच्या डोक्याला जोराचा मार लागून ते बेशुद्ध पडले. त्यांना गंभीर जखमी अवस्थेत फुलंब्री येथील ग्रामीण रुग्णालयात दाखल केले असता तेथील डॉक्टरांनी तपासून मृत घोषित केले. याप्रकरणी वडोद बाजार पोलिस ठाण्यात नोंद करण्यात आली आहे. आयशरचालक सुभाष जाधव (वय ६५, रा. हिना जि. जळगाव) याला पोलिसांनी ताब्यात घेतले.

आई-वडिलांची भेट राहिली

सुटीवर शुक्रवारी आल्यानंतर ज्ञानेश्वर कांबळे हे दुसऱ्याच दिवशी आई वडिलांना भेटन्यासाठी ज्ञानेश्वर काबंळे हे अंधारीला जात होते. त्यावेळी त्यांच्यावर काळाने झडप घातली. त्यांची आई-वडिलांसोबत भेट झाली नाही. त्यांच्या मागे पत्नी, एक मुलगा, एक मुलगी, आई-वडील, असा परिवार आहे.

मोबाइल अॅप डाउनलोड करा आणि राहा अपडेट

खासदार दानवेंनी भरले वीज बिल

August 13, 2017, 2:30 pm

≫ Next: वीणकाम उद्योगासाठी उपाययोजना

≪ Previous: मालट्रकच्या धडकेत सैनिक जागीच ठार

$

0

0

म. टा. प्रतिनिधी, औरंगाबाद
उर्जामंत्र्यांच्या जनता दरबारात खासदार रावसाहेब दानवे यांच्याकडेच महावितरणाचे दोन लाख ५९ हजार ५३० रूपयांची थकबाकी असल्याची माहिती समोर आली होती. थेट उर्जामंत्र्यांसमोरच हा विषय उपस्थित झाल्याने दानवे यांनी शनिवारी संध्याकाळी तत्काळ थकबाकी भरून यावरून निर्माण होणारा वाद रोखण्याचा प्रयत्न केला आहे.
खासदार रावसाहेब दानवे यांच्या भोकरदन येथील शिवाजीनगरमधील घराचे वीजबिल ८३ महिन्यांपासून भरलेले नव्हते. खासदार यांच्याकडे ही थकबाकी असताना गेल्या सहा वर्षांपासून कोणत्याही प्रकारची कारवाई झाली नसल्याचे समोर आले होते. सर्वसामान्य ग्राहकांवर वीज बिल थकबाकीपोटी कनेक्‍शन तोडण्याची कारवाई केली जात आहे. पण, लोकप्रतिनिधींकडील वीज बिलाची थकबाकी वसूल केली जात नाही, असा आरोप यावेळी लावण्यात आला होता. हे प्रकरण उपस्थित झाल्यानंतर उर्जामंत्रीही बॅकफूटवर आले होते. दरम्यान, हा प्रकार चव्हाट्यावर येताच दानवे यांच्याकडून दोन लाख ५८ हजार ९३० रुपये व पाच हजार ९५० रुपयांची दोन बिले चालू बिलांसह भरण्यात आले.

मोबाइल अॅप डाउनलोड करा आणि राहा अपडेट

वीणकाम उद्योगासाठी उपाययोजना

August 13, 2017, 2:30 pm

≫ Next: विमानतळापुढे अपघात; दुचाकीस्वाराचा मृत्यू

≪ Previous: खासदार दानवेंनी भरले वीज बिल

$

0

0

म. टा. प्रतिनिधी, बीड
वडवणी येथील टेरीकॉट कापड पुर्वीच्या काळी खूप लोकप्रिय होते. येथे कापड वीणकाम करणाऱ्या कामगाराची संख्या मोठ्या प्रमाणात असून आधुनिकतेच्या काळामध्ये कपडा वीणकामाचा उद्योग बंद पडण्याच्या मार्गावर आहे. येथील कामगारांपुढे त्यांच्या उदरनिर्वाहचा प्रश्न निर्माण झाला आहे. हा उद्योग जिवंत ठेवण्यासाठी शासनस्तरावरुन योग्य त्या उपाय योजना करण्यासाठी प्रयत्न करण्याचे आश्वासन पालकमंत्री पंकजा मुंडे यांनी दिले.
वडवणी येथील रामलिंग नागरी सहकारी पतसंस्थेच्या उदघाटन सोहळानिमित्त आयोजित कार्यक्रमात त्या बोलत होत्या. पुढे बोलतांना पालकमंत्री पंकजा मुंडे म्हणाल्या, ‘रामलिंग नागरी सहकारी पतसंस्था गेल्या 25 वर्षांपासून वडवणी सारख्या ठिकाणी सुरुवात करुन यशस्वीपणे वाटचाल करत आहे. आज या संस्थेला 70 लाख रुपयांचा नफा झाला असून हे काम उल्लेखनीय आहे. संस्थेने गोर-गरीब गरंजू नागरिकांना आपल्या संस्थेमार्फत वेळोवेळी कर्ज उपलब्ध करुन दिल्यामुळे या संस्थेविषयी नागरिकांमध्ये विश्वास वाढण्यास मदत झाली आहे. शिस्तबद्ध व पारदर्शकपणे काम केल्यामुळे ही संस्था यशस्वीपणे वाटचाल करत आहे.’
या कार्यक्रमास कर्नाटक राज्यातील हंपी येथील मठाधिपती श्री.श्री.श्री. दयानंदपुरी महाराज, आमदार आर.टी. देशमुख, बीड नगर पलिकेचे नगराध्यक्ष डॉ. भारतभूषण क्षीरसागर, माजी आमदार केशवराव आंधळे, जिल्हा परिषदेचे समाज कल्याण सभापती संतोष हंगे, वडवणीच्या नगरध्यक्षा मंगल मुंडे, उपनगराध्यक्षा वर्षा वारे, ह.भ.प. नामदेव महाराज लबडे, ह.भ.प. लक्ष्मण महाराज मेंगडे, ह.भ.प. ज्ञानोबा माऊली बेदरकर, ह.भ.प. नवनाथ महाराज चिनके, अनिल जगताप, अरुणराव वरोडे, बँकेचे अध्यक्ष हनुमंतराव डिगे यांची व्यासपीठावर उपस्थिती होती.

शिस्तबद्ध ,पारदर्शक कारभार
संस्थेने गोर-गरीब गरंजू नागरिकांना वेळोवेळी कर्ज उपलब्ध करुन दिले आहे. त्यामुळे या संस्थेविषयी नागरिकांमध्ये विश्वास वाढण्यास मदत झाली आहे. शिस्तबद्ध व पारदर्शकपणे काम केल्यामुळे ही संस्था यशस्वीपणे वाटचाल करत असल्याचेही यावेळी पंकजा मुंडे यांनी स्पष्ट केले.

मोबाइल अॅप डाउनलोड करा आणि राहा अपडेट

विमानतळापुढे अपघात; दुचाकीस्वाराचा मृत्यू

August 13, 2017, 2:30 pm

≫ Next: मसिआ करणार दोन क्लस्टरची निर्मिती

≪ Previous: वीणकाम उद्योगासाठी उपाययोजना

$

0

0

म. टा. प्रतिनिधी, औरंगाबाद
दुसऱ्या दुचाकीस्वाराने कट मारल्याने रस्त्यावर पडलेले सामान उचलणारा एका तरुण एसटी बसखाली चिरडून मरण पावला. हा अपघात रविवारी सकाळी साडेनऊ वाजता चिकलठाणा विमानतळासमोर झाला. संतोष नारायण पवार (वय २४ रा. जातवा ता. फुलंब्री), असे मृत तरुणाचे नाव आहे.
संतोष हा त्याच्या तीन मित्रांसोबत जुन्या वाहन बाजारात दुचाकी पाहण्यासाठी जात होता. संतोषने त्याच्या सोबत ईलेक्ट्रिक सामानाची पिशवी सोबत आणली होती.‌ विमानतळासमोर त्यांच्या दुचाकीला एका दुचाकीस्वाराने कट मारला. त्यामुळे संतोषच्या हातातील पिशवी खाली पडली. त्यातील रस्त्यावर पडलेले साहित्य वाकून उचलत होता. त्यावेळी जालन्याकडे जाणाऱ्या औरंगाबाद-निजामाबाद एसटी बसच्या पुढील चाकाखाली तो चिरडला गेला. या अपघातात संतोष जागीच ठार झाला. या अपघातानंतर गर्दी झाल्याने वाहतूक काही काळ ठप्प झाली होती. पोलिसांनी वाहतूक सुरळीत केली. या प्रकरणी बसचालकाविरुद्ध सिडको एमआयडीसी पोलिस ठाण्यात अपघाताची नोंद करण्यात आली आहे.

महिन्याभरापूर्वी आला शहरात

संतोष हा महिन्याभरापूर्वी शहरात राहण्यासाठी आला होता. तीन मित्रासोबत तो सिडको एन ६ मध्ये खोली भाड्याने घेऊन राहत होता. हे सर्व मित्र एका कंत्राटदाराकडे ईलेक्ट्रिशियन म्हणून काम करत होते.

अपघात नेहमीचेच, जीव मुठीत

विमानतळ परिसरात छोटे-मोठे अपघात नेहमीच होत आहेत. रस्त्याच्या कडेला शाळा असून, रस्ता ओलांडताना दोन्ही बाजूने येणाऱ्या वाहनांतून जीव मुठीत घेवून रस्ता ओलांडावा लागत आहे. दोन्ही बाजूंना गतिरोधक नसल्याने अपघातांचे प्रमाण वाढले आहे.

मोबाइल अॅप डाउनलोड करा आणि राहा अपडेट

मसिआ करणार दोन क्लस्टरची निर्मिती

August 13, 2017, 2:30 pm

≫ Next: काँग्रेसचे सचिव चौपाने अपघातात मृत्युमुखी

≪ Previous: विमानतळापुढे अपघात; दुचाकीस्वाराचा मृत्यू

$

0

0

मसिआ करणार दोन क्लस्टरची निर्मिती
‘लीन’ आणि ‘मसिआ-ऑटो’ क्लस्टरने होणार छोट्या उद्योजकांचा विकास
म. टा. प्रतिनिधी, औरंगाबाद
मराठवाडा असोसिएशन ऑफ स्मॉल स्केल इंडस्ट्रीज अँड अॅग्र‌िकल्चर यांच्यामाध्यमातून वाळूज परिसरात दोन महत्त्वाचे क्लस्टर तयार करण्यात येणार आहे. लीन आणि मसिआ ऑटो क्लस्टर असे त्यांची नावे आहेत. या दोन्ही क्लस्टरमध्ये प्रत्येकी १० उद्योजक एकत्र आले आहेत.
या दोन्ही क्लस्टरला केंद्र शासनाच्या एमएसएमई आणि एनपीसी नॅशनल प्रॉडक्ट कौन्सिलचे मार्गदर्शन मिळत आहे. मस‌िआ ऑटो क्लस्टरची निर्मिती मराठवाडा ऑटो क्लस्टरच्या बेसवरच होणार आहे, तर लिन उद्योगातील क्लस्टरमध्ये त्या-त्या उद्योजकांच्या उद्योगात वर्कशॉप, सेमीनार व मार्गदर्शन वर्ग घेऊन अपडेशन केले जाणार आहे. ऑटो कंपोनंटसह विविध उद्योगातील उद्योजकांना यातून चालना मिळणार आहे. मसिआ गेल्या सहा महिन्यांपासून या दोन्ही क्लस्टरवर काम करत असून ऑटो क्लस्टरसाठी होमवर्क सुरू आहे. पेपरवर्क झाले की याची अंमलबजावणी लवकरच होईल पण याला अवधी लागेल. तर लीन क्लस्टरचे कागदोपत्री असलेले काम पूर्ण होऊन अंमलबजावणीस सुरुवात होईल.
गुंतवणूक
यातील गुंतवणूक ही उद्योजक आणि शासन असे दोन्ही स्तरावर होईल. काही टक्केवारी केली जाईल, ही गुंतवणूक कोट्यावधींची असेल. अनेक छोट्या मोठ्या कामांची गरज जी पुणे-मुंबईत जाऊन पूर्ण करावी लागायची ती सर्व सुविधा आता या क्लस्टर्समुळे औरंगाबादेत उपलब्ध होणार आहे. यामुळे उत्पादन क्षमता वाढेल आणि विकास होईल.
लाभार्थी
या दोन्ही क्लस्टरचा उपयोग किमान २०० उद्योजकांना होणार आहे. यातून मोठ्या उद्योजकांनाही फायदा होणार आहे. मोठ्या उद्योजकांचीही संख्या २५०० च्यावर आहे. औरंगाबादेतील औद्योगिक वसाहतीतील जागाही या क्लस्टरला मिळणार आहे. यातून शासनदरबारी पाठपुरावाही सुरू झाला आहे.
मसिआच्या माध्यमातून ‌क्लस्टरमध्ये उद्योजकांच्या विकासासाठी एमएसएमई आणि नॅशनल प्रोडक्ट कौन्सिल यांच्या संयुक्त विद्यमाने काम होत आहे. मसिआच्या ऑटो क्लस्टरचे व लीन क्लस्टरचे स्वतंत्र ‌अस्तित्व राहणार आहे. ऑटो क्लस्टरचे काम सध्या प्राथमिक स्तरावर सुरू असून लीनचे काम लवकरच पूर्ण होणार आहे यातून औद्योगिक विकास साधला जाईल.
- सुनील कीर्दक, अध्यक्ष मसिआ
लीन क्लस्टरमधून सुमारे १२० छोटे उद्योजक वर्ल्डक्लास उत्पादन करू शकतील. यासाठी मागील सहा महिन्यांपासून काम सुरू असून येत्या १८ महिन्यांत याचे रिझल्ट दिसू शकतील. छोट्या उद्योजकांचा विकास सहज होणार आहे.
- राहुल मोगले, पीआरओ, मसिआ

मोबाइल अॅप डाउनलोड करा आणि राहा अपडेट

---

काँग्रेसचे सचिव चौपाने अपघातात मृत्युमुखी

August 13, 2017, 2:30 pm

≫ Next: देशात सध्या फक्त संघच सुरक्षित

≪ Previous: मसिआ करणार दोन क्लस्टरची निर्मिती

$

0

0

म. टा. प्रतिनिधी, औरंगाबाद
दुचाकीस्वाराला वाचविण्याच्या प्रयत्नात बस - कारच्या अपघातात प्रदेश काँग्रेस सचिव (प्रोटोकॉल) संजय चौपाने यांचा जागीच मृत्यू झाला. नवी मुंबईचे माजी उपमहापौर रमाकांत म्हात्रे, बाळकृष्ण पूर्णेकर आणि ड्रायव्हर बलदीपसिंग बिस्त हे तिघे जखमी झाले. हा अपघात रविवारी सायंकाळी सहाच्या सुमारास औरंगाबाद-पुणे महामार्गावरील भेंडाळा फाटा येथे झाला.

औरंगाबादेत रविवारी इंदिरा गांधी जन्मशताब्दी वर्षानिमित्त कार्यक्रमाचे आयोजन करण्यात आले होते. या कार्यक्रमासाठी ही मंडळी मुंबईहून कारने (क्रमांक एमएच ४३ एबी २२) आली होती. कार्यक्रम सायंकाळी संपल्यानंतर ते पुण्याकडे निघाले. भेंडाळा फाट्याजवळील ज्ञानेश्वरी पेट्रोलपंपासमोर एक मोटारसायकलस्वार आडवा आला. त्याला वाचविण्याच्या प्रयत्नात चालकाचा कारवरील ताबा सुटला आणि गाडी दुभाजकावर आदळून विरुद्ध दिशेने येणाऱ्या खाजगी बसवर (क्रमांक एमएच ३० एए ९१११) आदळली. या अपघातात प्रदेश काँग्रेसचे सचिव संजय चौपाने यांचा जागीच मृत्यू झाला. नवी मुंबईचे माजी उपमहापौर रमाकांत म्हात्रे, बाळकृष्ण पूर्णेकर आणि ड्रायव्हर बलदीपसिंग बिस्त हे जखमी झाले. जखमींना औरंगाबादच्या खाजगी रुग्णालयात दाखल करण्यात आले आहे. त्यापैकी एकाची प्रकृती गंभीर असल्याचे सूत्रांनी सांगितले.

मोबाइल अॅप डाउनलोड करा आणि राहा अपडेट

देशात सध्या फक्त संघच सुरक्षित

August 13, 2017, 2:30 pm

≫ Next: स्वातंत्र्यदिनाचा बंदोबस्त; हॉटेल, लॉजची झडती

≪ Previous: काँग्रेसचे सचिव चौपाने अपघातात मृत्युमुखी

$

0

0

म. टा. प्रतिनिधी, औरंगाबाद
‘देशभरात सध्या असुरक्षितेचे वातावरण आहे. दलित, अल्पसंख्याक, तरुणी, महिला, गरीब, शेतकरी आदी सर्व घटक त्रस्त आहेत. त्यांना कुठेच सुरक्षित वाटत नाही. भाजप प्रणित सरकारमुळे देशात सध्या फक्त राष्ट्रीय स्वयंसेवक संघच सुरक्षित आहे,’असा टोला राज्यसभेतील विरोधी पक्षनेते गुलाम नबी आझाद आझाद यांनी रविवारी पत्रकारांशी बोलताना लगाविला.
आझाद म्हणाले, फोडा आणि राज्य करा या तत्वानुसार सध्याचे सरकार वाटचाल करत आहे. सत्तेवर येण्यापूर्वी केलेल्या सर्व घोषणा पंतप्रधान विसरले आहेत. हे सरकार फक्त टेलिव्हिजन सरकार आहे. टीव्हीवर भाषणे करून सरकार चालविले जात आहे. जुन्या योजनांचे नाव बदलून उद्‍घाटने केली जात आहेत. जम्मू, काश्मिरचा मुख्यमंत्री असताना आठ वर्षांपूर्वी मी ज्या योजना राबविल्या त्यापैकी काहींची उद्‍घाटने आता हे करत आहेत. सफदरजंग येथे १४०० खाटांचे हॉस्पिटल आमच्या कार्यकाळात मंजूर झाले. ते सध्या उभे राहिले आहे. उद्‍घाटन मात्र केले जात नाही. विचारणा केली असता असे सांगितले गेले की तीन वर्षांनी करू म्हणजे आमच्या काळात उभारले असे सांगता येईल. अशी विचित्र परिस्थिती सध्या पाहायला मिळत आहे, असे आझाद म्हणाले.
जयराम रमेश यांनी काँग्रेसमधील अंतर्गत परिस्थिती विषयी नुकतेच भाष्य केले. त्याविषयी मत विचारले असता आझाद म्हणाले, काँग्रेसमध्ये कोणत्याही नेत्याला बोलण्याचा पूर्ण अधिकार दिलेला आहे. ते योग्य पद्धतीने असेल, तर टीकाही विचारात घेतली जाते. मात्र भाजपमध्ये पूर्ण उलटे आहे. जयराम रमेश यांच्यासारखे भाजपमधून कुणी बोलले असते, तर त्याला जेलमध्ये टाकले असते. भाजपमध्ये सुरुवातही मोदीच आणि शेवटही मोदीच आहे. अशी परिस्थिती काँग्रेसमध्ये नाही, असा दावा त्यांनी केला.

देशहितासाठी सरकारसोबत

काँग्रेस कायम देशहिताला प्राधान्य देते. चीन असो पाकिस्तान त्यांच्याशी मुकाबला करण्यासाठी आम्ही कायम सरकारसोबत आहोत. कारण आपण आधी भारतीय आहोत. त्यानंतर राजकीय विचारसरणी. त्यामुळे सरकारच्या चीनबाबतच्या धोरणाकडे आम्ही लक्ष ठेवून आहोत, असे आझाद यांनी सांगितले.

मोबाइल अॅप डाउनलोड करा आणि राहा अपडेट

स्वातंत्र्यदिनाचा बंदोबस्त; हॉटेल, लॉजची झडती

August 13, 2017, 2:30 pm

≫ Next: मुख्यमंत्री योगी आदित्यनाथ यांनी राजीनामा द्यावा

≪ Previous: देशात सध्या फक्त संघच सुरक्षित

$

0

0

म. टा. प्रतिनिधी, औरंगाबाद
स्वातंत्रदिनाच्या पार्श्वभूमीवर शहरात कडेकोट बंदोबस्त तैनात करण्यात आला आहे. मुख्य ध्वजारोहण होत असलेल्या विभागीय आयुक्तालयात वेगळा बंदोबस्त नेमला आहे. तसेच सुरक्षेच्या दृष्टीने लॉज, हॉटेलची पोलिसांनी तपासणी सुरू केली आहे.
पालकमंत्री रामदास कदम यांच्या हस्ते विभागीय आयुक्तालायात मंगळवारी (१५ ऑगस्ट) सकाळी नऊ वाजून पाच मिनिटांनी मुख्य ध्वजारोहण सोहळा होणार आहे. या अनुषंगाने अनुचित घटना होऊ नये यासाठी कडक बंदोबस्त तैनात करण्यात आला आहे. बंदोबस्तात तीन पोलिस उपायुक्त, सात सहाय्यक पोलिस आयुक्त, ३४ पोलिस निरीक्षक, एपीआय, पोलिस उपनिरीक्षक यांच्यासह एक हजार पोलिस तैनात करण्यात आले आहेत. विभागीय आयुक्तालयात वेगळा बंदोबस्त तैनात केला आहे. आयुक्तालयात व आयुक्तालयाबाहेर प्रत्येकी चार पोलिस निरीक्षक, आठ एपीआय, उपनिरीक्षक, ६० पोलिस कर्मचाऱ्यांचा समावेश आहे. त्याचप्रमाणे चार व्हिडिओग्राफर नेमले आहेत.
शहरातील लॉज, हॉटेलची स्थानिक पोलिस ठाणे व आयुक्तालयातील विशेष शाखेतर्फे झडती घेण्यात येत आहे. लॉजमध्ये उतरलेल्या प्रवाशाच्या सर्व माहितीची नोंद आहे का, त्याचे ओळखपत्र तपासले आहे का, कोणी संशयित प्रवासी आहे का. याची चाचपणी करण्यात येत आहे.
स्वातंत्रयदिनाच्या पार्श्वभूमीवर दहशतवाद विरोधी पथक, पोलिस आयुक्तालयातील स्थानिक दहशतवाद विरोधी कक्ष दक्षता बाळगत आहे. शहरातील संशयितांवर नजर ठेवण्यात आली आहे. गर्दीची ठिकाणे, रेल्वे स्टेशन, मध्यवर्ती बसस्थानक, मॉल आदी ठिकाणी बंदोबस्त नेमण्यात आला आहे.

मोबाइल अॅप डाउनलोड करा आणि राहा अपडेट

मुख्यमंत्री योगी आदित्यनाथ यांनी राजीनामा द्यावा

August 13, 2017, 2:30 pm

≫ Next: रॅम्पवर चालायचंय सहभागी व्हा

≪ Previous: स्वातंत्र्यदिनाचा बंदोबस्त; हॉटेल, लॉजची झडती

$

0

0

म. टा. प्रतिनिधी, औरंगाबाद
गोरखपूरमध्ये गेल्या तीन दिवसांत ६०हून अधिक मुलांचा ऑक्सिजनअभावी मृत्यू झाला. या मृत्यूस उत्तर प्रदेश सरकार आणि रुग्णालय प्रशासन पूर्णपणे जबाबदार आहे. उत्तर प्रदेशचे मुख्यमंत्री योगी आदित्यनाथ यांचा हा मतदारसंघ असूनही त्याकडे दुर्लक्ष केले गेले. नैतिक जबाबदारी स्वीकारून मुख्यमंत्र्यांनी राजीनामा दिला पाहिजे, अशी मागणी राज्यसभेतील विरोधी पक्षनेते गुलाम नबी आझाद यांनी रविवारी पत्रकारांशी बोलताना केली.

माजी पंतप्रधान (कै.) इंदिरा गांधी जन्मशताब्दी महोत्सवाची महाराष्ट्रातील सुरुवात औरंगाबादेत रविवारी आझाद यांच्या उपस्थितीत झाली. त्यापूर्वी ते पत्रकारांशी बोलत होते. काँग्रेस प्रभारी मोहन प्रकाश, विधान परिषदेचे उपसभापती माणिकराव ठाकरे, प्रदेशाध्यक्ष अशोक चव्हाण, आमदार अब्दुल सत्तार, एम. एम. शेख, कल्याण काळे, नामदेव पवार आदींची यावेळी प्रमुख उपस्थिती होती.

आझाद म्हणाले, ‘मी केंद्रीय आरोग्य मंत्री असताना गोरखपूरला किमान १७ वेळेस भेट दिली. गोरखपूर परिसरात दुषित पाण्याची मोठी समस्या आहे. नागरिक ज्या कुपनलिकांचे पाणी पितात ते मोठ्या प्रमाणावर दूषित आहे. याशिवाय जनावरांच्या माध्यमातून रोगांचा फैलाव होतो. त्यामुळे लहान मुलांचा मोठ्या प्रमाणावर मृत्यू होत होता. हे पाहून मी तत्कालीन पंतप्रधानांकडे विशेष पॅकेजची मागणी केली होती. साडेचार कोटींचे पॅकेज मंजूर झाले. शुद्ध पाणी पुरविण्यासाठी कृती कार्यक्रमही सुरू झाला होता. २०११ पूर्वी हे घडले. गेल्या काही वर्षांत पुन्हा एकदा गोरखपूरकडे दुर्लक्ष झाले.’

दोन दिवसांपूर्वी गोरखपूर शासकीय हॉस्पिटलमध्ये ऑक्सिजनअभावी ६०हून अधिक बालकांचा मृत्यू झाला. मी तिथे भेट दिल्यानंतर भयानक परिस्थिती समजली. ऑक्सिजनचा पुरवठाच झाला नाही, असे निदर्शनास आले. स्थानिक प्रसारमाध्यमांनी ही भीती आठवडाभरापूर्वी व्यक्त केली होती, पण राज्य सरकार आणि हॉस्पिटल प्रशासनाने त्याकडे गांभीर्याने पाहिले नाही. एवढ्या मोठ्या प्रमाणावर बालके मृत्युमुखी पडूनही सरकारने काहीच पावले उचलली नाहीत. त्यांना जर जनतेची सुरक्षा करता येत नसेल तर सत्तेत राहण्याचा कुठलाही अधिकार नाही. ६० कुटुंबीयांना देशोधडीला लावल्यावरून मुख्यमंत्री योगी आदित्यनाथ यांनी राजीनामा द्यावा, अशी मागणी त्यांनी केली.

बोलाचाच भात
पंतप्रधान नरेंद्र मोदी यांनी तीन वर्षांपूर्वी आश्वासन दिले होते, की देशातील दोन कोटी तरुणांना दरवर्षी रोजगार दिला जाईल. साडेतीन वर्षांची सरकारी आकडेवारी पाहिली, तर केवळ साडेतीन लाख तरुणांनाच रोजगार उपलब्ध झाला. हे म्हणजे देशाची फसवणूक आहे. माध्यमे, संघटना, संस्था सगळेच गप्प आहेत. कारण काही बोलले की ईडी, सीबीआयच्या चौकशीचा ससेमिरा लावून दिला जातो. ७० वर्षांत प्रथमच अशा प्रकारची लोकशाही आपण पाहत आहोत की जी केवळ बोलण्यावरच सुरू आहे. सध्याचे सरकार नुसतेच आश्वासने देते. अंमलबजावणी मात्र काहीच करत नाही, असा टोला आझाद यांनी लगाविला.

मोबाइल अॅप डाउनलोड करा आणि राहा अपडेट

रॅम्पवर चालायचंय सहभागी व्हा

August 13, 2017, 2:30 pm

≫ Next: सरकारकडून भ्रष्ट मंत्र्यांची पाठराखण

≪ Previous: मुख्यमंत्री योगी आदित्यनाथ यांनी राजीनामा द्यावा

$

0

0

रॅम्पवर चालायचंय सहभागी व्हा

‘मटा मिसेस औरंगाबाद’ स्पर्धेची उत्सुकता शिगेला; सहभागी होण्यासाठी मैत्रिणींकडून एकमेकिंना आग्रह

औरंगाबाद :

शहरातील गृहिणींसाठी महाराष्ट्र टाइम्स घेत असलेल्या ‘मटा मिसेस औरंगाबाद’ या स्पर्धेत सहभागी होण्यासाठी महिलांची लगबग सुरू आहे. तुम्हालाही स्पर्धेमध्ये सहभागी व्हायचे असेल तर लवकर आपली नाव नोंदणी करा. उद्या (१५ ऑगस्ट) स्पर्धेच्या नोंदणीचा अखेरचा दिवस आहे. आपण कंटाळा केल्याने संधी हुकली असे नंतर वाटू नये म्हणून त्वरा करा अन् स्पर्धत सहभागी व्हा.

‘मटा मिसेस औरंगाबाद’ या स्पर्धेत तुमचे सौंदर्य, कला आणि बुद्ध‌िमत्तेची कसोटी लागणार आहे. अनेक महिला मंडळाच्या सदस्यांनी या स्पर्धेसाठी आपला प्रवेश फॉर्म भरून दिला आहे. ज्या ज्या सहभागी होत आहेत, त्या आपल्या मैत्रिणींनाही स्पर्धेत येण्यासाठी आग्रह करू लागल्या आहेत.

शहरातील २६ ते ४५ वयोगटातील गृहिणी या सौंदर्यस्पर्धेत सहभागी होऊ शकतील. स्पर्धेत सौंदर्य आणि अदाकारी अर्थात कला अन् बुद्धिमत्तेची कसोटी लागणार आहे. त्यामुळे तुमच्यातील कलाकाराला जागे करा आणि सज्ज व्हा ‘मिसेस औरंगाबाद’ बनण्यासाठी. स्पर्धेसाठी ‘मिसेस औरंगाबाद’ किताबासह आठ पारितोषिके ठेवण्यात आली आहेत. उपविजेती, तृतीय, चौथा व पाचवा क्रमांक अशी पाच पारितोषिके आहेत. याशिवाय बेस्ट ड्रेस, बेस्ट मेकअप, बेस्ट परफॉर्मन्स अशी तीन विशेष पारितोषिकेही दिली जाणार आहेत. ‘मिसेस औरंगाबाद’ ही स्पर्धा २० ऑगस्ट रोजी होणार आहे. स्पर्धकाला चार राऊंडची परीक्षा द्यावी लागणार आहे. यात इंट्रोडक्शन राऊंड, रॅम्पवॉक, कोणताही एक कलाप्रकार तीन मिनिटांत सादर करणे व त्यानंतर प्रशोनत्तराचा राऊंड होईल. त्यातून परीक्षक विविध पारितोषिकांसाठी विजेत्यांची निवड करतील.

स्पर्धेत सहभागी होण्यासाठी तुम्ही महाराष्ट्र टाइम्सच्या उस्मानपुरा येथील कार्यालयात येऊन नोंदणी करू शकता. अथवा याशिवाय तुम्हाला ९८२२६३०५५५ या क्रमांकावर संपर्क करूनही नोंदणी करता येईल.

शरीर , मन आणि बुद्धी अशी त्रिस्तरीय पातळीवरील नाविण्यपूर्ण स्पर्धा अनुभवण्याची संधी ' मटा मिसेस औरंगाबाद ' स्पर्धेच्या निमित्ताने विवाहित स्त्रियांना मिळत आहे. आपल्या रोजच्या जीवनात उत्साह आणि नाविण्य भरण्याची अशी संधी एकदा तरी आपण अनुभवावी असे वाटते. मी तर भाग घेतला आहे आपणही या स्पर्धेत अवश्य भाग घ्यावा. चला तर मग या संधीचे सोने करू या. एक नवा अनुभव घेऊ या आणि स्वतःचा नव्याने शोध घेऊया.

अनघा चौधरी, स्पर्धक

मोबाइल अॅप डाउनलोड करा आणि राहा अपडेट