सौर पथदिव्यांबद्दल जातेगावात तक्रार

August 22, 2017, 2:30 pm

≫ Next: क्रुझरसह दारूचा साठा वैजापुरात जप्त

≪ Previous: ‘यू-टर्न’ निर्णयांचा शिक्षणात अडसर

$

0

0

म. टा. प्रतिनिधी, फुलंब्री
तालुक्यातील जातेगाव येथील ग्रामंपंचायतीतर्फे साैर पथदिव्यांवर दाेन लाख रुपये खर्च करण्यात आला. परंतु, या पैकी दाेन पथदिवे गावात, तर अाठ गावाबाहेर लावले आहेत. एवढा पैसा खर्च करून गावाला लाभ होत नसल्याबद्दल गटविकास अधिकारी यांनी ग्रामसेवकास पत्राद्वारे विचारणा केली आहे.
जातेगाव येथील ग्रामपंचायत सदस्य साेमिनाथ विश्वनाथ करपे यांनी याप्रकरणी गटविकास अधिकाऱ्यांकडे लेखी तक्रार केली होती. अाठ पथदिवे गावाबाहेर वस्ती नसलेल्या ठिकाणी लावल्याचे त्यात म्हटले आहे. या तक्रारीची विस्तार अधिकारी यांच्यामार्फत चाैकशी व पाहणी करण्यात आली. त्यानंतर ग्रामसेवकास लेखी पत्र देऊन विचारणा करण्यात आली आहे. सहा महिन्यांपूर्वी ही चौकशी झाली असूनही आपण पथदिवे गावात लावलेले नाहीत. हे पथदिवे सात दिवसाच्या अात गावात बसवावेत, ते सर्व चालू स्थितीत असावेत, अन्यथा कारवाई केली जाईल, असे या पत्रात म्हटले आहे. पण, या पत्राकडे ग्रामसेवकाने दुर्लक्ष केल्याचा गावकऱ्यांचा आरोप आहे. निम्म्या पथदिव्यांच्या बॅटऱ्या चाेरीस गेल्या. तर काहींचे साैर पॅनल गायब अाहेत, करपे यांनी सांगितले.

मोबाइल अॅप डाउनलोड करा आणि राहा अपडेट

---

क्रुझरसह दारूचा साठा वैजापुरात जप्त

August 22, 2017, 2:30 pm

≫ Next: एकतर्फी प्रेमातून विद्यार्थिनीला मारहाण

≪ Previous: सौर पथदिव्यांबद्दल जातेगावात तक्रार

$

0

0

म. टा. प्रतिनिधी, वैजापूर
दरोडा प्रतिबंधक विभागाने सोमवारी दुपारी तालुक्यातील राहेगाव शिवारात लासूरगाव रस्त्यावर अवैध दारूचा साठा घेऊन जाणारी क्रुझर पकडली. या वाहनात देशी दारूचे २६ हजार ४०० रुपये किंमतीचे ११ बॉक्स आढळून आले. पोलिसांनी दारू व क्रुझर असा चार लाख १४ हजार रुपये किंमतीचा मुद्देमाल हस्तगत केला. याप्रकरणी लासूरस्टेशन येथील हेमंत जीवनलाल जैस्वाल (वय २६) याच्याविरुद्ध गुन्हा नोंदवण्यात आला आहे.
तालुक्यातील राहेगाव शिवारात लासूरगाव रस्त्यावरून अवैध दारूची वाहतूक होत असल्याची माहिती पोलिसांना मिळाली होती. त्यावरून दरोडा प्रतिबंधक विभागाच्या वैजापूर विभागातील पोलिस नाईक अविनाश भास्कर, अनिल दाभाडे, हरीष सोनवणे, गुलचंद निकम, संतोष धाडबळे, कर्तारसिंह राजपूत यांनी दुपारी एक वाजता या रस्त्यावरील वाहनांची तपासणी केली. त्यावेळी लासूरगावकडे जाणाऱ्या क्रुझरमध्ये (एम एच २० डी जे ०९९१) देशी दारूचे विनापरवाना ११ बॉक्स आढळून आले. ही दारू चोरटी विक्री करण्यासाठी घेऊन जात असल्याने पोलिसांनी जप्त केली. याप्रकरणी अविनाश भास्कर यांच्या फिर्यादीवरून आरोपीविरुद्ध मुंबई दारूबंदी कायद्यानुसार वैजापूर पोलिस ठाण्यात गुन्हा दाखल करण्यात आला आहे. पुढील तपास पोलिस नाईक सचिन सोनार हे करीत आहे.

मोबाइल अॅप डाउनलोड करा आणि राहा अपडेट

एकतर्फी प्रेमातून विद्यार्थिनीला मारहाण

August 22, 2017, 2:30 pm

≫ Next: स्पॉट अॅडमिशनचा गोंधळ

≪ Previous: क्रुझरसह दारूचा साठा वैजापुरात जप्त

$

0

0

म. टा. प्रतिनिधी, औरंगाबाद
एकतर्फी प्रेमातून १९ वर्षांच्या विद्यार्थिनीला रोडरोमियोने भर रस्त्यात अश्लील शिवीगाळ करीत मारहाण केली. हा प्रकार सोमवारी दुपारी साडेबारा वाजता सिडको एन ७ भागात घडला. या प्रकरणी संशयित आरोपीविरुद्ध सिडको पोलिस ठाण्यात विनयभंगाचा गुन्हा दाखल करण्यात आला आहे.
पीडित विद्यार्थीनी सोमवारी कॉलेजला पायी जात होती. त्यावेळी संशयित आरोपी सचिन दत्ता पंडित (रा. अयोध्यानगर, सिडको एन ७) याने दुचाकीवर येऊन तिचा रस्ता अडवला. माझ्यावर प्रेम कर, अशी मागणी त्याने केली. त्याला विद्यार्थीनीने नकार दिल्यानंतर त्याने अश्लील शिवीगाळ करीत मारहाण केली. हा प्रकार आई-वडिलांना सां‌गितला, तर तुझे कॉलेजला येणे बंद करून ठार मारण्याची धमकी दिली. याप्रकरणी मुलीने दिलेल्या तक्रारीवरून सिडको पोलिस ठाण्यात विनयभंग, रस्ता अडवणे, मारहाण आदी कलमानुसार गुन्हा दाखल करण्यात आला आहे. याप्रकरणी उपनिरीक्षक एस. पी. मोरे हे तपास करीत आहेत.

मोबाइल अॅप डाउनलोड करा आणि राहा अपडेट

स्पॉट अॅडमिशनचा गोंधळ

August 22, 2017, 2:30 pm

≫ Next: ‘सीसीटीव्ही’विना विभाग अपंग

≪ Previous: एकतर्फी प्रेमातून विद्यार्थिनीला मारहाण

$

0

0

म. टा. प्रतिनिधी, औरंगाबाद
डॉ. बाबासाहेब आंबेडकर मराठवाडा विद्यापीठाने पदव्युत्तर वर्ग प्रवेशाचा शेवटचा दिवस २३ ऑगस्ट असून आता तात्काळ प्रवेश प्रक्रियेची तयारी सुरू आहे. ‘स्पॉट अॅडमिशन’ला संबंधित विद्यार्थ्याने विद्यापीठात हजर राहणे बंधनकारक आहे. या नियमाचा ग्रामीण भागातील विद्यार्थ्यांना फटका बसणार असल्यामुळे संबंधित कॉलेज प्रशासनाने अगोदरच अर्ज भरून प्रवेशाची तयारी केली आहे. तर वारंवार फोन करूनही विद्यापीठाचा मदत कक्ष ‘बिझी’ असल्याने विद्यार्थी व कॉलेज प्रतिनिधी हवालदिल झाले आहेत.
पदव्युत्तर प्रवेश प्रक्रिया केंद्रीय पद्धतीने राबवण्यासाठी विद्यापीठाने प्रवेशपूर्व परीक्षा (सीईटी) घेतली. १४ ऑगस्ट रोजी ‘पीजी’ तासिका सुरू करण्याचे नियोजन होते, मात्र पदव्युत्तर प्रवेशाची पहिली यादी, दुसरी यादी, गुणवत्ता यादी जाहीर झाल्यानंतर ‘स्पॉट अॅडमिशन’ होणार आहेत. प्रक्रिया शेवटच्या टप्प्यात येऊनही पुरेसे प्रवेश झाले नसल्याने विद्यापीठ प्रशासनाने ‘सीईटी’ न दिलेल्या विद्यार्थ्यांनाही प्रवेश देण्याचा निर्णय घेतला. जवळपास साडेचार हजार विद्यार्थी शिक्षणापासून वंचित राहू नये म्हणून स्पॉट अॅडमिशन देत असल्याचे कुलगुरूंनी म्हटले आहे. सीईटी दिली नसेल, पण किमान नोंदणी असलेल्या विद्यार्थ्यांना प्रवेश देण्यात येईल असा धाडसी निर्णय कुलगुरूंनी अगोदर घेतला होता. या निर्णयाला शेवटच्या टप्प्यात फाटा देत ‘स्पॉट अॅडमिशन’द्वारे विद्यार्थ्यांना सामावून घेण्याचे नियोजन आहे. येत्या २४ ऑगस्ट रोजी विद्यापीठ परिसरातील संबंधित विभागात विद्यार्थ्याला अर्ज जमा करावा लागणार आहे. खुल्या प्रवर्गातील विद्यार्थ्याला ३०० आणि राखीव प्रवर्गातील विद्यार्थ्याला २०० रुपये शुल्क आहे. या अर्जातून संवर्गनिहाय व गुणवत्तानिहाय यादी तयार करण्यात येईल. ‘स्पॉट अॅडमिशन’ संबंधित कॉलेजात करणे आवश्यक असताना विद्यापीठ कॅम्पसमध्ये विद्यार्थ्यांना अर्ज देणे बंधनकारक केले आहे. सध्या कॉलेज व विद्यापीठातील विभागांना प्रवेश वाढवण्याची गरज आहे. त्यामुळे प्रवेश क्षमता पूर्ण करण्यासाठी त्यांची धडपड सुरू आहे. इतर जिल्ह्यातील विद्यार्थ्यांनी औरंगाबादला जाण्यास नकार दिल्याने काही कॉलेजांनी विद्यार्थ्यांचे अर्ज ‘स्पॉट अॅडमिशन’च्या दिवशी विद्यापीठात जमा करण्याची व्यवस्था केली आहे. या प्रकारात आणखी गोंधळ होण्याची शक्यता आहे. प्रत्येक निर्णयात उलटसुलट निर्णय घेऊन विद्यापीठ प्रशासनाने प्रवेश प्रक्रिया जटील केल्याचा आरोप कॉलेज प्रशासनाने केला आहे. विद्यापीठाने प्रवेश प्रक्रियेसाठी मदत कक्ष सुरू केला; पण दूरध्वनी दिवसभर बिझी असतो आणि कुणी फोन उचलत नसल्याने विद्यार्थी व कॉलेजचे प्रतिनिधी वैतागले आहेत.
दरम्यान, स्पॉट अॅडमिशन प्रक्रिया महाविद्यालयात राबवण्यात यावी अशी मागणी व्यवस्थापन परिषदेचे माजी सदस्य भाऊसाहेब राजळे व माजी अधिसभा सदस्य डॉ. लक्ष्मीकांत शिंदे यांनी केली. याबाबत शिष्टमंडळाने मंगळवारी कुलगुरू डॉ. बी. ए. चोपडे यांची भेट घेतली. विद्यापीठातील ‘स्पॉट अॅडमिशन’ झाल्यानंतर संबंधित महाविद्यालयात प्रवेश प्रक्रिया राबवण्याबाबत निर्णय घेण्यात येईल असे आश्वासन चोपडे यांनी दिले.

प्राधान्य कुणाला?
तात्काळ प्रवेश प्रक्रियेत (स्पॉट अॅडमिशन) ‘प्रथम येणाऱ्यास प्रथम प्राधान्य’ या तत्त्वावर प्रवेश मिळतो. मात्र, पीजी प्रवेशात संवर्गनिहाय व गुणवत्तानिहाय यादी जाहीर करून प्रवेश देण्याची अट विद्यापीठाने घातली आहे. नवीन नियम कुणी आणि कशासाठी तयार केला असा सवाल विद्यार्थी व कॉलेजांनी केला आहे. स्पॉट अॅडमिशन पूर्वीच्या नियमानुसार करण्याची विद्यार्थ्यांची मागणी आहे.

मोबाइल अॅप डाउनलोड करा आणि राहा अपडेट

‘सीसीटीव्ही’विना विभाग अपंग

August 22, 2017, 2:30 pm

≫ Next: जावयाचा खून; पाचजण दोषी

≪ Previous: स्पॉट अॅडमिशनचा गोंधळ

$

0

0

‘सीसीटीव्ही’विना विभाग अपंग
आसनव्यवस्थाही तोकडी; अपंगांना उभे राहावे लागते तासन् तास
म. टा. प्रतिनिधी, औरंगाबाद
शासकीय वैद्यकीय महाविद्यालय व रुग्णालयाच्या (घाटी) बाह्यरुग्ण विभागामध्ये काही दिवसांपूर्वी अपंग संघटनेच्या जिल्हाध्यक्षाला सुरक्षा रक्षकाकडून ज्या ठिकाणी धक्काबुक्की झाली त्या अपंग विभागाच्या परिसरामध्ये सीसीटीव्ही कॅमेराच नसल्याचे स्पष्ट झाले आहे. घाटीच्या ‘ओपीडी बिल्डिंग’मध्ये इतर ठिकाणी कॅमेरे बसविण्यात आलेले आहेत; परंतु आठवड्यातील दोन दिवस तब्बल ४०० अपंग प्रमाणपत्रासाठी तासन् तास रांगा लावतात, त्या ठिकाणी कॅमेरे का बसविण्यात आलेले नाही, असा सवाल उपस्थित होत आहे.
घाटीच्या बाह्यरुग्ण विभागामध्ये दररोज तीन हजार रुग्ण उपचारासाठी येतात. त्यातच अंध, अपंग, मतिमंदांसह इतर प्रकारचे अपंगत्व असलेल्या व्यक्तींना वेगवेगळ्या दिवशी प्रमाणपत्रही दिले जाते. त्यामुळे आठवड्याचे सर्व सहा दिवस ‘ओपीडी बिल्डिंग’मध्ये मोठ्या प्रमाणावर गर्दी असते. या पार्श्वभूमीवर या इमारतीमध्ये ठिकठिकाणी सीसीटीव्ही कॅमेरे बसविण्यात आलेले आहेत. मात्र, ज्या अपंग विभागाच्या वॉर्ड क्रमांक १७-१८ मध्ये दोन दिवसांत ४०० पेक्षा जास्त अपंग प्रमाणपत्रासाठी येतात व तासन् तास रांगा लावतात, त्या ठिकाणी एकही कॅमेरा बसविण्यात आलेला नाही. त्यामुळेच दोन आठवड्यांपूर्वी प्रहार अपंग संघटनेच्या जिल्हाध्यक्षाला झालेल्या धक्काबुक्की व गोंधळाचा प्रसंग कॅमेऱ्यात कैद झालेला नाही. त्याचवेळी, या विभागातील आसनव्यवस्थाही अत्यंत तोकडी आहे. विभाग परिसरात असलेल्या काही बाकड्यांवर फार तर ५० अपंगांना बसण्यासाठी जागा मिळते; परंतु तब्बल १५० अपंगांना अक्षरशः दोन-तीन तास रांगेत उभे राहावे लागते व विनाकारण त्रास सहन करावा लागतो. त्यामुळे अपंगांसाठी पुरेशी आसनव्यवस्था करावी व तात्काळ सीसीटीव्ही कॅमेरे बसवावेत, अशी मागणी प्रहार अपंग संघटनेचे जिल्हाध्यक्ष शिवाजी गाडे यांनी केली आहे.

मोबाइल अॅप डाउनलोड करा आणि राहा अपडेट

जावयाचा खून; पाचजण दोषी

August 22, 2017, 2:30 pm

≫ Next: येवला रस्त्यावर वाहतुकीची कसरत

≪ Previous: ‘सीसीटीव्ही’विना विभाग अपंग

$

0

0

म. टा. प्रतिनिधी, औरंगाबाद
विरोधानंतरही प्रेमविवाह केलेला तरूण आपल्या बाळाला पाहण्यासाठी आल्याच्या रागातून बेदम मारहाण करीत जावयाचा खून करणाऱ्या सासू-सासऱ्यासह पाचजणांना जिल्हा व सत्र न्यायाधीश व्ही. व्ही. पाटील यांनी दोषी ठरवले. ‘तुम्हाला फाशीची शिक्षा का देण्यात येऊ नये’ अशी विचारणा करत कोर्टाने आरोपींना म्हणणे मांडण्यासाठी संधी दिली. या प्रकरणी गुरुवारी होणाऱ्या सुनावणीत शिक्षा जाहीर होण्याची शक्यता व्यक्त होत आहे.
औरंगाबाद जिल्ह्याच्या कन्नड तालुक्यातील खेडी येथील वाहनचालक सय्यद अजीम सय्यद सलीम (वय २५) याची शेजारच्या शमिमा या तरुणीशी मैत्री झाली व मैत्रीचे रूपांतर प्रेमामध्ये झाले. शमिमाच्या कुटुंबाचा विरोध असूनही दोघांनी पळून जाऊन नोंदणी पद्धतीने लग्न केले. लग्नानंतर शमिमा सासरी राहू लागली. विवाहानंतर घरगुती कार्यक्रमासाठी शमिमाचा मेव्हणा आयुब खान तिला माहेरी घेऊन गेला. दरम्यान, शमिमाचे आई-वडील व मेव्हाण्यांनी क्षुल्लक कारणावरून सय्यद अजीम व त्याच्या आई-वडिलांना शिविगाळ करत जीवे मारण्याची धमकीही दिली होती. तसेच शमिमाच्या आईने पिशोर पोलिस ठाण्यात अजीमने मुलीला पळवून नेऊन लग्न केल्याची तक्रार दिली होती. या तक्रारीवरून पोलिसांनी अजीमसह कुटुंबाला बोलवून घेतले होते व वस्तुस्थिती जाणून सोडून दिले होते. १९ जानेवारी २०१४ रोजी शमिमाने मुलीला जन्म दिला, २२ फेब्रुवारी रोजी शमिमा मुलीला पोलिओ डोस पाजण्यासाठी घेऊन गेली असता, सय्यद अजीम हा त्या पोलिओ केंद्रावर आला आणि त्याने बाळाला पाहिल्याचे शमीमाच्या आईच्या लक्षात आले. तिने सय्यद अजीमला शिविगाळ करत मारहाण केली. गोंधळ ऐकून शमिमाचे भाऊ, वहिणी, मेहुणा, बहीण घराबाहेर धावत आले, त्यांनीही लाठ्या-काठ्या, कुऱ्हाडीने अजीमला बेदम मारहाण केली. गंभीर जखमी अवस्थेत सय्यद अजीमला उपचारासाठी घाटी हॉस्पिटलमध्ये दाखल करण्यात आले असता, वैद्यकीय अधिकाऱ्यांनी तपासून मृत घोषित केले.
मृत अजीमचे वडील सय्यद सलीम सय्यद अली यांच्या तक्रारीवरून पिशोर पोलिस ठाण्यात कदीर खान मजीद खान (वय ७०), अश्रफ खान कदीर पठाण (वय २८), मुश्रफ खान कदीर पठाण (वय ३२), शकिला बी कदीर खान पठाण (वय ६५), जोहर खान कदीर खान पठाण, मृताची पत्नी शमिमा बी सय्यद अजीम, रिजवान बी मुश्रफ (वय २५), जावेद शेख आयुब (वय २६) व जहीरखान कदीर खान पठाण या नऊजणांविरोधात खुनाचा गुन्हा दाखल करण्यात आला. पिशोर पोलिसांनी तपास करुन कोर्टात दोषरोपपत्र दाखल केले. खटल्यावेळी, सहाय्यक लोकअभियोक्ता अरविंद बागुल यांनी ११ साक्षीदारांचे जबाब नोंदविले. यात तीन प्रत्यक्षदर्शी साक्षीदारांची साक्ष महत्त्वाची ठरली.

कोर्टाने चौघांना ठरवले निर्दोष

दोन्ही बाजुंच्या युक्तिवादानंतर व साक्ष-पुराव्यानंतर कोर्टाने कदीर खान पठाण, अश्रफ पठाण, मुश्रफ पठाण, शकिला बी पठाण, जोहर पठाण या पाचजणांना दोषी ठरविले, तर उर्वरित चारजणांना निर्दोष ठरवले. या खटल्याच्या शिक्षेवर गुरुवारी (२४ ऑगस्ट) सुनावणी होणार आहे.

मोबाइल अॅप डाउनलोड करा आणि राहा अपडेट

येवला रस्त्यावर वाहतुकीची कसरत

August 22, 2017, 2:30 pm

≫ Next: महालक्ष्मीच्या मुखवट्यांनी वेधले लक्ष

≪ Previous: जावयाचा खून; पाचजण दोषी

$

0

0

म. टा. प्रतिनिधी, वैजापूर
विनायकराव पाटील महाविद्यालयाकडे जाणाऱ्या येवला रस्त्यावर मोठे खड्डे पडल्याने विद्यार्थी व विद्यार्थिनींना पावसाळ्यात मोठा त्रास सहन करावा लागत आहे. या खड्ड्यात पाणी साचत असल्याने वाहतूक ठप्प होण्याचे प्रकार वारंवार घडत असून अपघात होण्याची भिती आहे. या शिवाय वैजापूर-लाडगाव हा रस्ताही पूर्णपणे खराब झाला आहे.
येवला रस्त्यावर नांदूरमधमेश्वर पाटबंधारे कार्यालयाच्या अलिकडे रस्त्यावर मोठे खड्डे पडले आहेत. त्यामुळे मंगळवारी वाहतुकीला अडथळा झाला. यावेळी महाविद्यालयातील विद्यार्थ्यांना रस्ता पार करतांना मोठी अडचण झाली. पाण्यातून धावणाऱ्या वाहनांमुळे नागरिक व विशेषतः महाविद्यालयीन विद्यार्थ्यांच्या अंगावर पाणी उडून कपडे खराब होण्याचे प्रकार घडत असल्याचे काही विद्यार्थ्यांनी सांगितले आहे. येवला रस्त्याव्यतिरिक्त शिऊर-श्रीरामपूर रस्त्याचा भाग असलेला वैजापूर-लाडगाव हा रस्ता पूर्णपणे खराब झाला आहे. या भागात मोठी नागरी वस्ती असून हॉस्पिटल्स आहेत. त्यामुळे या रस्त्यावर रहदारी जास्त असते. पण रस्त्यावर मोठे खड्डे पडल्याने वाहनधारकाना वाहन चालवताना मोठी कसरत करावी लागते. शिवाय पादचाऱ्यांना जीव मुठीत घेऊन चालावे लागते. सार्वजनिक बांधकाम विभागाने या रस्त्यावरील खड्डे त्वरित बुजवावेत, अशी मागणी होत आहे.

लवकरच टेंडर

महाविद्यालय प्रशासनाने विद्यार्थी हिताचा विचार करून सार्वजनिक बांधकाम विभागाला खड्डे बुजवण्याबाबत पत्र देऊन पाठपुरावा केल्यास कामाला गती मिळून त्रास कमी होऊ शकतो, असे भाजपचे शहर सरचिटणिस सुधाकर डगळे यांनी सांगितले. दरम्यान रस्त्यांच्या या अवस्थेबाबत सार्वजनिक बांधकाम विभागाचे सहायक अभियंता पी. बी. पवार यांना विचारले असता रस्त्यावरील खड्डे बुजवण्यासाठी लवकरच टेंडर काढण्यात येणार असल्याचे त्यांनी सांगितले.

मोबाइल अॅप डाउनलोड करा आणि राहा अपडेट

महालक्ष्मीच्या मुखवट्यांनी वेधले लक्ष

August 22, 2017, 2:30 pm

≫ Next: कंडक्टरचा मृत्यू; पावणेनऊ लाखांची भरपाई

≪ Previous: येवला रस्त्यावर वाहतुकीची कसरत

$

0

0

म. टा. प्रतिनिधी, औरंगाबाद
महालक्ष्मीच्या मुखवट्यांनी बाजार सजला आहे. बाजारात मुखवट्यांच्या वैविध्यपूर्ण सादरीकरणामुळे ठिकठिकाणी ग्राहकांचे चित्त वेधले जात आहे. गणपती उत्सव दोन दिवसांवर तर गणेशस्थापनेनंतर ४ दिवसांनी यंदा गौरी (महालक्ष्मींचे) आगमन होणार आहे. बाजारात या मुखवट्यांह गौरी-गणपतींसाठी लागणारे विविध साहित्य खरेदीसाठी गर्दी झाली आहे. यंदा महालक्ष्म्यांच्या मुखवटे, दागदागिने, कोठ्या, वस्त्रप्रावरणे आदींवर जीएसटी (वस्तू व सेवा कर) चे सावट आहे.
औरंगपुरा येथील व्यापारी मधुकर चौधरी यांनी सांगितले, ‘यंदा मुखवट्यांच्या किंमतीत कमीतकमी १० टक्के वाढ झाली आहे. मुखवट्यांचे दर यंदा ५५१ रुपयांपासून ते १२०० रुपयांपर्यत आहेत. यावर्षी सणावर दुष्काळाचे सावट असल्याचे बोलले जात होते, परंतु दोन दिवसांपासून झालेल्या पावसाने बाजारात चैतन्य निर्माण केले आहे. मराठवाड्यात तर गणपती उत्सवादरम्यान महालक्ष्मी घरोघरी बसवण्याची प्रथा आहे. हा एक वार्षिक उत्सव असल्याने यात घरोघरी उत्साहाचे, चैतन्याचे वातावरण असते. या सणासाठी खरेदी करताना गृहिणीदेखील उत्साही असतात व तिचा हात खरेदीसाठी मोकळा असतो. साड्या, कोठ्या, दागदागिने, महालक्ष्म्यांच्या बाळांचे कपडे, विविध अलकांरिक वस्तू, सजावटीसाठी लागणारे मखर आदी बाजारात आले आहेत.
जीएसटी लागू झाल्याने वस्तू महागल्या आहेत. दागदागिन्यांच्या किंमती १२ टक्क्यांनी, कोठ्या- मखर- मुखवटे १८ टक्के आणि इतर वस्तू १५ टक्क्यांनी महाग झाल्या आहेत. दागदागिन्यांमध्ये कंबरपट्टा, मेखला, हार, चपलाहार, मुकुट व विविध प्रकार १५० पासून ५०० रुपयांपर्यंत उपलब्ध आहेत. कोठ्या ५०० पासून १५०० रुपयांपर्यंत उंची आणि आकारानुसार उपलब्ध आहेत. बाळांचे कपडे ३०० ते ५०० रुपयांपर्यंत, महालक्ष्मींचे हात २५० ते ४०० रुपयांपर्यंत उपलब्ध आहेत, असे ऋतुजा चौधरी यांनी सांगितले. आवड, रंगसंगती, आकार आणि दर्जा यानुसार विविध वस्तू आहेत. वस्तू महाग असल्या तरी हौसेपुढे मोल नाही, या उक्तीनुसार खरेदी होत आहे. पुढील दोन दिवसांत अधिक उत्साह वाढेल, असे मधुकर चौधरी यांनी सांगितले.
बाजारात मखर, विद्युत माळा, पाना-फुलांच्या झिरमाळ्या, आकर्षक पडदे, पताका, हार, कागदी साहित्य, स्टेशनरी साहित्य, रांगोळी या सजावटीच्या साहित्याबरोबरच अगरबत्ती, कापूर, धूप या पूजेच्या साहित्यांबरोबरच नारळ, फळे, गौरीसमोर ठेवण्यासाठी फराळ यांचीही दालने सजली आहेत. गुलमंडी, रंगारगल्ली, औरंगपुरा, या भागात तर खरेदीसाठी उत्साह आहे, हा उत्साह बुधवार-गुरुवारनंतर अधिक वाढेल, असे तेथील व्यापारी सांगतात.

मोबाइल अॅप डाउनलोड करा आणि राहा अपडेट

---

कंडक्टरचा मृत्यू; पावणेनऊ लाखांची भरपाई

August 22, 2017, 2:30 pm

≫ Next: पैठणमध्ये दुचाकींविरुद्ध कारवाई

≪ Previous: महालक्ष्मीच्या मुखवट्यांनी वेधले लक्ष

$

0

0

म. टा. प्रतिनिधी, औरंगाबाद
खासगी लक्झरी बस व कन्टेनरच्या अपघातात मृत्युमुखी पडलेले बसमधील कंडक्टर संतोष देवीलाल गायकवाड यांच्या वारसांना लक्झरी बसचे मालक व विमा कंपनी यांनी संयुक्तरित्या ८ लाख ८५ हजार ४८० रुपये १२ टक्के व्याजासह अदा करण्याचा आदेश कामगार आयुक्त डी. व्ही. जोशी यांनी दिले.
संतोष गायकवाड हे एका खासगी लक्झरी बसवर कंडक्टर म्हणून काम करीत होते. ही लक्झरी बस ३० मे २०१६ रोजी औरंगाबादहून मुंबईला जात होती. नेवासा तालुक्यातील शिंगवे तुकाई गावाच्या शिवारातील सिंहगड हॉटेलजवळ बस चालकाने रात्री साडेअकराच्या सुमारास उभ्या असलेल्या कंटेनरला पाठीमागून जोरदार धडक दिली. यात संतोष गायकवाड हे गंभीर जखमी झाले होते. त्यांना उपचारासाठी नेत असताना त्यांचा मृत्यू झाला होता. दरम्यान, नुकसान भरपाईसाठी संतोष गायकवाड यांच्या वारसांनी कामगार कोर्टात अ‍ॅड. संदीप राजेभोसले यांच्यामार्फत दावा दाखल केला असता कोर्टाने वारसांना ८ लाख ८५ हजार ४८० रुपये १२ टक्के व्याजाने देण्याचे आदेश दिले.

मोबाइल अॅप डाउनलोड करा आणि राहा अपडेट

पैठणमध्ये दुचाकींविरुद्ध कारवाई

August 22, 2017, 2:30 pm

≫ Next: महसूल अधिकाऱ्यांची वानवा

≪ Previous: कंडक्टरचा मृत्यू; पावणेनऊ लाखांची भरपाई

$

0

0

म. टा. प्रतिनिधी, पैठण
नियमांचे उल्लंघन करणाऱ्या जवळपास पन्नास मोटरसायकलच्या विरोधात मंगळवारी पैठण पोलिसांनी कार्यवाही केली. ट्रिपल सिट, फॅन्सी नंबर, प्रेशर हॉर्न व विनानंबरच्या वाहनावर कार्यवाही सुरू राहणार असल्याची माहिती पोलिस निरीक्षक अशोक गिरी यांनी दिली.
गेल्या काही दिवसापासून शहरात बेशिस्त वाहतूक व्यवस्था वाढली आहे. त्याचा जेष्ठ नागरिक, महिला, लहान मुलांना रस्त्यावरून चालताना त्रास होत असल्याचे पोलिस अधीक्षक डाॅ. आरती सिंह यांच्या उपस्थितीत झालेल्या शांतता कमिटीच्या बैठकीत नागरिकांनी उपस्थित केला होता. ग्रामीण पोलिस अधीक्षकांनी याची गंभीर दखल घेऊन नियमांचे उल्लंघन करणाऱ्या वाहनांवर कारवाईचे आदेश दिले होते. त्यानुसार पोलिसांनी मंगळवारी शिवाजी चौक, बसस्थानक परिसर व कोर्डरोडवर परिसरात ट्रिपल सिट, फॅन्सी नंबर, प्रेशर हॉर्न व विनानंबरच्या जवळपास पन्नास मोटरसायकलविरुद्ध दंडात्मक कारवाई केली.
या पथकात राजेंद्र पंडित, लालचंद नागलोत, नंदू सोनवणे, सोमनाथ थेटे, योगेश खमाट यांचा समावेश होता. दरम्यान, नियमांचे उल्लंघन करणाऱ्या व शहरात अवैध धंदे करणाऱ्याच्या विरोधात कारवाई सुरू राहणार असल्याची माहिती पोलिस निरीक्षक अशोक गिरी यांनी दिली.

मोबाइल अॅप डाउनलोड करा आणि राहा अपडेट

महसूल अधिकाऱ्यांची वानवा

August 22, 2017, 2:30 pm

≫ Next: मृणाल, मानसी, संस्कृती, रिची विजेत्या

≪ Previous: पैठणमध्ये दुचाकींविरुद्ध कारवाई

$

0

0

मोतीचंद बेदमुथा, उस्मानाबाद
उस्मानाबाद जिल्ह्यामध्ये महसूल यंत्रणेतील महत्त्वाची पदे रिक्त आहेत. यामध्ये उपजिल्हाधिकारी पदाची चार, नायब तहसीलदार पदाची दहा आणि कर्मचाऱ्यांची ४९ पदे रिक्त आहेत. जिल्हा अधीक्षक कृषी अधिकारी व जिल्हा उपनिबंधक ही पदेही रिक्तच आहेत. सातत्याने पाठपुरावा केल्यानंतरही ही पदे रिक्त आहेत. त्यामुळे जनतेच्या कामांचा खोळंबा होत असून, ही पदे तातडीने भरण्याची मागणी होत आहे.
उस्मानाबाद जिल्ह्यात उपजिल्हाधिकाऱ्यांची चार पदे गेल्या अनेक दिवसांपासून रिक्त आहेत. यामध्ये उपजिल्हाधिकारी रोहयो, भूसंपादन, पुनर्वसन, पुरवठा विभाग या महसूल यंत्रणेतील महत्त्वाच्या विभागांचा समावेश आहे. याशिवाय १० नायब तहसीलदाराच्या जागा रिक्त आहेत. जिल्ह्यात महसूल यंत्रणेतील विविध विभागात कर्मचाऱ्यांची एकूण ४५६ पदे असून यातील ४९ पदे रिक्त आहेत. अधिकारी व कर्मचारी यांच्या रिक्त पदामुळे त्याचा परिणाम येथील कामकाजावर होऊ लागला आहे. कामाचा वेग मंदावल्यामुळे जनतेचा रोष उपस्थित अधिकाऱ्यांना सहन करावा लागत आहे. याशिवाय रिक्त अधिकाऱ्यांच्या कामाचा बोजा अन्य अधिकाऱ्यांकडे सोपविण्यात आल्याने त्यांच्याकडील कामेही प्रलंबित राहात आहेत. कामाचा ताण वाढत असल्याने त्याचा परिणाम त्यांच्या कार्यक्षमतेवर होवू लागला आहे. याशिवाय जिल्ह्यातील महत्त्वाच्या अनेक ठिकाणी अधिकाऱ्यांची नियुक्ती रखंडल्याने येथील कामांची प्रगती मंदावली आहे.

कामे मंदगतीने
जिल्हा अधीक्षक कृषी अधिकारी हे पद गेल्या अनेक महिन्यापासून रिक्त असल्याने या कार्यालयाकडून होणारी जलयुक्त शिवार, ठिबक, शेततळे फळबाग ही कामे मंदावली आहेत. उस्मानाबादेत खासगी सावकारीने जनता त्रस्त आहे. जिल्हा सहकारी बँकेवर नियंत्रण ठेवण्याचे काम जिल्हा उपनिबंधक यांचेकडे आहे. मात्र, येथील जिल्हा उपनिबंधक हे पद बऱ्याच काळापासून रिक्त आहे.परिणामी जिल्ह्यात खासगी सावकारी सुरू आहे. कृषी अधीक्षक व जिल्हा उपनिबंधक या पदावर प्रभारी अधिकारी असून ते सवडीनुसार कारभाराचा गाडा हाकत आहेत. जिल्ह्यात सध्या दुष्काळजन्य स्थिती आहे, याशिवाय कर्जमाफी पीकविमा अनुदान ही महत्त्वाची कामांच्या अमलबजावणीसाठी अपुरे मनुष्यबळ असल्याने ही कामे संथ गतीने होत असून त्याचा फटका ग्रामस्थांना बसणार आहे.

पाठपुराव्यानंतरही दुर्लक्ष
उस्मानाबाद जिल्हा हा गेल्या पाच वर्षांपासून दुष्काळाचा सामना करीत आहे. जिल्ह्यात आत्महत्या वाढत आहेत. बळीराजा चेतना अभियान जिल्ह्यात राबविण्यात येत आहे. या सर्व उपक्रमांच्या प्रभावी अंमलबजावणीसाठी शासकीय अधिकारी व कर्मचाऱ्यांची नितांत गरज आहे. जिल्हा प्रशासनाकडून ही बाब वारंवार शासनाच्या व जिल्हा पालक मंत्री शिवाय लोकप्रतिनिधी यांच्या निदर्शनास आणून देण्यात आली आहे. मात्र, शासनाकडून याकडे दुर्लक्ष केले जात आहे. उस्मानाबाद जिल्हा हा शासनाच्या विविध योजना राबविण्यात अग्रभागी असताना, शासनाकडून येथील अधिकारी व कर्मचारी भरतीकडे दुर्लक्ष होत आहे.

उस्मानाबाद जिल्ह्यात शासकीय अधिकारी व कर्मचारी यांच्या रिक्त जागेबाबत सरकारला वारंवार कळवले आहे. प्रशासकीय पातळीवर व लोकप्रतिनिधी यांच्याकडे याबाबत पाठपुरावा सुरू आहे.
- राधाकृष्ण गमे,
जिल्हाधिकारी, उस्मानाबाद

मोबाइल अॅप डाउनलोड करा आणि राहा अपडेट

मृणाल, मानसी, संस्कृती, रिची विजेत्या

August 22, 2017, 2:30 pm

≫ Next: खुलताबाद ठाण्याच्या नव्या इमारतीला तडे

≪ Previous: महसूल अधिकाऱ्यांची वानवा

$

0

0

मृणाल, मानसी, संस्कृती, रिची विजेत्या
मुलांच्या गटात आर्यन, श्रीपाद, साईनाथ, निखिल अव्वल
शालेय जिम्नॅस्टिक्स स्पर्धा
म. टा. प्रतिनिधी, औरंगाबाद
जिल्हा क्रीडा कार्यालय व महापालिका यांच्या संयुक्त विद्यमाने आयोजित आंतरशालेय जिम्नॅस्टिक्स स्पर्धेत मृणाल वासडीकर, आर्यन नहाते, मानसी देशमुख, श्रीपाद हराळ, संस्कृती बोराडे, साईनाथ जाधव, रिची भंडारी, निखिल सयाजी यांनी विजेतेपद पटाकाविले.
मराठवाडा सांस्कृतिक मंडळावर मंगळवारी ही स्पर्धा झाली. मुलींच्या चौदा वर्षांखालील गटात मृणाल वासडीकर, संस्कृती बोर्डे, आर्यन नहाते, साईनाथ जाधव यांनी, तर १७ वर्षांखालील मुलींच्या गटात मानसी देशमुख, रिची भंडारी, निखिल सयाजी व श्रीपाद हराळ यांनी यशस्वी कामगिरी केली. शहर व ग्रामीण अशा दोन्ही विभागांत घेण्यात आलेल्या या स्पर्धेत १८ शाळा, महाविद्यालय संघांनी सहभाग घेतला होता. नगरसेवक विकास पेडके यांच्या हस्ते स्पर्धेचे उद्घाटन करण्यात आले. या प्रसंगी रामकृष्ण लोखंडे, तनुजा गाढवे, रणजित पवार, आदित्य जोशी, राहुल तांदळे, वृषाली नागेश यांची प्रमुख उपस्थिती होती.
या स्पर्धेत पंच म्हणून तनुजा गाढवे, रणजित पवार, राहुल तांदळे, हर्षल मोगरे, राहुल श्रीरामवार, रोहन श्रीरामवार, प्रवीण शिंदे, मनीष थत्तेकर, संतोष साबळे, सोमाजी बालुरे, वृषाली नागेश, दीपाली बजाज, ऋतुजा महाजन, ऋतिका महाजन, दिशा चंदेले, ऋग्वेद जोशी, प्रथमेश हत्तेकर, पुरुषार्थ गरजाले, संदीप उंटवाल, संदेश चिंतलवाड, अविनाश कोळेश्वर यांनी काम पाहिले. बुधवारी ऱ्हिदमिक जिम्नॅस्टिक्स व अॅक्रोबॅटिक्स जिम्नॅस्टिक्स या प्रकारातील स्पर्धा होईल, अशी माहिती जिल्हा जिम्नॅस्टिक्स संघटनेचे सचिव सागर कुलकर्णी यांनी दिली.
अंतिम निकाल (महापालिका) ः १४ वर्षांखालील मुली - मृणाल वासडीकर (गोदावरी पब्लिक स्कूल), २. गौरी जाधव (शांतीनिकेतन पब्लिक स्कूल), ३. राधिका आर्य (मॉडर्न इंग्लिश स्कूल). मुले - १. आर्यन नहाते (ब्लूमिंग बर्ड स्कूल), २. सारंग बीडकर (मुकुल मंदिर), ३. कनिष्क निकाळजे (मिलिंद मल्टिपर्पज स्कूल).
१७ वर्षांखालील मुली - १. मानसी देशमुख (शारदा मंदिर), २. सिद्धी हत्तेकर (शारदा मंदिर), ३. रिद्धी हत्तेकर (शारदा मंदिर). मुले - १. श्रीपाद हराळ (शांतीनिकेतन), २. अथर्व जोशी (पोदार इंटरनॅशनल स्कूल), ३. ऋषिकेश तोनगिरे (मिलिंद).
ग्रामीण विभाग ः १४ वर्षांखालील मुले - १. संस्कृती बोराडे (केंद्रीय विद्यालय), २. अमृता बलांडे (ज्ञानदा इंग्लिश स्कूल), ३. स्वामिनी कुलकर्णी (गायकवाड ग्लोबल अकादमी). मुले - १. साईनाथ जाधव (महाराष्ट्र पब्लिक स्कूल), २. अपूर्व मुंदडा (केंब्रिज स्कूल), ३. आदित्य सिंग (जैन इंटरनॅशनल स्कूल).
१७ वर्षांखालील मुली - १. रिची भंडारी (अग्रसेन विद्यामंदिर), २. मृण्मयी कुलकर्णी (एचपीएल स्कूल), ३. रेणुका रंगदळ (महराष्ट्र स्कूल). मुले - १. निखिल सयाजी (जैन स्कूल), २. श्रेयस शिंदे (जैन स्कूल), ३. गौरव सुलनाने (जैन स्कूल).

मोबाइल अॅप डाउनलोड करा आणि राहा अपडेट

खुलताबाद ठाण्याच्या नव्या इमारतीला तडे

August 22, 2017, 2:30 pm

≫ Next: ‘डीपीआर’वर लेखा परीक्षणात प्रश्नचिन्ह

≪ Previous: मृणाल, मानसी, संस्कृती, रिची विजेत्या

$

0

0

म. टा. प्रतिनिधी, खुलताबाद
सर्वसामान्यांच्या सुरक्षेसाठी सदैव दक्ष असलेले खुलताबाद पोलिस नवीन पोलिस ठाण्याच्या इमारतीमध्ये जीव मुठीत धरून काम करीत आहेत. एक वर्षांपूर्वी बांधलेल्या इमारतीला ठिकठिकाणी तडे गेले आहेत. एका खिडकीचा सज्जा कोसळल्याची घटना मंगळवारी सकाळी उघडकीस आली.
सार्वजनिक बांधकाम विभागामार्फत पोलिस ठाण्याच्या इमारतीचे बांधकाम करण्यात आले. या इमारतीमध्ये मे २०१६ मध्ये पोलिस ठाण्याचे कामकाज सुरू झाले. एक वर्षातच इमारतीला ठिकठिकाणी तडे गेलेले असून दर्शनी भागात असलेल्या एका खिडकीचा सज्जा कोसळला. पोलिस ठाण्याची जुनी निजामकालीन इमारत १०० वर्षानंतरही मजबूत आहे. नवीन इमारतीच्या बांधकामासाठी निकृष्ट दर्जाचे बांधकाम साहित्य वापरल्याचा आरोप होत आहे. इमारतीच्या भिंतींना भेगा पडल्या असून स्लॅपला प्लास्टर न करता रंगरंगोटी करण्यात आलेली आहे. विशेष म्हणजे बांधकाम सुरू असताना २०१६ मध्ये इमारतीच्या पाठीमागे असलेला सज्जा असाच कोसळला होता. बांधकामासाठी अंदाजपत्रकात असलेल्या तरतुदीनुसार साहित्य न वापरता कंत्राटदाराने इमारतीचे हस्तांतरण केले आहे. नवीन इमारतीच्या दुरुस्तीवर एक वर्षातच खर्च करण्याची वेळ आली आहे.

मोबाइल अॅप डाउनलोड करा आणि राहा अपडेट

‘डीपीआर’वर लेखा परीक्षणात प्रश्नचिन्ह

August 22, 2017, 2:30 pm

≫ Next: कुस्त्यांच्या दंगलीत हर्सूलचा सद्दाम विजयी

≪ Previous: खुलताबाद ठाण्याच्या नव्या इमारतीला तडे

$

0

0

महापालिकेला कोट्यावधींचा भुर्दंड
म. टा. प्रतिनिधी, औरंगाबाद
भूमिगत गटार योजनेसाठी तयार करण्यात आलेल्या सविस्तर प्रकल्प अहवालाबद्दल (डीपीआर) लेखा परीक्षण अहवालात अनेक प्रश्न उपस्थित करण्यात आले आहेत. योग्यप्रकारे डीपीआर तयार न केल्यामुळे महापालिकेला कोट्यवधी रुपयांचा भुर्दंड सहन करावा लागत आहे, असे त्यात नमूद करण्यात आले आहे.
भूमिगत गटार योजनेचा सविस्तर प्रकल्प अहवाल फोट्रेस या कंपनीने तयार केला आहे. कंपनीने तयार केलेल्या ‘डीपीआर’बद्दल काही गंभीर आक्षेप लेखा परिक्षण अहवालात आहेत. या योजनेंतर्गत ६० किलोमीटर लांबीच्या मुख्य मलनिःसारण वाहिन्या व २०० किलोमीटर लांबीच्या अंतर्गत वाहिन्या टाकण्याचे नियोजन करण्यात आले होते, परंतु शहरातील भौगोलिक रचनेनुसार व अरुंद रस्त्यांचा विचार करता आवश्यक व्यासाच्या मेनहोलची, तसेच संलग्न बाबींची तरतूद करणे गरजेचे होते. ‘डीपीआर’ तयार करताना याचा विचार करण्यात आला नाही, असे लेखा परीक्षणाच्या वेळी लक्षात आले आहे. डीपीआरमध्ये झालेल्या बदलामुळे ३३ कोटी ६१ लाख रुपयांचा जास्तीचा खर्च महापालिकेला करावा लागणार आहे. त्यामुळे डीपीआर योग्यप्रकारे तयार करण्यात आला नाही, असे स्पष्ट होते असे अहवालात नमूद करण्यात आले आहे.
रेल्वे रुळाखालून मलनिःसारण वाहिन्या टाकण्याचे ‘डीपीआर’मध्ये नमूद करण्यात आले होते. हे काम करताना ‘ट्रेंच लेस’ पद्धतीचा वापर करा, असे रेल्वे विभागाने महापालिकेला कळविले आहे. डीपीआर तयार करताना याचा विचार करण्यात आला नाही का असा सवाल लेखा परिक्षण अहवालात करण्यात आला आहे. ‘ट्रेंच लेस’ पद्धतीने काम करण्यासाठी साडेतीन कोटींचा जास्तीचा खर्च लागणार आहे, असे पालिकेच्या प्रशासनाने कळविले. या जास्तीच्या खर्चाला सर्वसाधारण सभेची मंजुरी घेण्यात आली, परंतु त्यानंतर याच कामासाठी ७ कोटी ८८ लाख रुपये खर्च येणार असल्याचा सुधारित प्रस्ताव सादर करण्यात आला. सुधारित प्रस्तावाला सर्वसाधारण सभेची मान्यता घेऊन प्रत्यक्ष काम सुरू करण्यास वेळ लागणार असल्यामुळे विहित मुदतीत काम होणार तर नाहीच, पण महापालिकेवर आर्थिक बोजा पडणार आहे, असे लेखा परिक्षण अहवालात नमूद करण्यात आले आहे.

मोबाइल अॅप डाउनलोड करा आणि राहा अपडेट

कुस्त्यांच्या दंगलीत हर्सूलचा सद्दाम विजयी

August 22, 2017, 2:30 pm

≫ Next: निम्म्या वर्षानंतर प्रशिक्षण

≪ Previous: ‘डीपीआर’वर लेखा परीक्षणात प्रश्नचिन्ह

$

0

0

म. टा. प्रतिनिधई, फुलंब्री
तालुक्यातील गणोरी येथे सालाबादप्रमाणे यंदाही पोळ्याचा पाडवा मंगळवारी उत्साहात साजरा करण्यात आला. पाडव्यानिमित्त ग्रामदैवतांचे विधीवत पूजन करून सोनगडावर कुस्त्यांची दंगल भरविण्यात आली.
फुलंब्रीच्या ग्रामस्थांनी कुस्त्यांची परंपरा जपली आहे. या स्पर्धेत सामील होण्यासाठी पंचक्रोशीसह जिह्याबाहेरूनही मल्ल आले. यावेळी पाच रुपयांच्या बक्षिसापासून कुस्त्यांना सुरुवात झाली. यावर्षी मुलींच्या दोन कुस्त्या खेळवण्यात आल्या. यात श्रृखंला रत्नपारखी, वर्षा राठोड यांच्यातील सामना श्रृखंला रत्नपारखीने जिंकला. रुपाली वर्देने प्रतीक्षा पवारला मात दिली. मुलांची शेवटची कुस्ती तीन हजार रुपयांची झाली. ही कुस्ती हर्सूल येथील मल्ल सद्दाम पटेल व औरंगाबाद तालुक्यातील नायगाव येथील मल्ल सद्दाम पटेल यांच्यात झाली. या अटीतटीच्या सामन्यात हर्सूल येथील सद्दाम पटेल यांचा विजय झाला. यावेळी पंच म्हणून बापू तांदळे, गणपत तांदळे, प्रभाकर गायकवाड, शंकर उबाळे यांनी काम पाहिले.
याप्रसंगी उपसरपंच बाळू तांदळे, कृषी उत्पन्न बाजार समितीचे संचालक नामदेव काळे, ग्रामपंचायत सदस्य बाबासाहेब तांदळे, शिवाजी तांदळे, अंबादास जाधव, रवींद्र गायकवाड, रामू भादवे, पोलिस पाटील भाऊसाहेब तांदळे, कैलास सोनवणे यांच्यासह ग्रामस्थांची मोठ्या संख्येने उपस्थिती होती.

मोबाइल अॅप डाउनलोड करा आणि राहा अपडेट

---

निम्म्या वर्षानंतर प्रशिक्षण

August 22, 2017, 2:30 pm

≫ Next: ​ १३ तालुक्यांत ‘अपेक्षित’ पाऊस

≪ Previous: कुस्त्यांच्या दंगलीत हर्सूलचा सद्दाम विजयी

$

0

0

म. टा. प्रतिनिधी, औरंगाबाद
सातवी, नववीचा अभ्यासक्रम बदलला पाठ्यपुस्तके विद्यार्थ्यांची हाती आली. जूनमध्ये शाळा सुरू झाल्या, पहिली घटक चाचणीही झाली. अर्धे शैक्षणिक वर्ष संपत आल्यानंतर आता नवीन अभ्यासक्रम कसा शिकवायचा, याचे प्रशिक्षण सातवी वर्गाच्या शिक्षकांना दिले जात आहे. इयत्ता नववीच्या शिक्षकांच्या प्रशिक्षणाचा कार्यक्रमच अद्याप नाही. ऑगस्टपर्यंत प्रशिक्षणच नव्हते, तर एवढे दिवस शिक्षकांनी काय शिकवले? असा प्रश्न उपस्थित केला जात आहे.
सुधारित बदलाच्या अभ्यासक्रमानुसार येत्या शैक्षणिक वर्षापासून इयत्ता सातवी व इयत्ता नववी अभ्यासक्रमांची पाठ्यपुस्तके बदलली. सर्व विषयांमध्ये अमूलाग्र बदल करण्यात आले. शाळा १५ जूनपासून सुरू होताच विद्यार्थ्यांना नवीन पाठ्यपुस्तकेही मिळाली. हा अभ्यासक्रम घोकमपट्टी पद्धतीला दूर करत कृतीयुक्त, उपयोजनात्मक (अॅप्लिकेशन बेस) आहे. त्यात ‘आयसीटी’ विषयाचाही अंतर्भाव आहे. एकीकडे अभ्यासक्रम बदलला, मात्र दुसरीकडे शिक्षकांना नवीन अभ्यासक्रम कसा आहे, तो कसा शिकवायचा याचे प्रशिक्षण प्रशिक्षण महाराष्ट्र विद्या प्राधिकरणाकडून दिले जात आहे. जिल्हा, तालुकास्तरावर माध्यम, विषयनिहाय शिक्षकांना हे प्रशिक्षण दिले जाणार आहे. प्रशिक्षणाचे वेळापत्रक सप्टेंबरपर्यंत चालणार आहे. शैक्षणिक वर्ष अर्धे संपल्यानंतर प्रशिक्षणामुळे आश्चर्य व्यक्त केले जात आहे.

अभ्यासक्रमात मोठे बदल
अभ्यासक्रम हा कृतीयुक्त आणि अॅप्लीकेशन बेस आहे. त्यामुळे शिकविण्याच्या पद्धतीतही बदल शिक्षकांना करावा लागणार आहे. एखाद्या विषयाची संकल्पना समजून सांगायची असेल, तर ती कृतीवर संकल्पना समजविण्यावर भर देण्यात आला आहे. विषयाचे संदर्भ कसे शोधायचे, त्यात तंत्रज्ञानाचा सहभागही आहे. बारकोडही देण्यात आलेले आहे. याबाबत शिक्षकांनाच माहिती नसेल तर ते विद्यार्थ्यांना काय शिकवणार हा प्रश्न आहे. त्यामुळे हे प्रशिक्षण केवळ औपचारिकता ठरण्याची शक्यता आहे.

नववीचे कधी
सातवीसह इयत्ता नववीचा अभ्यासक्रमही बदलला आहे. त्यातील बदल आणि नव्या बदलानुसार अध्यापन, अध्ययन कसे, असावे याबाबत शिक्षकांनाच माहिती नाही. सध्या इयत्ता सातवीच्या शिक्षकांचे प्रशिक्षणाचे वेळापत्रक आले. नववीचे शिक्षकांचे हे प्रशिक्षण कधी होणार आणि त्यानंतर ते विद्यार्थ्यांना शिकवणार कधी असा प्रश्नही उपस्थित केला जात आहे. गणित, विज्ञान, प्रथम भाषा, द्वितीय भाषा, तृतीय भाषा, इतिहास, नागरिकशास्त्र, भूगोल अशा विविध विषयांचे प्रशिक्षण दिले जाते.

मराठवाड्यातील शाळा संख्या ः २१ हजार ७४२
एकूण विद्यार्थी ः ४२ लाख ४० हजार २०३
शिक्षक संख्या ः १ लाख ४० हजार २१४
जिल्ह्यातील शाळा ः ४ हजार ०२७
६ ते ८ उच्च प्राथमिक विद्यार्थी संख्या ः २४ हजार ८०८६
९ ते १० माध्यमिक विद्यार्थी संख्या ः १ लाख ४५ हजार ८३३
शिक्षक संख्या एकूण ः २९ हजार ५८५

मोबाइल अॅप डाउनलोड करा आणि राहा अपडेट

​ १३ तालुक्यांत ‘अपेक्षित’ पाऊस

August 22, 2017, 2:47 pm

≫ Next: ​ धार्मिक स्वातंत्र्य अबाधित ठेवा

≪ Previous: निम्म्या वर्षानंतर प्रशिक्षण

$

0

0

म. टा. प्रतिनिधी, औरंगाबाद
दुष्काळछाया पसरलेल्या मराठवाड्यात दोन दिवस वरुणराजाने कृपादृष्टी केली असली तरी दुष्काळाचे संकट अद्यापही टळले नाही. विभागात अद्यापही ७६पैकी तब्बल ६३ तालुक्यांमध्ये अपेक्षित पाऊस झाला नसल्यामुळे चिंता कायम आहे. सरासरीत पिछाडीवर असलेल्या या तालुक्यांना मोठ्या पावसाची आवश्यकता असताना विभागात केवळ १३ तालुक्यांमध्येच अपेक्षित सरासरीपेक्षा अधिक पाऊस झाला आहे.

एकीकडे निम्मा मराठवाडा पावसाची वाट पाहत असताना असताना नांदेड, बीड, लातूर आणि उस्मानाबाद जिल्ह्यातील काही ‌मंडळांमध्ये नियमित पाऊस सुरु होता. शिवाय १९ आणि २० ऑगस्ट रोजीही या चार जिल्ह्यांत दमदार पाऊस झाल्यामुळे या जिल्ह्यांमधील १२ तालुक्यांमध्ये अपेक्षित सरासरीपेक्षा अधिक पाऊस झाला आहे. उर्वरित एक तालुका औरंगाबाद जिल्ह्यातील आहे.

जून महिन्याच्या प्रारंभी पावसाने दमदार हजेरी लावल्यामुळे अवघ्या १२ दिवसांमध्ये मराठवाड्यातील ७६पैकी ६४ तालुक्यांमध्ये अपेक्षित सरासरी ओलांडली होती, मात्र त्यानंतर पावसाच्या मोठ्या खंडामुळे सर्वच गणित बिघडले. आता मराठवाड्यात पुन्हा एकदा पावसाने दमदार हजेरी लावल्यामुळे आशा पल्लवीत झाल्या आहेत. अद्यापही विभागातील ६९ मंडळांमध्ये निम्माही पाऊस झाला नसल्याची आकडेवारी प्रशासनाकडे आहे. दोन दिवस झालेल्या पावसामुळे काहीसे चित्र बदलले असले तरी चिंता मात्र कायम आहे.

ओलांडली सरासरी
दोन दिवस झालेल्या पावसानंतर १३ तालुक्यांनी अपेक्षित सरासरी ओलांडली असून यामध्ये औरंगाबाद जिल्ह्यातील केवळ खुलताबाद (१२१.७ टक्के) तालुक्याचा समावेश आहे. नांदेड जिल्ह्यातील नांदेड (१२०.१९), मुदखेड (१०९.५९), बीड जिल्ह्यातील बीड (१०८.६३, पाटोदा (१२५.६३), आष्टी (१४७.८४), केज (११२.९), लातूर जिल्ह्यातील लातूर (१०६.९०), रेणापूर (११४.५९), शिरुर अनंतपाळ (१०४.५६) तालुक्यांचा समावेश आहे.

मोबाइल अॅप डाउनलोड करा आणि राहा अपडेट

​ धार्मिक स्वातंत्र्य अबाधित ठेवा

August 22, 2017, 2:49 pm

≫ Next: बडे वीज थकबाकीदार महावितरणच्या रडारवर

≪ Previous: ​ १३ तालुक्यांत ‘अपेक्षित’ पाऊस

$

0

0

म. टा. प्रतिनिधी, औरंगाबाद
तिहेरी तलाकबाबत सर्वोच्च न्यायालयाने दिलेल्या निर्णयाचा आम्ही आदर करतो. आता सरकारने धार्मिक स्वातंत्र्य अबाधित ठेवून कायदा करावा, अशी प्रतिक्रिया मुस्लिम बांधवांनी दिली.

सर्वोच्च न्यायलयाच्या निर्णयाचा आम्ही आदर करतो. या निर्णयामध्ये कायदा करण्याबाबत कोर्टाने काही निर्देश दिलेले आहेत. मुस्लिम पर्सनल लॉ बोर्ड याबाबत काय निर्णय घेणार त्यावर आगामी दिशा ठरविणार आहे. कोर्टात तिहेरी तलाकबाबत पाच न्यायमूर्तींच्या पीठाने हा निकाल दिला आहे. आगामी काळात कोर्टाच्या निर्देशानुसार धार्मिक स्वातंत्र्य अबाधित ठेवून याबाबत कायदा व्हावा. - इम्तियाज जलील, आमदार

कोर्टाचा निकाल आम्ही पूर्ण वाचलेला नाही, मात्र जी माहिती आमच्यापर्यंत आलेली आहे, त्यावरून तलाकबाबत कायदा तयार करण्याचे केंद्र शासनाला निर्देश दिल्याची माहिती मिळाली. तलाकबाबत कायदा तयार करताना या प्रक्रियेत इस्लाम धर्माचे तत्व पाळणारे तसेच मुस्लिम पर्सनल लॉ बोर्डाशी चर्चा करून निर्णय घ्यावा. - मुबशिरा फिरदौस, सदस्य, जमात ए इस्लामी वुमन्स विंग

मुस्लिम समाजात अन्य समाजाच्या तुलनेत तलाक किंवा घटस्फोटाचे प्रमाण कमी आहे. तिहेरी तलाक हा काही देशाचा मुद्दा नाही. हा एका समाजापुरता मर्यादित आहे. अशा मुद्दयांना हवा देवून महागाई, शेतकरी आत्महत्या असे गंभीर मुद्दे बाजूला केले जात आहेत. कोर्टाने जो काही निकाल दिलेला आहे, त्याचा आम्ही आदर करतो. या निकालानंतर कोर्टाच्या आदेशाप्रमाणे कायदा तयार करताना मुस्लिम पर्सनल लॉ बोर्डाशी चर्चा आवश्यक आहे. - मौलाना इलियास फलाही, शहर अध्यक्ष, जमात ए इस्लामी

मोबाइल अॅप डाउनलोड करा आणि राहा अपडेट

बडे वीज थकबाकीदार महावितरणच्या रडारवर

August 22, 2017, 2:52 pm

≫ Next: पैशासाठी मुले पळवणारी टोळी गजाआड

≪ Previous: ​ धार्मिक स्वातंत्र्य अबाधित ठेवा

$

0

0

म. टा. प्रतिनिधी, औरंगाबाद
‘औरंगाबाद आणि जालना जिल्हयात एक लाखापेक्षा जास्त वीज बिल असलेल्या ग्राहकांकडे ३९ कोटींची थकबाकी आहे. ऑगस्ट अखेरपर्यंत यांनी बिल नाही भरल्यास वीज पुरवठा खंडित केला जाईल,’ अशा इशारा मंगळवारी झालेल्या पत्रकार परिषदेत महावितरणचे मुख्य अभियंता सुरेश गणेशकर यांनी दिला.

गणेशकर म्हणाले, ‘वीज चोरी आणि बिल वसुलीसाठी विशेष मोहीम सुरू आहे. या कारवाई अंतर्गत ३२३४ वीज चोऱ्या पकडल्या. तर ५२८ वीज ग्राहकांवर वीज चोरी प्रकरणात गुन्हा दाखल केला. २४७ आकडे बहाद्दरांचे आकडे काढले आहे. ही वीज चोरी रोखल्यामुळे रोज पाच लाखांची वीज बचत होत आहे. एक लाखापेक्षा जास्त वीज बिल असलेल्या ग्राहकांची संख्या औरंगाबादमध्ये दोन हजार ११३ इतकी आहे. मागील पाच ते दहा वर्षांपासून या ग्राहकांकडे बिलाचे पैसे थकले आहेत. त्यांच्यावर कारवाई सुरू केली आहे. तसेच आंबेडकरनगर, सिद्धार्थनगर भागात वीज जोडणी देण्याची मोहीम सुरू आहे. या मोहिमेतंर्गत ३० ग्राहकांचे अर्ज आले आहेत,’ असे गणेशकर म्हणाले.

डीपी दुरुस्ती केंद्राला निधी मिळेना
‘औरंगाबाद आणि जालना जिल्ह्यात चार डीपी दुरुस्ती केंद्र उभारले जाणार होते. एका केंद्राला पन्नास लाखांचा निधी जिल्हा संनियंत्रण समितीमधून देण्यात येणार होता. मात्र, हा निधी न मिळाल्याने जिल्हयातील केंद्राचे काम रखडले आहे. यामुळे ग्रामीण भागातील नादुरुस्त डीपी दुरुस्तीसाठी‌ एजन्सी नेमली आहे,’ असे गणेशकर म्हणाले.

जायकवाडीची कटकट २५ लाखांत होणार बंद
‘जायकवाडी पंप हाउसचा वीज पुरवठा सुरळित करण्यासाठी मंगळवारी महावितरण आणि महापालिका अधिकाऱ्यांनी पंप हाऊसला भेट दिली. या ठिकाणी दोन वीज कनेक्शन देण्यात आले आहेत. एका सबस्टेशनमधून वीज पुरवठा खंडित झाल्यानंतर दुसऱ्या सबस्टेशनचा पुरवठा करण्यासाठी महावितरणाच्या कर्मचाऱ्याला बोलवावे लागते. हा त्रास संपविण्यासाठी २५ लाखांचे आरयूएम (रिंग मेन युनिट) टाकण्याचा प्रस्ताव महावितरणने महापालिकेला दिला आहे,’ असे गणेशकर म्हणाले.

मोबाइल अॅप डाउनलोड करा आणि राहा अपडेट

पैशासाठी मुले पळवणारी टोळी गजाआड

August 22, 2017, 2:54 pm

≫ Next: औरंगाबादला १६ पदके

≪ Previous: बडे वीज थकबाकीदार महावितरणच्या रडारवर

$

0

0

म. टा. प्रतिनिधी, उस्मानाबाद
पैशासाठी मुलांना पळवून नेत मारहाण करून धमक्या देणाऱ्या सराईत गुन्हेगारांच्या टोळीला पकडण्यात उस्मानाबाद पोलिसांना यश आले. हिंगोली येथून शनिवारी सायंकाळी ( १९ ऑगस्ट) गणेश श्रीकृष्ण शिंदे ( वय १८) याला हिंगोली येथून पैसे लाटण्याचा हेतूने पळवून नेण्यात आल्याचा सुगावा उस्मानाबाद पोलिसांना लागला होता. सोमवारी दुपारी उस्मानाबाद जिल्ह्यातील पारगावजवळील रुई येथील हॉटेल विसावा येथे एका कारमधील प्रवाशांचे हॉटेल मालकासोबत भांडण झाले. यावेळी या प्रवाशाने एका मुलाचे अपहरण केल्याचे उघड झाल्याने हॉटेल मालकांनी स्थानिक नागरिकांच्या सहाय्याने या पाच जणांचा पाठलाग करीत पारगावच्या शिवारात पकडून ताब्यात घेऊन पोलिसांच्या स्वाधीन केले.
गणेश शिंदे याचे शनिवारी सायंकाळी या टोळीने हिंगोली येथील स्टेट बँक ऑफ इंडियाच्या एटीएममधून पैसै काढताना ताब्यात घेतले. तेथे त्याला मारहाण करून कारच्या डिग्गीत कोंबण्यात आले. त्याच्याकडील मोबाइल हिसकावून घेऊन त्या मोबाइल मधून त्याला मारहाण केलेले फोटो त्याच्या वडिलांना पाठविले. २ लाखाचा भरणा तातडीने एटीएममध्ये करा, अन्यथा मुलाला मारून टाकण्याची धमकीही दिली. त्यानंतर या टोळीने आदिलाबाद, निजामाबाद, नांदेड, लातूर, कळंब असे फिरवत सोमवारी उस्मानाबादमधील पारगाव गाठले होते.
पारगाव येथे कार पार्किंग करीत असताना हॉटेलचा पाण्यासाठीचा अंथरलेला पाईप फुटला. याच्या नुकसान भरपाईवरून तेथे वादाचा प्रसंग उदभवला. यातूनच हे अपहरणाचे प्रकरण सामोरे आले. सोमवारी दुपारी उस्मानाबाद जिल्ह्यातील पारगावजवळील रुई येथील हॉटेल विसावा येथे एका कारमधील प्रवाशांसोबत हॉटेल चालक श्रीनिवास उंदरे यांचा वाद झाल्याची वार्ता वाशी पोलिसांना मिळाली. या वादात श्रीनिवास उंदरे यांनी त्या कारमधील प्रवाशांकडून कारची चावी हिसकावून घेतली व कारची डिग्गी उघडली असता त्यामध्ये त्यांना एका मुलाच्या हातापायाला बांधून तोंडाला चिकटपटी बांधून ठेवल्याचे दिसून आले. त्यामुळे हॉटेलचालक उंदरे व त्याच्या साथीदारांनी या कारमधील पाच जणांना अडवून ठेवण्याचा प्रयत्न करताच त्यांनी तेथून पळ काढला. दरम्यान, वाशी पोलिसही तेथे पोहचले. त्यांनी स्थानिक नागरिकांच्या सहाय्याने या पाच जणांचा पाठलाग करीत पारगावच्या शिवारात पकडून ताब्यात घेतले. यांनतर त्यांनी हिंगोली येथून पळविलेल्या मुलाची सखोल चौकशी करून त्याच्यावर प्राथमिक औषधोपचार केले. यावेळी गणेशने सर्व वृत्तांत सांगितला.

यावेळी हॉटेलचालक श्रीनिवास उंदरे यांनी दाखविलेल्या हुशारीमुळे व कार्यतत्परतेमुळे शिवाय पोलिस उपअधीक्षक सिद्धेशवर धुमाळ व पोलिस निरीक्षक मोतीराम बगाड यांच्या शीघ्र कारवाईमुळे ही सराईत गुन्हेगारी टोळी पोलिसांच्या हाती लागली. पकडण्यात आलेल्या या टोळीत हृषिकेश महादेव
कोकणे (रा. पारगाव जि. उस्मानाबाद ),रोहित हनुमंत राक्षे व गजानन अंकुश शिंदे (रा.मोशी-आळंदी-पुणे), सुनील देवेंद्र आहेरकर व रामेशवर आपासाहेब तौर
( रा. केलेगाव -आळंदी )यांचा समावेश आहे.
या आरोपीकडून (एम एच २१ व्ही ७२८९) कार, तसेच कोयता ,सिरेंज, सुरा, कात्री, चिकटपटी टेप मोबाइल आदी साहित्य ताब्यात घेण्यात आले. दरम्यान, तपासकामी भ्रमंती करणारे हिंगोली पोलिसांचे पथकही उस्मानाबादेत दाखल झाले असून, चौकशी अंती या गुन्हेगारांना हिंगोली पोलिसांच्या ताब्यात देण्यात येईल अशी माहिती उस्मानाबादचे पोलीस अधीक्षक पंकज देशमुख यांनी दिली. शिवाय या मोहिमेत सहभागी झालेल्या पोलीस अधिकारी व कर्मचाऱ्यांचा सत्कार देशमुख यांचे हस्ते करण्यात आला. हॉटेल चालक श्रीनिवास उंदरे यांचेही यावेळी विशेष कौतुक केले.

मोबाइल अॅप डाउनलोड करा आणि राहा अपडेट