पहिले राज्यस्तरीय श्रमिक साहित्य संमेलन येत्या १० व ११ सप्टेंबर रोजी जालन्यात आयोजित करण्यात आले आहे. प्रसिद्ध साहित्यिक, विचारवंत डॉ. आ .ह. साळुंखे संमेलनाध्यक्ष आहेत. ज्येष्ठ साहित्यिक डॉ. नागनाथ कोत्तापल्ले यांच्या हस्ते संमेलनाचे उद्‍घाटन होणार आहे. पी. साईनाथ, डॉ. रावसाहेब कसबे यांच्यासह अन्य साहित्यिक, विचारवंत उपस्थित राहणार आहेत,अशी माहिती सीटूचे उपाध्यक्ष उद्धव भवलकर यांनी शुक्रवारी पत्रकारांशी बोलताना दिली.
कॉ. प्रभाकर संझगिरी साहित्य नगरी, शगुन मंगल कार्यालय, अंबड नाका, जालना येथे संमेलन आयोजित केले आहे. १० सप्टेंबर रोजी सकाळी साडेआठ वाजता ग्रंथसन्मान मिरवणुकीचे उद्‍घाटन माजी आमदार नरसय्या आडाम हे करणार आहेत. त्यानंतर सकाळी दहा वाजता माजी कुलगुरु डॉ. नागनाथ कोत्तापल्ले यांच्या हस्ते संमलेनाचे उद्‍घाटन होईल. संमेलनाध्यक्ष डॉ. साळुंखे यांच्यासह अखिल भारतीय मराठी साहित्य संमेलनाचे माजी अध्यक्ष वसंत आबाजी डहाके, ज्येष्ठ कादंबरीकार दिनानाथ मनोहर, ज्येष्ठ पत्रकार महावीर जोंधळे उपस्थित राहणार आहेत. संमेलनाच्या दुसऱ्या दिवशी सोमवारी (११ सप्टेंबर) श्रमिक संस्कृतीपुढील आव्हाने या विषयावरील चर्चासत्राने संमेलनाची सांगता होईल. सीटूचे राज्य अध्यक्ष डॉ. डी. एल. कराड यांच्या अध्यक्षतेखाली हे सत्र होणार आहे. या चर्चासत्रात ज्येष्ठ पत्रकार पी. साईनाथ, उत्तम कांबळे, साहित्यिक डॉ. रावसाहेब कसबे, शेतमजूर युनियनचे संस्थापक कुमार शिराळकर उपस्थित राहणार आहेत. अॅड. एम.एच. शेख हे ठराव वाचन करणार असून ज्येष्ठ साहित्यिक किशोर घोरपडे, उर्दू शायर शम्स जालनवी यांचा विशेष गौरव करण्यात येणार आहे.
भरगच्च कार्यक्रम
उद्‍घाटनानंतर ‘कला आणि अभिव्यक्ती स्वातंत्र्यः सद्यःस्थिती’ या विषयावर विचारवंत प्रा. जयदेव डोळे यांच्या अध्यक्षतेखाली परिसंवाद होणार आहे. सायंकाळी साडेपाच वाजता सांस्कृतिक कार्यक्रम व त्यानंतर साहित्यिक रेखा बैजल यांच्या अध्यक्षतेखाली निमंत्रितांचे कविसंमेलन होणार आहे. कादंबरीकार कुमार अनिल यांच्या अध्यक्षतेखाली सोमवारी सकाळी साडेनऊ वाजता ‘श्रमिकांचे मुक्ती लढे आणि मराठी साहित्य’ या विषयावर परिसंवाद होईल. कवी समीक्षक डॉ. मनोहर जाधव यांच्या अध्यक्षतेखाली ‘ग्रामीण कष्टकरी आणि कला साहित्य’ या विषयावर परिसंवाद होणार आहे.
मोबाइल अॅप डाउनलोड करा आणि राहा अपडेट
