म. टा. प्रतिनिधी, औरंगाबाद
डॉ. बाबासाहेब आंबेडकर मराठवाडा विद्यापीठात छत्रपती शिवाजी महाराज यांचा पुतळा उभारण्यास आंबेडकरी पक्ष आणि संघटनांनी पाठिंबा जाहीर केला. दोन समाजातील तेढ टाळण्यासाठी गुरूवारी सुभेदारी विश्रामगृहात झालेल्या बैठकीत हा निर्णय घेण्यात आला. तर जनसंपर्क अधिकारी संजय शिंदे यांचे निलंबन पंधरा दिवसात मागे घेणार आणि अधिसभा निवडणुकीनंतर शिवरायांचा पुतळा उभारणार असल्याचे कुलगुरू डॉ. बी. ए. चोपडे यांनी लेखी आश्वासन दिल्यानंतर मराठा क्रांती मोर्चाच्या समन्वयकांनी नियोजित आंदोलन रद्द केले.
डॉ. बाबासाहेब आंबेडकर मराठवाडा विद्यापीठात छत्रपती शिवाजी महाराज यांचा पुतळा उभारण्याचा निर्णय अत्यंत वादग्रस्त ठरला होता. समर्थक आणि विरोधकांचा दबाव वाढल्यामुळे विद्यापीठात तणाव निर्माण झाला होता. काही आंबेडकरवादी संघटनांनी तीव्र आंदोलन केल्यानंतर मराठा संघटनांनी आंदोलनाची तयारी केली होती. या संघटना शुक्रवारी विद्यापीठावर मोर्चा काढणार असल्यामुळे परिस्थिती चिघळली होती. पोलिस प्रशासनानेही अधिक खबरदारी घेतली होती, मात्र विद्यापीठ प्रशासन आणि आंबेडकरी संघटनांनी समन्वयाने तोडगा काढत हा तिढा मिटवला. आंबेडकरवादी कार्यकर्ते आणि नेत्यांची ज्येष्ठ नेते दिनकर ओंकार यांच्या अध्यक्षतेखाली सुभेदारी विश्रामगृहात गुरुवारी दुपारी चार तास बैठक झाली. या बैठकीत छत्रपती शिवाजी महाराजांच्या पुतळ्याचे समर्थन करण्याचा निर्णय एकमताने घेण्यात आला. डॉ. बाबासाहेब आंबेडकर आणि शिवराय समस्त बहुजनांचे प्रेरणास्त्रोत आहेत, मात्र काही लोकांनी जाणीवपूर्वक दोन महापुरूषांच्या आडून जातीय तेढ वाढवली आहे. हा वाद टाळत आंबेडकरी जनतेने छत्रपती शिवाजी महाराजांच्या पुतळ्याचे समर्थन केले आहे. पुतळ्याचा वाद निर्माण करून दंगली पेटवण्याचे कारस्थान संघ-भाजप, शिवसेना यासारख्या कट्टर उजव्या विचारसरणीच्या पक्ष-संघटनांनी आखले आहे. काँग्रेस व राष्ट्रवादी काँग्रेसचे नेते या वादात हात धुवून घेत असल्याचा आरोप बैठकीत करण्यात आला. आंबेडकरी जनतेचे विद्यापीठाशी भावनिक नाते असून, नामांतर लढ्याच्या जखमा सुकलेल्या नाहीत. अशा परिस्थितीत आंबेडकरी जनतेला भडकावण्याचे काम काही संघटना करीत आहेत. ५७ मोर्चे काढूनही मागण्या मान्य न झालेल्या मराठा समाजाचा रोष सरकारवरून दुसरीकडे वळवण्यासाठी भाजप-सेना वादाला खतपाणी घालत असल्याचे मत कार्यकर्त्यांनी मांडले. मराठा विरुद्ध बौद्ध वाद पेटवण्याचा राजकीय डाव हाणून पाडण्यासाठी दोन्ही समाजाने सामंजस्याची भूमिका घ्यावी, असे आवाहन करण्यात आले.
यावेळी रिपाइंचे (डेमोक्रेटीक) प्रदेश अध्यक्ष रमेश गायकवाड, मुकुंद सोनवणे, साहित्यिक डॉ. ऋषिकेश कांबळे, रिपाइं (ए) श्रावण गायकवाड, रिपब्लिकन सेनेचे जिल्हाध्यक्ष के. व्ही. मोरे, माजी नगरसेवक कृष्णा बनकर, नगरसेवक कैलास गायकवाड, भारिपचे जिल्हाध्यक्ष अमित भुईगळ, माजी पोलिस अधिकारी दौलतराव मोरे, भारतीय महासभेचे अध्यक्ष अशोक कांबळे, भीमसेन कांबळे, प्रा. विजयकुमार घोरपडे, सिद्धार्थ मोकळे, मेघानंद जाधव यांच्यासह आंबेडकरी कार्यकर्ते मोठ्या संख्येने उपस्थित होते.
दरम्यान, मराठा क्रांती मोर्चाचा शुक्रवारचा नियोजित मोर्चा रद्द करण्यात आला आहे. कुलगुरू डॉ. चोपडे यांनी मोर्चा समन्वयकांशी सायंकाळी चर्चा करून मागण्या मान्य केल्या, अशी माहिती समन्वयक किशोर चव्हाण यांनी दिली. येत्या १५ दिवसांत जनसंपर्क अधिकारी संजय शिंदे यांचे निलंबन मागे घेण्यात येईल आणि दोन महिन्यांनंतर शिवरायांच्या पुतळ्याचे काम सुरू होईल, असे चोपडे म्हणाले.
स्मारकाचे काम सुरू करा
विद्यापीठ प्रशासनाने तातडीने नामांतर शहिदांचे स्मारक आणि छत्रपती शिवाजी महाराजांच्या पुतळ्याचे काम सुरू करावे, मात्र यानंतर विद्यापीठ परिसरात कुठल्याही पुतळ्याची स्थापना करण्यात येणार नाही, असा ठराव विद्यापीठाने जाहीर करावा, अशी भूमिका बैठकीचे अध्यक्ष दिनकर ओंकार यांनी मांडली. दोन्ही समाजाने अस्तित्वाचे आणि विकासाचे प्रश्न सोडवण्यास प्राधान्य द्यावे. भावनिक राजकारणात तरूणांना अडकवण्याचा प्रयत्न करणाऱ्या संधीसाधू पक्ष-संघटनांचा धिक्कार करावा, असे आवाहन आंबेडकरी नेते व कार्यकर्त्यांनी केले.
‘एसएफआय’चे समर्थन
डॉ. बाबासाहेब आंबेडकर मराठवाडा विद्यापीठात छत्रपती शिवाजी महाराज यांचा पुतळा उभारण्यास विरोध नाही, मात्र हा मुद्दा अस्मितेचा करून दोन समाजात वितुष्ट पसरवल्यामुळे विद्यार्थ्यांचे नुकसान होत आहे. त्यामुळे समाजविघातक शक्तींनी जातीचे राजकारण विद्यापीठाबाहेर करावे. विद्यापीठात विद्यार्थ्यांच्या भावनांशी खेळू नये, अशी भूमिका स्टुडंट्स फेडरेशन ऑफ इंडियाचे राज्य उपाध्यक्ष सुनील राठोड यांनी मांडली. विद्यापीठात झालेल्या पत्रकार परिषदेत ते बोलत होते. पुतळ्याच्या राजकारणामुळे विद्यापीठातील शैक्षणिक वातावरण कलुषित झाले आहे, असे राठोड म्हणाले. राजकीय हस्तक्षेप रोखण्यात अपयश आल्यामुळे शैक्षणिक वातावरण गढूळ झाले आहे. या प्रकाराला कुलगुरू जबाबदार असल्याचा आरोप ‘एसएफआय’ने केला. यावेळी जिल्हा सचिव अभिमान भोसले, उपाध्यक्ष स्टॅलिन आडे, प्राजक्ता शेटे, सत्यजीत मस्के, लोकेश कांबळे, ओम पुरी, रेखा काकडे आदी उपस्थित होते.
मोबाइल अॅप डाउनलोड करा आणि राहा अपडेट
