‘क्रांतीचे क्षण अनेक येतात, पण ते जिवंत ठेवण्याचे काम श्यामराव बोधनकर व अन्य स्वातंत्र्यसैनिकांनी केले,’ असे प्रतिपादन प्रा. जयदेव डोळे यांनी शनिवारी केले. श्यामराव बोधनकर स्मृती पुरस्काराने महाराष्ट्र टाइम्सचे मुंबई येथील निवासी संपादक श्रीकांत बोजेवार यांचा प्रा. डोळे यांच्या हस्ते गौरव करण्यात आला. यावेळी ते बोलत होते.
व्यासपीठावर स्वातंत्र्यसैनिक श्यामराव बोधनकर स्मृती प्रतिष्ठानचे अध्यक्ष डॉ. प्र. दि. पाटोदेकर, सचिव डॉ. राघवेंद्र चाकूरकर उपस्थित होते. यावेळी प्रा. डोळे म्हणाले, ‘बोधनकर व त्यांच्या सारख्या स्वातंत्र्यसैनिकांनी हैदराबाद मुक्तिसंग्रामाच्या लढ्यातील क्रांतीचे क्षण जिवंत ठेवले. महाराष्ट्राला हेवा वाटावा असाच हा लढा आहे. भारताच्या स्वातंत्र्य संग्रामाचे विस्मरण आता होत आहे, तसे या संग्रामाबद्दल होणार नाही. आम्ही या संग्रामाचा विसर पडू देणार नाही. हैदराबाद मुक्तिसंग्रामाचा लढा राजकीय दृष्ट्या मागे पडला असला, तरी साहित्यात त्याचे स्थान भक्कम आहे. बी. रघुनाथांच्या पुस्तकांमधून त्याची प्रचिती येते. साहित्याने या लढ्याची बऱ्यापैकी दखल घेतली. पत्रकारिता तर सोबत होतीच. धगधगते जिवंत विश्व या निमित्याने आम्हाला ठेव म्हणून मिळाले आहे,’ असा उल्लेख प्रा. डोळे यांनी केला.
डॉ. उर्मिला चाकूरकर व श्रीकांत उमरीकर यांनी श्रीकांत बोजेवार यांची प्रकट मुलाखत घेतली. मुलाखती दरम्यान बोजेवार यांनी विदर्भातील दिग्रस गाव ते मुंबई असा प्रवास उलगडून दाखवला. ‘आई-वडिलांमुळे आपला हा प्रवास यशस्वी झाला. असे आई-बाबा मिळाले हे मी माझे भाग्य समजतो.’ ‘तंबी दुराई’, ‘दोन फुल्ल, एक हाफ’ च्या निर्मितीबद्दलही त्यांनी विविध किस्से सांगितले. ‘आताच्या पिढीत विनोदी लिखाण करताना कुणी दिसत नाही. गंभीर लिखाणात - विनोदी लिखाणात चार - पाच नावेच दिसतात. आपल्याकडे विनोदाला प्रतिष्ठा नाही हे खरे आहे. केवळ साहित्यातच नाही, तर सर्वच बाबतीत खुजेपणा आला आहे.’
श्यामराव बोधनकरांच्या कार्याबद्दल त्यांनी गौरवोदगार काढले. ‘त्यावेळी स्वातंत्र्यसैनिकांची गरज होती. आता ती स्थिती राहिलेली नाही, पण उद्या अशी स्थिती निर्माण झाली, तर अशा व्यक्ती निर्माण होतील,’ असा विश्वास बोजेवार यांनी व्यक्त केला.
शालेय साहित्याचे वाटप
कार्यक्रमात स्वातंत्र्यसैनिक ना. वि. देशपांडे, कमलाबाई चाकूरकर यांचा विशेष सत्कार करण्यात आला. आत्महत्या केलेल्या शेतकऱ्यांच्या पाल्यांना नारायणराव चाकूरकर स्मृती प्रतिष्ठानतर्फे शालेय साहित्याचे वाटप करण्यात आले. कार्यक्रमाचे प्रास्ताविक डॉ. पाटोदकर यांनी केले. डॉ. चाकूरकर यांनी प्रतिष्ठानच्या कार्याची ओळख करून दिली. श्रीकांत उमरीकर यांनी सूत्रसंचालन केले.
मोबाइल अॅप डाउनलोड करा आणि राहा अपडेट
