टीम मटा, औरंगाबाद
मराठवाड्यात सर्वत्र हैदराबाद मुक्तिसंग्राम दिन विविध कार्यक्रमांनी साजरा करण्यात आला. जिल्ह्याच्या ठिकाणी ध्वजवंदनाचा मुख्य शासकीय समारंभ मोठ्या उत्साहात पार पडला. यावेळी हुतात्मा स्मृती स्तंभास पुष्पचक्र अर्पण करून स्वातंत्र्य संग्रामातील हुतात्म्यांना आदरांजली वाहण्यात आली.
नांदेडमध्ये खोतकर यांच्या हस्ते ध्वजारोहण
नांदेड : हैदराबाद मुक्तिसंग्राम दिनाच्या ६९ व्या वर्धापन दिनानिमित्त माता गुजरीजी विसावा उद्यानात ध्वजवंदनाचा मुख्य शासकीय समारंभ मोठ्या उत्साहातपार पडला. यावेळी नांदेड जिल्ह्याचे पालकमंत्री अर्जून खोतकर यांचे हस्ते ध्वजारोहण पार पडले. तत्पूर्वी माता गुजरीजी विसावा उद्यानातील हुतात्मा स्मृती स्तंभास पुष्पचक्र अर्पण करून स्वातंत्र्य संग्रामातील हुतात्म्यांना भावपूर्ण आदरांजली वाहण्यात आली तसेच मानवंदना देण्यात आली.
जिल्हा परिषदेच्या अध्यक्षा शांता पवार, महापौर शैलजा स्वामी, स्वातंत्र्य सैनिक यांच्यावतीने स्वातंत्र्य सेनानी नारायणराव भोगावकर, माजी मुख्यमंत्री व खासदार अशोकराव चव्हाण, आमदार अमर राजुरकर, हेमंत पाटील, डी. पी. सावंत, आमदार अमिता चव्हाण, विशेष पोलिस महानिरीक्षक चिरंजीव प्रसाद, जिल्हाधिकारी अरूण डोंगरे, जिल्हा परिषदेचे मुख्य कार्यकारी अधिकारी अशोक शिनगारे, पोलिस अधीक्षक चंद्रकिशोर मिना, मनपा आयुक्त गणेश देशमुख, गृहरक्षक दलाचे जिल्हा समादेशक तथा अप्पर पोलिस अधीक्षक मंगेश शिंदे उपस्थितीत होते.
‘बलिदानाच्या प्रेरणेतून मराठवाडयाचा विकास’
उस्मानाबाद - हैदराबाद मुक्तिसंग्रामात सहभागी झालेले उस्मानाबाद जिल्ह्यातील स्वातंत्र्यसैनिक आयुष्यभर क्रियाशील राहिले आणि आजही क्रियाशील आहेत. ज्यांनी या स्वातंत्र्य संग्रामात भाग घेतला, अशा सर्व स्वातंत्र्य सैनिकांच्या त्यागाची सदैव जाणीव राहील. मराठवाडा मुक्ती संग्रामातील थोर हुतात्म्यांच्या बलिदानाच्या प्रेरणेमुळे मराठवाड्याचा विकास झाल्याचे प्रतिपादन पालकमंत्री दिवाकर रावते यांनी रविवारी जिल्हाधिकारी कार्यालयाच्या आवारात आयोजित मराठवाडा मुक्ती संग्राम दिनाच्या ६९ व्या वर्धापनादिनाच्या मुख्य ध्वजारोहण कार्यक्रम प्रसंगी केले.
मुख्य शासकीय ध्वजारोहण प्रसंगी दिवाकर रावते बोलत होते. यावेळी जिल्हाधिकारी राधाकृष्ण गमे, आमदार राणाजगजितसिंह पाटील, माजी आमदार ओमराजे निंबाळकर, पोलिस अधीक्षक पंकज देशमुख, मुख्य कार्यकारी अधिकारी आनंद रायते, अतिरिक्त मुख्य कार्यकारी अधिकारी अनुप शेंगुलवार, अतिरिक्त पोलिस अधीक्षक स्वाती भोर, नगराध्यक्ष मकरंद राजेनिंबाळकर, अपर जिल्हाधिकारी अविनाश पाठक, निवासी उपजिल्हाधिकारी राजेंद्र खंदारे, उपजिल्हाधिकारी शिल्पा करमरकर, उपजिल्हाधिकारी प्रभोदय मुळे, उपविभागीय अधिकारी चेतन गिरासे उपस्थित होते.
‘सर्वांगीण विकासासाठी सहकार्य आवश्यक’
हिंगोली : मराठवाडा मुक्ती संग्रामात निजामाच्या हुकूमशाही विरोधात स्वातंत्र्य सैनिकांनी संपुर्ण आयुष्याची आहुती देत मराठवाड्याला निजामांच्या जोखडातून मुक्त केले. त्याची जाणीव ठेऊनच मराठवाड्याच्या सर्वांगीण विकासाकरिता सर्वांचे सहकार्य आवश्यक असल्याचे प्रतिपादन हिंगोली जिल्ह्याचे पालकमंत्री दिलीप कांबळे यांनी केले.
मराठवाडा मुक्ती संग्राम दिनाच्या ६९ व्या वर्धापन दिनानिमित्त देवडा नगर येथील हुतात्मा स्मारक स्मृतिस्तंभ येथे आयोजित करण्यात आलेल्या मुख्य ध्वजारोहण समारंभाप्रसंगी ते बोलत होते. यावेळी जिल्हा परिषदेच्या अध्यक्षा शिवराणी नरवाडे, खासदार राजीव सातव, आमदार तान्हाजी मुटकुळे, नगराध्यक्ष बाबाराव बांगर, जिल्हाधिकारी अनिल भंडारी, जिल्हा पोलिस अधिक्षक अरविंद चावरिया, जिल्हा परिषदेचे मुख्य कार्यकारी अधिकारी डॉ. एच. पी. तुम्मोड यांची उपस्थिती होती.
जालन्यात शहिदांना मानवंदना
म. टा. प्रतिनिधी, जालना
हैदराबाद मुक्ती संग्राम दिनाच्या ६९ व्या वर्धापन दिनानिमित्त टाऊन हॉल येथील स्मृती स्तंभास पुष्पचक्र वाहून जालना जिल्ह्याचे पालकमंत्री बबनराव लोणीकर यांनी हुतात्म्यांना आदरांजली वाहिली. यावेळी पोलिस जवानांनी हवेत बंदुकीच्या तीन फेरी झाडून हुतात्म्यांना मानवंदना दिली. जिल्ह्यात आज सर्वत्र मराठवाडा मुक्तीसंग्राम दिन मोठ्या उत्साहात साजरा करण्यात आला.
शहरातील टाऊन हॉल जवळच्या मराठवाडा मुक्तीसंग्राम स्मृती स्तंभास रविवारी मुख्य शासकीय ध्वजवंदना आणि हुतात्म्यांना आदरांजली अर्पण करण्याचा कार्यक्रम पालकमंत्री बबनराव लोणीकर यांच्या उपस्थितीत पार पडला. यावेळी पालकमंत्री बबनराव लोणीकर यांनी जनतेला उद्देशून शुभेच्छा संदेशही दिला.
याप्रसंगी स्वातंत्र्य सैनिक रामश्वरजी दायमा, सुभद्राबाई शंकरराव देशमुख, आशाबाई मदनलाल चरमरे, प्रभावती गजानन जोशी, जानीबाई माणिकचंद कटारे, प्रयागबाई हरिशचंद्र हावळे, मालनबाई विठ्ठलराव चव्हाण, जाईबाई, खंडेराव खलसे, मालनबाई राजाराम बरवे, राणीरक्षा अब्दुल अजीज खॉ, कांताबाई विश्वंभरराव मिटकर यांचा पालकमंत्र्यांच्या हस्ते शाल व पुष्पगुच्छ देऊन सत्कार करण्यातआला. कार्यक्रमास आमदार राजेश टोपे, जिल्हा परिषदेचे अध्यक्ष अनिरुद्ध खोतकर, उपाध्यक्ष सतीश टोपे, नगराध्यक्षा संगीता गोरंट्याल, माजी आमदार अरविंद चव्हाण, विलास नाईक, जिल्हाधिकारी शिवाजी जोंधळे, जिल्हा पोलिस अधीक्षक रामनाथ पोकळे, जिल्हा परिषदेचे मुख्य कार्यकारी अधिकारी दीपक चौधरी, अपर जिल्हाधिकारी पी. बी. खपले, उपजिल्हाधिकारी (सामान्य प्रशासन) कमलाकर फड, निवासी उपजिल्हाधिकारी राजेश जोशी, उपजिल्हाधिकारी (रोहयो) पाटील, जिल्हा सुचना व विज्ञान अधिकारी रवींद्र पडुळकर, जिल्हा माहिती अधिकारी एस.के. बावस्कर यांच्यासह स्वातंत्र्य सैनिक, पदाधिकारी, अधिकारी, कर्मचारी, पत्रकार व नागरिक मोठ्या संख्येने उपस्थित होते.
‘हुतात्म्यांच्या बलिदानाच्या प्रेरणेमुळे विकास’
लातूर : हैदराबाद मुक्ती संग्रामात निजामाच्या हुकूमशाही विरोधात ज्या थोर विरांनी आपले जीवन समर्पित केले, आपल्या संपुर्ण आयुष्याची आहुती देऊन मराठवाड्यातील सर्व जिल्हे निजामांच्या बंधनातून मुक्त केले. मराठवाडा मुक्ती संग्रामातील थोर हुतात्म्यांच्या बलिदानाच्या प्रेरणेमुळे मराठवाड्याचा विकास झाल्याचे प्रतिपादन कामगार व कौशल्य विकास मंत्री संभाजी पाटील-निलंगेकर यांनी केले.
मराठवाडा मुक्तीसंग्रामाच्या ६९ व्या वर्धापन दिनानिमित्त टाऊन हॉल येथील हुतात्मा स्मारक स्मृतीस्तंभ येथे आयोजित मुख्य शासकीय ध्वाजारोहण कार्यक्रमप्रसंगी ते बोलत होते. यावेळी जिल्हा परिषदेचे अध्यक्ष मिलींद लातुरे, उपाध्यक्ष रामचंद्र तिरुके, जिल्हाधिकारी जी. श्रीकांत, पोलिस अधिक्षक शिवाजी राठोड, अतिरिक्त मुख्य कार्यकारी अधिकारी महेश मेघमाळे, लातूरचे महापौर सुरेश पवार, उपमहापौर देविदास काळे, निवासी उपजिल्हाधिकारी अनंत गव्हाणे, उपजिल्हाधिकारी सुनील यादव उपस्थित होते.
मोबाइल अॅप डाउनलोड करा आणि राहा अपडेट
